គិតត្រឹមថ្ងៃទី ១៦ ខែឧសភា អ្នកឆ្លងជំងឺរាតត្បាត COVID-19 ចុងក្រោយនៅកម្ពុជាបានជាសះស្បើយហើយ ខណៈកម្ពុជាបន្តគ្មានអ្នកឆ្លងថ្មី។ ទោះជាយ៉ាងណាក៏ដោយក្រសួងសុខាភិបាលមិនបានបន្ធូរបន្ថយការប្រុងប្រយ័ត្នទេ ហើយកំពុងត្រៀមខ្លួនដើម្បីប្រយុទ្ធប្រឆាំងនឹងរលកទីពីរនៃការផ្ទុះជំងឺរាតត្បាត COVID-19
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ប្រាប់អ្នកកាសែតនៅមន្ទីរពេទ្យមិត្តភាពខ្មែរ-សូវៀត នាព្រឹកថ្ងៃទី១៦ ខែឧសភា ឆ្នាំ២០២០ យ៉ាងដូច្នេះថា៖«[យើង] នៅតែធ្វើការ ចង់ធ្វើការឲ្យច្រើនជាងមុនផង ដើម្បីកុំឲ្យមករលកទីពីរ [នៃជំងឺកូវីដ១៩] ទៀត»។ លោក ទៅមន្ទីរពេទ្យមិត្តភាពខ្មែរ-សូវៀត ដើម្បីជូនដំណើរអ្នកជំងឺកូវីដ១៩ចុងក្រោយគេ ដែលទើបនឹងជាសះស្បើយ វិលត្រឡប់ទៅផ្ទះវិញ។លោករដ្ឋមន្ត្រី បន្តថា កម្ពុជា អាចគ្រប់គ្រងបានចំពោះអ្នកជំងឺកូវីដ១៩ ទាំង១២២នាក់ រហូតព្យាបាលពួកគេ ឲ្យជាសះស្បើយទាំងអស់គ្នា។ លោក មានប្រសាសន៍នៅចំពោះមុខអ្នកកាសែតថា៖«យើង ត្រូវយកការរៀនសូត្រពីការគ្រប់គ្រង [លើអ្នកជំងឺ] ១២២នាក់នេះ ដើម្បីបន្តការងារយើងតទៅមុខទៀត ពង្រឹងការងារតទៅមុខទៀត ដើម្បីកុំឲ្យមានការចម្លង ឬមួយបើមានការអី យើងត្រូវគ្រប់គ្រងឲ្យបាន។ នេះជាជំហាននៃការរៀនសូត្រ-ដកពិសោធរបស់យើង»។
រដ្ឋមន្ត្រីសុខាភិបាល ថ្លែងថា ភាគច្រើននៃអ្នកជំងឺកូវីដ១៩ គឺនាំចូលមកពីក្រៅប្រទេស ដូច្នេះ រដ្ឋាភិបាលកម្ពុជា នៅតែត្រួតពិនិត្យគ្រប់ច្រកចេញចូល និងប្រុងប្រយ័ត្នខ្ពស់ចំពោះការធ្វើដំណើចូលមករបស់ភ្ញៀវបរទេស។ លើសពីនេះ លោក បន្តអំពាវនាវឲ្យប្រជាជន រក្សាអនាម័យនិងការពារកុំឆ្លងជំងឺកូវីដ១៩។
ព្រោះតែបារម្ភនឹងរលកទីពីរនៃការផ្ទុះជំងឺកូវីដ១៩ ទើបសម្តេចនាយករដ្ឋមន្ត្រី ហ៊ុន សែន មិនទាន់ឲ្យបើកសាលារៀនឡើងវិញ។ នាកិច្ចប្រជុំគណៈរដ្ឋមន្ត្រី កាលពីព្រឹកថ្ងៃទី១៥ ខែឧសភា ប្រមុខរដ្ឋាភិបាល បង្ហាញក្តីបារម្ភថា៖«ក្រែងលោផ្ទុះឡើងវិញ ហើយទប់ស្កាត់លែងបាន ជាពិសេសការស្នើសុំឲ្យបើកសាលាឡើងវិញ គឺមិនគួរប្រញាប់ប្រញាល់ក្នុងការបើកទេ...ប្រសិនបើវាចូលក្នុងសាលា គឺវាស្មើនឹងការចូលក្នុងសហគមន៍តែម្តង»។
ចំណែកអាជីវកម្មនានា ដូចជា ក្លិបកម្សាន្ត រោងកុន ខារ៉ាអូខេ ប៊ីហ្កាឌិន កាស៊ីណូ កន្លែងម៉ាស្សា-ស្ប៉ា និង កន្លែងហាត់ប្រាណ ជាដើម ក៏រដ្ឋាភិបាល មិនទាន់អនុញ្ញាតឲ្យបើកវិញដែរ។
នាយករដ្ឋមន្ត្រី ក៏ដូចរដ្ឋមន្ត្រីសុខាភិបាលដែរ គឺនៅតែទទូចកុំឲ្យប្រជាជន មើលស្រាលចំពោះជំងឺកូវីដ១៩ ថ្វីបើពេលនេះ ហាក់មានសភាពធូរស្បើយខ្លាំងក៏ដោយ៕
（សរុបដោយសាមេត）
មតិពីមិត្តអ្នកអាន