សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃពុធ ទី០៦ ខែវិច្ឆិកា ឆ្នាំ២០១៩នេះ អញ្ជើញជាអធិបតីភាពបើកសន្និសីទ អគ្គព្រះរាជអាជ្ញាអាស៊ាន-ចិន លើកទី១២ ដែលប្រារព្ធធ្វើឡើងនៅខេត្តសៀមរាប។
សម្តេចតេជោ ហ៊ុន សែន អញ្ជើញបើកសន្និសីទ អគ្គព្រះរាជអាជ្ញាអាស៊ាន-ចិនលើកទី១២ នៅខេត្តសៀមរាប។
សន្និសីទអគ្គព្រះរាជអាជ្ញាអាស៊ាន-ចិនលើកទី១២ ត្រូវធ្វើឡើងក្រោមប្រធានបទ «តួនាទីព្រះរាជអាជ្ញាក្នុងការប្រយុទ្ធប្រឆាំង អំពើជួញដូរមនុស្សនៅក្នុងតំបន់»។ សន្និសីទអគ្គព្រះរាជអាជ្ញាអាស៊ាន-ចិនលើកទី១២ មានរយៈពេលប្រមាណពីរថ្ងៃនេះ មានការអញ្ជើញចូលរួមពីអគ្គព្រះរាជអាជ្ញា អគ្គរដ្ឋអាជ្ញា ឬប្រធានប្រតិភូមកពីបណ្តាបណ្តាប្រទេសនៃសមាគមអាស៊ាន និងប្រទេសចិនផងដែរ។
មុនពេលបើកសន្និសីទសម្តេចតេជោ ហ៊ុន សែន ក៏អនុញ្ញាតឱ្យអគ្គព្រះរាជអាជ្ញា អគ្គរដ្ឋអាជ្ញា ក៏ដូចជាប្រធានប្រតិភូចូលជួបសម្តែងការគួរសម និងពិភាក្សាលើការងារមួយចំនួនផងដែរ។
សូមបញ្ជាក់ថា សន្និសីទអគ្គព្រះរាជអាជ្ញាអាស៊ាន-ចិន គឺជាយន្តការកិច្ចសហប្រតិបត្តិការក្នុងតំបន់ក្នុងវិស័យអយ្យការ ដែលទទួលបានការឧបត្ថម្ភគាំទ្រពីអយ្យការប្រជាជនជាន់ខ្ពស់នៃសាធារណរដ្ឋប្រជាមានិតចិន។
ចាប់តាំងពីការបង្កើតឡើងដំបូងក្នុងឆ្នាំ២០០៤ សន្និសីទបានប្តេជ្ញាលើកកម្ពស់ការកសាងសមត្ថភាពរបស់ស្ថាប័នរដ្ឋអាជ្ញា ក្នុងការប្រយុទ្ធប្រឆាំងឧក្រិដ្ឋកម្មការពារសុខុមាលភាព និងការថែរក្សាសន្តិភាព និងស្ថេរភាពនៅក្នុងតំបន់អាស៊ាននិងចិន។
លោកជំទាវ ហាយ៉ាស ស៊ូរៃនី និងសម្តេចតេជោ ហ៊ុន សែន។ (ប្រភព៖ AKP)
គួរជម្រាបថានៅមុនការចាប់ផ្តើមពិធីបើកសន្និសីទនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ប្រតិភូអគ្គព្រះរាជអាជ្ញា-រដ្ឋអាជ្ញាមកពីបណ្ដាប្រទេសអាស៊ាន និងប្រទេសចិន ដឹកនាំដោយលោកជំទាវ ហាយ៉ាស ស៊ូរៃនី ចូលជួបសម្តែងការគួរសម។
ឯកឧត្តម អ៊ាង សុផល្លែត ជំនួយការសម្តេចតេជោ បានឱ្យដឹងថា ក្នុងជំនួបនេះ ប្រតិភូអគ្គព្រះរាជអាជ្ញា-រដ្ឋអាជ្ញាមកពីបណ្ដាប្រទេសអាស៊ាន និងចិនបានគោរពសម្ដែងការដឹងគុណសម្តេចតេជោ ដែលបានឆ្លៀតពេលដ៏មមាញឹក មកធ្វើជាអធិបតីក្នុងសន្និសីទនេះ។ លោកជំទាវ ហាយ៉ាស ស៊ូរៃនី បានលើកឡើងថា សន្និសីទដែលរៀបចំឡើងនាពេលនេះ គឺដើម្បីធ្វើការរួមគ្នា ពង្រឹងកិច្ចសហប្រតិបត្តិការ ឱ្យបានកាន់តែស៊ីជម្រៅថែមទៀត ក្នុងការប្រយុទ្ធប្រឆាំងនឹងអំពើឧក្រិដ្ឋកម្មឆ្លងដែន ជាពិសេសលើការជួញដូរមនុស្ស។
ជាការឆ្លើយតប សម្តេចតេជោ ហ៊ុន សែន បានសម្ដែងការស្វាគមន៍ ដល់ព្រះរាជអាជ្ញា-រដ្ឋអាជ្ញាទាំងអស់ ដែលបានមកកាន់ទីក្រុងសៀមរាប ដែលជាអតីត រាជធានីរបស់កម្ពុជា កាលពីជាង១ពាន់ឆ្នាំមុន។ សម្ដេចតេជោបានលើកឡើងថា ប្រធានបទការប្រយុទ្ធប្រឆាំងជួញដូរមនុស្ស នៅក្នុងឱកាសនេះ គឺជាប្រធានបទដ៏ត្រឹមត្រូវមួយ ព្រោះថានេះគឺជាអ្វីដែលយើងត្រូវធ្វើ ដើម្បីជួយដល់ជនស្លូតត្រង់ ជាពិសេសពលករ ដែលកំពុងតែមានចលនា និងលំហូរ នៅក្នុងតំបន់អាស៊ាន ហើយតែងតែមានជនខិលខូច ឬក៏ឧក្រិដ្ឋជន កេងប្រវ័ញ្ចលើជនស្លូតត្រង់ទាំងនេះ។ សម្ដេចតេជោបានបន្តថា តាមរយៈវេទិកានេះ សម្ដេចតេជោបាន សូមផ្ដល់ក្តីសង្ឃឹមថា កិច្ចសហប្រតិបត្តិការរវាងប្រទេសទាំងអស់ ជាពិសេសរវាងព្រះរាជអាជ្ញា និងរដ្ឋអាជ្ញា នៃប្រទេសអាស៊ានជាមួយចិន នឹងមានការពង្រឹងកាន់តែខ្លាំង និងរឹងមាំថែមទៀត ជាផលប្រយោជន៍ ដើម្បីទប់ស្កាត់ឧក្រិដ្ឋកម្មឆ្លងដែនផង និងឧក្រិដ្ឋកម្មទាំងឡាយ ដែលមានទៅលើប្រជាជនស្លូតត្រង់ នៅក្នុងតំបន់អាស៊ាន-ចិនផងដែរ៕
（សរុបដោយវិច្ឆិកា）
មតិពីមិត្តអ្នកអាន