កាលានុវត្តភាពអភិវឌ្ឍន៍ទេសចរណ៍វប្បធម៌ តាមរយៈកម្មវិធី “ព្រៃព្រឹក្សាជួបសមុទ្រខៀវ”

ក្នុងឆ្នាំ២០២៦ ខេត្ត Gia Lai មានកិត្តិយសត្រូវបានជ្រើសរើសឱ្យធ្វើជាម្ចាស់ផ្ទះនៃឆ្នាំទេសចរណ៍ជាតិ ២០២៦ ក្រោមប្រធានបទ “ព្រៃព្រឹក្សាជួបសមុទ្រខៀវ”។ នេះគឺជាកាលានុវត្តភាពមាស ដើម្បីណែនាំនូវរូបភាពថ្មីនៃខេត្ត Gia Lai ដែលត្រូវបានបង្កើតឡើងនៅលើមូលដ្ឋាននៃការតភ្ជាប់យ៉ាងជិតស្និទ្ធរវាងតំបន់ពីរដែលសម្បូរទៅដោយអត្តសញ្ញាណ គឺខេត្ត Binh Dinh និងខេត្ត Gia Lai។ ការតភ្ជាប់នេះបើកនូវលំហអភិវឌ្ឍន៍អន្តរតំបន់ដ៏វិសេសវិសាល បង្កើតបានជាភាពទាក់ទាញដោយឡែកសម្រាប់ទេសចរណ៍ក្នុងតំបន់។

ការអភិរក្ស និងលើកកម្ពស់យ៉ាងពេញលេញនូវរាល់តម្លៃស្នូលរបស់មូលដ្ឋាន

នៅក្នុងសន្និសីទផ្សព្វផ្សាយទេសចរណ៍ខេត្ត Gia Lai ក្នុងក្របខ័ណ្ឌនៃពិព័រណ៍ទេសចរណ៍អន្តរជាតិវៀតណាម (VITM Hanoi 2026) ដែលត្រូវបានរៀបចំឡើងចាប់ពីថ្ងៃទី៩ ដល់ថ្ងៃទី១២ ខែមេសា ឆ្នាំ២០២៦ នៅទីក្រុងហាណូយ លោកស្រី Do Thi Dieu Hanh - ប្រធានមន្ទីរវប្បធម៌ កីឡា និងទេសចរណ៍ខេត្ត Gia Lai បានមានប្រសាសន៍ថា ឆ្នាំ២០២៦ គឺជាចំណុចរបត់ពិសេសដ៏សំខាន់ ដែលបើកនូវដំណាក់កាលអភិវឌ្ឍន៍ថ្មីរបស់ខេត្ត ផ្សារភ្ជាប់ជាមួយនឹងការអនុវត្តរាល់សេចក្តីសម្រេចចិត្តធំៗរបស់មជ្ឈិម និងមូលដ្ឋាន។ នេះគឺជាមូលដ្ឋានគ្រឹះដើម្បីសម្រេចបាននូវរាល់ការរំពឹងទុកនៃការអភិវឌ្ឍក្នុងសម័យកាលថ្មី ដែលក្នុងនោះ ទេសចរណ៍ត្រូវបានកំណត់ថាជាសសរស្តម្ភដ៏សំខាន់មួយ។

ខេត្ត Gia Lai ចូលរួមផ្សព្វផ្សាយទេសចរណ៍ នៅពិព័រណ៍ទេសចរណ៍អន្តរជាតិវៀតណាម។

ភ្លាមៗបន្ទាប់ពីពិធីបើកឆ្នាំទេសចរណ៍ជាតិ ២០២៦ ខេត្ត Gia Lai ទទួលបាននូវប្រសិទ្ធភាពផ្សព្វផ្សាយយ៉ាងទូលំទូលាយ ដែលបញ្ជាក់ពីសក្ដានុពល និងបង្កើតសន្ទុះយ៉ាងសំខាន់សម្រាប់វិស័យទេសចរណ៍របស់ខេត្តឱ្យមានការឈានលោតយ៉ាងខ្លាំងក្លានានាពេលខាងមុខ។ យោងតាមទិន្នន័យ ក្នុងត្រីមាសទី១ ឆ្នាំ២០២៦ ខេត្ត Gia Lai បានទទួលភ្ញៀវទេសចរចំនួន ៤,២ លាននាក់ កើនឡើង ១៤% បើធៀបនឹងរយៈពេលដូចគ្នានៃឆ្នាំមុន។ ក្នុងនោះ ភ្ញៀវអន្តរជាតិសម្រេចបាន ៦៤.៩០០ នាក់ កើនឡើងយ៉ាងគំហុករហូតដល់ ៧២%; ភ្ញៀវក្នុងស្រុកសម្រេចបាន ៤,១ លាននាក់ កើនឡើង ១៣,៧%។ ចំណូលសរុបពីវិស័យទេសចរណ៍ប៉ាន់ស្មានសម្រេចបាន ៨.៧១០ ពាន់លានដុង កើនឡើង ១៧%។

