ជំងឺកូវីដ-១៩ បានធ្វើឱ្យតំបន់អេកូទេសចរណ៍មានឱកាសបង្ហាញសក្ដានុពលរបស់ខ្លួន។ ភ្ញៀវទេសចរក្នុងស្រុក ចាប់ផ្ដើមធ្វើដំណើរកម្សាន្តក្នុងប្រទេស ជាពិសេសនៅតាម តំបន់ ទេសចរណ៍ធម្មជាតិ។ តើអ្នកពាក់ព័ន្ធធ្វើយ៉ាងណា ដើម្បីឱ្យដំណើរកម្សាន្តរបស់ទេសចរក្នុងស្រុកនៅតែមានភាពរស់រវើក ឬរក្សាស្ថិរភាពនៃកំណើនទេសចរ នៅតំបន់អេកូទេសចរណ៍នោះ?
 សំណើផ្លាស់ប្តូររបត់នៃកិច្ចសហប្រតិបត្តិការអន្តរជាតិ លើវិស័យបរិស្ថាននៅកម្ពុជា |
 ទេសចរក្នុងជាតិជិត ១៦ ម៉ឺននាក់បានធ្វើដំណើរកម្សាន្ដនៅតាមតំបន់ទេសចរណ៍នានាក្នុងប្រទេស |
 |
| អ្នកធ្វើការលើវិស័យទេសចរណ៍ផ្លាស់ប្តូរយោបល់គ្នា លើការពង្រឹងទេសចរណ៍សហគមន៍ឲ្យមានស្ថិរភាព |
អ្នកជំនាញផ្នែកទេសចរណ៍ ក្រសួងទេសចរណ៍ និងក្រសួងបរិស្ថាន តាមរយៈកិច្ចតាមរយៈពិភាក្សា «និន្នាការដើរកម្សាន្តតាមតំបន់អេកូទេសចរណ៍ក្នុងបរិបទកូវីដ-១៩» យល់ថា កំណើនអ្នកទេសចរ តាមតំបន់ទេសចរណ៍ធម្មជាតិក្នុងបរិបទជំងឺកូវីដ-១៩ ជាឱកាសល្អសម្រាប់កម្ពុជា ដើម្បីពង្រឹងសេវាកម្មទេសចរណ៍បន្ថែម។
លោកស្រី ឆាយ សៀវលីន ប្រធានសមាគមទីភ្នាក់ងារទេសចរណ៍កម្ពុជា បានលើកឡើងថា មុនពេលផ្ទុះជំងឺកូវីដ-១៩ ភ្ញៀវទេសចរមួយចំនួន បានចេញទៅកម្សាន្តនៅបរទេស ដោយមិនបានចាប់អារម្មណ៍ ពីសក្តានុពលទេសចរណ៍ធម្មជាតិក្នុងស្រុក។ តែកូវីដ-១៩ បានធ្វើឱ្យភ្ញៀវទេសចរមានឱកាស ដើរកម្សាន្តក្នុងស្រុក ជាពិសេសតំបន់អេកូទេសចរណ៍។
«ដើម្បីថែរក្សាភ្ញៀវនៅតំបន់អេកូទេសចរណ៍ត្រូវមានការពង្រឹងសមត្ថភាពដល់ប្រជាសហគមន៍ តាមតំបន់ទេសចរណ៍។ យើងត្រូវធ្វើឱ្យភ្ញៀវទេសចរ ទៅកន្លែងធម្មជាតិមួយ ហើយចង់ទៅមួយទៀត។ គាត់នឹងងាកមកស្រឡាញ់ធម្មជាតិ។ ក្នុងសហគមន៍ ក៏ត្រូវបន្ថែមសេវាកម្មមួយចំនួន ដែលភ្ញៀវត្រូវការ ផងដែរ»។ នេះជាការអះអាងរបស់ អ្នកស្រី ឆាយ សៀវលីន។
លោកស្រី ឆាយ សៀវលីន ក៏បានស្នើឱ្យភ្ញៀវទេសចរ ទាក់ទងទៅសហគមន៍មូលដ្ឋាន តាមតំបន់ទេសចរណ៍នីមួយៗដើម្បីជួយផ្ដល់ចំណូលដល់សហគមន៍ ជាពិសេសបញ្ចៀសជម្លោះដណ្ដើមភ្ញៀវទេសចររបស់អាជីវករកបម្រើសេវាកម្មទេសចរណ៍ក្នុងមូលដ្ឋាន។បន្ថែមពីនេះ លោក ឡោ វុឌ្ឍី ជាអ្នករៀបចំកញ្ចប់ទេសចរណ៍បែបផ្សងព្រេង អះអាងថា ខ្នងផ្សា បានធ្វើឱ្យភ្ញៀវទេសចរយល់ពីតម្លៃនៃតំបន់ទេសចរណ៍ធម្មជាតិ។
ភ្ញៀវទេសចរ នៅខ្នងផ្សា កើនឡើងឥតឈប់ឈរ ព្រោះសម្រស់ដ៏ស្រស់ត្រកាល។សម្រស់ធម្មជាតិទាំងនេះ ក៏បានជំរុញឱ្យភ្ញៀវទេសចរចង់បន្តដំណើរកម្សាន្តបែបផ្សងព្រេងទៅកន្លែងថ្មីទៀត។
