បើទោះបីជាប្រឈមនឹងការផ្ទុះឡើងនៃជំងឺកូវីដ-១៩ ក៏ដោយ ក៏គណបក្សប្រជាជនកម្ពុជាដែលកំពុងកាន់អំណាចទំនងជាអាចដណ្តើមបានអសនៈក្រុមប្រឹក្សាឃុំ-សង្កាត់ភាគច្រើន។ ដោយសារគណបក្សតូចៗ និងបក្សប្រឆាំងដែលទើបបង្កើតថ្មី មិនទាន់អាចដំណើរការពេញលេញដើម្បីជ្រើសរើសបេក្ខជនដែលមានសក្តានុពលបាន។
CPP មានប្រៀបក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់នាពេលខាងមុខ |
អ្នកឃ្លាំមើលការបោះឆ្នោតក៏បាននិយាយផងដែរថាការផ្ទុះឡើងនៃជំងឺរាតត្បាតបានផ្តល់ប្រយោជន៍ដល់គណបក្សប្រជាជនកម្ពុជា ដោយសារពួកគេមានមន្ត្រីគណបក្សមូលដ្ឋានដែលកំពុងកាន់ដំណែងស្រាប់ ហើយទំនងជាមិនប៉ះពាល់ដល់ការប្រជែងនោះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបាននិយាយថាដោយមិនមានមទ្ទិលចំពោះគណបក្សចាស់វស្សាមួយនេះក្នុងការទទួលបានជ័យជំនះក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំក្រោយ។
យោងតាមគណៈកម្មាធិការជាតិរៀបចំការបោះឆ្នោត (គ.ជ.ប) ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ដែលជា ការបោះឆ្នោតថ្នាក់ក្រោមជាតិនឹងប្រព្រឹត្តិទៅនៅថ្ងៃអាទិត្យទី ៥ ខែមិថុនាឆ្នាំ ២០២២។
លោក សំ គន្ធាមី នាយកប្រតិបត្តិរបស់អង្គការឃ្លាំមើលការបោះឆ្នោត (NICFEC) បាននិយាយថាការផ្ទុះឡើងនៃជំងឺកូវីដ-១៩ នឹងផ្តល់ផលប្រយោជន៍ដល់គណបក្សកាន់អំណាចក្នុងការបោះឆ្នោតឃុំ-សង្កាត់នាពេលខាងមុខ។
លោកបន្តថា៖ «គាត់ (CPP) កាន់អំណាចស្រាប់។ សមាជិកក្រុមប្រឹក្សាឃុំសង្កាត់ និងមេឃុំជាដើមភាគច្រើនគឺមកពីគណបក្ស (CPP) ដែលប្រជាជនបានស្គាល់រួចទៅហើយ បើទោះបីជាពួកគាត់គ្មានពេលវេលាធ្វើការឃោសនា ក៏ពលរដ្ឋស្គាល់ពួកគេរួចទៅហើយ។ គណបក្សដែលមានអសនៈស្រាប់ក្នុងក្រុមប្រឹក្សាឃុំសង្កាត់គឺមានប្រៀប ឯគណបក្សថ្មីៗ ពលរដ្ឋនៅមិនទាន់ស្គាល់ទេ បើពួកគេមិនបានទៅឃោសនានៅមូលដ្ឋាន ជាពិសេសផ្សព្វផ្សាយអំពីគោលនយោបាយរបស់ខ្លួន»។
លោកបន្ថែមថា៖ «យុទ្ធសាស្ត្ររបស់គណបក្សប្រជាជនកម្ពុជា គឺពួកគាត់មានក្រុមការងារចុះពង្រឹងមូលដ្ឋាន ទី២អាជ្ញាធរ និងក្រុមបឹក្សាឃុំសង្កាត់សុទ្ធសឹងតែមកពីគណបក្សប្រជាជន។ គណបក្សកាន់អំណាចគឺមានលទ្ធភាពច្រើន [ដើម្បីក្រោបក្ដាប់អសនៈ]។ ក្រុមការងាររបស់ពួកគេនៅតែមានលទ្ធភាពចុះទៅមូលដ្ឋាន សួរសុខទុក្ខពលរដ្ឋ។ ពួកគេមានភ្នាក់ងារ និងបណ្ដាញនៅទូទាំងប្រទេស»។
