កិច្ចសហប្រតិបត្តិការលើវិស័យការពារជាតិ៖ សសរស្តម្ភសំខាន់ក្នុងទំនាក់ទំនងវៀតណាម-កម្ពុជា

វៀតណាម និងកម្ពុជា ជំរុញកិច្ចសហប្រតិបត្តិការលើច្បាប់យោធា ការពារជាតិ

កិច្ចសហប្រតិបត្តិការលើវិស័យការពារជាតិ គឺជាសសរស្តម្ភសំខាន់ក្នុងទំនាក់ទំនងវៀតណាម-កម្ពុជា

ផលប៉ះពាល់ជាក់ស្តែងពីកិច្ចសហប្រតិបត្តិការការពារជាតិ

ពិធីទទួលបដិសណ្ឋារកិច្ចគណៈប្រតិភូក្រសួងការពារជាតិ នៃប្រទេសទាំងពីរ បានប្រព្រឹត្តទៅយ៉ាងឱឡារិកនៅច្រកទ្វារព្រំដែនត្រពាំងស្រែ ស្រុកស្នួល ខេត្តក្រចេះ (កម្ពុជា) និងច្រកទ្វារព្រំដែនអន្តរជាតិ Hoa Lu ស្រុក Loc Ninh ខេត្ត Binh Phuoc (វៀតណាម)។ គណៈប្រតិភូក្រសួងការពារប្រទេសវៀតណាមដឹកនាំដោយលោកនាយឧត្តមសេនីយ៍ Phan Van Giang រដ្ឋមន្ត្រីក្រសួងការពារប្រទេសវៀតណាម។ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា បានដឹកនាំគណៈប្រតិភូក្រសួង​​ការពារជាតិកម្ពុជា។

ថ្លែងមតិជាមួយសារព័ត៌មាន ឧត្តមសេនីយ៍ឯក Le Duc Thai - សមាជិកគណៈកម្មាធិការមជ្ឈិមបក្ស សមាជិកគណៈកម្មាធិការមជ្ឈិមបក្ស មេបញ្ជាការឆ្មាំព្រំដែន បានឲ្យដឹងថា៖ ក្រសួងការពារជាតិ បញ្ជាការដ្ឋានការពារព្រំដែន និងកងកម្លាំងការពារព្រំដែននៃ ចិន ឡាវ និងកម្ពុជាបានសម្របសម្រួលអនុវត្តកម្មវិធីផ្លាស់ប្តូរមិត្តភាពតាមព្រំដែនជាច្រើន ដែលមានសារៈសំខាន់យ៉ាងជ្រាលជ្រៅ រួមចំណែកលើកកម្ពស់ចំណងសាមគ្គីភាពមិត្តភាពរបស់ប្រជាជន និងកងកម្លាំងការពារព្រំដែនវៀតណាមជាមួយប្រទេសជិតខាង។

បន្ទាប់ពីពិធីទទួលបដិសណ្ឋារកិច្ច រដ្ឋមន្ត្រីក្រសួងការពារជាតិ នៃប្រទេសទាំងពីរ បានប្រារព្ធពិធីគោរពបង្គោលព្រំដែន លាបពណ៌បង្គោលព្រំដែន ថតរូបជុំគ្នា ដាំដើមឈើមិត្តភាពនៅច្រកទ្វារព្រំដែនចំនួន២ អញ្ជើញ​​ជាសាក្សី​ក្នុង​ពិធីយាមល្បាតរួមគ្នារវាងកម្លាំងការពារព្រំដែននៃប្រទេសទាំងពីរដែលដឹកនាំដោយកងទ័ពការពារព្រំដែនវៀតណាម។

ពិធីជំនួបប្រាស្រ័យលើកនេះគឺជាសកម្មភាពដ៏ធំមួយ មានអត្ថន័យជានិមិត្តរូប ដែលក្រសួងការពារជាតិទាំងពីរសហការរៀបចំឡើងក្នុងគោលបំណងឆ្ពោះទៅរក “ឆ្នាំមិត្តភាពវៀតណាម - កម្ពុជា; កម្ពុជា - វៀតណាម” និងខួបលើកទី ៥៥ នៃការបង្កើតទំនាក់ទំនងការទូតរវាងប្រទេសទាំងពីរ (ថ្ងៃទី ២៤ ខែមិថុនា ឆ្នាំ ១៩៦៧ / ថ្ងៃទី ២៤ ខែមិថុនា ឆ្នាំ ២០២២)។

