វៀតណាម - កម្ពុជា ជំរុញកិច្ចសហប្រតិបត្តិការ ឆ្ពោះទៅកាន់ការរំលឹកខួប ៦០ ឆ្នាំនៃទំនាក់ទំនងការទូត

អនុរដ្ឋមន្ត្រីការបរទេស Nguyen Manh Cuong ជួបពិភាក្សាការងារជាមួយ ឯកឧត្តម នេត សាវឿន ឧបនាយករដ្ឋមន្ត្រីកម្ពុជា។

ជំនួបនេះបានប្រព្រឹត្តទៅក្នុងក្របខ័ណ្ឌនៃដំណើរទស្សនកិច្ចការងារនៅកម្ពុជារបស់សមមិត្តសមាជិកគណៈកម្មាធិការមជ្ឈិមបក្ស អនុលេខាប្រចាំការនៃគណៈកម្មាធិការបក្ស អនុរដ្ឋមន្ត្រីការបរទេស Nguyen Manh Cuong។

នៅក្នុងជំនួប អនុរដ្ឋមន្ត្រី Nguyen Manh Cuong បានសម្តែងការអបអរសាទរចំពោះសមិទ្ធផលទាំងឡាយដែលព្រះរាជាណាចក្រកម្ពុជាសម្រេចបានក្នុងរយៈពេលកន្លងមក ក្នុងការអភិវឌ្ឍសេដ្ឋកិច្ច-សង្គម និងសមាហរណកម្មអន្តរជាតិ។

លោកបានអះអាងថា វៀតណាមតែងតែយកចិត្តទុកដាក់ និងផ្តល់អាទិភាពខ្ពស់ចំពោះទំនាក់ទំនងភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ យូរអង្វែង និងប្រកបដោយចីរភាពជាមួយកម្ពុជា។

អនុរដ្ឋមន្ត្រី Nguyen Manh Cuong បានវាយតម្លៃថា ទំនាក់ទំនងរវាងប្រទេសទាំងពីរក្នុងរយៈពេលថ្មីៗនេះបានបន្តអភិវឌ្ឍយ៉ាងខ្លាំងក្លា និងជាក់ស្តែង ជាពិសេសគឺក្រោយដំណើរទស្សនកិច្ចផ្លូវរដ្ឋទៅកាន់កម្ពុជារបស់អគ្គលេខាបក្ស ប្រធានរដ្ឋ To Lam កាលពីខែកុម្ភៈ ឆ្នាំ ២០២៦។

ទំនាក់ទំនងនយោបាយ-ការទូតត្រូវបានពង្រឹងតាមរយៈការផ្លាស់ប្តូរគណៈប្រតិភូ និងការជួបប្រាស្រ័យជាន់ខ្ពស់ជាប្រចាំ។ កិច្ចសហប្រតិបត្តិការលើវិស័យការពារជាតិ និងសន្តិសុខបានបន្តពង្រឹង រួមចំណែករក្សាស្ថិរភាព និងសណ្តាប់ធ្នាប់នៅប្រទេសនីមួយៗ។

កិច្ចសហប្រតិបត្តិការសេដ្ឋកិច្ចបន្តជាចំណុចលេចធ្លោ។ ក្នុងរយៈពេល ៨ ខែដើមឆ្នាំ ទំហំពាណិជ្ជកម្មទ្វេភាគីសម្រេចបាន ៨,៧ ពាន់លានដុល្លារអាមេរិក កើនឡើង ៨,៣% បើធៀបនឹងរយៈពេលដូចគ្នាក្នុងឆ្នាំ ២០២៥។

ឯកឧត្តម នេត សាវឿន ឧបនាយករដ្ឋមន្ត្រី បានអបអរសាទរចំពោះជោគជ័យទាំងឡាយរបស់វៀតណាមទាំងលើទិដ្ឋភាពកិច្ចការផ្ទៃក្នុង និងកិច្ចការបរទេសនាពេលកន្លងមក។ ឯកឧត្តមបានសង្កត់ធ្ងន់ថា ការដែលវៀតណាមរក្សាបាននូវកំណើនសេដ្ឋកិច្ចក្នុងកម្រិតខ្ពស់ ក៏នាំមកនូវផលប្រយោជន៍ជាច្រើនសម្រាប់កម្ពុជាផងដែរ តាមរយៈទំនាក់ទំនងពាណិជ្ជកម្ម-វិនិយោគកាន់តែជិតស្និទ្ធរវាងប្រទេសទាំងពីរ។

ឯកឧត្តម នេត សាវឿន ឧបនាយករដ្ឋមន្ត្រី បានសម្តែងនូវការវាយតម្លៃខ្ពស់ចំពោះទំនាក់ទំនងអ្នកជិតខាងមិត្តភាពជាប្រពៃណី ក៏ដូចជាការគាំទ្រ ជួយឧបត្ថម្ភដែលប្រទេសទាំងពីរបានផ្តល់ជូនគ្នាទៅវិញទៅមកឆ្លងកាត់ដំណាក់កាលប្រវត្តិសាស្ត្រនានា។

