ប្រទេសឡាវវាយតំលៃខ្ពស់ចំពោះការរួមចំណែកនិងតួនាទីរបស់វៀតណាមក្នុងអាស៊ាន

រដ្ឋមន្ត្រីការបរទេសឡាវលោក Saleumsay Kommasith (រូបថត៖ VN+)

វៀតណាមបានបង្ហាញពីសមត្ថភាពរបស់ខ្លួនមិនត្រឹមតែក្នុងការដឹកនាំអាស៊ានប៉ុណ្ណោះទេថែមទាំងសមត្ថភាពរបស់ខ្លួនក្នុងការដោះស្រាយបញ្ហាដែលកំពុងកើតឡើងនៅលើពិភពលោកនិងក្នុងតំបន់ផងដែរ។ នេះជាសក្ខីភាពយ៉ាងច្បាស់លាស់នៃតួនាទីឆ្នើមរបស់វៀតណាមក្នុងនាមជាប្រធានអាស៊ាន ២០២០ ។

នោះគឺជាការអត្ថាធិប្បាយរបស់រដ្ឋមន្ត្រីការបរទេសឡាវលោក Saleumsay Kommasith អំពីការ ចូលរួមចំណែកនិងតួនាទីរបស់ប្រទេសវៀតណាមអស់ពីរយៈពេល ២៥ ឆ្នាំនៃការចូលរួមជាមួយអាស៊ាន ក្នុងឱកាសធ្វើបទសម្ភាសន៍ទៅកាន់អ្នកយកព័ត៌មានទីភ្នាក់ងារសារព័ត៌មានវៀតណាមនៅទីក្រុងវៀងចន្ទន៍ផងដែរ។

អត្ថាធិប្បាយអំពីសារៈសំខាន់នៃការចូលជាសមាជិករបស់វៀតណាមក្នុងអាស៊ានកាលពីថ្ងៃទី ២៨ ខែកក្កដាឆ្នាំ ១៩៩៥ រដ្ឋមន្ត្រីការបរទេសឡាវ លោក Saleumsay Kommasith បានមានប្រសាសន៍ថា បើនិយាយអំពីវិស័យនយោបាយ ការដែលវៀតណាមធ្វើជាសមាជិកភាពក្នុងប្លុកអាស៊ាននាឆ្នាំ ១៩៩៥ បានត្រួសត្រាយផ្លូវសម្រាប់ ប្រទេសផ្សេងទៀតដូចជាឡាវ មីយ៉ាន់ម៉ា និងកម្ពុជា បានចូលរួម ក្នុងសមាគម ដោយនាំអាស៊ានពីសមាគមនៃប្រទេសដែលមានប្រព័ន្ធនយោបាយប្រហាក់ប្រហែលគ្នាដើម្បីក្លាយជាសមាគមនៃប្រទេសសហប្រតិបត្តិការដោយមិនគិតពីភាពខុសគ្នានៃប្រព័ន្ធនយោបាយផងដែរ។

លោកក៏បានមានប្រសាសន៍ថានេះគឺជាអត្ថន័យសំខាន់បំផុតដែលបង្ហាញថាអាស៊ាននៅក្នុងតំបន់អាស៊ី-ប៉ាស៊ីហ្វិកមានការកើនឡើងនូវកិច្ចសហប្រតិបត្តិការនិងភាពស្ថិតស្ថេរក្រោមគោលការណ៍នៃកិច្ចសហប្រតិបត្តិការពហុភាគី និងជួយដល់ទំនាក់ទំនងកិច្ចសហប្រតិបត្តិការពហុភាគីនេះ នាំមកនូវអត្ថប្រយោជន៍ជាក់ ស្តែងដល់បណ្តាប្រទេសក្នុងតំបន់ជាពិសេសសម្រាប់បណ្តាប្រទេសអាស៊ីអាគ្នេយ៍។ លោក Saleumsay Kommasith បន្ថែមទៀតថា ចំណុចនេះមានតួនាទីសំខាន់ណាស់ក្នុងការត្រួសត្រាយផ្លូវសម្រាប់ប្រទេស ឡាវ កម្ពុជា និងមីយ៉ាន់ម៉ាដើម្បីក្លាយជាសមាជិកអាស៊ានដោយជួយអាស៊ានពីជំហររបស់សមាជិក ៦ នាក់ឱ្យក្លាយជាអង្គការមួយដែលមានសមាជិក ១០ ផងដែរ។

