វៀតណាម មិនទាន់កត់ត្រាករណីឆ្លងវីរុស Hanta បំប្លែងថ្មី Andes នៅឡើយទេ

វៀតណាម បង្កើនការត្រួតពិនិត្យ និងបង្ការជំងឺ

នារសៀលថ្ងៃទី ១៣ ខែឧសភា នាយកដ្ឋានបង្ការជំងឺ (នៃក្រសួងសុខាភិបាល) បានចេញលិខិតបន្ទាន់ផ្ញើជូនបណ្ដាអង្គភាពមានសមត្ថកិច្ច និងមន្ទីរសុខាភិបាលតាមមូលដ្ឋាននានា អំពីការបង្កើនការត្រួតពិនិត្យ និងម្ចាស់ការដាក់ឱ្យអនុវត្តវិធានការបង្ការ និងទប់ស្កាត់ជំងឺដែលពាក់ព័ន្ធនឹងវីរុស Hanta បន្ទាប់ពីអង្គការសុខភាពពិភពលោក (WHO) បានផ្ដល់ព័ត៌មានអំពីចង្កោមករណីជំងឺនៅលើនាវាទេសចរណ៍អន្តរជាតិ MV Hondius។

តាមព័ត៌មានចុងក្រោយពី WHO នៅលើនាវា MV Hondius ដែលកំពុងធ្វើដំណើរពីប្រទេសអាហ្សង់ទីន ទៅកាន់ Cape Verde (ប្រទេសដីកោះនៅឆ្នេរសមុទ្រអាហ្វ្រិកខាងលិច) បានកត់ត្រាករណីអ្នកជំងឺចំនួន ០៨ នាក់ ក្នុងនោះមាន ០៣ នាក់បានស្លាប់។ លទ្ធផលធ្វើតេស្តបានបញ្ជាក់ថា មានករណីឆ្លងវីរុស Hanta ចំនួន ០៦ ករណី ដែលសុទ្ធតែពាក់ព័ន្ធនឹងវីរុសបំប្លែងថ្មី Andes (ANDV)។

នាយកដ្ឋានបង្ការជំងឺបានឱ្យដឹងថា រហូតមកដល់ពេលនេះ មិនទាន់មានការកត់ត្រាថាមានប្រជាពលរដ្ឋវៀតណាមណាម្នាក់ ពាក់ព័ន្ធនឹងចង្កោមករណីជំងឺនៅលើនាវា MV Hondius នោះទេ។ ទន្ទឹមនឹងនោះ តាមរយៈការពិនិត្យឡើងវិញនូវទិន្នន័យវិទ្យាសាស្ត្រដែលមានស្រាប់ វៀតណាមក៏មិនទាន់បានរកឃើញករណីជំងឺដែលបង្កឡើងដោយវីរុសបំប្លែងថ្មី Andes ដែរ។ ទោះជាយ៉ាងណាក៏ដោយ ដើម្បីម្ចាស់ការបង្ការគ្រោះថ្នាក់នៃការជ្រៀតចូលនៃជំងឺ បណ្ដាមូលដ្ឋានចាំបាច់ត្រូវបង្កើនការត្រួតពិនិត្យនៅតាមច្រកទ្វារព្រំដែន និងមូលដ្ឋានពិនិត្យ និងព្យាបាលជំងឺ; ជំរុញអនាម័យបរិស្ថាន ការបាញ់ថ្នាំសម្លាប់មេរោគលើមធ្យោបាយដឹកជញ្ជូន; ត្រួតពិនិត្យសត្វកកេរ និងអនុវត្តវិធានការបង្ការ និងទប់ស្កាត់ជំងឺឱ្យស្របតាមស្ថានភាពជាក់ស្តែង។

