យុគសម័យ - នាព្រឹកថ្ងៃទី ១៧ ខែមេសា ឥណ្ឌូនេស៊ីបានចាប់ផ្តើមការបោះឆ្នោតដែលត្រូវបានចាត់ទុកជាការបោះឆ្នោតធំបំផុតនៅលើពិភពលោកក្នុងរយៈពេលត្រឹមតែ ១ ថ្ងៃ តែប៉ុណ្ណោះ។
ប្រធានាធិបតីឥណ្ឌូនេស៊ីលោក Joko Widodo (ឆ្វេង) បានបោះឆ្នោតនៅមណ្ឌលបោះឆ្នោតប្រធានាធិបតីនៅហ្សាកាតានៅថ្ងៃទី ១៧ ខែមេសាឆ្នាំ ២០១៩ (រូបថត AFP / TTXVN)
សម្រាប់បេក្ខជនប្រធានាធិបតីពីររូបដែលលេចធ្លោជាងគេ នៅក្នុងការយុទ្ធនាការបោះឆ្នោតកន្លងមកនេះ គឺប្រធានា ធិបតីបច្ចុប្បន្នលោក Joko Widodo និងអតីតមេបញ្ជាការយោធា ឥណ្ឌូណេស៊ីលោក Prabowo Subianto។ សម្រាប់ការបោះឆ្នោតគឺចាប់ផ្តើមពីខេត្តប៉ាពួរ មុនគេតែម្តង ព្រោះនេះជាខេត្តស្ថិតនៅចុងភាគខាងកើតឥណ្ឌូណេស៊ី ដែលបានទទួលពន្លឺព្រះអាទិត្យមុនគេ និងក្រោយមកទៀត ទើបមានការចាប់ផ្តើមបើកដំណើរការមណ្ឌលជាបន្តបន្ទាប់ រហូតដល់កោះស៊ូម៉ាត្រា ដែលស្ថិតនៅភាគខាងលិច។
បើតាមការចេញផ្សាយដោយ Washington ប៉ុស្តិ៍នៅមុននេះបន្តិច លោក Joko Widdo បានទទួលសំឡេងគាំទ្រលើសគូប្រជែងធំបំផុតរបស់លោកទៅហើយ ក្រោយការរាប់សន្លឹក ឆ្នោតមិនទាន់ផ្លូវការបានប្រមាណ ៨០%។ នៅក្នុងនោះគឺក្នុងចំណោមសន្លឹកឆ្នោតទាំងអស់ ដែលត្រូវបានរាប់មិនទាន់ផ្លូវការ លោក Widodo ទទួលបានការគាំទ្រសរុបរហូតដល់ ៥៥% ដែលលើសលោក Subianto រហូតដល់ទៅជាង ១០% ឯណោះ។ យ៉ាងណាក៏ដោយ លទ្ធផលជាផ្លូវការ គឺនឹងត្រូវប្រកាសនៅ អំឡុងដើមខែឧសភា យ៉ាងឆាប់។
គួរបញ្ជាក់ថា ប្រជាជនឥណ្ឌូណេស៊ីមានចំនួនសរុបជិត ២៧០លាននាក់ ដោយក្នុងនោះ អ្នកមានសិទ្ធិបោះឆ្នោតមានជាង ១៩០លាននាក់។ បន្ថែមពីនេះមណ្ឌលបោះឆ្នោតប្រមាណ ៨០០,០០០កន្លែង បានបើកដំណើរការទូទាំងប្រទេស ដែលមានកោះច្រើនបំផុតលើលោកនេះ ចាប់តាំងពីម៉ោង ៧៖០០នាទីព្រឹក ហើយក្រោយបិទបញ្ចប់ការបោះឆ្នោតនៅល្ងាចថ្ងៃពុធនេះ ហិបផ្ទុកសន្លឹកឆ្នោតទាំងអស់ត្រូវបានគេរៀបចំដឹកតាមទូក ដំរី យន្តហោះ សេះ និងរថយន្តជាដើម ចេញពីបណ្តាកោះ និងតំបន់នានា យកមកទីស្នាក់ការកណ្តាលដើម្បីរាប់៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន