នាពេលថ្មីៗ រដ្ឋាភិបាលអាមេរិកបានទឹកប្រាក់ចំនួន ៥៦ លានដុល្លារអាមេរិកដើម្បីជួយគាំទ្រដល់កម្មវិធីអភិវឌ្ឍន៍សេដ្ឋកិច្ច-សង្គមរបស់កម្ពុជាក្នុងឆ្នាំ ២០២០ ក្នុងបរិបទនៃការឆ្លងរាលដាលនៃជំងឺរាតត្បាត COVID-19 នៅតែមានភាពស្មុគស្មាញ។
ឯកអគ្គរដ្ឋទូតសហរដ្ឋអាមេរិក លោក W. Patrick Murphy ជួបជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព នាថ្ងៃទី២៣ តុលា ២០១៩
រដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា (CDC) និងរដ្ឋាភិបាលអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍន៍អន្តរជាតិ (USAID) បានចុះហត្ថលេខាលើកិច្ចព្រមវិសោធនកម្មស្តីពីហិរញ្ញប្បទានសហប្រតិបត្តិការអភិវឌ្ឍន៍កាលពីសប្តាហ៍មុន ដើម្បីផ្តល់ថវិកាប្រមាណ ១៨ លានដុល្លារអាមេរិកសម្រាប់វិស័យកសិកម្ម និងបរិស្ថានដែលអនុវត្តដោយអង្គការនៅកម្ពុជានិង ៣៨ លានដុល្លារសម្រាប់វិស័យសុខាភិបាល និងវិស័យអប់រំ។
លោក ជិន ប៊ុន ស៊ាន អនុប្រធានក្រុមប្រឹក្សាអភិវឌ្ឍន៍កម្ពុជាបាននិយាយថា កិច្ចព្រមព្រៀងនេះបង្ហាញពីការប្តេជ្ញាចិត្តលើកិច្ចសហប្រតិបត្តិការរបស់ប្រទេសទាំងពីរ។ លោកបាននិយាយថា៖ “កិច្ចសហប្រតិបត្តិការទ្វេភាគីដែលកំពុងបន្តនេះគឺជាសសរស្តម្ភដ៏សំខាន់មួយក្នុងការជំរុញ និងពង្រឹងកិច្ចសហប្រតិបត្តិការ និងភាពជាដៃគូរវាងប្រទេសទាំងពីរ”។
ក្នុងកិច្ចសហការជាដៃគូជាមួយក្រសួងកសិកម្ម រុក្ខាប្រមាញ់ និងនេសាទទីភ្នាក់ងារ USAID នឹងផ្តល់ថវិកាដល់កម្មវិធីនានាដែលកាត់បន្ថយចំនួនប្រជាជនដែលរស់នៅក្នុងភាពក្រីក្រ បង្កើនផលិតកម្មដំណាំសំខាន់ៗនិងលើកកម្ពស់អាហារូបត្ថម្ភក្នុងចំណោមសហគមន៍ជនបទ។
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាបាននិយាយក្នុងពេលចុះហត្ថលេខាថា រដ្ឋាភិបាលអាមេរិកប្តេជ្ញាបន្តគាំទ្ររបស់ខ្លួនចំពោះប្រជាជនកម្ពុជាក្នុងការសម្រេចឲ្យបាននូវការអភិវឌ្ឍសេដ្ឋកិច្ចសង្គមប្រកបដោយចីរភាព និងសមធម៌។
តាមរយៈកិច្ចសហការជាមួយក្រសួងសុខាភិបាលកម្មវិធីនានាមានគោលបំណងកាត់បន្ថយអត្រាមរណភាពមាតា និងទារក និងមរណភាពចំពោះកុមារដែលមានអាយុក្រោម ៥ ឆ្នាំ។ ថវិកានេះក៏នឹងគាំទ្រដល់កម្មវិធីនានាដើម្បីកាត់បន្ថយជំងឺក្រិន និងជំងឺខ្វះគ្រាប់ឈាមក្រហមរបស់កុមារ និងស្ត្រី និងកាត់បន្ថយអត្រាប្រេវ៉ាឡង់នៃជំងឺអេដស៍ របេង និងគ្រុនចាញ់នៅកម្ពុជា។
ក្នុងវិស័យអប់រំ ក្រសួងអប់រំ យុវជន និងកីឡា និងកម្មវិធី USAID នឹងបន្តគាំទ្រដល់កិច្ចខិតខំប្រឹងប្រែងក្នុងការធ្វើឲ្យប្រសើរឡើងនូវសមត្ថភាពការអានរបស់កុមារ កាត់បន្ថយអត្រាបោះបង់ចោលការសិក្សានៅថ្នាក់វិទ្យាល័យ និងបំពាក់បំប៉នបន្ថែមដល់ប្រជាជនកម្ពុជាក្នុងការឈានចូលទីក្នុងទីផ្សារពលកម្ម។
មូលនិធិនេះក៏នឹងគាំទ្រដល់កម្មវិធីបរិស្ថានដែលកាត់បន្ថយភាពងាយរងគ្រោះរបស់ប្រជាជន និងទេសភាពទៅនឹងផលប៉ះពាល់នៃអាកាសធាតុដែលកំពុងមានការផ្លាស់ប្តូរ និងជួយប្រទេសកម្ពុជាបំពេញតាមក្របខណ្ឌអន្តរជាតិរបស់ខ្លួនក្នុងការកាត់បន្ថយការបំភាយឧស្ម័នផ្ទះកញ្ចក់ ជាពិសេសពីការកាប់បំផ្លាញព្រៃឈើ និងការរិចរិលព្រៃឈើដោយសហការជាមួយក្រសួងបរិស្ថាន។
គិតចាប់ពីខែមីនាឆ្នាំ២០១៦ រហូតដល់ការហត្ថលេខាលើកនេះទៀត សហរដ្ឋអាមេរិកបានផ្តល់ជំនួយឥតសំណងចំនួន២៥៣លានដុល្លារដល់កម្ពុជាលើវិស័យទាំង៤រួមមានវិស័យអប់រំ សុខាភិបាល កសិកម្ម និងបរិស្ថាន។ ដោយឡែកពាក់ព័ន្ធការប្រយុទ្ធប្រឆាំងមេរោគកូវីដ១៩ឆ្នាំចាប់ពីខែមីនាឆ្នាំ២០២០មក សហរដ្ឋអាមេរិកជួយកម្ពុជាចំនួន១១លានដុល្លារអាមេរិក។ សូមបញ្ចាក់ថារដ្ឋាភិបាលសហរដ្ឋអាមេរិកបានផ្តល់ការគាំទ្រមកប្រទេសកម្ពុជាប្រមាណជាង១ពាន់លានដុល្លារ នេះបើគិតចាប់តាំងពីឆ្នាំ១៩៩៤មកទល់បច្ចុប្បន្ន៕
（សរុបដោយសាមេត）
មតិពីមិត្តអ្នកអាន