កាលពីម្សិលមិញលោក គង់ មុនីកា ប្រធានគណបក្សឆន្ទៈខ្មែរ (KWP) បានយល់ស្របដោយនិយាយថាដំណើរការនៃការបោះឆ្នោតនឹងផ្តល់អត្ថប្រយោជន៍ច្រើនដល់គណបក្សកាន់អំណាចជាងគណបក្សនយោបាយដទៃទៀត។
លោកបន្តថា៖ «ជាការពិតគ្រប់ការបោះឆ្នោតតែងតែផ្តល់ផលចំណេញដល់CPP ព្រោះទាំងច្បាប់បោះឆ្នោត និងលក្ខខណ្ឌនានាសម្រាប់ដាក់បេក្ខជន ភ្នាក់ងារសង្កេតការណ៌…។ ល។ សុទ្ធតែបង្កការលំបាកដល់គណបក្សនយោបាយផ្សេង»។
ទោះយ៉ាងណា លោក ឥសាន បាននិយាយថាទោះបីគណបក្សប្រជាជនកម្ពុជារំពឹងថានឹងឈ្នះការបោះឆ្នោតឃុំសង្កាត់នាពេលខាងមុខក៏ពិតមែន ក៏ប៉ុន្តែគណបក្សនឹងមិន«ជិះសេះលេងដៃ»នៅថ្នាក់មូលដ្ឋាននោះទេ។
លោកបន្តថា៖ «យុទ្ធសាស្ត្ររបស់គណបក្សប្រជាជនកម្ពុជា គឺនៅតែប្រកាន់ជំហរក្នុងការធ្វើសកម្មភាពល្អ ដើម្បីប្រជាជនដោយស្មោះ ដើម្បីឲ្យប្រជាជនជឿទុកចិត្ត»។
លោកបន្ថែមថាយើងយកចិត្តទុកដាក់ចំពោះសុខុមាលភាពរបស់ប្រជាជន ហើយគណបក្សនឹងមិនលើកលែងដល់មន្ត្រីគណបក្សប្រជាជនមូលដ្ឋានណាមួយដែលរំលោភអំណាចឡើយ។
លោកថា៖ «គណបក្សកំពុងដោះស្រាយបណ្ដើៗហើយ ជាពិសេសរឿងទំនាស់ដីធ្លី យើងបានដោះស្រាយច្រើនករណីហើយ នៅសល់តែចំនួនតិចតួចប៉ុណ្ណោះ»។
អំឡុងពេលនៃសន្និបាតគណៈកម្មាធិការកណ្តាលលើកទី៤២ អាណត្តិទីV នៃគណបក្សប្រជាជនកម្ពុជា លោកនាយករដ្ឋមន្ត្រី ហ៊ុន សែន បានស្នើសុំឲ្យសមាជិកសមាជិកាគណបក្ស ចាប់ផ្តើមរៀបចំខ្លួនសម្រាប់ការបោះឆ្នោតឃុំសង្កាត់នៅឆ្នាំ ២០២២ ។
គណបក្សប្រជាជនកម្ពុជាបានស្នើឲ្យសមាជិកវ័យក្មេងរបស់ខ្លួនរៀបចំសម្រាប់ការបោះឆ្នោតដោយណែនាំឲ្យសមាជិកសមាជិកាគណបក្សទាំងអស់ ខិតខំប្រឹងប្រែងយ៉ាងខ្លាំងដើម្បីធានាបាននូវជ័យជំនះសម្រាប់គណបក្សប្រជាជនកម្ពុជាក្នុងអំឡុងពេលនៃការបោះឆ្នោតឃុំសង្កាត់នាពេលខាងមុខ។
ចាប់តាំងពីការបោះឆ្នោតជាតិឆ្នាំ ២០១៣ នៅពេលដែលគណបក្សប្រជាជនកម្ពុជាបានបាត់បង់អាសនៈរដ្ឋសភាចំនួន ២២ ទៅគណបក្សប្រឆាំង។ លោក ហ៊ុន សែន បានប្រកាសធ្វើកំណែទម្រង់ជាបន្តបន្ទាប់រួមមានការដោះស្រាយអំពើពុករលួយ ការដំឡើងប្រាក់ឈ្នួលរបស់មន្ត្រីរាជការសាធារណៈ និងការធ្វើកំណែទម្រង់វិស័យអប់រំ។
