វៀតណាម - កូរ៉េខាងត្បូង ជំរុញកិច្ចសហប្រតិបត្តិការថាមពលនុយក្លេអ៊ែរ AI និងបច្ចេកវិទ្យាខ្ពស់

ជំនួបពិភាក្សាការងាររវាងរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Vu Hai Quan និងរដ្ឋមន្ត្រីក្រសួងពាណិជ្ជកម្ម ឧស្សាហកម្ម និងធនធានកូរ៉េខាងត្បូង (MOTIR) Kim Jung Kwan។

ការពង្រឹងកិច្ចសហប្រតិបត្តិការលើវិស័យថាមពលនុយក្លេអ៊ែរ

នៅក្នុងក្របខ័ណ្ឌនៃដំណើរទស្សនកិច្ច និងបំពេញការងារនៅកូរ៉េខាងត្បូង និងជប៉ុន នាព្រឹកថ្ងៃទី ៣០ ខែកញ្ញា រដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យា Vu Hai Quan បានបំពេញការងារជាមួយរដ្ឋមន្ត្រីក្រសួងពាណិជ្ជកម្ម ឧស្សាហកម្ម និងធនធានកូរ៉េខាងត្បូង Kim Jung Kwan ដោយបានផ្លាស់ប្តូរយោបល់អំពីកិច្ចសហប្រតិបត្តិការក្នុងបណ្តាវិស័យឧស្សាហកម្មជឿនលឿន ដោយផ្តោតសំខាន់លើថាមពលនុយក្លេអ៊ែរ។

រដ្ឋមន្ត្រី Vu Hai Quan បានឱ្យដឹងថា វៀតណាមបានកំណត់យកថាមពលនុយក្លេអ៊ែរជាទិសដៅអាទិភាពមួយនៅក្នុងយុទ្ធសាស្ត្រអភិវឌ្ឍន៍ និងអនុវត្តថាមពលបរមាណូរហូតដល់ឆ្នាំ ២០៣៥ ចក្ខុវិស័យដល់ឆ្នាំ ២០៥០។ វៀតណាមបានកំណត់គោលដៅកសាងសមត្ថភាពជាតិឱ្យបានរឹងមាំគ្រប់គ្រាន់ ដើម្បីគ្រប់គ្រង និងដំណើរការប្រកបដោយសុវត្ថិភាព ឈានទៅម្ចាស់ការជាបណ្តើរៗលើបច្ចេកវិទ្យា និងអភិវឌ្ឍន៍វិស័យថាមពលនុយក្លេអ៊ែរប្រកបដោយចីរភាព។

រដ្ឋមន្ត្រីបានស្នើឱ្យកូរ៉េខាងត្បូងចែករំលែកបទពិសោធន៍ស្តីពីការកសាងស្ថាប័ន ការគ្រប់គ្រងរដ្ឋ ការរៀបចំស្ថាប័នច្បាប់និយតកម្ម បច្ចេកវិទ្យាថាមពលនុយក្លេអ៊ែរជឿនលឿន ការអភិវឌ្ឍខ្សែច្រវាក់ផ្គត់ផ្គង់ និងឧស្សាហកម្មនុយក្លេអ៊ែរក្នុងស្រុក។ ភាគីទាំងពីរក៏បានយកចិត្តទុកដាក់លើការបណ្តុះបណ្តាលស៊ីជម្រៅ ការអនុវត្តការងារជាក់ស្តែង និងការផ្លាស់ប្តូរវេនកម្មាភិបាល សំដៅអភិវឌ្ឍន៍ធនធានមនុស្សយូរអង្វែង។

រដ្ឋមន្ត្រី Kim Jung Kwan បានឱ្យដឹងថា កូរ៉េខាងត្បូងមានបទពិសោធន៍ប្រមាណ ៤០ ឆ្នាំក្នុងការអភិវឌ្ឍបច្ចេកវិទ្យាថាមពលនុយក្លេអ៊ែរ។ យោងតាមភាគីកូរ៉េខាងត្បូង បច្ចេកវិទ្យា ក្របខ័ណ្ឌគតិយុត្ត-ការគ្រប់គ្រងស៊ីសង្វាក់គ្នា និងការធានាសុវត្ថិភាព គឺជាកត្តាកំណត់ចំនួនបីដែលមានអត្ថន័យយ៉ាងសំខាន់។

កូរ៉េខាងត្បូងបានបង្ហាញនូវបំណងចង់សហការជាមួយវៀតណាមក្នុងវិស័យនេះ ក្នុងនោះរួមមានគម្រោង Ninh Thuan 2 ចាប់តាំងពីការសាងសង់ ការដំណើរការរោងចក្រ ការធានាសុវត្ថិភាព រហូតដល់ការបណ្តុះបណ្តាលធនធានមនុស្ស និងការអភិវឌ្ឍឧស្សាហកម្មឧបត្ថម្ភ។

ភាគីទាំងពីរក៏បានផ្លាស់ប្តូរយោបល់អំពីការអនុវត្ត AI ក្នុងការផលិតផងដែរ។ ភាគីកូរ៉េខាងត្បូងបានឧទ្ទេសនាមនូវគំរូសម្ព័ន្ធភាព MX Alliance ដែលតភ្ជាប់រវាងរដ្ឋាភិបាល សហគ្រាសផលិតកម្ម ក្រុមហ៊ុន AI វិទ្យាស្ថានស្រាវជ្រាវ និងសាកលវិទ្យាល័យនានា សំដៅជំរុញការផ្លាស់ប្តូរ AI នៅក្នុងវិស័យឧស្សាហកម្ម។

ការពង្រីកកិច្ចសហប្រតិបត្តិការ AI ការស្រាវជ្រាវ-អភិវឌ្ឍន៍ (R&D) និងការបណ្តុះបណ្តាលធនធានមនុស្ស

បន្ទាប់ពីជំនួបពិភាក្សាការងារ គណៈប្រតិភូវៀតណាមបានចូលរួមវេទិកាថ្នាក់ដឹកនាំបច្ចេកវិទ្យាព័ត៌មាន និងសារគមនាគមន៍សកលលើកទី ១២ ដែលរៀបចំឡើងដោយក្រសួងវិទ្យាសាស្ត្រ និង ICT កូរ៉េខាងត្បូង សហការជាមួយទីភ្នាក់ងារសង្គមព័ត៌មានជាតិកូរ៉េខាងត្បូង ដោយផ្តោតសំខាន់លើកិច្ចសហប្រតិបត្តិការបរិវត្តកម្ម AI។

លោក Nguyen Khac Lich ប្រធាននាយកដ្ឋានឧស្សាហកម្មបច្ចេកវិទ្យាព័ត៌មាន បានឱ្យដឹងថា វៀតណាមតម្រង់ឆ្ពោះទៅរកការប្រែក្លាយ AI ឱ្យក្លាយជាឧបករណ៍មួយដែលត្រូវបានប្រើប្រាស់ជាប្រចាំនៅក្នុងស្ថាប័នរដ្ឋ សហគ្រាស និងជីវភាពសង្គម។

រហូតដល់ឆ្នាំ ២០៣០ វៀតណាមបានកំណត់គោលដៅឱ្យកម្មាភិបាល មន្ត្រីរាជការ ១០០% ប្រើប្រាស់ AI រៀងរាល់សប្តាហ៍; សហគ្រាស ៦០% អនុវត្ត AI ដើម្បីលើកកម្ពស់ប្រសិទ្ធភាពប្រតិបត្តិការ; អភិវឌ្ឍហេដ្ឋារចនាសម្ព័ន្ធគណនាប្រមាណ ៥០០ MW គំរូភាសាវៀតណាមយ៉ាងហោចណាស់ ៨ វេទិកា AI ប្រើប្រាស់រួមចំនួន ៥ និងបណ្តុះបណ្តាលអ្នកជំនាញ AI កម្រិតខ្ពស់ចំនួន ១០.០០០ នាក់។

វៀតណាមបានស្នើបង្កើនកិច្ចសហប្រតិបត្តិការជាមួយកូរ៉េខាងត្បូងក្នុងការសាកល្បង AI សម្រាប់សេវាសាធារណៈ ការតភ្ជាប់បណ្តាញស្រាវជ្រាវ - សហគ្រាស ការអភិវឌ្ឍហេដ្ឋារចនាសម្ព័ន្ធគណនា និងការកសាងបទដ្ឋានស្តង់ដារធ្វើតេស្តសាកល្បង អភិបាលកិច្ច AI ប្រកបដោយសុវត្ថិភាព និងគួរឱ្យទុកចិត្ត។