ឯកឧត្តមបានវាយតម្លៃខ្ពស់ជាពិសេសចំពោះភាពផ្សារភ្ជាប់គ្នារវាងបណ្តាខេត្តជាប់ព្រំដែន និងសកម្មភាពផ្លាស់ប្តូរប្រជាជន និងប្រជាជនរវាងកម្ពុជានិងវៀតណាមក្នុងរយៈពេលថ្មីៗនេះ ដែលស្តែងចេញតាមរយៈកំណើននៃចំនួនភ្ញៀវទេសចរទៅវិញទៅមក និងចំនួនប្រជាជនកម្ពុជាដែលមកពិនិត្យ និងព្យាបាលជំងឺនៅវៀតណាមកាន់តែមានការកើនឡើង។

តាម ឯកឧត្តម នេត សាវឿន ឧបនាយករដ្ឋមន្ត្រី កិច្ចសហប្រតិបត្តិការលើវិស័យផ្សេងៗទៀត ជាពិសេសគឺសេដ្ឋកិច្ច បានបន្តនាំមកនូវផលប្រយោជន៍ជាក់ស្តែងសម្រាប់ប្រជាជន និងសហគ្រាសនៃប្រទេសទាំងពីរ។

ភាគីទាំងពីរបានឯកភាពបន្តសម្របសម្រួលអនុវត្តឱ្យមានប្រសិទ្ធភាពនូវបណ្តាកិច្ចព្រមព្រៀង និងយន្តការសហប្រតិបត្តិការរវាងរដ្ឋាភិបាលទាំងពីរ។

ទន្ទឹមនឹងនោះ វៀតណាមនិងកម្ពុជានឹងរួមគ្នាត្រៀមរៀបចំ និងចាត់តាំងឱ្យបានល្អនូវបណ្តាសកម្មភាពរំលឹកខួប ៦០ ឆ្នាំនៃការបង្កើតទំនាក់ទំនងការទូតក្នុងឆ្នាំ ២០២៧ តាមរយៈនោះរួមចំណែកលើកកម្ពស់ការយល់ដឹង និងការយល់ជ្រួតជ្រាបរបស់ស្រទាប់ប្រជាជននានា ជាពិសេសគឺយុវជនជំនាន់ក្រោយនៃប្រទេសទាំងពីរ អំពីប្រពៃណីសាមគ្គីភាព និងភាពស្អិតរមួតរវាងប្រជាជាតិទាំងពីរ។

ក្នុងថ្ងៃដដែល អនុរដ្ឋមន្ត្រី Nguyen Manh Cuong បានជួបធ្វើការជាមួយ ឯកឧត្តម អ៊ុង រចនា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា ដោយបានផ្លាស់ប្តូរយោបល់លើវិធានការជាច្រើន សំដៅជំរុញទំនាក់ទំនងទ្វេភាគី ក៏ដូចជាកិច្ចសហប្រតិបត្តិការរវាងក្រសួងការបរទេសទាំងពីរនាពេលខាងមុខ៕

ឯកអគ្គរដ្ឋទូត Nguyen Minh Vu៖ ទាញយកផលប្រយោជន៍ពីគ្រប់កាលានុវត្តភាពដើម្បីនាំយុទ្ធជនពលីវិលត្រឡប់មកកាន់មាតុភូមិ យុគសម័យ - នៅក្នុង «ដំណាក់កាលសម្រុកចុងក្រោយ» នៃការងារស្វែងរក និងប្រមូលផ្តុំអដ្ឋិធាតុយុទ្ធជនពលីនៅកម្ពុជា ឯកអគ្គរដ្ឋទូតវៀតណាមប្រចាំនៅកម្ពុជា Nguyen Minh Vu បានអះអាងថា ស្ថានទូតនឹងបន្តរួមដំណើរយ៉ាងជិតស្និទ្ធជាមួយកងកម្លាំងសមត្ថកិច្ច ពង្រីកឱ្យបានជាអតិបរមានូវការគាំទ្រពីភាគីមិត្ត ពង្រីកប្រភពព័ត៌មាន និងធានាសុវត្ថិភាពសម្រាប់បណ្តាក្រុមការងារប្រមូលផ្តុំអដ្ឋិធាតុ ដោយការប្តេជ្ញាចិត្តនាំយកយុទ្ធជនពលីកាន់តែច្រើនបន្ថែមទៀតវិលត្រឡប់មកកាន់ទឹកដីមាតុភូមិ។

ទីក្រុង Ho Chi Minh ចែករំលែកបទពិសោធន៍អភិបាលកិច្ច និងការបំប្លែងឌីជីថល ជាមួយថ្នាក់ដឹកនាំវ័យក្មេង វៀតណាម - ឡាវ - កម្ពុជា យុគសម័យ - នារសៀលថ្ងៃទី ២៤ ខែសីហា ថ្នាក់ដឹកនាំទីក្រុង Ho Chi Minh បានជួបពិភាក្សាការងារជាមួយគណៈប្រតិភូថ្នាក់ដឹកនាំវ័យក្មេងនៃគណបក្សទាំងបី វៀតណាម - ឡាវ - កម្ពុជា ដោយបានផ្លាស់ប្តូរបទពិសោធន៍ស្តីពីការអភិវឌ្ឍសេដ្ឋកិច្ច - សង្គម អភិបាលកិច្ចទីក្រុង ការបំប្លែងឌីជីថល ការអភិវឌ្ឍប្រភពធនធានមនុស្ស និងការងារកសាងបក្ស។

ឌឿងង្វៀន