ឧបនាយករដ្ឋមន្ត្រីវៀតណាម Pham Binh Minh អញ្ជើញជួបពិភាក្សាការងារជាមួយរដ្ឋមន្រ្តីការបរទេសអាមេរិកលោក Michael Pompeo

ឧបនាយករដ្ឋមន្ត្រីវៀតណាម Pham Binh Minh អញ្ជើញជួបពិភាក្សាការងារជាមួយរដ្ឋមន្រ្តីការបរទេសអាមេរិកលោក Michael Pompeo

នៅក្នុងជំនួបនេះ ឧបនាយករដ្ឋមន្ត្រីនិងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានថ្លែងអំណរគុណដល់រដ្ឋាភិបាលអាមេរិកនិងក្រសួងការបរទេសអាមេរិកដែលបានគាំទ្រជាក់ស្តែងនិងទាន់ពេលវេលាចំពោះប្រទេសវៀតណាម ក្នុងការឆ្លើយតបទៅនឹងការរីករាលដាលនៃជំងឺ Covid-19 ក៏ដូចជាគ្រោះទឹកជំនន់នៅភាគកណ្តាលវៀតណាមនាពេលថ្មីៗនេះក្នុងនោះមានការផ្តល់ជំនួយឥតសំណងចំនួន ២ លានដុល្លារពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ផងដែរ។ ទន្ទឹមនឹងនេះ លោកឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេស Pham Binh Minh បានអះអាងថាវៀតណាមយកចិត្តទុកដាក់យ៉ាងខ្លាំងចំពោះភាពជាដៃគូគ្រប់ជ្រុងជ្រោយរបស់ខ្លួនជាមួយសហរដ្ឋអាមេរិក ព្រមទាំងសម្តែងនូវក្តីរីករាយចំពោះការអភិវឌ្ឍប្រកបដោយភាពវិជ្ជមាននិងគ្រប់ជ្រុងជ្រោយនៃទំនាក់ទំនងទ្វេភាគី ពីវិស័យនយោបាយការទូត សេដ្ឋកិច្ច ពាណិជ្ជកម្ម សន្តិសុខ ការពារជាតិ រហូតដល់ការង្កើនទំនាក់ទំនងរវាងប្រជាជននិងប្រជាជន។

ថ្លែងក្នុងជំនួបពិភាក្សានេះដែរ រដ្ឋមន្រ្តីក្រសួងការបរទេសអាមេរិក លោក Michael Pompeo បានវាយតម្លៃខ្ពស់ចំពោះការពង្រឹងនិងពង្រីកទំនាក់ទំនងភាពជាដៃគូគ្រប់ជ្រុងជ្រោយរវាងប្រទេសទាំងពីរ ដោយឈរលើមូលដ្ឋានគោរពឯករាជ្យ អធិបតេយ្យភាព បូរណភាពទឹកដីនិងរបបនយោបាយរបស់គ្នាទៅវិញទៅមក ព្រមទាំងបានអះអាងថាសហរដ្ឋអាមេរិកគាំទ្រវៀតណាមក្នុងការដើរតួនាទីសំខាន់កាន់តែខ្លាំងឡើងៗនៅក្នុងតំបន់ ហើយទន្ទឹមនឹងនោះប្តេជ្ញារក្សាទំនាក់ទំនងស្ថិរភាព ហើយនឹងបន្តសហប្រតិបត្តិការជាមួយវៀតណាមដើម្បីជំរុញទំនាក់ទំនងដ៏ល្អប្រពៃនេះផងដែរ។

លើសពីនេះទៅទៀត ភាគីទាំងពីរក៏បានផ្លាស់ប្តូរយោបល់លើវិធានការណ៍នានាដើម្បីជំរុញទំនាក់ទំនងកាន់តែស៊ីជម្រៅថែមទៀតរវាងប្រទេសទាំងពីរនាពេលខាងមុខដោយផ្តល់អាទិភាពដល់ការជំរុញការចាប់ផ្តើមឡើងវិញនូវការផ្លាស់ប្តូរគណៈប្រតិភូជាទៀងទាត់ជាពិសេសគណៈប្រតិភូជាន់ខ្ពស់; ពង្រឹងកិច្ចសហប្រតិបត្តិការមនុស្សធម៌និងជំនះផលវិបាកនៃសង្គ្រាម ដើម្បីរួមចំណែកដល់ការកសាងជំនឿទុកចិត្តគ្នារវាងប្រទេសទាំងពីរបន្តជួយសម្រួលដល់ការពង្រឹងទំនាក់ទំនងពាណិជ្ជកម្មនិងវិនិយោគទ្វេភាគីដោយឈរលើផលប្រយោជន៍ទៅវិញទៅមក។

ឧបនាយករដ្ឋមន្ត្រីវៀតណាម Pham Binh Minh អញ្ជើញជួបពិភាក្សាការងារជាមួយរដ្ឋមន្រ្តីការបរទេសអាមេរិកលោក Michael Pompeo

ទាក់ទងនឹងបញ្ហាក្នុងតំបន់ដែលមានផលប្រយោជន៍ទៅវិញទៅមកឧបនាយករដ្ឋមន្រ្តីនិងជារដ្ឋមន្រ្តីវៀតណាម លោក Pham Binh Minh បានស្នើឱ្យសហរដ្ឋអាមេរិកបន្តគាំទ្រតួនាទីស្នូលនិងរឹតចំណងសាមគ្គីភាពជាមួយអាស៊ាន រួមទាំងលើកកម្ពស់ទំនាក់ទំនងភាពជាដៃគូយុទ្ធសាស្ត្រអាស៊ាន - អាមេរិកផងដែរ។

ម្យ៉ាងវិញទៀត រដ្ឋមន្រ្តីក្រសួងការបរទេសអាមេរិកលោក Pompeo ក៏បានវាយតម្លៃខ្ពស់ចំពោះតួនាទីរបស់វៀតណាមក្នុងនាមជាប្រធានអាស៊ានឆ្នាំ ២០២០ និងជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់ដំណាក់កាលឆ្នាំ ២០២០-២០២១ ដោយសង្ឃឹមថាភាគីទាំងពីរបន្តពង្រឹងការសម្របសម្រួលក្នុងការដោះស្រាយបញ្ហាប្រឈម ដើម្បីរួមវិភាគទានដល់ការថែរក្សាសន្តិភាព ស្ថិរភាព សន្តិសុខនិងការអភិវឌ្ឍនៅក្នុងតំបន់និងជុំវិញពិភពលោកផងដែរ៕

（ប្រែសម្រួលដោយ ហេង វុធ្ធី）

（ប្រភពព័ត៌មាន: vov）

（ប្រែសម្រួលដោយ ហេង វុធ្ធី）