នារសៀលថ្ងៃដដែល រដ្ឋមន្ត្រី Vu Hai Quan បានបំពេញការងារជាមួយវិទ្យាស្ថានវិទ្យាសាស្ត្រ និងបច្ចេកវិទ្យាកូរ៉េខាងត្បូង (KIST) ដោយបានស្នើពង្រីកការស្រាវជ្រាវរួមគ្នាក្នុងវិស័យបន្ទះឈីបពាក់កណ្តាលចម្លង, AI, អាគុយ និងការស្តុកទុកថាមពល, សម្ភារជឿនលឿន, បច្ចេកវិទ្យាជីវសាស្ត្រ។

វៀតណាមក៏បានស្នើបង្កើនការប្រើប្រាស់រួមគ្នានូវហេដ្ឋារចនាសម្ព័ន្ធស្រាវជ្រាវ - អភិវឌ្ឍន៍រវាង KIST ជាមួយវិទ្យាស្ថានវិទ្យាសាស្ត្រ និងបច្ចេកវិទ្យាវៀតណាម - កូរ៉េខាងត្បូង (VKIST) ព្រមទាំងបណ្តាវិទ្យាស្ថាន សាកលវិទ្យាល័យក្នុងស្រុក; បញ្ជូនអ្នកស្រាវជ្រាវទៅបំពេញការងារនៅ KIST; បង្កើនការផ្សារភ្ជាប់បណ្តុះបណ្តាលថ្នាក់អនុបណ្ឌិត បណ្ឌិត តាមរយៈ KIST School និងជំរុញគម្រោង VKIST R&D ដំណាក់កាល ២០២៦-២០៣៣។

ប្រធាន KIST លោក Oh Sang Rok បានអះអាងថា VKIST គឺជានិមិត្តរូបនៃកិច្ចសហប្រតិបត្តិការរវាងប្រទេសទាំងពីរ និងបានឱ្យដឹងថា KIST នឹងបន្តគាំទ្រគម្រោងឱ្យអនុវត្តតាមវឌ្ឍនភាព ព្រមទាំងបង្កើនការតភ្ជាប់រវាងវិទ្យាស្ថានស្រាវជ្រាវ និងសហគ្រាស។

នៅក្នុងដំណើរទស្សនកិច្ចនៅ KIST គណៈប្រតិភូវៀតណាមក៏បានស្វែងយល់អំពីការស្រាវជ្រាវនានាស្តីពីបន្ទះឈីបកង់ទិច , មនុស្សយន្តដែលមានរូបរាងដូចមនុស្ស និងការអនុវត្ត AI ក្នុងការស្វែងរកមនុស្សបាត់ខ្លួន ការរកឃើញភ្លើងឆេះព្រៃ និងការឆ្លើយតបនឹងគ្រោះមហន្តរាយ៕

វៀតណាម - កូរ៉េខាងត្បូង៖ ជំរុញកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យា តាមទិសដៅជាក់ស្តែង និងផ្សារភ្ជាប់ជាមួយការអនុវត្តជាក់ស្តែង យុគសម័យ - ក្នុងក្របខ័ណ្ឌនៃដំណើរទស្សនកិច្ចផ្លូវការនៅវៀតណាមរបស់ប្រធានាធិបតីកូរ៉េខាងត្បូង វេទិកាវិទ្យាសាស្ត្រ បច្ចេកវិទ្យា និងនវានុវត្តន៍វៀតណាម - កូរ៉េខាងត្បូង បានឯកភាពលើទិសដៅសហប្រតិបត្តិការសំខាន់ៗជាច្រើន តាមទិសដៅជាក់ស្តែង ដោយផ្សារភ្ជាប់ការស្រាវជ្រាវទៅនឹងការអនុវត្ត។

កម្លាំងចលករខ្លាំងក្លាចំនួន ៤ ដែលជំរុញការផ្លាស់ប្តូររវាងប្រជាជន និងប្រជាជន ចិន - កូរ៉េខាងត្បូង យុគសម័យ - យោងតាមការវាយតម្លៃរបស់សារព័ត៌មាន Global Times ទំនាក់ទំនងចិន - កូរ៉េខាងត្បូង កំពុងមានកម្លាំងចលករយ៉ាងខ្លាំងក្លាចំនួន ៤ ដើម្បីជំរុញការផ្លាស់ប្តូររវាងប្រជាជន និងប្រជាជននៃប្រទេសទាំងពីរ។

វ៉ាន់ណាំ