ព្រៃកោងកាងជាប្រភពចំណូលមួយរបស់សហគមន៍ផ្នែកអេកូទេសចរណ៍ធម្មជាតិ ហើយក្រៅពីនេះវាក៏ផ្តល់នូវសក្តានុពលជីវចម្រុះ និង អ្វីដែលពិសេសយើងអាចលក់កាបោនថែមទៀត ដែលនេះមិនរាប់ទាំងការផ្តល់នូវលើវិស័យសេដ្ឋកិច្ចផ្សេងៗផង។
នេះជាការលើកឡើងរបស់ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន កាលពីថ្ងៃទី១៩ខែមិថុនា ឆ្នាំ ២០២០ នាឱកាសដែលលោកដឹកនាំប្រតិភូក្រសួងបរិស្ថានចុះពិនិត្យដំណើរការចិញ្ចឹមខ្យងចំពុះទានិងការកែច្នៃផលិតផលជាច្រើនទៀតក្នុងសហគមន៍តំបន់ការពារធម្មជាតិពាមក្រសោប នៃដែនជម្រកសត្វព្រៃពាមក្រសោប ក្នុងភូមិសាស្ត្រទឹកដីខេត្តកោះកុង។
គួរបញ្ជាក់ថាព្រៃកោងកាងជារុក្ខជាតិពណ៌បៃតង និងមានឫសច្រើនបែកចេញសាខាមើលទៅគួរឱ្យគយគន់ដល់ក្រុមអ្នកទេសចរចូលទៅកម្សាន្ត។ដើមឈើមួយប្រភេទនេះមិនត្រឹមតែមានប្រយោជន៍សម្រាប់មនុស្សទេ សូម្បីតែសត្វក៏ត្រូវពឹងផ្អែកលើវាដែរក្នុងនេះដូចជាជម្រកត្រី ខ្ចង ក្ដាមគ្រប់ប្រភេទរស់នៅ និងជាជម្រកពងកូនយ៉ាងសំខាន់។
បើតាមលោកនេត្រភក្រ្តារដ្ឋលេខាធិការបានថ្លែងឱ្យដឹងថានៅតំបន់សហគមន៍ពាមក្រសោប សំបូរព្រៃកោងកាងច្រើនជាងគេ ហើយបើនិយាយពីខេត្តទាំង៤ដែលនៅជាប់មាត់សមុទ្រខេត្តកោះកុងមានព្រៃកោងកាងសរុបដល់ទៅ ៤៦០០០ហិកតា ហើយតំបន់ដែនជម្រកសត្វព្រៃពាមក្រសោបនេះដែរបានហ៊ុមព័ទ្ធទៅដោយព្រៃកោងកាង។តំបន់នេះយើងមានរមណីយដ្ឋានពាមក្រសោប ដែលតាមរយៈរមណីយដ្ឋាននេះគេឃើញមានភ្ញៀវទេសចរជាតិ និងអន្តរជាតិចូលមកកម្សាន្តច្រើន ។
យ៉ាងណាក្តីលោករដ្ឋលេខាធិការបានលើកឡើងថាក្នុងអំឡុងការវាយលុកដោយជំងឺកូវីដ-១៩នេះដែរភ្ញៀវទេសចរបរទេសមិនសូវចូលមកកម្សាន្តពិតមែន ប៉ុន្តែបើគេក្រឡេកមើលពីភ្ញៀវទេសចរក្នុងស្រុកវិញមានកំណើនកើនឡើង ក្នុងនេះបើតាមរយៈរបាយការណ៍កាលពីខែ ឧសភាកន្លងមកគឺរយៈពេលត្រឹមតែមួយខែប៉ុណ្ណោះ មានបងប្អូនប្រជាពលរដ្ឋខ្មែរ ចូលមកកម្សាន្តតំបន់នេះជាង១ម៉ឺននាក់។
លោកបានបញ្ជាក់ថាតាមរយៈភ្ញៀវទេសចរនេះបង្ហាញថាបងប្អូនប្រជាពលរដ្ឋខ្មែរបានចាប់អារម្មណ៍ទៅលើការទស្សនាចរបែបធម្មជាតិ ហើយការចូលមកកម្សាន្តនេះ បានផ្តល់នូវចំណូលប្រជាពលរដ្ឋសហគមន៍ ដែលធ្វើឱ្យពលរដ្ឋអាចយកចំណូលនេះមកជួយការពារព្រៃកោងកាងផងដែរ។
តាមរយៈព្រៃកោងកាងដែលជាផ្នែកមួយទាក់ទាញភ្ញៀវទេសចរ និងពិសេសផ្តល់នូវសក្តានុពលជីវចម្រុះយ៉ាងមហាសាលនេះដែរ លោករដ្ឋលេខាធិការបានបញ្ជាក់ថាកាលពីមុន ព្រៃដើមកោងកាង រងការកាប់យកទៅធ្វើធ្យូង និងប្រើប្រាស់ប្រចាំថ្ងៃច្រើន ប៉ុន្តែបច្ចុប្បន្ន ពលរដ្ឋភាគច្រើនជាពិសេសប្រជានេសាទ បានយល់ដឹងពីសារប្រយោជន៍របស់វា និងបានយកចិត្តទុកដាក់ការពារយ៉ាងម៉ត់ចត់ និងមានផែនការដាំដុះឡើងវិញជាបន្តបន្ទាប់។
លោកបានបញ្ជាក់ជុំវិញបញ្ហានេះថា “គ្រំចំពុះទាដែលសំបូរនិងធំធាត់បានល្អគឺមួយផ្នែកកើតឡើងដោយការតែការរក្សាបាននូវព្រៃកោងកាង ។តាមពិតព្រៃកោងកាងជាប្រភពចំណូលរបស់សហគមន៍ ផ្នែកទេសចរធម្មជាតិ ។នេះមិនគិតទាំងតម្លៃសេដ្ខកិច្ចជាតិ ដែលបានមកពីព្រៃកោងកាងផង។ពិតណាស់ព្រៃកោងកាងបំភាយអុកស៊ីសែនច្រើន និងវាបានបំភាយនូវកាបោនដែលយើងអាចលក់ឥណ្ឌទានកាបោនស្ម័គ្រចិត្ត ដូចដែលយើងបានលក់នៅស្រុកកែវសីម៉ា ខេត្តមណ្ឌកគិរី នៅតាតៃខេត្តកោះកុង និង ឧទ្យានជាតិភ្នំក្រវ៉ាញខាងត្បូងហើយបើនៅតំបន់នេះអាចរក្សាបាននោះយើងនឹងអាចលក់កាបោកបានថែមទៀតនិងពិសេសជាងនេះកម្រិតនៃការបំភាយកាបោនរបស់ព្រៃកោងកាងមានកម្រិតខ្ពស់៣ដងបើប្រៀបធៀបនឹងព្រៃឈើធម្មតា”
(ប្រភពព័ត៌មាន: rasmeinews)
មតិពីមិត្តអ្នកអាន