តាមនាយកដ្ឋានបង្ការជំងឺ ជំងឺបង្កដោយវីរុស Hanta មិនមែនជាបញ្ហាថ្មីទាំងស្រុងក្នុងការងារត្រួតពិនិត្យរោគរាតត្បាតនៅវៀតណាមនោះទេ។ ការសិក្សាមួយចំនួននាពេលកន្លងមក ធ្លាប់បានកត់ត្រានូវភស្តុតាងពាក់ព័ន្ធនឹងវីរុស Hanta បំប្លែងថ្មីផ្សេងៗ ឬវីរុសដែលរកឃើញលើសត្វ ប៉ុន្តែមិនទាន់កត់ត្រាវីរុសបំប្លែងថ្មី Andes នៅឡើយទេ។

ក្រសួងសុខាភិបាលបានផ្ដល់អនុសាសន៍ដល់ប្រជាពលរដ្ឋ កុំឱ្យមានការភ័យស្លន់ស្លោ ឬបកស្រាយដោយស្មាននូវគ្រោះថ្នាក់នៃការរីករាលដាលជំងឺក្នុងសហគមន៍ នៅពេលមិនទាន់មានសេចក្តីសន្និដ្ឋានជាផ្លូវការពីស្ថាប័នជំនាញ។ ប្រជាពលរដ្ឋចាំបាច់ត្រូវតាមដានព័ត៌មានពីប្រភពផ្លូវការ និងម្ចាស់ការអនុវត្តវិធានការបង្ការជំងឺ។ វិធានការដែលបានណែនាំរួមមាន៖ រក្សាអនាម័យបរិស្ថាន បោសសម្អាតកន្លែងស្នាក់នៅ និងកន្លែងធ្វើការជាប្រចាំ រក្សាទុកអាហារឱ្យមានសុវត្ថិភាព បិទភ្ជិតនូវរន្ធប្រហោងនានាដែលអាចបង្កលក្ខណៈងាយស្រួលឱ្យសត្វកណ្ដុរចូល និងសកម្មក្នុងការកំចាត់សត្វកណ្ដុរ ដើម្បីកាត់បន្ថយគ្រោះថ្នាក់នៃការចម្លងជំងឺពីសត្វកកេរមកមនុស្ស។

បណ្ដាអ្នកដំណើរនៅលើនាវាទេសចរណ៍ ត្រូវបានជម្លៀសចេញនៅកោះ Tenerife នៃប្រទេសអេស្ប៉ាញ នាថ្ងៃទី ១០ ខែឧសភា។

វិស័យសុខាភិបាលក៏បានកត់សម្គាល់ដល់ប្រជាពលរដ្ឋផងដែរថា មិនត្រូវបោសស្ងួត ឬបូមធូលីដោយផ្ទាល់នៅតំបន់ដែលមានលាមក ឬទឹកនោមសត្វកណ្ដុរឡើយ; ចាំបាច់ត្រូវធ្វើឱ្យសើមនូវតំបន់ដែលមានការបំពុលមុនពេលធ្វើអនាម័យ និងបង្កើនការលាងសម្អាតដៃឱ្យបានញឹកញាប់។

ក្នុងករណីបន្ទាប់ពីបានប៉ះពាល់ជាមួយសត្វកណ្ដុរ សំណល់របស់សត្វកណ្ដុរ ឬតំបន់ដែលមានស្នាមដានសត្វកកេរ ហើយលេចចេញនូវរោគសញ្ញាដូចជា ក្តៅខ្លួន ឈឺសាច់ដុំ អស់កម្លាំង រំខានដល់ប្រព័ន្ធរំលាយអាហារ ក្អក ណែនទ្រូង ឬពិបាកដកដង្ហើម ប្រជាពលរដ្ឋត្រូវទៅកាន់មូលដ្ឋានសុខាភិបាលជាប្រញាប់ ដើម្បីទទួលការពិនិត្យ ពិគ្រោះយោបល់ និងព្យាបាលឱ្យបានសមស្រប ព្រមទាំងជម្រាបជូនឱ្យបានច្បាស់អំពីប្រវត្តិនៃការប៉ះពាល់។