ក្នុងក្របខ័ណ្ឌនៃពិធីជំនួបប្រាស្រ័យនេះ លោកនាយឧត្តមសេនីយ៍ Phan Van Giang ថ្លែង​ថា៖ "វៀតណាម-កម្ពុជា ជាប្រទេសជិតខាងភូមិផងរបងជាមួយគ្នា។ ប្រជាជននៃប្រទេសទាំងពីរមានទំនាក់ទំនងជិតស្និទ្ធ ប្រពៃណី សាមគ្គីភាព ជួយគ្នាទៅវិញទៅមកតាំងពីយូរយារណាស់មកហើយ។ ក្នុងដំណើរការតស៊ូទាមទារឯករាជ្យជាតិពីមុន​ ក៏ដូចជាការកសាងប្រទេស​នាពេលបច្ចុប្បន្ននេះ ប្រទេសយើងទាំងពីរ​តែងតែប្រកៀកស្មាគ្នាជាមួយគ្នា ចែករំលែកទាំងភាពផ្អែមល្ហែម និងល្វីងជូរចត់ ផ្តល់ការគាំទ្រ និងជំនួយដ៏មានតម្លៃដល់គ្នាទៅវិញទៅមក។ ទំនាក់ទំនងល្អនេះត្រូវបានបង្កើតឡើងដោយលោកប្រធានហូជីមិញ និងព្រះបរមរតនកោដ្ឋ សម្តេចព្រះនរោត្តមសីហនុ ហើយត្រូវបានពូនជ្រំដោយថ្នាក់ដឹកនាំគ្រប់ជំនាន់នៃប្រទេសទាំងពីរ។ ប្រវត្តិសាស្ត្របានបង្ហាញថា ទំនាក់ទំនងរវាងវៀតណាម និងកម្ពុជាបានក្លាយជាកត្តាសំខាន់សម្រាប់ជោគវាសនានៃប្រទេសយើងទាំងពីរ"។

ចំណែកសម្តេចពិជ័យសេនា ទៀ បាញ់ បានវាយតម្លៃខ្ពស់ចំពោះគំនិតផ្តួចផ្តើមរបស់វៀតណាមក្នុងការរៀបចំជំនួបប្រាស្រ័យមិត្តភាពការពារជាតិ​ព្រំដែនវៀតណាម-កម្ពុជា។ ភាគីទាំងពីរបានអនុវត្តយ៉ាងសកម្ម និងប្រកបដោយប្រសិទ្ធភាពនូវខ្លឹមសារនៃកិច្ចសហប្រតិបត្តិការដែលបានឯកភាពនៅក្នុងកិច្ចប្រជុំរវាងរដ្ឋមន្ត្រីក្រសួងការពារជាតិទាំងពីរនៅរាជធានីភ្នំពេញក្នុងខែធ្នូ ឆ្នាំ២០២១។ សកម្មភាពផ្លាស់ប្តូរព័ត៌មាន ការថែរក្សាសន្តិសុខ សណ្តាប់ធ្នាប់សង្គម និងសុវត្ថិភាពនៅតាមតំបន់ព្រំដែន ការជួយគ្នាទៅវិញទៅមកក្នុងការទប់ស្កាត់ការរីករាលដាលនៃជំងឺកូវីដ១៩ និងកិច្ចសហប្រតិបត្តិការបណ្តុះបណ្តាល ត្រូវបានភាគីទាំងពីរសម្របសម្រួលអនុវត្តប្រកបដោយប្រសិទ្ធភាព។

អំពីទិសដៅនៃកិច្ចសហប្រតិបត្តិការនាពេលខាងមុខ ភាគីទាំងពីរបានឯកភាពផ្តោតលើ៖ ការបង្កើនការដឹកនាំការសម្របសម្រួល និងអនុវត្តខ្លឹមសារនៃកិច្ចសហប្រតិបត្តិការដែលបានឯកភាពក្នុងពិធីសារកិច្ចសហប្រតិបត្តិការលើវិស័យការពារជាតិរយៈពេល៥ឆ្នាំ ផែនការសហប្រតិបត្តិការប្រចាំឆ្នាំ; បង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់; កិច្ចសន្ទនាគោលនយោបាយការពារជាតិនៅថ្នាក់អនុរដ្ឋមន្ត្រី; កិច្ចសហប្រតិបត្តិការរវាងបណ្តាប្រភេទទ័ព កងកម្លាំងប្រដាប់អាវុធ កងទ័ពការពារព្រំដែន; កិច្ចសហប្រតិបត្តិការក្នុងការឃោសនាអប់រំនយោបាយ; គាំទ្រគ្នាទៅវិញទៅមកក្នុងវេទិកាពហុភាគីក្នុងតំបន់ និងអន្តរជាតិ។

