ធនាគារអភិវឌ្ឍន៍អាស៊ី ADB ព្យាករថាកម្ពុជាប្រឈមបាត់បង់ការងារចំនួន ៣៩ ម៉ឺនកន្លែងនៅឆ្នាំ ២០២០ ដោយសារការរាតត្បាតសកលនៃជំងឺកូវីដ ១៩។ ប៉ុន្តែស្ថាប័ននេះអបអរដល់កម្ពុជាចំពោះការឆ្លើយតបទៅនឹងវិបត្តិនេះ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ហើយខ្លួនក៏បានផ្តល់ប្រាក់កម្ចីចំនួន ២៥០ លានដុល្លារ ដើម្បីស្តារសេដ្ឋកិច្ចឡើងវិញ។
លោកស្រី Sunniya Durrani-Jamal នាយកប្រតិបត្តិ ADB (ឆ្វេង) នៅក្នុងពិធីចុះហត្ថលេខាលើកិច្ចព្រមព្រៀងកម្ចីកាលពីឆ្នាំមុន។ រូបថត ADB
ADB កាលពីសប្ដាហ៍មុនបានអនុម័តប្រាក់កម្ចីចំនួន ២៥០ លានដុល្លារ សម្រាប់កម្ពុជាក្នុងការឆ្លើយតបទៅនឹងការរាតត្បាតសកលនៃជំងឺកូវីដ ១៩ និងការស្ដារសេដ្ឋកិច្ចឡើងវិញ។
ក្នុងកិច្ចសម្ភាសន៍ជាមួយភ្នំពេញប៉ុស្តិ៍កាលពីថ្ងៃពុធលោកស្រី Sunniya Durrani-Jamal នាយកប្រតិបត្តិនៃធនាគារអភិវឌ្ឍន៍អាស៊ីប្រចាំកម្ពុជាថ្លែងថា កម្ចីសម្បទាននេះនឹងមានរយៈពេល ២៤ ឆ្នាំ បូករួមទាំងរយៈពេលអនុគ្រោះ ៨ ឆ្នាំ។ កម្ចីនេះនឹងមានអត្រាការប្រាក់ ១ ភាគរយក្នុង ១ ឆ្នាំក្នុងរយៈពេលអនុគ្រោះ និងមានអត្រា ១,៥ ភាគរយនៅដំណាក់កាលបន្ទាប់។
លោកស្រីបញ្ជាក់ថា ក្រៅពីកម្ចីនេះ ADB នឹងផ្ដល់ជំនួយឥតសំណងដល់កម្ពុជាក៏ដូចជា ជំនួយបច្ចេកទេសសម្រាប់កម្មវិធីឧបត្ថម្ភ សាច់ប្រាក់ជូនគ្រួសារក្រីក្រ និងងាយរងគ្រោះ។ បន្ទាប់ពីកម្ចីនេះត្រូវបានអនុម័តកម្ពុជានឹងមានលទ្ធភាពទទួលការគាំទ្រជំនួយបច្ចេកទេសក្នុងទឹកប្រាក់ ៥ លានដុល្លារក្នុងកម្មវិធីប្រឹក្សាគោលនយោបាយ សម្រាប់ស្ដារសេដ្ឋកិច្ចឡើងវិញពីវិបត្តិកូវីដ១៩។
លោកស្រីមានប្រសាសន៍ថា៖ «កម្ពុជាកំពុងប្រឈមនឹងបញ្ហាប្រឈមដែលមិនធ្លាប់មានបង្កដោយកូវីដ ១៩។ ដំណើរធ្លាក់ចុះនៃសេដ្ឋកិច្ចនៅកម្ពុជានឹងដាក់សម្ពាធលើក្រុមមនុស្សក្រីក្រ និងងាយរងគ្រោះ ហើយ ADB ប៉ាន់ប្រមាណថា កូវីដ ១៩ នឹងនាំដល់ការបាត់បង់ការងារចំនួន ៣៩ ម៉ឺនកន្លែងនៅឆ្នាំ ២០២០ នេះ»។
លោកស្រីបន្តថា៖ «ជំងឺកូវីដ ១៩ នឹងធ្វើឲ្យមានភាពងាយរងគ្រោះកាន់តែខ្លាំងសម្រាប់ពលរដ្ឋក្រីក្រ ដោយសារតែពួកគេមានប្រភពចំណូលមានកម្រិត។ ការគាំពារសង្គមមានសារៈសំខាន់ណាស់ក្នុងការទប់ស្កាត់ការរីកកាន់តែធំនៃភាពក្រីក្រ ហើយយើងសូមអបអរដល់រដ្ឋាភិបាលដែលបានដាក់បញ្ចូលទឹកប្រាក់ ៣០០ លានដុល្លារ ទៅក្នុងកម្មវិធីឧបត្ថម្ភសាច់ប្រាក់នៃគោលនយោបាយឆ្លើយតបរបស់ខ្លួន»។