WHO៖ គ្រោះថ្នាក់នៃវីរុស Hanta នៅវៀតណាមបច្ចុប្បន្នស្ថិតក្នុងកម្រិតទាប

តាមអង្គការសុខភាពពិភពលោក (WHO) គ្រោះថ្នាក់នៃជំងឺបង្កដោយវីរុស Hanta ចំពោះសហគមន៍សកលលោក រួមទាំងវៀតណាមផងនោះ បច្ចុប្បន្ននៅតែត្រូវបានវាយតម្លៃថានៅក្នុងកម្រិតទាប។ បណ្ឌិត Jennifer Horton ប្រធានស្ដីទីតំណាង WHO ប្រចាំនៅវៀតណាម បានឱ្យដឹងថា ការផ្ទុះឡើងនាពេលនេះ គឺស្ថិតក្នុងរង្វង់កំណត់នៃនាវាទេសចរណ៍មួយប៉ុណ្ណោះ ហើយមិនទាន់មានការកត់ត្រាថាមានជនជាតិវៀតណាមណាម្នាក់នៅលើនាវានោះឡើយ។ ទោះជាយ៉ាងណាក៏ដោយ ព្រឹត្តិការណ៍នេះបង្ហាញឱ្យឃើញថា ជំងឺឆ្លងនៅតែអាចឆ្លងកាត់ព្រំដែនជាតិ ប្រសិនបើមិនមានការត្រួតពិនិត្យ និងឆ្លើយតបឱ្យបានទាន់ពេលវេលា។

បណ្ឌិត Jennifer Horton ប្រធានស្ដីទីតំណាងអង្គការសុខភាពពិភពលោក (WHO) ប្រចាំនៅវៀតណាម។

បច្ចុប្បន្ន អង្គការនេះនៅតែបន្តស៊ើបអង្កេតរកប្រភពចម្លងនៃចង្កោមករណីជំងឺ។ សម្មតិកម្មដំបូងបានឱ្យដឹងថា ករណីដំបូងអាចឆ្លងវីរុសក្នុងអំឡុងពេលប៉ះពាល់ជាមួយបរិស្ថាន ឬសត្វកណ្ដុរដែលមានផ្ទុកមេរោគ នៅពេលចូលរួមក្នុងសកម្មភាពទេសចរណ៍ក្រៅផ្ទះមុនពេលឡើងនាវា។ បន្ទាប់មក ការចម្លងក្នុងកម្រិតកំណត់ពីមនុស្សទៅមនុស្ស អាចនឹងកើតមានឡើងក្នុងលក្ខខណ្ឌនៃការប៉ះពាល់ជិតស្និទ្ធ និងអូសបន្លាយពេលនៅលើនាវា។ ជាមួយគ្នានោះ WHO ក៏បានផ្ដល់អនុសាសន៍ឱ្យកុំបកស្រាយស្មានអំពីប្រភពចម្លងចេញពីអាហារ ទឹកផឹក ឬពីខ្លួននាវាផ្ទាល់ នៅពេលមិនទាន់មានសេចក្តីសន្និដ្ឋានចុងក្រោយនៃការស៊ើបអង្កេត។

ចំពោះក្រុមអ្នកប៉ះពាល់ដែលមានគ្រោះថ្នាក់ខ្ពស់ WHO ផ្ដល់អនុសាសន៍ឱ្យមានការតាមដានដោយម្ចាស់ការ និងធ្វើចត្តាឡីស័កនៅផ្ទះ ឬមូលដ្ឋានដែលសមស្របក្នុងរយៈពេល ៤២ ថ្ងៃ បន្ទាប់ពីការប៉ះពាល់។ រីឯក្រុមដែលមានគ្រោះថ្នាក់ទាប មិនចាំបាច់ធ្វើចត្តាឡីស័កឡើយ ប៉ុន្តែត្រូវតាមដានសុខភាពដោយខ្លួនឯង និងទៅពិនិត្យជំងឺនៅពេលលេចចេញរោគសញ្ញា រួមមាន ឈឺក្បាល វិលមុខ រងាញាក់ ក្តៅខ្លួន ឈឺសាច់ដុំ និងការរំខានដល់ប្រព័ន្ធរំលាយអាហារដូចជា ចង្អោរ ក្អួត រាគ និងឈឺពោះ។ ករណីខ្លះអាចលេចចេញនូវអាការៈក្អក ណែនទ្រូង ឬពិបាកដកដង្ហើម។