លោក ឡោ វុឌ្ឍី បានស្នើឱ្យក្រសួងបរិស្ថាន និងក្រសួងទេសចរណ៍ កំណត់ចំនួនភ្ញៀវតាមតំបន់អេកូទេសចរណ៍ និងទេសចរណ៍ផ្សងព្រេង ដើម្បីកុំឱ្យធម្មជាតិរងសម្ពាធ ពីមនុស្សច្រើនខ្លាំងពេក។ លោកក៏បានស្នើឱ្យក្រសួងពាក់ព័ន្ធ អភិវឌ្ឍហេដ្ឋារចនាសម្ព័ន្ធ តាមតំបន់ទេសចរណ៍ផងដែរ។
 |
| លោកស្រី ឆាយ សៀវលីន ប្រធានសមាគមទីភ្នាក់ងារទេសចរណ៍កម្ពុជា |
«កន្លែងទេសចរណ៍ធម្មជាតិខ្លះគឺមានភាពទាក់ទាញខ្លាំង ប៉ុន្តែផ្លូវចូលគឺពិបាកខ្លាំងពេក ធ្វើឱ្យទេសចរពិបាកធ្វើដំណើរ» ។ នេះជាការបញ្ជាក់របស់លោក វុឌ្ឍី។ ជុំវិញបញ្ហានេះ លោកឃិន ម៉េងឃាង ប្រធាននាយកដ្ឋានទេសចរណ៍ធម្មជាតិ នៃក្រសួងបរិស្ថាន បានឆ្លើយតបថា ក្រសួងបរិស្ថាន កំពុងធ្វើការជាមួយក្រសួងអភិវឌ្ឍជនបទ ដើម្បីធ្វើផ្លូវចូលតំបន់ទេសចរណ៍មួយចំនួនដូចជា ទឹកធ្លាក់ជ្រាវ ទឹកធ្លាក់ថ្មដា ក្នុងខេត្តកំពង់ស្ពឺ។លោកសង្កត់ធ្ងន់ថាក្រសួងបរិស្ថាន នឹងពង្រឹងការរក្សាអនាម័យ តាមតំបន់ទេសចរណ៍ធម្មជាតិ ប៉ុន្តែភ្ញៀវទេសចរ ក៏ត្រូវសហការដែរ។ «បញ្ហាសំរាមនៅតែមានទោះបីក្រសួងបានអប់រំណែនាំ ដាក់ឡដុតសំរាម ធុងសំរាម ហើយក្រសួង ក៏បានដាក់ស្លាកណែនាំដែរ។ បញ្ហានេះ យើងមិនទាន់ដោះស្រាយបានអស់ទេ យើងនឹងខិតខំអប់រំគាត់ ឱ្យយល់ពីអត្ថប្រយោជន៍នៃធនធានធម្មជាតិ ធ្វើយ៉ាងណាឱ្យទេសចរ ដើរលេងដោយទទួលខុសត្រូវ»។ នេះជាការបញ្ជាក់របស់លោក ឃិន ម៉េងឃាង ដោយបន្ថែមថាតាមសហគមន៍អាចពិន័យភ្ញៀវ ដែលចោលសំរាមផ្ដេសផ្ដាសបាន។
ក្នុងវិបត្តិកូវីដ-១៩ ការដើរកម្សាន្តនៅតំបន់អេកូទេសចរណ៍ បានទ្រទ្រង់វិស័យទេសចរណ៍ទាំងមូល ខណៈទេសចរណ៍បែបវប្បធម៌ មានសភាពស្ងប់ស្ងាត់។ លោក ជុក ជំនោ អ្នកនាំពាក្យក្រសួងទេសចរណ៍ បានលើកឡើងថា ក្រសួងទេសចរណ៍ កំពុងអភិវឌ្ឍតំបន់អេកូទេសចរណ៍មួយចំនួន តាមរយៈការបណ្ដុះបណ្ដាលប្រជាសហគមន៍ ពីការបដិសណ្ឋារកិច្ចដល់ភ្ញៀវទេសចរ។ ប៉ុន្តែលោកសង្កត់ធ្ងន់ថា តំបន់ទេសចរណ៍ធម្មជាតិ មិនអាចមានភាពប្រណីត ដូចរមណីយដ្ឋាន ឬរីសតនោះទេ។
លោក ជុក ជំនោ បញ្ជាក់យ៉ាងថា៖«យើងអាចមើលឃើញថា កន្លែងខ្លះសេវាទេសចរណ៍ដូចជាមិនទាន់ល្អផ្លូវមិនទាន់គ្រប់គ្រាន់ ប៉ុន្តែបើយើងគិតត្រឡប់ថយក្រោយវិញដំណើរកម្សាន្តបែបអេកូទេសចរណ៍ គឺទេសចរដែលស្រឡាញ់ធម្មជាតិ។ យើងមិនអាចរំពឹងថា ការដើរកម្សាន្តក្នុងសហគមន៍ វាមានភាពប្រណីតទេ»៕
Thmeythmey/cambodianess
មតិពីមិត្តអ្នកអាន