អនុស្សរណៈនៃការយោគយល់គ្នាលើវិស័យពលកម្មនិងការងារនឹងបង្កើតមូលដ្ឋានសម្រាប់កិច្ចសហប្រតិបត្តិការរវាងភាគីទាំងពីរលើវិស័យអភិវឌ្ឍន៍ធនធានមនុស្សទីផ្សារការងារនិងទីផ្សារការងារសុវត្ថិភាពនិងសុខភាពការងារ ។ល។
អនុរដ្ឋមន្រ្តីក្រសួងការងារ យុទ្ធជនពិការ និងសង្គមកិច្ចវៀតណាម លោក Le Tan Dungនិង អនុរដ្ឋមន្រ្តីក្រសួងការងារ និងពលកម្មរបស់កូរ៉េខាងត្បូង លោក Im Sep Jeong បានចុះហត្ថលេខាលើអនុស្សរណៈនៃការយោគយល់គ្នាមួយ លើវិស័យពលកម្មនិងការងារ នៅរដ្ឋធានីហាណូយ។ (ប្រភព៖ TTXVN)
កាលពីថ្ងៃទី២៨ ខែសីហា ឆ្នាំ២០១៩ ក្រសួងការងារ យុទ្ធជនពិការ និងសង្គមកិច្ចវៀតណាម និងក្រសួងការងារ និងពលកម្មរបស់កូរ៉េខាងត្បូង បានចុះហត្ថលេខាលើអនុស្សរណៈនៃការយោគយល់គ្នាមួយ លើវិស័យពលកម្មនិងការងារ នៅរដ្ឋធានីហាណូយ។
យោងតាមអនុស្សរណៈនៃការយោគយល់គ្នានេះ ក្រសួងទាំងពីរបានកំណត់គោលដៅសម្រាប់រយៈពេល ៥ឆ្នាំខាងមុខ នៃការបង្កើតក្របខ័ណ្ឌសហប្រតិបត្តិការដើម្បីជំរុញសមត្ថភាពផែនការគោលនយោបាយរបស់ពួកគេទាក់ទងនឹងការងារបណ្តុះបណ្តាលវិជ្ជាជីវៈ សុវត្ថិភាព និងអនាម័យ ព្រមទាំងការគ្រប់គ្រងការងារ។
ផ្អែកលើលទ្ធផលជាវិជ្ជមាន នៃកតិកាសញ្ញាសហប្រតិបត្តិការរបស់ពួកគេ ដែលបានចុះហត្ថលេខាកាលពីឆ្នាំ២០០៤ ឆ្នាំ២០០៩ និងឆ្នាំ២០១៣ កន្លងទៅក្រសួងទាំងពីរបានព្រមព្រៀងគ្នាបង្កើតភាពជាដៃគូ រយៈពេលមធ្យម និងវែង ព្រមទាំងពង្រីកការងាររួមគ្នានៅក្នុងវិស័យការងារ និងពលកម្ម។
នៅក្នុងពិធីចុះហត្ថលេខានោះ អនុរដ្ឋមន្រ្តីក្រសួងការងារ យុទ្ធជនពិការ និងសង្គមកិច្ចវៀតណាម លោក Le Tan Dung បាននិយាយថា បន្ទាប់ពីរយៈពេលជិត ៣ទសវត្ស ចាប់តាំងពីប្រទេសទាំងពីរបានបង្កើតទំនាក់ទំនងការទូតមក បច្ចុប្បន្ននេះ កូរ៉េខាងត្បូង គឺជាវិនិយោគិនបរទេសធំជាងគេនៅវៀតណាមដោយមានគម្រោងជាង ៦០០០ ព្រមទាំងបានបង្កើតការងារ និងធានាសុខុមាលភាពដល់កម្មករជាង ៧០០.០០០នាក់។
លោកបាននិយាយបន្ថែមថា នៅក្នុងបរិបទនោះ ថ្នាក់ដឹកនាំរបស់ពួកគេបានយកចិត្តទុកដាក់បន្ថែមទៀតចំពោះកិច្ចសហការការងារទ្វេភាគី។ អនុរដ្ឋមន្រ្តីក្រសួងការងារ និងពលកម្មរបស់កូរ៉េខាងត្បូង លោក Im Sep Jeong បាននិយាយថា ប្រទេសកូរ៉េខាងត្បូងឱ្យតម្លៃខ្ពស់ទៅលើកិច្ចសហប្រតិបត្តិការជាមួយប្រទេសវៀតណាម។
លោកបានបញ្ជាក់ថា ការចុះហត្ថលេខាលើអនុស្សរណៈនៃការយោគយល់គ្នានេះ នឹងជួយឱ្យក្រសួងទាំងពីរពង្រីកភាពជាដៃគូរបស់ខ្លួនបន្ថែមទៀត។ កន្លងមក ក្រសួងទាំងពីរបានចុះហត្ថលេខាលើកិច្ចព្រមព្រៀងស្តីពីការផ្ទៀងផ្ទាត់អ្នកជំនាញកូរ៉េខាងត្បូងមកធ្វើការនៅប្រទេសវៀតណាម នឹងកិច្ចព្រមព្រៀងនៃការអនុវត្តគម្រោងគាំទ្របច្ចេកទេសសម្រាប់ បណ្តាញព័ត៌មានសេវាកម្មការងាររបស់វៀតណាម ដែលមានតម្លៃប្រមាណ ២,៩លានដុល្លារអាម៉េរិក និងកិច្ចព្រមព្រៀងផ្សេងៗទៀត៕
(យោងតាម vietnamplus ប្រែសម្រូលដោយវិច្ឆិកា)
មតិពីមិត្តអ្នកអាន