តាម WHO បណ្ដាការិយាល័យនៃអង្គការនេះនៅតាមប្រទេសនានា កំពុងសម្របសម្រួលយ៉ាងជិតស្និទ្ធជាមួយអ្នកជំនាញក្នុងតំបន់ និងទីស្នាក់ការកណ្ដាល ដើម្បីដាក់ឱ្យអនុវត្តការវាយតម្លៃគ្រោះថ្នាក់ជាបន្ទាន់ ផ្ដល់ការណែនាំបច្ចេកទេសដល់បណ្ដាប្រទេសជាសមាជិក និងជួយឧបត្ថម្ភដល់ការបញ្ជូនអ្នកដំណើរពីនាវា MV Hondius ត្រឡប់ទៅប្រទេសវិញ តាមនីតិវិធីសុខាភិបាលយ៉ាងតឹងរ៉ឹង។

បណ្ឌិត Jennifer Horton បានសង្កត់ធ្ងន់ថា ដូចជាបណ្ដាការផ្ទុះឡើងនៃជំងឺឆ្លងដទៃទៀតដែរ ការរកឃើញករណីជំងឺឱ្យបានឆាប់រហ័ស ការធ្វើចត្តាឡីស័កអ្នកជំងឺឱ្យបានទាន់ពេលវេលា ការតាមដានយ៉ាងដិតដល់នូវអ្នកប៉ះពាល់ផ្ទាល់ និងការអនុវត្តឱ្យបានពេញលេញនូវវិធានការបង្ការ និងត្រួតពិនិត្យការឆ្លងមេរោគ គឺដើរតួនាទីយ៉ាងសំខាន់ក្នុងការកាត់បន្ថយគ្រោះថ្នាក់នៃការរីករាលដាលជាបន្តបន្ទាប់៕

កម្ពុជាព្យាយាមទប់ស្កាត់ជំងឺ SARS-CoV-2 បំប្លែងថ្មី មុនចូលឆ្នាំខ្មែរ នៅថ្ងៃទី ២៩ ខែមីនា ក្រសួងសុខាភិបាលកម្ពុជា បានអនុវត្តឡើងវិញនូវបទប្បញ្ញត្តិស្តីពីការធ្វើតេស្តរហ័សរកវីរុសកូវីដ-១៩ សម្រាប់ពលករខ្មែរដែលត្រឡប់មកពីប្រទេសថៃ។

វៀតណាមរៀបចំជាបន្ទាន់នូវផែនការបង្ការជំងឺរាតត្បាតដើម្បីឆ្លើយតបនឹងវិរុសកូវីដ១៩​បំប្លែងថ្មី តាមនោះ លោកនាយករដ្ឋមន្ត្រីបានតម្រូវឲ្យរដ្ឋមន្ត្រីក្រសួងសុខាភិបាល បន្តតាមដានយ៉ាងសកម្មនូវស្ថានភាពជំងឺរាត ត្បាតដែលបណ្តាលមកពីវីរុសបំប្លែងថ្មី Omicron ឈរលើអនុសាសន៍របស់អង្គការសុខភាពពិភពលោក ត្រូវរៀបចំផែនការជាបន្ទាន់លើវ៉ាក់សាំង ថ្នាំព្យាបាល និងវិធានការបង្ការប្រយុទ្ធប្រឆំាងជំងឺរាតត្បាត ឲ្យសមស្របតាមការបំប្លែងថ្មីនៃវីរុស SARS-CoV-2។

ឌឹកអាញ់

thoidai.com.vn