Ho Tram រះលើផែនទីទេសចរណ៍ពិភពលោក

ធ្លាប់ត្រូវបានប៉ូស្តិ៍ទូរទស្សន៍ CNNGo (សហរដ្ឋអាមេរិក) បោះឆ្នោតជ្រើសរើសជាឆ្នេរសមុទ្រមួយក្នុងចំណោមឆ្នេរសមុទ្រដ៏រហោស្ថាននិងស្អាតបំផុតនៅលើភពផែនដីនោះ Ho Tram បានលេចចេញដោយឈ្មោះហៅថា "រាជធានីនៃទេសចរណ៍រមណីយដ្ឋាន" នៅតំបន់ភាគខាងត្បូង ជាមួយនឹងឆ្នេរសមុទ្រពណ៌ខៀវស្រស់ថ្លានិងឆ្នេរខ្សាច់សក្បុសដែលលាតសន្ធឹងប្រវែង ៣០ គីឡូម៉ែត្រ។

ធម្មជាតិបានប្រទានឲ្យ Ho Tram មានអាកាសធាតុត្រូពិចបង្គួរជាមួយនឹងពន្លឺថ្ងៃស្រស់ស្អាតចែងចាំងរស្មីស្ទើរតែពេញមួយឆ្នាំ។ រួមជាមួយនឹងតំបន់អភិរក្សធម្មជាតិ Binh Chau – Phuoc Buu ដែលមានទំហំជាង ១១ ពាន់ហិកតា “សួតបៃតង” ដ៏ធំសម្បើមនេះ ជួយឱ្យ Ho Tram ក្លាយជាគោលដៅមួយក្នុងចំណោមគោលដៅទេសចរណ៍ដែលមានគុណភាពខ្យល់អាកាសល្អបំផុតនៅប្រទេសវៀតណាម។

តំបន់អភិរក្សធម្មជាតិ Binh Chau - Phuoc Buu ដោយមានប្រព័ន្ធដើមឈើច្រើនស្រទាប់ បានបង្កើតជាលំហធម្មជាតិដ៏ស្រស់ស្រាយ ស្ងប់ស្ងាត់ ស្និទ្ធស្នាលជាមួយធម្មជាតិ ដែលសមស្របសម្រាប់ការដើរថ្មើចម្ងាយវែង ឬរីករាយនឹងការស្រូបយកខ្យល់អាកាសបរិសុទ្ធ ដាច់ដោយឡែកទាំងស្រុងពីភាពអ៊ូអរមមាញឹកនៃទីក្រុង។

រូបថតឧទាហរណ៍

ទន្ទឹមនឹងប្រៀបខ្លាំងនៃព្រៃស្តុក Ho Tram ក៏មានឆ្នេរសមុទ្រ ឆ្នេរខ្សាច់សម៉ត់ខែដ៏វែងឆ្ងាយ ដែលរក្សាបាននូវសោភ័ណភាពដើម និងភាពសុខសាន្តត្រាណ ដូចការអញ្ជើញភ្ញៀវទេសចរឱ្យជ្រមុជខ្លួននៅក្នុងទឹកពណ៌ខៀវស្រស់ថ្លា ហើយរីករាយនឹងភាពស្ងប់ស្ងាត់ដ៏កម្រ។ ជាមួយនឹងអាកាសធាតុក្តៅស្រួល ពេញមួយឆ្នាំ និងសីតុណ្ហភាពចន្លោះពី ២៥ - ៣០អង្សាសេ កន្លែងនេះគឺជាជម្រើសដ៏ល្អឥតខ្ចោះសម្រាប់ភ្ញៀវទេសចរ មិនថាវិស្សមកាលរដូវក្តៅដ៏រស់រវើក ឬដំណើរកម្សាន្តដោយចៃដន្យនាចុងសប្តាហ៍នោះទេ។ ភ្ញៀវទេសចរស្រីម្នាក់បានចែករំលែកថា៖

“នេះជាលើកទីមួយហើយដែលខ្ញុំបានមកទីនេះ ប៉ុន្តែខ្ញុំមានអារម្មណ៍ស្និទ្ធស្នាល ស្រស់ស្អាតខ្លាំងណាស់។ ផ្ទៃសមុទ្រ ផ្ទៃមេឃធំល្វឹងល្វើយ ខ្យល់ត្រជាក់ស្រួល។ ខ្ញុំនឹងវិលត្រឡប់មកទីនេះវិញជាពុំខាន”។

ទីតាំងអំណោយផល ធម្មជាតិស្រស់បំព្រង និងឆ្នេរសមុទ្រស្អាត... ជាកត្តាដែលធ្វើឲ្យតំបន់ Ho Tram ទាក់ទាញវិនិយោគិនឈានមុខគេជាច្រើន មកអភិវឌ្ឍន៍គម្រោងរមណីយដ្ឋានលំដាប់ខ្ពស់។ វិនិយោគិន Tran Quang Hy បានចែករំលែកថា៖

“អត្ថប្រយោជន៍ដ៏ធំបំផុតដែលតំបន់ឆ្នេរ Ho Tram នេះនាំមកជូនភ្ញៀវទេសចរគឺទីតាំងភូមិសាស្រ្តស្ថិតនៅជិតមជ្ឈមណ្ឌលទីក្រុងហូជីមិញ។ ឆ្នេរ Ho Tram ត្រូវបានកាសែតអន្តរជាតិមួយ វាយតម្លៃថា ជាឆ្នេរសមុទ្រមួយក្នុងចំណោមឆ្នេរសមុទ្រដ៏ស្អាតបំផុតលើពិភពលោក ដូច្នេះនេះក៏ជាហេតុផលសំខាន់មួយដែលយើងបានបណ្ដាក់ទុនមកទីនេះ។ បច្ចុប្បន្ននេះ Ho Tram ក៏ជាគោលដៅទេសចរណ៍ដែលទើបលេចចេញ ដូច្នេះសេវាកម្សាន្តមិនទាន់មានភាពសម្បូរបែបនៅឡើយ យើងអាចកសាងភោជនីយដ្ឋានជាមួយនឹងទេសភាពសមុទ្រ”។

រូបថតឧទាហរណ៍

ចំណែកឯវិនិយោគិនបរទេសវិញ នៅពាក់កណ្តាលខែឧសភា ក្រុមហ៊ុន Grand Ho Tram បានចាប់ផ្តើមសាងសង់តំបន់ថ្មីលើផ្ទៃដី ៣៥ ហិកតា ដែលជាព្រឹត្តិការណ៍យុទ្ធសាស្ត្រក្នុងដំណើរឆ្ពោះទៅអភិវឌ្ឍតំបន់ទេសចរណ៍លំដាប់អន្តរជាតិនៅវៀតណាម។ លោក Stuart Haine នាយកប្រតិបត្តិប្រចាំតំបន់អាស៊ីអាគ្នេយ៍ តំណាងឱ្យមូលនិធិ Warburg Pincus ដែលជាម្ចាស់វិនិយោគគម្រោងបាននិយាយថា៖

“គម្រោងស្នូលរបស់យើងខ្ញុំក្នុងតម្លៃជាង ១,៤ ពាន់លានដុល្លារអាមេរិក ត្រូវបានវិនិយោគនៅ Ho Tram ហើយលើកនេះវាមានតម្លៃ ១ ពាន់លានដុល្លារ។ ក្នុងដំណាក់កាលថ្មីនេះ យើងខ្ញុំនឹងសាងសង់បន្ទប់សណ្ឋាគារជាង ៦០០០ បន្ទប់ និងអាចទទួលភ្ញៀវបាន ១៨ ពាន់នាក់។ នៅពេលសាងសង់រួចរាល់ The Grand Ho Tram នឹងក្លាយជារមណីយដ្ឋានរួមបញ្ចូលគ្នាលំដាប់ពិភពលោកតាមគំរូ MICE ហើយក្លាយជារមណីយដ្ឋានមួយក្នុងចំណោមរមណីយដ្ឋានដ៏ធំបំផុតលើទូទាំងពិភពលោក”។

យោងតាមលោក Huynh Phi Khanh ប្រធានគណៈកម្មាធិការប្រជាជនឃុំ Ho Tram បានឲ្យដឹងថា ក្នុងរយៈពេល៦ខែដើមឆ្នាំ២០២៥ មូលដ្ឋានបានទទួលភ្ញៀវទេសចរណ៍ប្រមាណ៣លាននាក់ ដែលក្នុងនោះមានភ្ញៀវអន្តរជាតិជាង៩១៥ ពាន់នាក់។ ប្រាក់ចំណូលត្រូវបានប៉ាន់ប្រមាណថា ទទួលបានជាង៣.៣៤០ ពាន់លានដុង។