ភាពទាក់ទាញរបស់ខេត្ត Gia Lai ត្រូវបានបញ្ជាក់តាមរយៈទស្សនវិជ្ជានៃការតភ្ជាប់នៃប្រធានបទឆ្នាំទេសចរណ៍ជាតិ ដែលជាការរួមបញ្ចូលគ្នាយ៉ាងសុខដុមរមនារវាងធម្មជាតិ វប្បធម៌ និងលំហអភិវឌ្ឍន៍។ អញ្ជើញមកដល់ Gia Lai ភ្ញៀវទេសចរអាចទទួលបាននូវបទពិសោធន៍ក្នុងដំណើរដ៏វិសេសវិសាល ចាប់ពីលំហវប្បធម៌គងឃ្មុំតំបន់ Tây Nguyên - ជាបេតិកភណ្ឌវប្បធម៌អរូបីនៃមនុស្សជាតិ - រហូតដល់តម្លៃលក្ខណៈពិសេសនៃតំបន់ឆ្នេរសមុទ្រ។

ក្នុងឆ្នាំទេសចរណ៍ជាតិ ២០២៦ ខេត្ត Gia Lai បានកំណត់គោលដៅទទួលភ្ញៀវទេសចរឱ្យបាន ១៥ លាននាក់ ចំណូលសរុបជាង ៣៥.០០០ ពាន់លានដុង ឆ្ពោះទៅរកការប្រែក្លាយវិស័យទេសចរណ៍ឱ្យទៅជាវិស័យសេដ្ឋកិច្ចមុខព្រួញនៅឆ្នាំ២០៣០។ ដើម្បីសម្រេចបាននូវគោលដៅដែលបានកំណត់ ការងារផ្សព្វផ្សាយ និងជំរុញទេសចរណ៍ត្រូវបានចាត់ទុកថាដើរតួនាទីយ៉ាងសំខាន់។

ដោយជ្រាបច្បាស់ថា សក្ដានុពលដ៏ធំធេងត្រូវតែដើរទន្ទឹមគ្នាជាមួយនឹងយុទ្ធសាស្ត្រអភិវឌ្ឍន៍ដ៏សមស្រប ថ្នាក់ដឹកនាំខេត្ត Gia Lai បានកំណត់នូវទស្សនវិជ្ជា xuyên suốt (ដែលជាស្នូល) គឺ៖ “វប្បធម៌ជាគ្រឹះ - ធម្មជាតិជាកម្លាំង - មនុស្សជាមជ្ឈមណ្ឌល”។ តាមលោកស្រី Do Thi Dieu Hanh បានឱ្យដឹងថា ខេត្ត Gia Lai ជ្រើសរើសផ្លូវនៃការអភិវឌ្ឍប្រកបដោយចីរភាព ដោយមិនដេញតាមការរីកចម្រើនក្នុងតម្លៃណាក៏ដោយ ដើម្បីអភិរក្ស និងលើកកម្ពស់យ៉ាងពេញលេញនូវរាល់តម្លៃស្នូលរបស់មូលដ្ឋាន។

ការប្រែត្លាយកាលានុវត្តភាពឱ្យទៅជាកម្លាំងចលករនៃកំណើនទេសចរណ៍ជាក់ស្តែង

ក្នុងការវាយតម្លៃអំពីសក្ដានុពលរបស់ខេត្ត Gia Lai លោក Vu The Binh - ប្រធានសមាគមទេសចរណ៍វៀតណាម បានលើកឡើងថា មូលដ្ឋានកំពុងស្ថិតក្នុងពេលវេលាដ៏អំណោយផលដើម្បីឈានលោតយ៉ាងខ្លាំងក្លា ជាពិសេសនៅពេលត្រូវបានជ្រើសរើសឱ្យធ្វើជាម្ចាស់ផ្ទះនៃឆ្នាំទេសចរណ៍ជាតិ។ ទោះជាយ៉ាងណាក៏ដោយ ដើម្បីប្រែក្លាយកាលានុវត្តភាពឱ្យទៅជាកម្លាំងចលករនៃកំណើនជាក់ស្តែង ខេត្ត Gia Lai ចាំបាច់ត្រូវអភិវឌ្ឍផលិតផលទេសចរណ៍ថ្មីៗឱ្យបានឆាប់រហ័ស ដើម្បីឱ្យទាន់នូវនិន្នាការទីផ្សារ។

