ការលើកកម្ពស់សមភាពក្នុងការទទួលបានការថែទាំសុខភាពនៅវៀតណាម

វៀតណាម-កម្ពុជា សហការគ្នាអភិវឌ្ឍន៍វិស័យទេសចរណ៍ក្នុងការថែទាំសុខភាព

វេជ្ជបណ្ឌិតវៀតណាមផ្សព្វផ្សាយអំពីការថែទាំសុខភាពបន្តពូជសម្រាប់ស្ត្រីស៊ូដង់ខាងត្បូង

ការលើកកម្ពស់សមភាពក្នុងការទទួលបានការថែទាំសុខភាពនៅវៀតណាម

នាថ្ងៃទី ២០ ខែកក្កដា នៅទីក្រុងហាណូយ ក្រសួងសុខាភិបាល និងកម្មវិធីអភិវឌ្ឍន៍អង្គការសហប្រជាជាតិ (UNDP) ប្រចាំនៅវៀតណាមបានរួមគ្នារៀបចំសិក្ខាសាលាព័ត៌មានស្តីពីលទ្ធផលនៃការអនុវត្តកម្មវិធីពិគ្រោះយោបល់តាមទូរស័ព្ទនៅកម្រិតសុខភាពមូលដ្ឋានដោយប្រើកម្មវិធី “វេជ្ជបណ្ឌិតសម្រាប់គ្រប់គេហដ្ឋាន”។

ការអនុវត្តកម្មវិធីប្រកបដោយភាពច្នៃប្រឌិតនេះបានផ្លាស់ប្តូរការចូលប្រើសេវាថែទាំសុខភាពដោយផ្តល់សិទ្ធិអំណាចដល់អ្នកជំងឺក្នុងការជ្រើសរើស និងកក់ការណាត់ជួបជាមួយអ្នកជំនាញថែទាំសុខភាពតាមពេលវេលាសមស្របបំផុត។

ប្រជាពលរដ្ឋដែលត្រូវការការពិនិត្យ និងព្យាបាលអាចទទួលបានការព្យាបាលទាន់ពេលវេលាពីស្ថានីយ៍សុខភាពឃុំ ដោយមានការណែនាំពីវេជ្ជបណ្ឌិតនៅកម្រិតខ្ពស់ តាមរយៈការតភ្ជាប់អ៊ីនធឺណិតដោយប្រើកម្មវិធី "វេជ្ជបណ្ឌិតសម្រាប់គ្រប់គេហដ្ឋាន"។

វិធីសាស្រ្តនេះមិនត្រឹមតែកាត់បន្ថយថ្លៃដើមសម្រាប់អ្នកជំងឺនៅពេលទទួលសេវាព្យាបាលពីចម្ងាយប៉ុណ្ណោះទេ ថែមទាំងពង្រឹងសមត្ថភាពបុគ្គលិកសុខាភិបាលនៅមណ្ឌលសុខភាពឃុំ លើកកម្ពស់ប្រព័ន្ធថែទាំសុខភាពដែលបត់បែនជាងមុន។

ចែករំលែកនៅក្នុងសិក្ខាសាលា លោកស្រី Ramla Khalidi អ្នកតំណាង UNDP ប្រចាំនៅវៀតណាមបានសង្កត់ធ្ងន់ថា UNDP ដាក់អាទិភាពខ្ពស់លើការជួយឧបត្ថម្ភផែនទីផ្លូវនៃការផ្លាស់ប្តូរឌីជីថលជាតិរបស់វៀតណាមដល់ឆ្នាំ ២០២៥និងចក្ខុវិស័យដល់ឆ្នាំ ២០៣០ រួមទាំងការផ្លាស់ប្តូរឌីជីថលក្នុងវិស័យសុខាភិបាលផងដែរ។