គណបក្សប្រជាជនកម្ពុជាបានអនុវត្តនូវ«អភិក្រមទាំង៥» ដែលរួមមាន«ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ដើម្បីចៀសវាងការធ្វើខុសដែលប៉ះពាល់ដល់ផលប្រយោជន៍ ឬអារម្មណ៍របស់ប្រជាជន។ លោក ឥសាន បានឲ្យដឹងថាថាអភិក្រមទាំង៥ នេះនៅនៅតែបន្តអនុវត្ត។
លោកនិយាយថា៖ «កម្មវិធីនយោបាយរបស់គណបក្សប្រជាជនកម្ពុជានៅដដែល ប៉ុន្តែយុទ្ធសាស្ត្រនឹងមានការផ្លាស់ប្ដូរទៅតាមស្ថានភាព និងដំណាក់កាលនីមួយៗ។ យើងមិនអាចប្រាប់ឥឡូវនេះបានទេ ព្រោះនៅសល់ពេល១ឆ្នាំទៀត ប៉ុន្តែវាមិនខុសពីអាណត្តិមុនប៉ុន្មានទេ»។
លោកបន្តថា៖ «យើងរំពឹងទុកថាគណបក្សរបស់យើងនឹងឈ្នះ ប៉ុន្តែយើងមិនអាចកំណត់អសនៈទុកមុនបានទេ ពីព្រោះវាជាការប្រមាថឆន្ទៈប្រជាពលរដ្ឋ ថាតើយើងនឹងឈ្នះភ្លូកទឹក ភ្លូកដីឬយ៉ាងណា ចាំមើលលទ្ធផលជាក់ស្ដែង»។
ថ្មីៗនេះគណបក្សនយោបាយមួយចំនួនបានអំពាវនាវដល់រដ្ឋាភិបាលឲ្យពន្យារពេលការបោះឆ្នោតឃុំដោយនិយាយថាដោយសារតែជំងឺរាតត្បាតពួកគេមិនមានពេលវេលាគ្រប់គ្រាន់ ដើម្បីពង្រាយបេក្ខជនឲ្យបានទូលំទូលាយដូចដែលបានគ្រោងទុកនោះទេ។
ថ្មីៗនេះ គ.ជ.ប បានជូនដំណឹងដល់គ្រប់ភាគីពាក់ព័ន្ធនិងសាធារណជនអំពីការពន្យារពេលនៃការបោះឆ្នោតសាកល្បងជ្រើសរើសក្រុមប្រឹក្សាឃុំ-សង្កាត់ ឆ្នាំ២០២១ ដោយសារការផ្ទុះឡើងនៃជំងឺកូវីដ-១៩ ក្នុងសហគមន៍ ក៏ដូចជាការប្រជុំពិគ្រោះយោបល់តាមអ៊ិនធរណេតជាមួយភាគីពាក់ព័ន្ធដែលគ្រោងធ្វើនៅថ្ងៃទី ២១ ខែមេសា។
លោក គន្ធាមី បាននិយាយថា៖ «ការស្នើរនេះមានហេតុផលសមរម្យ ព្រោះអ្នកណាក៏គេដឹងពីស្ថានភាពជំងឺកូវីដ-១៩។ ក្នុងច្បាប់ក៏មានចែងពីករណីប្រធានស័ក្តិ ដែលអាចលើកពេលការបោះឆ្នោតបាន។ ជំងឺកូវីតដ ១៩ នៅមិនទាន់ធូរស្រាលនៅឡើយ យើងនៅមានបញ្ហាប្រឈមនៅឡើយ។ បើស្ថានភាពមិនទាន់ធូរស្បើយអ្នកបោះឆ្នោតក៏មិនហ៊ានទៅបោះឆ្នោតដែរ»។
ប៉ុន្តែគណបក្សប្រជាជនកម្ពុជាបានលើកឡើងថាគណបក្សកាន់អំណាចមិនចាប់អារម្មណ៍នឹងការស្នើសុំឲ្យ មានការពន្យារពេលការបោះឆ្នោតឃុំសង្កាត់នាពេលខាងមុខនោះទេ ហើយបានហៅសំណើនោះថាមិនមានលក្ខណៈស្របនឹងរដ្ឋធម្មនុញ្ញ។
លោក ឥសាន ធ្លាប់បាននិយាយថា៖ «ការបោះឆ្នោតត្រូវធ្វើ ៥ ឆ្នាំម្ដងជាទៀងទាត់។ បើគណបក្សនយោបាយទាំងអស់បានទទួលរងគ្រោះដោយសារកូវីត-១៩ ដូច្នេះគណបក្សប្រជាជនកម្ពុជា ក៏ទទួលរងគ្រោះដូចគ្នាដែរ។ ពួកគេមិនអាចធ្វើសកម្មភាព នៅមូលដ្ឋានបាន យើងក៏មិនអាចធ្វើបានដូចគ្នាដែរ»។
Khmertimes/Postkhmer
មតិពីមិត្តអ្នកអាន