ក្នុងនោះ តាមលោក Vu Thế Bình ទេសចរណ៍វប្បធម៌ត្រូវតែត្រូវបានកំណត់ថាជាមូលដ្ឋានគ្រឹះស្នូល ពីព្រោះនេះគឺជាកត្តាដែលបង្កើតបានជាអត្តសញ្ញាណដោយឡែក។ ខេត្ត Gia Lai បច្ចុប្បន្នកំពុងកាន់កាប់ “អណ្តូងរ៉ែមាស” វប្បធម៌ ជាមួយនឹងលំហវប្បធម៌គងឃ្មុំ ប្រព័ន្ធបុណ្យទាន និងជីវភាពរស់នៅរបស់ប្រជាជនក្នុងតំបន់យ៉ាងសម្បូរបែប។ ទន្ទឹមនឹងនោះ និន្នាការទេសចរណ៍បៃតងកំពុងក្លាយជាតម្រូវការចាំបាច់ ដែលតម្រូវឱ្យមូលដ្ឋានត្រូវអនុវត្តឱ្យបានស្របគ្នានូវរាល់លក្ខណៈវិនិច្ឆ័យបៃតង ក្នុងការគ្រប់គ្រង និងប្រតិបត្តិការ។

លោកស្រី Nguyen Thi Hoa Mai - អនុអគ្គនាយិកានៃអគ្គនាយកដ្ឋានទេសចរណ៍ជាតិវៀតណាម បានចាត់ទុកថា ខេត្ត Gia Lai មានប្រៀបខ្លាំងទ្វេដង និងមានលំហទេសចរណ៍យ៉ាងសម្បូរបែប ច្រើនស្រទាប់ និងមានប្រព័ន្ធអេកូឡូស៊ីផលិតផលពេញលេញ រួមមាន៖ ទេសចរណ៍ធម្មជាតិ ទេសចរណ៍សមុទ្រ និងលំហែកាយ ទេសចរណ៍វប្បធម៌ និងបេតិកភណ្ឌ ព្រមទាំងទេសចរណ៍សហគមន៍ផងដែរ។ ខេត្ត Gia Lai មាននូវរឿងរ៉ាវ និងលក្ខណៈពិសេសដោយឡែក ដើម្បីអភិវឌ្ឍវិស័យទេសចរណ៍ ដោយមើលចេញពីទិដ្ឋភាពប្រវត្តិសាស្ត្រ វប្បធម៌ ធនធានធម្មជាតិ និងនិន្នាការអភិវឌ្ឍន៍ទេសចរណ៍ពិភពលោក។ នោះគឺរឿងរ៉ាវអំពីបរិស្ថានបៃតង ការរស់នៅបែបយឺតៗ និងការប៉ះទង្គិចដល់អារម្មណ៍។ ការប្រែក្លាយបណ្តាភូមិស្រុក ចម្ការតែ ព្រៃស្រល់ និងកសិដ្ឋានកាហ្វេ... ឱ្យទៅជាគោលដៅទេសចរណ៍នៃបទពិសោធន៍ "បែបយឺតៗ" និងជារឿងរ៉ាវវប្បធម៌ដែលមានជម្រៅជ្រាលជ្រៅ។ នេះគឺជាប្រៀបខ្លាំងប្រកួតប្រជែងដោយឡែក ដែលមានលក្ខណៈយុទ្ធសាស្ត្ររយៈពេលវែង។

