សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានអញ្ជើញចូលរួមក្នុងសន្និបាតប្រចាំឆ្នាំលើកទី៧៧របស់ គណៈកម្មការ សេដ្ឋកិច្ច និងសង្គមកិច្ច សម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN-ESCAP) ក្រោមប្រធានបទ “ការស្តារឡើងវិញក្រោយវិបត្តិតាមរយៈកិច្ចសហប្រតិបត្តិការតំបន់នៅក្នុងតំបន់អាស៊ី និងប៉ាស៊ីហ្វិក” ទីក្រុងបាងកក, ថ្ងៃទី ២៦ – ២៩ ខែ មេសា ឆ្នាំ ២០២១តាមរយៈប្រព័ន្ធវីដេអូ។តាមរយៈវីដេអូដែល បានថតទុក នៅរសៀលថ្ងៃទី២៦ខែមេសាសម្តេចតេជោបានមានប្រសាសន៍ថា ក្នុងបរិការណ៍នេះ,ការប្រយុទ្ធប្រឆាំង នឹងជំងឺកូវីដ១៩និងការង្រឹងគុណភាពនិងប្រសិទ្ធភាពនៃប្រព័ន្ធសុខាភិបាលគឺជាការងារអាទិភាពបំផុតសម្រាប់យើងទាំងអស់គ្នា ។
 |
| សម្តេចតេជោៈមានការងារបួនដែលត្រូវយកចិត្តទុកដាក់ក្នុងការស្តារឡើងវិញក្រោយវិបត្តិកូវីដ១៩ |
កម្ពុជាសូមគូសបញ្ជាក់ពីសារសំខាន់ និងភាពបន្ទាន់នៃការបែងចែកនិងប្រើប្រាស់វ៉ាក់សាំង បង្ការជំងឺកូវីដ-១៩ ប្រកបដោយសមធម៌ និងថ្លៃសមរម្យ ជាពិសេស សម្រាប់ប្រទេសកំពុងអភិវឌ្ឍ ។ ជាមួយគ្នានេះ, កម្ពុជាសូមអំពាវនាវដល់ប្រទេសមួយចំនួន កុំប្រមូលទិញវ៉ាក់សាំងលើសតម្រូវការរបស់ខ្លួន (hoarding) និងសូមកុំឱ្យមានការប្រើប្រាស់ វ៉ាក់សាំងជាឧបករណ៍នយោបាយ (vaccine politics) ។
ប្រមុខរាជរដ្ឋាភិបាលបានបញ្ជាក់ទីកាន់អង្គសន្និបាតថា ឆ្លៀតក្នុងឱកាសនេះ,ខ្ញុំសូមលើកឡើងនូវទស្សនៈផ្ទាល់ខ្លួន មួយចំនួន ដែលយើងត្រូវយកចិត្តទុកដាក់ជាពិសេសពាក់ព័ន្ធនឹងការស្តារឡើងវិញក្រោយវិបត្តិ ដូចខាងក្រោម៖
(១).បន្តជំរុញនិងគាំទ្រគោលការណ៍សកលភាវូបនីយកម្មតាមរយៈការបើកចំហពាណិជ្ជកម្មអន្តរជាតិឱ្យកាន់តែទូលំទូលាយ និងគាំទ្រប្រព័ន្ធពហុភាគីនិយមឱ្យកាន់តែខ្លាំងក្លា ព្រមទាំងផ្តល់ភាពអនុ-គ្រោះដល់ប្រទេសកំពុងអភិវឌ្ឍ ដើម្បីធានាថាផលប្រយោជន៍ដែលកើតចេញពីសកលភាវូបនីយកម្មត្រូវបានវិភាជប្រកបដោយសមធម៌ និងប្រសិទ្ធភាព ។
(២).ជំរុញឌីជីថលូបនីយកម្មដោយផ្តល់អាទិភាពដល់ការកសាងរដ្ឋាភិបាលឌីជីថលនិងអភិវឌ្ឍហេដ្ឋារចនាសម្ព័ន្ធគាំទ្រ ព្រមទាំង លើកទឹកចិត្តឱ្យវិស័យឯកជនចាប់យកបច្ចេកវិទ្យាឌីជីថលឱ្យបានទូលំ-ទូលាយដែលនេះនឹងដើរតួជា ជន្ទល់កំណើនសេដ្ឋកិច្ចថ្មី ព្រមទាំងចូលរួមចំណែកលើកកម្ពស់ភាពប្រកួត-ប្រជែង និងជំរុញការធ្វើពិពិធកម្មសេដ្ឋកិច្ច ។