តំណាង UNDP បន្ថែមថា បច្ចុប្បន្ន UNDP កំពុងធ្វើការជាមួយក្រសួងសុខាភិបាល ខេត្ត និងដៃគូផ្សេងទៀតក្នុងប្រទេសវៀតណាម ដើម្បីកៀងគរធនធានបន្ថែមទៀត ដើម្បីគាំទ្រការពង្រីកទៅកាន់ខេត្តកាន់តែច្រើន និងបន្តបង្កើតក្របខ័ណ្ឌច្បាប់ និងគោលនយោបាយសម្រាប់វិស័យវេជ្ជសាស្ត្រទូរគមនាគមន៍។

ថ្លែងមតិ អនុរដ្ឋមន្ត្រីក្រសួងសុខាភិបាល លោក Tran Van Thuan បានអះអាងថា ក្រសួងសុខាភិបាលនឹងបន្តសម្របសម្រួលជាមួយ UNDP ដើម្បីកៀងគរធនធាន ដើម្បីអនុវត្តកម្មវិធីបំប្លែងឌីជីថលសុខភាព, បំពេញ​គោលដៅ​នៃ​កម្មវិធី​ជនបទ​ថ្មី និង​​ជនបទ​ជឿនលឿន​ថ្មី​ក្រោម​ការគ្រប់គ្រង​របស់​ក្រសួងសុខាភិបាល, ឆ្ពោះទៅការគ្រប់គ្រងសុខភាពប្រជាជនក្នុងបរិយាកាសឌីជីថល និងបន្តផ្តល់អាទិភាពដល់សកម្មភាពកសាងសមត្ថភាពសម្រាប់កម្រិតសុខភាពមូលដ្ឋាន។

"វេជ្ជបណ្ឌិតសម្រាប់គ្រប់គេហដ្ឋាន" ត្រូវបានអនុវត្តន៍តាំងពីឆ្នាំ ២០២០។ រហូតមកដល់ពេលនេះ ដំណើរការអនុវត្តបានឆ្លងកាត់ពីរដំណាក់កាលគឺ ការអភិវឌ្ឍន៍កម្មវិធី និងការធ្វើតេស្តនៅខេត្ត Ha Giang, Bac Kan និង Lang Son ពីឆ្នាំ ២០២១ ដល់ឆ្នាំ ២០២២។ ដោយផ្អែកលើលទ្ធផលវិជ្ជមាន និងមេរៀនដែលទទួលបានពីដំណាក់កាលដំបូងនេះ ដំណាក់កាលទី ២ ត្រូវបានអនុវត្តនៅក្នុងខេត្តចំនួន ៥ គឺ Thua Thien Hue, Quang Ngai, Binh Dinh, Dak Lak និង Ca Mau។

ចាប់តាំងពីខែវិច្ឆិកា ឆ្នាំ ២០២២ កម្មវិធី "វេជ្ជបណ្ឌិតសម្រាប់គ្រប់គេហដ្ឋាន" ត្រូវបានដំឡើង និងដាក់ឱ្យប្រើប្រាស់នៅមណ្ឌលសុខភាពខេត្ត ស្រុក និងឃុំចំនួន ១,៤០៣ នៅក្នុងខេត្តចំនួន ៥ ដែលឧបករណ៍ទាំងអស់នេះត្រូវបានភ្ជាប់យ៉ាងរលូនជាមួយមជ្ឈមណ្ឌលទិន្នន័យរបស់ក្រសួងសុខាភិបាល។

កម្មវិធីនេះក៏បានបង្កើតបន្ទប់ពិគ្រោះ និងព្យាបាលជំងឺពីចម្ងាយនៅស្ថានីយ៍សុខភាពឃុំដែលមានហានិភ័យខ្ពស់ចំនួន ៧៥ ដោយបំពាក់នូវកុំព្យូទ័រលើតុ កាមេរ៉ាបណ្ដាញ មីក្រូហ្វូន និងឧបករណ៍បំពងសំឡេងខាងក្រៅចំនួន ៧៥ ឈុត ដែលមានគុណភាពល្អ ដើម្បីធានាបាននូវសេវាពិនិត្យ និងពិគ្រោះព្យាបាលពីចម្ងាយប្រកបដោយប្រសិទ្ធភាព៕

ឌឹកអាញ់

Thoidai.com.vn