វៀតណាមបង្រួមគម្លាតឌីជីថលយ៉ាងសកម្មក្នុងការឆ្លើយតបនឹងជំងឺរាតត្បាតកូវីដ១៩

ឧបការីរដ្ឋមន្រ្តីក្រសួងការបរទេសវៀតណាមលោក Pham Quang Hieu (រូនថត៖ baoquocte)

សន្និសីទនេះដឹកនាំដោយរដ្ឋមន្រ្តីក្រសួងការបរទេសអេស្ត្រូសលោក Urmas Reinsalu និងរដ្ឋមន្ត្រីការបរទេសសិង្ហបុរី លោក Vivian Balakrishnan រួមទាំងតំណាងមកពីប្រទេសជាង ៦០ ផងដែរ។ អគ្គលេខាធិការរងនៃអង្គការសហប្រជាជាតិ លោកស្រី Amina J. Mohammed ក៏បានផ្ញើសារស្វាគមន៍ទៅកាន់សន្និសីទនេះ។

ថ្លែងមតិនៅសន្និសីទនេះ ឧបការីរដ្ឋមន្រ្តីក្រសួងការបរទេសវៀតណាមលោក Pham Quang Hieu បានសង្កត់ធ្ងន់លើសារសំខាន់នៃការអនុវត្តបច្ចេកវិទ្យាឌីជីថលដើម្បីជំរុញកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងនឹងជំងឺត្បាតសកល ព្រមទាំងបង្កើតកម្លាំងចលករ ដើម្បីស្តារសេដ្ឋកិច្ច-សង្គមក្រោយពីជំងឺរាតត្បាតកូវីដ១៩។ ហេតុដូច្នោះហើយ បណ្តាប្រទេសនានាចាំបាច់ត្រូវពង្រឹងកិច្ចសហប្រតិបត្តិការ ដើម្បីកែលម្អហេដ្ឋារចនាសម្ព័ន្ធឌីជីថល កសាងដំណើរការលើអភិបាលកិច្ចឌីជីថល និងបង្កើតបណ្តាញតភ្ជាប់ឌីជីថលប្រកបដោយសុវត្ថិភាពនិងប្រសិទ្ធភាពផងដែរ។

ឧបការីរដ្ឋមន្រ្តីក្រសួងការបរទេសបានឲ្យដឹងថាក្នុងបរិបទនៃការរីករាលដាលនៃជំងឺរាតត្បាតកូវីដ១៩កំពុងវិវត្តដ៏ស្មុគស្មាញនោះ ប្រទេសវៀតណាមក្នុងនាមជាប្រធានអាស៊ានបានសម្របសម្រួលយ៉ាងសកម្មក្នុងការអនុវត្តផែនការសកម្មភាពសម្រាប់ឆ្នាំ ២០១៩-២០២៥ ក្នុងក្របខ័ណ្ឌនៃការភ្ជាប់ឌីជីថលអាស៊ាន ព្រមទាំងរៀបចំកិច្ចប្រជុំតាមប្រព័ន្ធអនឡាញជាច្រើននៅក្នុងអាស៊ាននិងរវាងអាស៊ាននិងដៃគូនានាសំដៅចាត់វិធានការដើម្បីជួយពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងនឹងជំងឺរាតត្បាតផងដែរ។

ទន្ទឹមនឹងនេះ លោក Pham Quang Hieu បានអះអាងថាវៀតណាមនឹងសហការយ៉ាងសកម្មជាមួយបណ្តាប្រទេសនានានៅជុំវិញពិភពលោកដើម្បីខិតខំបង្រួមគម្លាតឌីជីថលនិងរួមចំណែកក្នុងការឆ្លើយតបទៅនឹងជំងឺរាតត្បាតកូវីដ១០ប្រកបដោយប្រសិទ្ធភាព ក៏ដូចជាជំរុញការអភិវឌ្ឍន៍ ប្រកបដោយនិរន្តរភាពនិងមានភាពច្នៃប្រឌិតផងដែរ៕

（បកប្រែដោយ ហេងវុធ្ធី）

（ប្រភពព័ត៌មាន: baoquocte.vn）

（បកប្រែដោយ ហេងវុធ្ធី）