លោក អេឌ្យូដូ កូប្រា វ័យ ៤៤ ឆ្នាំជាវិចិត្រករផ្នែកគំនូរតាមដងផ្លូវមានឈ្មោះល្បីម្នាក់ក្នុងពិភពលោក ភាពល្បីល្បាញនេះកើតឡើងដោយសារស្នាដៃលាបពណ៌គំនូរដ៏ល្អភ្លឺចែងចាំង និងភាពរហ័សរហួននៃការគូរគំនូរលើផ្ទាំងជញ្ជាំងតាមដងផ្លូវរបស់គាត់ ហើយលោកនឹងប្រើប្រាស់គំនូរនោះដើម្បីជួយប្រជាជនដែលកំពុងរងគ្រោះដោយសារជំងឺរាតត្បាតនាពេលបច្ចុប្បន្ន។
វិចិត្រករធ្លាប់បំណែក ឯកត្តកម្មពិភពលោក គូរគំនូរកុមារពាក់ម៉ាស រំលេចអត្តសញ្ញាណសាសនាធំៗ តាមដងផ្លូវ
បើនិយាយតាមបែបបច្ចេកទេស នេះមិនមែនជាពេលវេលាសក្តិសមសម្រាប់អាជីពជាវិចិត្រករគូររូបនៅតាមដងផ្លូវទេ ព្រោះមនុស្សគ្រប់គ្នាមិនអាចចេញទៅក្រៅ ដើម្បីមើលគំនូរទាំងនោះឡើយ។
ប៉ុន្តែវិចិត្រករឯកទេសខាងផ្នែកគំនូរជនជាតិប្រេស៊ីលម្នាក់ ឈ្មោះ កូប្រា បាននិយាយថា ទោះជាស្ថិតក្នុងកាលៈទេសៈបែបនេះ គាត់នៅតែសម្លឹងឃើញប្រភេទគំនូរ ដែលអាចបំផុសគំនិតប្រជាជនឲ្យនៅក្នុងផ្ទះ មិនចេញទៅណា ហើយលោកនឹងប្រើប្រាស់គំនូរនោះដើម្បីជួយប្រជាជនដែលកំពុងរងគ្រោះដោយសារជំងឺរាតត្បាតនាពេលបច្ចុប្បន្ន។
លោក អេឌ្យូដូ កូប្រា វ័យ ៤៤ ឆ្នាំជាវិចិត្រករផ្នែកគំនូរតាមដងផ្លូវមានឈ្មោះល្បីម្នាក់ក្នុងពិភពលោក ភាពល្បីល្បាញនេះកើតឡើងដោយសារស្នាដៃលាបពណ៌គំនូរដ៏ល្អភ្លឺចែងចាំង និងភាពរហ័សរហួននៃការគូរគំនូរលើផ្ទាំងជញ្ជាំងតាមដងផ្លូវរបស់គាត់។
មិនត្រឹមតែប៉ុណ្ណោះ គាត់ធ្លាប់បំបែកកំណត់ត្រាពិភពលោក ដល់ទៅ២ដង ផ្នែកផ្ទាំងគំនូរបាញ់ថ្នាំលើជញ្ជាំង។ បំបែកឯកត្តកម្មលើកទី ១ ជាមួយនឹងផ្ទាំងគំនូរ ដែលគូរដោយ កូប្រា និងក្រុមរបស់លោកផ្ទាល់ នៅក្នុងកម្មវិធីប្រកួតកីឡាអូឡាំពិច នៅ ទីក្រុង រីអូ ឆ្នាំ ២០១៦ និងលើកទី២ ក្នុងឆ្នាំបន្ទាប់ នៅទឹកដីកំណើតរបស់ក្នុងទីក្រុង សៅ ប៉ូឡូ ប្រទេសប្រស៊ីល តែម្តង។
ប៉ុន្តែ តើវិចិត្រករតាមដងផ្លូវម្នាក់នេះ ដែលធ្លាប់តែធ្វើដំណើរទៅកាន់ប្រទេសផ្សេងៗក្នុងពិភពលោក ហើយចូលចិត្តធ្វើការខាងក្រៅផ្ទះបែបនេះ អាចសម្ងំនៅក្នុងផ្ទះដ៏ស្ងាត់ជ្រងំ ក្នុងពេលវិបត្តិនៃជំងឺឆ្លង មកយាយ៉ីបានឬទេ?