លោកស្រីបញ្ជាក់ថា ការគាំទ្រផ្នែកថវិការបស់ ADB នឹងផ្ដោតទៅលើធុរកិច្ច គ្រួសារ និងបុគ្គលដែលរងផលប៉ះពាល់ខ្លាំងពីវិបត្តិនេះ ដោយផ្ដោតការយកចិត្តទុកដាក់ពិសេសទៅក្រុមមនុស្សក្រីក្រ និងអ្នកងាយរងគ្រោះ។ ADB និងដៃគូអភិវឌ្ឍន៍ដទៃទៀតនឹងធ្វើការជាមួយរដ្ឋាភិបាលដើម្បីពង្រឹងការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ។
លោកស្រីថ្លែងថា៖ «រឿងមួយដែលយើងស្វាគមន៍យ៉ាងខ្លាំងដល់ការរៀបចំកម្មវិធីរបស់រដ្ឋាភិបាលគឺថា កម្មវិធីនេះបានបញ្ចូលសមាសភាពគ្រួសារក្រីក្រ។ នេះមានន័យថាពលរដ្ឋដែលបាត់បង់ប្រាក់ចំណូលភ្លាមៗដោយសារតែកូវីដ ១៩ អាចទទួលបានជំនួយហិរញ្ញវត្ថុ»។
លោកស្រីប៉ាន់ប្រមាណថា ការចំណាយប្រចាំខែសម្រាប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះនឹងមានតម្រូវការសាច់ប្រាក់លើសពី ២៥ លានដុល្លារក្នុង ១ ខែ ដោយសារតែចំនួនអ្នកដែលនឹងទទួលបានការឧបត្ថម្ភនេះនឹងកើនឡើង។ ធនាគារ ADB ក៏ត្រៀមខ្លួនជួយដល់កម្ពុជាបន្ថែមទៀតប្រសិនបើបញ្ហានេះកើតឡើង។
លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច និងហិរញ្ញវត្ថុថ្លែងថា ព័ត៌មានលម្អិតអំពីកម្ចី ២៥០ លានដុល្លារនេះនឹងបញ្ចេញនៅពេលក្រសួងចុះហត្ថលេខាជាមួយ ADB នាពេលឆាប់ៗនេះ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ជឿជាក់ថាកម្ចីនេះមានសារៈសំខាន់ណាស់ក្នុងការជួយស្ដារសេដ្ឋកិច្ចកម្ពុជាឡើងវិញ និងជួយឲ្យពលរដ្ឋក្រីក្រអាចរួចផុតពីភាពក្រីក្រ។ ប៉ុន្តែរឿងទាំងនេះអាចសម្រេចបានដរាបណាកម្ចីនេះត្រូវបានប្រើប្រាស់ត្រឹមត្រូវ។
លោកមានប្រសាសន៍ថា៖ «កម្ចីនេះត្រូវតែប្រើប្រាស់ប្រកបដោយតម្លាភាព និងមានប្រសិទ្ធភាពទៅលើគោលដៅ។ ត្រូវតែមានការធ្វើសវនកម្មតាមដានដោយភ្នាក់ងារ ឬដោយភាគីពាក់ព័ន្ធដទៃទៀត។ បើមិនអ៊ីចឹងទេ វានឹងធ្វើឲ្យបំណុលកាន់តែកើនច្រើនឡើង ហើយសេវា ឬគម្រោងអភិវឌ្ឍន៍មិនបានធ្វើដោយប្រសិទ្ធភាព។ ដូច្នេះត្រូវមានយន្តការតាមដាន ហើយគោលដៅអាទិភាពត្រូវតែកំណត់ឲ្យបានច្បាស់»៕
（ប្រភពព័ត៌មាន: postkhmer）
មតិពីមិត្តអ្នកអាន