ប្រមុខរាជរដ្ឋាភិបាលកម្ពុជា សម្ដេចអគ្គមហា សេនាបតីតេជោ ហ៊ុន សែន បានសម្ដែងនូវការអរគុណសារជាថ្មីចំពោះប្រជាពលរដ្ឋ និងមន្រ្តីរាជការ ព្រមទាំងកូនក្មួយកម្មករ កម្មការិនីទាំងអស់ ដែលបានយោគយល់ និងចូលរួមទប់ ស្កាត់ប្រយុទ្ធប្រឆាំងកម្ចាត់ជំងឺកូវីដ-១៩ ដោយបន្តធ្វើការងារធម្មតាក្នុងថ្ងៃបុណ្យចូលឆ្នាំប្រពៃ ណីជាតិ។
សម្ដេចអគ្គមហា សេនាបតីតេជោ ហ៊ុន សែននិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
នៅលើផេកផ្លូវការរបស់សម្ដេចតេជោ នៅថ្ងៃចន្ទ ៦រោច ខែចេត្រ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៣ ខែមេសា ឆ្នាំ២០២០នេះ បានសរសេរថា ជូនពរឆ្នាំថ្មី ១៣-១៦ មេសា ២០២០។ នៅក្នុងឱកាសនៃថ្ងៃបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី១៣-១៦ ខែមេសា ឆ្នាំ ២០២០ ខ្ញុំព្រះករុណា និងភរិយា សូមប្រគេនពរព្រះសង្ឃគ្រប់ព្រះអង្គ និងជូនពរបងប្អូនជនរួម ជាតិ និងកងកម្លាំងប្រដាប់អាវុធទូទាំងប្រទេស ជួបតែសេចក្តីសុខ សេចក្តីចម្រើន មានលាភ ជ័យ សុភមង្គល និងសុខភាពល្អចៀសផុតពីជំងឺទាំងឡាយរួមទាំងជំងឺកូវីដ-១៩។
សម្ដេចតេជោនាយករដ្ឋមន្ត្រី ក៏សូមអរគុណសារជាថ្មីចំពោះបងប្អូនប្រជាពលរដ្ឋ និង មន្រ្តីរាជការ ព្រមទាំងកូនក្មួយកម្មករ កម្មការិនីទាំងអស់ ដែលបានយោគយល់ និងចូលរួមទប់ស្កាត់ប្រយុទ្ធប្រឆាំងកម្ចាត់ជំងឺកូវីដ-១៩ ដោយបន្តធ្វើការងារជាធម្មតាក្នុងថ្ងៃចូលឆ្នាំ។ ទន្ទឹម នឹងនេះសូមបន្តធ្វើតាមការណែនាំរបស់ក្រសួងសុខាភិបាល ដើម្បីសុវត្ថិភាពសុខភាព អាយុ ជីវិតទាំងអស់គ្នា៕
（ប្រភពព័ត៌មាន: ប្រភពព័ត៌មាននិងរូបថត៖ akp.com.khmer）
មតិពីមិត្តអ្នកអាន