កូប្រា និយាយនៅក្នុងបទសម្ភាសន៍ជាមួយ AFP នៅក្នុងទីក្រុងតូចមួយនៃភាគខាងជើងថា៖ «ការងាររបស់ខ្ញុំគឺធ្វើការនៅតាមដងផ្លូវ។ ខ្ញុំជាជាងគំនូរ ម្នាក់ ដែលពឹងផ្អែកលើដងផ្លូវ ហើយខ្ញុំក៏គូរគំនូរជាច្រើនលើជញ្ជាំង នៅតាមដងផ្លូវនោះផងដែរ។ ប៉ុន្តែនៅពេលខ្ញុំត្រូវ សំងំនៅក្នុងផ្ទះមិនចេញទៅណាបែបនេះ វាជាការផ្លាស់ប្តូរដ៏ធំមួយសម្រាប់ខ្ញុំ ហេតុនេះ ខ្ញុំត្រូវតែគិត រិះរកមធ្យោបាយក្នុងការផ្លាស់ប្តូរបែបផែននៃការធ្វើការរបស់ខ្ញុំ និងព្យាយាមគិតជាថ្មីអំពី ការច្នៃប្រឌិតថ្មី»។
គាត់និយាយថា ដំបូងឡើយ គាត់ដូចជាមនុស្សពិការចឹង គិតរកនឹកធ្វើអ្វីមិនឃើញ។ ប៉ុន្តែបន្ទាប់មក គាត់ចាប់ផ្តើមគិតម្តងហើយម្តងទៀត រហូតមានគំនិតមួយផុសឡើងថា គាត់អាចគូរគំនូរដែលពាំនាំ នូវក្តីសង្ឃឹមដល់មនុស្សគ្រប់គ្នា ក្នុងអំឡុងពេលកំពុងជួបវិបត្តិនេះ និងព្យាយាមប្រមូលថវិកាពីការគូរគំនូរនោះ ដើម្បីជួយប្រជាជន ដែលកំពុងរងគ្រោះពីវិបត្តិនេះ។ ក្នុងអំឡុងពេលឃុំខ្លួននៅក្នុងផ្ទះ កូប្រា បាន គូរគំនូរស្តីពី «ការរួមរស់ជាមួយគ្នា» តូចនៅលើផ្ទាំងក្រណាត់មួយ។
គំនូរនោះ ពិពណ៌នាអំពីកុមារប្រាំរូប មកពី ទ្វីបទាំងប្រាំ ផ្សេងៗគ្នា កំពុងបួងសួងជាមួយផ្ទៃមុខដែលគ្របដណ្តប់ដោយម៉ាសការពារមុខ ដែលមានដាក់រូបសញ្ញាតំណាងឲ្យសាសនា ធំៗទាំងប្រាំ នៅក្នុងពិភពលោកដូចជា សាសនាអ៊ីស្លាម ព្រះពុទ្ធ គ្រិស្ត យូដដា និងសាសនាហិណ្ឌូ។
រូបគំនូរមួយផ្ទាំងនោះ មើលទៅតូចសម្រាប់ស្តង់ដា របស់ កូប្រា ប៉ុន្តែការពិត គឺវា ពិតជាធំ និងមានកំពស់ខ្ពស់ជាងខ្លួនគាត់ទៅទៀត។ យ៉ាងណាមិញ វិចិត្រកររូបនេះ មានក្តីសុបិន្តថា នឹងគូរគំនូរមួយផ្ទាំងនេះក្នុងទំរង់ និងសណ្ឋានបែបពេញលេញ មួយចំហ នៅកន្លែងណាមួយនៃពិភពលោកនេះ នៅពេលដែលស្ថានភាពនៃការរាតត្បាតនៃជំងឺឆ្លងមានលក្ខណៈប្រសើរ។គាត់បានលើកឡើងនូវឃ្លាមួយយ៉ាងដូច្នេះថា «ជួយអ្នកដែលគ្មានផ្ទះសម្បែង»។
វិចិត្រករធ្លាប់បំណែក ឯកត្តកម្មពិភពលោក គូរគំនូរកុមារពាក់ម៉ាស រំលេចអត្តសញ្ញាណសាសនាធំៗ តាមដងផ្លូវ