លោក Huynh Phi Khanh បានឲ្យដឹងថែមទៀតថា ហេដ្ឋារចនាសម្ព័ន្ធចរាចរណ៍គឺជាគំនាស់ដ៏សំខាន់សម្រាប់ទេសចរណ៍នៅឃុំ Ho Tram នាពេលអនាគត។ ជាពិសេស អាកាសយានដ្ឋានអន្តរជាតិ Long Thanh នៅពេលដាក់ឲ្យដំណើរការ នឹងបង្កើតឱកាសសម្រាប់តំបន់សមុទ្រភាគខាងត្បូង ទទួលបានភ្ញៀវទេសចរយ៉ាងច្រើនសន្ធឹកសន្ធាប់ ជាពិសេសភ្ញៀវអន្តរជាតិ។ ផ្លូវហាយវែទីក្រុង Ho Tram - អាកាសយានដ្ឋានអន្តរជាតិ Long Thanh ពេលសាងសង់រួចរាល់នឹងរួមចំណែកសុក្រិតបណ្តាញផ្លូវចរាចរណ៍ ដែលជួយអភិវឌ្ឍន៍វិស័យទេសចរណ៍ និងសេវាកម្មយ៉ាងខ្លាំងក្លាឆ្ពោះទៅរកស្តង់ដារអន្តរជាតិសម្រាប់តំបន់ Ho Tram។

ដោយការពង្រីកប្រៀបខ្លាំងដែលប្រទានដោយធម្មជាតិ ជាមួយនឹងប្រព័ន្ធហេដ្ឋារចនាសម្ព័ន្ធសមកាលកម្ម ផលិតផលទេសចរណ៍គុណភាពខ្ពស់ សម្បូរបែប និងមានកេរ្តិ៍ឈ្មោះ ក្នុងរយៈពេលវែង Ho Tram នឹងត្រូវបានអភិវឌ្ឍន៍ទៅជាតំបន់ទេសចរណ៍ជាតិ ជារាជធានីទេសចរណ៍គុណភាពខ្ពស់ជាមួយនឹងទម្រង់ទេសចរណ៍រមណីយដ្ឋាន សន្និសីទ ដំណើរផ្សងព្រេងយ៉ាងសម្បូរបែប... ប្រការនេះនឹងក្លាយទៅជាការពិតក្នុងពេលឆាប់ៗនេះ នៅពេលដែលកន្លែងនេះត្រូវបានច្របាច់បញ្ចូលទៅក្នុងទីក្រុងហូជីមិញ ដែលរួមចំណែកបង្កើតសន្ទុះថ្មីសម្រាប់ការអភិវឌ្ឍសេដ្ឋកិច្ចតំបន់៕

តើត្រូវទៅណាក្នុងរយៈពេលពីរថ្ងៃនៅបឹង Tram ? យុគសម័យ - បឹង Tram រក្សាបាននូវសោភ័ណភាពដ៏បរិសុទ្ធ ដោយមិនមានភាពអ៊ូអរ ប៉ុន្តែនៅតែនាំមកនូវបទពិសោធន៍សំរាកលំហែកាយលំដាប់ខ្ពស់។ អ្នកទស្សនាអាចចំណាយពេល ២ថ្ងៃ ចុងសប្តាហ៍ដើម្បីសម្រាក និងរីករាយជាមួយធម្មជាតិនៃកន្លែងនេះ។

ពិធីប្រគល់រូបសំណាក លោកប្រធាន Ho Chi Minh និងវត្ថុដាក់តាំង ជូនដល់កេរ្តិ៍ដំណែលប្រវត្តិសាស្ត្រលោកប្រធាន Ho Chi Minh នៅទីក្រុង Kunming នៃប្រទេសចិន យុគសម័យ - នាពេលថ្មីៗ នេះ នៅទីក្រុង Kunming ខេត្ត Yunnan (ភាគនិរតីនៃប្រទេសចិន) អគ្គកុងស៊ុលវៀតណាមប្រចាំនៅទីក្រុង Kunming លោក Nguyen Trung Hieu តំណាងអគ្គកុងស៊ុល វៀតណាមប្រចាំនៅទីក្រុង Kunming និងសមាគមជនវៀតណាមនៅខេត្ត Yunnan បានប្រគល់​​រូបសំណាកលោកប្រធាន Ho Chi Minh និងវត្ថុដាក់តាំងចំនួន ...

ហេង វុធ្ធី