យុគសម័យ - បន្ទាប់ពីការប្រកួតដ៏ស្វិតស្វាញក្រុមរ៉ូបូតរបស់កម្ពុជាបានផ្តួលក្រុមរ៉ូបូតមកពីប្រទេសថៃ ឈានទៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ប្រកួតរ៉ូបូតលំដាប់អន្តរជាតិលើកទី១៧ (17th ABU Robocon 2018) ដែលបានប្រារព្ធឡើងវៀតណាម នាថ្ងៃទី២៦ ខែសីហា ឆ្នាំ២០១៨។
រូបថត៖ Fresh News
ព្រឹត្តិការណ៍ប្រកួតប្រជែងរ៉ូបូត ABU Robocon 2018 លើកទី១៧ ដែលរៀបចំឡើងនៅខេត្ត Ninh Binh (វៀតណាម) នេះ មានការចូលរួមពីប្រទេសស្ថិតនៅក្នុងតំបន់អាស៊ីប៉ាស៊ីហ្វិកចំនួន១៧ប្រទេស ស្មើនឹង ១៨ក្រុម។ ការប្រកួតនៅឆ្នាំនេះ វៀតណាមទទួលបានចំណាត់ថ្នាក់លេខ១ ប្រទេសចិនលេខ២ ហើយកម្ពុជានិង ជប៉ុនទទួលបានលេខ៣។
ក្រុមរ៉ូបូតកម្ពុជា ក្រៅទទួលបានពានរង្វាន់ចំណាត់ថ្នាក់លេខ៣ទៅ ក៏ទទួលបានពានរង្វាន់កិត្តិយសពីក្រុមហ៊ុន Panasonic ផងដែរ។
ការប្រកួតឆ្នាំ២០១៨នេះ គឺជាឆ្នាំទី២ ដែលកម្ពុជាបានបញ្ជូនក្រុមរ៉ូបូតរបស់ខ្លួនចូលរួម បន្ទាប់ពីឆ្នាំ២០១៧កន្លងទៅបានចូលរួមប្រកួតនៅប្រទេសជប៉ុន។ ក្រុមរ៉ូបូតកម្ពុជា ដែលចូលរួមការប្រកួត 17th ABU Robocon 2018 នៅវៀតណាមនាឆ្នាំនេះ តំណាងដោយវិទ្យាស្ថានបច្ចេកវិទ្យាកម្ពុជា បន្ទាប់ពីបានជ័យលាភីលេខ១ ក្នុងការប្រកួតប្រជែងរ៉ូបូតថ្នាក់ជាតិ ដែលរៀបចំឡើងដោយអគ្គនាយកដ្ឋានទូរទស្សន៍ជាតិកម្ពុជា៕
（យោងតាម Fresh News）