ទោះជាយ៉ាងណាក៏ដោយ លោកស្រី Hoa Mai ក៏បានចង្អុលបង្ហាញនូវចំណុចខ្វះខាតមួយចំនួនដែលទេសចរណ៍ខេត្ត Gia Lai កំពុងជួបប្រទះផងដែរ គឺមុនដំបូងបង្អស់ ខេត្ត Gia Lai មានចំណុចខ្លាំងលើផ្នែកធនធាន ប៉ុន្តែនៅខ្សោយលើផ្នែកផលិតផលពេញលេញ បទពិសោធន៍នៅមានភាពរាយប៉ាយ ខ្វះនូវរឿងរ៉ាវតភ្ជាប់ ខ្វះសេវាកម្មបន្ទាប់បន្សំ និងខ្វះផលិតផលលំដាប់ខ្ពស់។ ហេតុដូច្នេះហើយ ទោះបីជាភ្ញៀវមកដល់ ប៉ុន្តែមិនសូវមានអ្វីច្រើនដើម្បីចំណាយប្រាក់ និងស្នាក់នៅបានយូរនោះទេ។

ទន្ទឹមនឹងនោះ ហេដ្ឋារចនាសម្ព័ន្ធតភ្ជាប់ក្នុងតំបន់នៅមិនទាន់មានភាពងាយស្រួលនៅឡើយទេ ទោះបីជាមានព្រលានយន្តហោះក៏ដោយ ប៉ុន្តែការធ្វើដំណើរពីទីក្រុង Pleiku ទៅកាន់ទីក្រុង Quy Nhon នៅមានការលំបាក និងមិនទាន់ទាក់ទាញបានយ៉ាងខ្លាំងក្លានូវបណ្តាសហគ្រាសឱ្យចូលរួមក្នុងការផ្សព្វផ្សាយទេសចរណ៍នៅឡើយ។

ម្យ៉ាងវិញទៀត ប្រសិនបើមិនមានការកំណត់ឱ្យច្បាស់ថា “ខ្លួនយើងជានរណា តើខ្លួនយើងស្ថិតនៅទីណាលើផែនទីទេសចរណ៍វៀតណាម និងក្នុងតំបន់” នោះទេ ការផ្សព្វផ្សាយនឹងមានលក្ខណៈរាយប៉ាយ មិនអាចកំណត់បាននូវរូបភាពទេសចរណ៍របស់ខេត្តឡើយ។ បន្ថែមលើនេះ ចាំបាច់ត្រូវដោះស្រាយបញ្ហានៃការផ្សព្វផ្សាយបែបប្រពៃណី ទៅជាការធ្វើទីផ្សារ (Marketing) តាមតម្រូវការទីផ្សារជាក់ស្តែង។

ហេតុដូច្នេះហើយ លោកស្រី Hoa Mai ចាត់ទុកថា ចាំបាច់ត្រូវជ្រើសរើសចំណុចស្នូលដើម្បីអភិវឌ្ឍទេសចរណ៍ខេត្ត Gia Lai នាពេលខាងមុខ ដែលក្នុងនោះចាំបាច់ត្រូវដោះស្រាយបញ្ហាសំខាន់ៗចំនួន ៣ គឺ៖ ទីមួយ ត្រូវផ្តោតលើការកសាងផលិតផលទេសចរណ៍លក្ខណៈពិសេស ដែលមានសមត្ថភាពប្រកួតប្រជែងខ្ពស់ ដោយយកអ័ក្សតភ្ជាប់ ព្រៃឈើ - ខ្ពង់រាប - សមុទ្រ ជាមូលដ្ឋានគ្រឹះ; រាល់ផលិតផលនីមួយៗត្រូវតែមានរឿងរ៉ាវ មានបទពិសោធន៍ និងមានសមត្ថភាពធ្វើពាណិជ្ជកម្មយ៉ាងច្បាស់លាស់។ អាចនិយាយបានថា សក្ដានុពលមានន័យពិតប្រាកដ លុះត្រាតែវាត្រូវបានប្រែក្លាយទៅជាផលិតផល សេវាកម្ម និងលំហូរភ្ញៀវជាក់ស្តែង។ ក្នុងនោះ ត្រូវយកចិត្តទុកដាក់លើការវិនិយោគលើកកម្ពស់គុណភាពហេដ្ឋារចនាសម្ព័ន្ធ និងសេវាកម្ម។