រដ្ឋមន្ត្រីការបរទេសឡាវលោក Saleumsay Kommasith (រូបថត៖ VN+)

ទន្ទឹមនឹងនេះលោក Saleumsay Kommasith បានថ្លែងថាក្នុងនាមជាប្រធានអាស៊ានវៀតណាមបានខិត ខំប្រឹងប្រែងលើកកម្ពស់ការរួបរួមសាមគ្គីភាពនិងឯកភាពនៅក្នុងប្លុក។ ហើយនេះពិតជាសំខាន់ណាស់ ព្រោះនៅក្នុងបរិបទបច្ចុប្បន្នបើនិយាយពីអង្គការដែលមានតួនាទីទទួលបានការជឿទុកចិត្តនិងត្រូវបានភាគីជាច្រើនចង់ធ្វើជាដៃគូ អាស៊ានគឺជាអង្គការមួយអន្តរជាតិដែលក្នុងនោះមានប្រទេសជាច្រើននៅលើ ពិភពលោកជាពិសេសប្រទេសមហាអំណាចនិងប្រទេសអភិវឌ្ឍន៍មានបំណងជំរុញនិងពង្រឹងទំនាក់ទំនង។ រដ្ឋមន្រ្តីការបរទេសឡាវបានអះអាងថា៖“ អាចនិយាយបានថាវៀតណាមបានបង្ហាញ សមត្ថភាពមិន ត្រឹមតែក្នុងការនាំមុខអាស៊ានប៉ុណ្ណោះទេថែមទាំងបង្ហាញសមត្ថភាពរបស់ខ្លួនក្នុងការដោះស្រាយបញ្ហាដែលកំពុងកើតឡើងនៅលើពិភពលោកនិងក្នុងតំបន់។ នេះជាការបង្ហាញយ៉ាងច្បាស់ពីតួនាទីឆ្នើមរបស់ វៀតណាមក្នុងនាមជាប្រធានអាស៊ាន ២០២០»។

អំពីកិច្ចសហប្រតិបត្តិការរវាងវៀតណាមនិងឡាវក្នុងក្របខ័ណ្ឌអាស៊ានអស់រយៈពេលជាង ២០ ឆ្នាំមក នេះរដ្ឋមន្រ្តីការបរទេសឡាវបានមានប្រសាសន៍ថា៖“ នៅពេលដែលប្រទេសទាំងពីរមានទំនាក់ទំនង ពិសេសនិងកិច្ចសហប្រតិបត្តិការគ្រប់ជ្រុងជ្រោយឡាវនិងវៀតណាមតែងតែសហការគ្នា និងផ្លាស់ប្តូរ ទស្សនៈគ្នាទៅវិញទៅមក។ ក្រសួងការបរទេសឡាវនិងក្រសួងការបរទេស វៀតណាម តែងតែមាន ការពិគ្រោះយោបល់យ៉ាងជិតស្និទ្ធ។ វៀតណាមចូលជាសមាជិកអាស៊ាន មុនពេលឡាវ ២ ឆ្នាំដូច្នេះឡាវ អាចរៀនសូត្រពីវៀតណាមនូវមេរៀនបទពិសោធន៍ជាច្រើន។ ប្រទេសវៀតណាម ជាផ្ទាល់ខ្លួន ក៏បាន ចែករំលែកជាមួយប្រទេសឡាវនូវបទពិសោធន៍ជាច្រើនអំពីការត្រៀមរៀបចំចូលរួមអាស៊ានក្នុងឆ្នាំ ១៩៩៧ផងដែរ។នាបច្ចុប្បន្ននេះប្រទេសយើងទាំងពីរនៅតែបន្តពិគ្រោះយោបល់គ្នាដោយហើយក្រសួងបរទេសទាំងពីក៏រមានយន្តការសម្របសម្រួលគ្នាយ៉ាងជិតស្និទ្ធទៀតផងដែរ»៕

（បកប្រែដោយ ហេង វុធ្ធី）

（ប្រភពព័ត៌មាន: vietnamplus.vn）