សហព័ន្ធស្រូវអង្ករកម្ពុជា (CRF) បានចុះអនុស្សារណៈនៃការយោគយល់គ្នាស្តីពិព័រណ៍នាំចូលចិនអន្តរជាតិ (CIIE) ដោយសង្ឃឹមក្នុងការស្វែងរកឱកាសពាណិជ្ជកម្មវិនិយោគបន្ថែមទៀតដើម្បីលើកកម្ពស់វិស័យស្រូវអង្កររបស់កម្ពុជា។
សហព័ន្ធស្រូវអង្ករកម្ពុជា និងធនាគារចិនបានឯកភាពគ្នាថានឹងប្រើប្រាស់កម្លាំងរៀងៗខ្លួន ដើម្បីពង្រឹងសម្ព័ន្ធភាពយុទ្ធសាស្ត្រឱ្យកាន់តែស៊ីជម្រៅថែមទៀត
អនុស្សរណៈនេះត្រូវបានចុះហត្ថលេខាដោយលោក សុង សារ៉ន ប្រធានសហព័ន្ធស្រូវអង្ករកម្ពុជា និងធនាគារចិន (ហុងកុង) អិលធីឌី សាខាភ្នំពេញ (BOC) ដែលតំណាងដោយលោក Liu Zheng។
លោកបាននិយាយថា៖ «ក្នុងនាមជាដៃគូយុទ្ធសាស្ត្រនៃពិព័រណ៍នាំចូលចិនអន្តរជាតិ (CIIE) លើកទី ៣ BOC ទទួលស្គាល់ CRF ថាជាសមាគមធុរកិច្ចសំខាន់មួយនៅកម្ពុជា ជាមួយនឹងគុណសម្បត្តិនៃការមានសមាជិកក្រុមហ៊ុនជាច្រើន»។
លោកមានប្រសាសន៍ថា លោកនឹងណែនាំសមាជិកសាជីវកម្មទៅ BOC យ៉ាងសកម្ម ដោយមានបំណងចូលរួមក្នុង CIIE សម្រាប់សមាជិករបស់ CRF ដើម្បីទទួលបានឱកាសក្នុងពាណិជ្ជកម្មសកលនិងពង្រីកអាជីវកម្ម។
លោកបន្តថា អនុស្សារណៈយោគយល់គឺជាគោលការណ៍សំខាន់មួយ ដើម្បីជួយសម្រួលបន្ថែមទៀតដល់ការអនុវត្តគម្រោង CIIE ដែលក្នុងនោះ CRF និង BOC បានឯកភាពគ្នាក្នុងការបង្កើនកម្លាំងរៀងៗខ្លួន ដើម្បីពង្រឹងសម្ព័ន្ធភាពយុទ្ធសាស្ត្រមួយបន្ថែមទៀត។
យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការនាំចេញអង្កររបស់ប្រទេសកម្ពុជាបានកើនឡើង ៣១,០៥ ភាគរយស្មើនឹង ៤៤៨ ២០៣ តោនក្នុងរយៈពេល ៨ ខែដំបូងនៃឆ្នាំនេះ។
ប្រទេសចិននៅតែជាទីផ្សារឈានមុខគេសម្រាប់ការនាំចេញអង្កររបស់កម្ពុជា ដែលមានប្រមាណ ១៥៩ ២៥៣ តោនក្នុងរយៈពេល ៨ ខែដំបូង បន្ទាប់មកគឺប្រទេសបារាំងដែលមានចំនួន ៥៦ ៩៦៤ តោន។ ទោះយ៉ាងណា នៅក្នុងបណ្តាប្រទេសអាស៊ាន ម៉ាឡេស៊ីបាននាំចូលប្រហែល ២៣ ២០១ តោនពីកម្ពុជា វៀតណាម ១២ ៨៣៦ តោន និងព្រុយណេ ១០ ៥០០ តោន។
យោងតាមសេចក្ដីជូនដំណឹងរបស់ ពិព័រណ៍នាំចូលចិនអន្តរជាតិ (CIIE) ពិព័រណ៍នាំចូលចិនអន្តរជាតិ (CIIE) លើកទី ៣ នឹងត្រូវធ្វើឡើងតាមការគ្រោងទុកចាប់ពីថ្ងៃទី ៥-១០ វិច្ឆិកានៅទីក្រុងសៀងហៃ ប្រទេសចិន។
លោកបន្ថែមថា៖ «សហព័ន្ធស្រូវអង្ករកម្ពុជា (CRF) រំពឹងយ៉ាងមុតមាំថានឹងចូលរួមយ៉ាងសកម្មនៅក្នុងព្រឹត្តិការណ៍នេះ ក៏ដូចជាដើម្បីលើកកម្ពស់ម៉ាកអង្កររបស់កម្ពុជានៅលើឆាកអន្តរជាតិ។ ហើយក៏កំពុងស្វែងរកឱកាសអាជីវកម្មបន្ថែមទៀតនៅក្នុងវិស័យស្រូវអង្ករ និងវិស័យពាក់ព័ន្ធពីព្រឹត្តិការណ៍នេះ» ។
លោកថា វិស័យនេះត្រូវការថវិកាប្រមាណ ៣០០ លានដុល្លារ ដើម្បីទិញស្រូវក្នុងឆ្នាំនេះ ដើម្បីឈានដល់គោលដៅនាំចេញ ៨០០ ០០០ តោន។
លោកថ្លែងទៀតថា៖ «ជាមួយនឹងគោលដៅនាំចេញអង្ករ ៨០០ ០០០ តោនក្នុងឆ្នាំនេះ រដ្ឋាភិបាលត្រូវការចាក់បញ្ចូលចន្លោះពី ៨០ លានដុល្លារទៅ ១០០ លានដុល្លារ ខណៈដែលវិស័យឯកជនត្រូវការទុនបំរុងប្រហែល ២០០ លានដុល្លារ»។
លោកបានបន្ថែមថា ទាំងវិស័យរដ្ឋ និងឯកជន ក៏ត្រូវបញ្ចូលថវិកាបន្ថែមទៀតដើម្បីឈានដល់គោលដៅចុងក្រោយចំនួន ១ លានតោន៕
（សរុបដោយសាមេត）
មតិពីមិត្តអ្នកអាន