ទីពីរ គឺការកំណត់ឱ្យច្បាស់នូវម៉ាកសញ្ញាទេសចរណ៍ខេត្ត Gia Lai ក្នុងបរិបទថ្មី ដោយត្រូវបង្កើតនូវចំណាប់អារម្មណ៍ខុសប្លែកពីគេ ងាយចងចាំ ផ្សារភ្ជាប់ជាមួយនឹងតម្លៃវប្បធម៌ក្នុងតំបន់ និងបទពិសោធន៍ដ៏វិសេសវិសាល (ដែលនេះជាចំណុចខ្លាំងរបស់ខេត្ត Gia Lai)។ ចាំបាច់ត្រូវផ្លាស់ប្តូរយ៉ាងខ្លាំងក្លាពីការផ្សព្វផ្សាយបែបប្រពៃណី ទៅជាការធ្វើទីផ្សារបែបទំនើប ដោយយកទីផ្សារជាមជ្ឈមណ្ឌល; រុញច្រានការផ្សព្វផ្សាយតាមប្រព័ន្ធឌីជីថល ជ្រើសរើសទីផ្សារគោលដៅ និងកសាងយុទ្ធនាការផ្សព្វផ្សាយតាមផ្នែកអតិថិជនជាក់ស្តែងនីមួយៗ។

ទីបី គឺជំរុញការតភ្ជាប់ការអភិវឌ្ឍទេសចរណ៍ឱ្យមានជម្រៅជ្រាលជ្រៅ និងជាក់ស្តែង មិនត្រឹមតែរវាងបណ្តាគោលដៅក្នុងខេត្តប៉ុណ្ណោះទេ ប៉ុន្តែថែមទាំងជាមួយបណ្តាមូលដ្ឋាន តំបន់ជុំវិញ និងទីផ្សារអន្តរជាតិទៀតផង។ ការតភ្ជាប់ត្រូវតែបង្ហាញឡើងតាមរយៈផលិតផល ខ្សែសង្វាក់ទេសចរណ៍ និងខ្សែសង្វាក់តម្លៃជាក់ស្តែង។

លោកស្រី Hoa Mai បានឱ្យដឹងថា អគ្គនាយកដ្ឋានទេសចរណ៍ជាតិវៀតណាម ប្តេជ្ញានឹងរួមដំណើរជាមួយមូលដ្ឋាន ក្នុងការតភ្ជាប់អន្តរជាតិ ការផ្សព្វផ្សាយផលិតផល ការដាក់បញ្ចូលទេសចរណ៍ខេត្ត Gia Lai ទៅលើបណ្តាប្រព័ន្ធឌីជីថល និងគាំទ្រដល់ការបណ្តុះបណ្តាលធនធានមនុស្ស៕

ឧស្សាហកម្មទេសចរណ៍វៀតណាមបំបែកកំណត់ត្រា បង្កើតសន្ទុះដើម្បីសម្រេចបានគោលដៅភ្ញៀវទេសចរអន្តរជាតិ ២៥ លាននាក់ យុគសម័យ - ដោយសម្រេចបាននូវកំណត់ត្រាជាបន្តបន្ទាប់នៃចំនួនអ្នកទស្សនាអន្តរជាតិ វិស័យទេសចរណ៍របស់ប្រទេសវៀតណាមបង្ហាញពីភាពធន់ និងសមត្ថភាពងើបឡើងវិញយ៉ាងខ្លាំង។ យោងតាមរដ្ឋបាលទេសចរណ៍ជាតិវៀតណាម លទ្ធផលនេះមិនត្រឹមតែកើតចេញពីតម្រូវការទីផ្សារកើនឡើងប៉ុណ្ណោះទេ ប៉ុន្តែថែមទាំងកើតចេញពីការច្នៃប្រឌិតក្នុងការគិត និងវិធីសាស្រ្តនៃការផ្សព្វផ្សាយគោលដៅទេសចរណ៍ផងដែរ។

ទីក្រុងហាណូយ ជាប់ចំណាត់ថ្នាក់ក្នុងចំណោមទីក្រុងស្អាតបំផុតទាំង ៥០ នៅលើពិភពលោក យុគសម័យ - ទស្សនាវដ្តីទេសចរណ៍អាមេរិកដ៏មានកិត្យានុភាព Condé Nast Traveler បានដាក់បញ្ចូលទីក្រុងហាណូយក្នុងបញ្ជីទីក្រុងដ៏ស្រស់ស្អាតបំផុតទាំង ៥០ នៅលើពិភពលោកសម្រាប់ឆ្នាំ ២០២៦ ដោយចាត់ថ្នាក់វារួមជាមួយគោលដៅទេសចរណ៍ល្បីៗដូចជា អាំស្ទែរដាំ ប៉ារីស ញូវយ៉ក និងក្យូតូ។

ហេង វុធ្ធី