ក្នុងពេលបច្ចុប្បន្ន កូប្រា កំពុងធ្វើការនៅក្នុងផ្នែកទី២ នៃគម្រោងរបស់លោក គឺការប្រគល់ ផ្ទាំងគំនូររបស់លោក ទៅកាន់អ្នកដេញថ្លៃ ដែលបានបរិច្ចាគថវិកាជួយដល់ប្រជាជនក្រីក្រដែលកំពុងត្រូវការម្ហូបអាហារ និងសំភារៈប្រើប្រាស់ផ្សេងៗ ព្រមទាំងអ្នកដែលកំពុងសំងំនៅក្នុងផ្ទះ ហើយពិបាកក្នុងការស្វែងរកអាហារបរិភោគ នៅក្នុងទីក្រុង សៅ ប៉ូឡូ។
កូប្រា វិចិត្រករស្លៀកពាក់ ពណ៌ខ្មៅ ពីលើដល់ក្រោម ដែលមើលទៅមានពណ៌ផ្ទុយគ្នាទៅនឹងគំនូរដែលគាត់កំពុងលាបពណ៌ បានលើកឡើងថា៖ «ប្រសិនបើយើងមានអារម្មណ៍ភ័យខ្លាចនៅពេលស្នាក់នៅក្នុងផ្ទះ ចូរយើងធ្វើការស្រមើស្រមៃពីជីវិតនៃអ្នកគ្មានផ្ទះសំបែង ហើយត្រូវរស់នៅតាមចិញ្ចើមផ្លូវ។ វាមិនមែនជារឿងល្អប៉ុន្មានទេ ដែលយើងអាចនៅក្នុងផ្ទះ ដោយមិនបានគិតអំពីមនុស្សជាតិដទៃទៀតដែលកំពុងខ្វះខាតនៅខាងក្រៅនោះ»។
កូប្រា កំពុងស្វែងរកសប្បុរសជន ដើម្បីចូលរួមចំណែកជួយក្នុងមូលនិធិ I Know My Rights (IKMR) និងមូលនិធិរបស់ក្រុមហ៊ុនមួយឈ្មោះ Nissi Arts Company។
សម្រាប់កញ្ចប់ ម្ហូបអាហារ និងសំភារៈប្រើប្រាស់ មួយកញ្ចប់ តំលៃ ៤ដុល្លារ។ សប្បុរសជនដែលបរិច្ចាគចំនួន ១០០០ កញ្ចប់ ឬច្រើនជាងនេះ នឹងទទួលបានផ្ទាំងគំនូរមួយផ្ទាំងដោយស្វ័យប្រវតិ្ត។
ការដាក់ដេញថ្លៃ ធ្វើឡើងរៀងរាល់ថ្ងៃ សុក្រ។ ក្រុមការងាររបស់កូប្រានិយាយថា ពេលនេះពួកគេប្រមូលបាន ជំនួយប្រហែល ១១០០០ កញ្ចប់ហើយ។
ជាមួយនឹងទឹកមុខញញឹម ដែលលាក់បាំងពីក្តីកង្វល់របស់លោក ចំពោះវិបត្តិនាពេលបច្ចុប្បន្ន វិចិត្រកររូបនេះ និយាយថា គាត់មានក្តីសង្ឃឹមថា នឹងអាចរៃអង្គាសថវិការ ក៏ដូចជា សំភារៈផ្សេងៗច្រើនជាងនេះទៀត។
គាត់បាននិយាយទៀតថា៖ «ទាំងនេះ គឺជាសប្បុរសជន ដែលជួយ ប្រេស៊ីល ឲ្យដំណើរការទៅមុខ។ នេះ ជាពេលវេលាដែលប្រទេសនេះ ត្រូវក្រលេកមើលមនុស្សដែលរងគ្រោះ ហើយចូលរួមចំណែកជួយពួកគេ»៕
（សរុបដោយ ហេង វុធ្ធី）
（ប្រភពព័ត៌មាន: popular.com.kh និង AFP）
មតិពីមិត្តអ្នកអាន