នាយឧត្តមសេនីយ៍ Phan Van Giang និងឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា សម្តេចពិជ័យសេនា ទៀ បាញ់ នៅបង្គោលព្រំដែន។

សសរស្តម្ភសំខាន់ក្នុងទំនាក់ទំនងវៀតណាម-កម្ពុជា

កិច្ចសហប្រតិបត្តិការលើវិស័យការពារជាតិ គឺជាសសរស្តម្ភដ៏សំខាន់ រួមចំណែកជាច្រើនក្នុងការអភិវឌ្ឍន៍ទំនាក់ទំនងអ្នកជិតខាងល្អ មិត្តភាពប្រពៃណី និងកិច្ចសហប្រតិបត្តិការលើគ្រប់វិស័យរវាងវៀតណាម និងកម្ពុជា។ ក្នុងរយៈពេលកន្លងមក ទន្ទឹមនឹងការពង្រឹង និងបង្រួបបង្រួមទំនាក់ទំនងមិត្តភាព និងកិច្ចសហប្រតិបត្តិការឥតឈប់ឈរ វៀតណាម និងកម្ពុជាតែងតែអះអាងនូវការគោរពឯករាជ្យ អធិបតេយ្យភាព និងបូរណភាពទឹកដីរបស់គ្នាទៅវិញទៅមក ព្រោះព្រំដែន និងទឹកដីតែងតែជាប្រធានបទដ៏ពិសិដ្ឋសម្រាប់ប្រជាជាតិនីមួយៗ។ ការធានាបាននូវសន្តិសុខនយោបាយ សណ្តាប់ធ្នាប់សង្គម និងសុវត្ថិភាពនៅតាមតំបន់ព្រំដែន និងការសម្រួលដល់ការអភិវឌ្ឍនៃការផ្លាស់ប្តូរលើគ្រប់វិស័យរវាងអាជ្ញាធរ និងប្រជាជននៅតាមព្រំដែនទាំងពីរ ក៏ដើម្បីផលប្រយោជន៍ និងការរីកចម្រើនរបស់ប្រទេសវៀតណាម និងកម្ពុជា។

ក្នុងបរិបទនោះ ដោយមានកម្រិតខ្ពស់ជាងកម្មវិធីផ្លាស់ប្តូរមុនៗ ពិធីជំនួបប្រាស្រ័យមិត្តភាពការពារជាតិព្រំដែនវៀតណាម-កម្ពុជា នៅថ្នាក់ក្រសួងការពារជាតិ មានសារសំខាន់យ៉ាងខ្លាំងចំពោះកិច្ចការបរទេសរ​វាងប្រទេសទាំងពីរ។ នេះជាឱកាសសម្រាប់ថ្នាក់ដឹកនាំនៃក្រសួងការពារជាតិទាំងពីរបានជួបពិភាក្សា និងចែករំលែកបញ្ហាដែលយកចិត្តទុកដាក់គ្នាទៅវិញទៅមក ផ្លាស់ប្តូរ និងឯកភាពលើទិសដៅសំខាន់ៗក្នុងកិច្ចសហប្រតិបត្តិការ បង្កើតកម្លាំងចលករជំរុញកិច្ចសហប្រតិបត្តិការលើវិស័យការពារជាតិទ្វេភាគីឱ្យរីកចម្រើនឥតឈប់ឈរ។

តាមរយៈសកម្មភាពខាងក្រៅដ៏វិសេសវិសាលនេះ ទំនាក់ទំនងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ព និងកងទ័ពការពារព្រំដែនវៀតណាម និងកម្ពុជានឹងកាន់តែរឹងមាំ និងរឹងមាំថែមទៀត។ ក៏ដូចជាបង្កើតឥទ្ធិពលដ៏ទូលំទូលាយ និងវិជ្ជមានលើផ្ទៃក្នុង និងក្រៅប្រទេសនីមួយៗ ជាពិសេសជាមួយរដ្ឋាភិបាលមូលដ្ឋានគ្រប់លំដាប់ថ្នាក់ ប្រជាជននៅសងខាងព្រំដែន​​ ដែលរួមចំណែកកសាងតំបន់ព្រំដែនរវាងវៀតណាម និងកម្ពុជា ក្នុងសន្តិភាព ស្ថិរភាព មិត្តភាព កិច្ចសហប្រតិបត្តិការ និងការអភិវឌ្ឍន៍៕

thoidai.com.vn