(៣). ជំរុញកសាងភាពធន់ផ្នែកសង្គម ដោយផ្ដោតលើការអភិវឌ្ឍប្រព័ន្ធសុខាភិបាល,លើកកម្ពស់សេវាសុខភាព សាធារណៈ និងប្រព័ន្ធគាំពារសង្គម ទាំងគុណភាព និងវិសាលភាព ដើម្បីត្រៀមខ្លួនឆ្លើយតបទៅនឹងវិបត្តិ ឬហានិភ័យនានា ដែលអាចកើតឡើងជាយថាហេតុនាពេលអនាគត ព្រមទាំងការអភិវឌ្ឍធនធានមនុស្ស ។
 |
| សម្តេចតេជោៈមានការងារបួនដែលត្រូវយកចិត្តទុកដាក់ក្នុងការស្តារឡើងវិញក្រោយវិបត្តិកូវីដ១៩ |
(៤). ជំរុញការអភិវឌ្ឍសហគ្រាសធុនតូច និងមធ្យម ដោយលើកកម្ពស់កិច្ចដំណើរការអាជីវកម្មក្នុងសេដ្ឋកិច្ចផ្លូវការ និងធានាការទទួលបានការគាំទ្រ ទាំងផ្នែកគោលនយោបាយ និងហិរញ្ញប្បទាន ក៏ដូចជាបច្ចេកទេសគ្រប់គ្រង ដើម្បីជំរុញការតភ្ជាប់ទៅនឹងច្រវាក់ផលិតកម្ម និងការបម្រើដល់ឧស្សាហកម្មធំៗ ។ ទន្ទឹមនេះ,បង្កើនការវិនិយោគលើ ហេដ្ឋារចនាសម្ព័ន្ធបៃតងដើម្បីសម្របខ្លួនទៅនឹងការប្រែប្រួលអាកាសធាតុនិងគ្រប់គ្រងគ្រោះធម្មជាតិដើម្បីកសាងភាព ធន់ទៅនឹងវិបត្តិ, ធានាចីរភាព និងបរិយាប័ន្ននៃការអភិវឌ្ឍសង្គម-សេដ្ឋកិច្ច ។
សម្តេចបញ្ជាក់ថា ជារួមកម្ពុជាជឿជាក់ថាការប្រយុទ្ធប្រឆាំងនឹងជំងឺកូវីដ-១៩និងការស្តារឡើងវិញក្រោយវិបត្តិទាមទារ ឱ្យយើងទាំងអស់គ្នាត្រូវឆ្លើយតបជាបន្ទាន់និងប្រកបដោយការទទួលខុសត្រូវដើម្បីដោះស្រាយបញ្ហាប្រឈមទាំងក្នុងក្របខណ្ឌតំបន់ និងសកល ដោយឈរលើស្មារតីសាមគ្គីភាព រួមទាំងកិច្ចសហការនិងការគោរពគ្នាទៅវិញទៅមក។
លោកហ៊ុន សែនបាននិយាយថា៖«ប្រទេសកម្ពុជាសូមបញ្ជាក់ពីសារៈសំខាន់និងភាពបន្ទាន់នៃការចែកចាយនិងការប្រើប្រាស់វ៉ាក់សាំង ប្រកបដោយលក្ខណៈសមធម៌និងមានតំលៃសមរម្យជាពិសេសសម្រាប់ប្រទេសកំពុងអភិវឌ្ឍន៍»។
លោកបានបន្ថែមថា៖«ក្រៅពីនេះ ប្រទេសកម្ពុជាសូមអំពាវនាវដល់បណ្តាប្រទេសមួយចំនួនកុំឲ្យចាក់វ៉ាក់សាំងនេះលើសពីតម្រូវការក៏ដូចជាកុំប្រើវ៉ាក់សាំងជាឧបករណ៍នយោបាយ»។
លោកហ៊ុន សែនបាននិយាយថា ប្រទេសកម្ពុជាជឿជាក់យ៉ាងមុតមាំថាការប្រយុទ្ធប្រឆាំងនឹងជំងឺកូវីដ-១៩ និងការងើបឡើងវិញក្រោយវិបត្ដិ តម្រូវឱ្យប្រទេសទាំងអស់ត្រូវដោះស្រាយបញ្ហាប្រឈមក្នុងតំបន់និងពិភពលោកជាបន្ទាន់ប្រកបដោយស្មារតីទទួលខុសត្រូវ សាមគ្គីភាព ការសហការគ្នានិងការគោរពគ្នាទៅវិញទៅមក ៕
Rasmeinews/Khmertime
មតិពីមិត្តអ្នកអាន