យុគសម័យ - នៅក្នុងបរិបទដែលជីវភាពរស់នៅរបស់សហគមន៍ខ្មែរនៅទីក្រុងហូជីមិញ (ភាគខាងត្បូងវៀតណាម) កំពុងមានការផ្លាស់ប្តូរគួរឱ្យកត់សម្គាល់ ដើម្បីសមស្របទៅនឹងសង្គមសម័យទំនើបនោះ ព្រះពុទ្ធសាសនាថេរវាទខ្មែរ និងវត្តអារាមនានា កំពុងបំពេញនូវតួនាទី តភ្ជាប់ទំនាក់ទំនងរក្សាវប្បធម៌ប្រពៃណីរបស់ប្រជាជនខ្មែរនៅក្នុងទីក្រុង។
ព្រះតេជគុណ Danh Lung និងព្រះសង្ឃនៅវត្តចន្ទរង្សី បានរួមជាមួយជនរួមជាតិខ្មែរនៃទីក្រុងហូជីមិញ និងតំបន់ជំវិញ អនុវត្តពិធីបួងសួងឧទ្ទិសកុសលសូមសេចក្តីសុខចម្រុងចម្រើនក្នុងឱកាសបុណ្យចូលឆ្នាំថ្មីប្រពៃណី ២០១៩
ព្រះពុទ្ធសាសនាថេរវាទក្នុងជីវភាពប្រចំាថ្ងៃរបស់ជនជាតិខ្មែរ
ឆ្លងកាត់ជាច្រើនជំនាន់មក ព្រះពុទ្ធសាសនាថេរវាទបានក្លាយជាផ្នែកមួយដ៏មិនអាចខ្វះបានឡើយ ក្នុងជីវភាពខាងព្រលឹងវិញ្ញាណរបស់ប្រជាជនខ្មែរណាមបូ ដែលផ្សារភ្ជាប់ជាមួយនឹងទស្សនៈអំពីជីវិតមនុស្ស, ទស្សនៈអំពីពិភពលោក ដែលបានក្លាយទៅជាប្រភពគំនិតមួយដែលជះឥទ្ធិពលដល់ការបង្កើតលក្ខណៈវប្បធម៌ដោយឡែករបស់សហគមន៍ជនជាតិខ្មែរ។
ផ្សាភ្ជាប់នឹងព្រះពុទ្ធសាសនា គឺវត្តអារាម ដែលដើរតួនាទីយ៉ាងសំខាន់ក្នុងជីវភាពប្រចាំថ្ងៃរបស់សហគមន៍ជនជាតិខ្មែរ។ យោងតាមប្រពៃណីរាប់ពាន់ឆ្នាំរបស់ជនជាតិខ្មែរណាមបូ វត្តអារាមតែងតែបានកសាងឡើងចំកណ្តាលនៃតំបន់ លើដីខ្ពស់ ដើម្បីងាយស្រួលក្នុងការគោរពបូជារបស់ពុទ្ធសាសនិកនិងការបួសរបស់ព្រះសង្ឃ។
សកម្មភាពក្នុងជីវភាពប្រចាំថ្ងៃក៏ដូចជានៅក្នុងពិធីបុណ្យវប្បធម៌សហគមន៍ឬការងាររបស់គ្រួសារនិមួយៗ ដូចជាបុណ្យសព អាពាហ៍ពិពាហ៍ ការសាងសង់ផ្ទះថ្មី សុទ្ធតែបានជះឥទ្ធិពលមកពីព្រះធម៌នៃព្រះពុទ្ធសាសនា។ ហេតុ ដូច្នេះ សកម្មភាពទាំងអស់នេះភាគច្រើនបានប្រព្រឹត្តទៅនៅវត្តអារាមដោយមានការចូលរួមដោយផ្ទាល់ឬការណែនាំរបស់ព្រះសង្ឃផងដែរ។ វត្ត ក៏ជាកន្លែងសម្រាប់បង្រៀនអក្សរឲ្យប្រជាជនខ្មែរ តម្កល់ទុកសៀវភៅ អភិរក្សអក្សរ ក៏ដូចជាតម្លៃវប្បធម៌ទាំងខាងសំភារៈនិងខាងស្មារតីរបស់ប្រជាជនខ្មែរ។
ប្រជាជនខ្មែរនៅទីក្រុងហូជីមិញ អនុវត្តពិធីស្រង់ព្រះពុទ្ធនៅវត្តចន្ទរង្សី ក្នុងឱកាសបុណ្យចូលឆ្នាំថ្មីប្រពៃណី ២០១៩
សាស្ត្រាចារ្យរង បណ្ឌិត Huynh Ngoc Thu ប្រធាននាយកដ្ឋាននរវិទ្យានៃសាកលវិទ្យាល័យវិទ្យាសាស្ត្រសង្គមនិងមនុស្សសាស្ត្រនៃទីក្រុងហូជីមិញដែលបានចំណាយពេលជាច្រើន សម្រាប់ស្រាវជ្រាវពីជីវភាពរស់នៅរបស់ប្រជាជនខ្មែរបានលើកឡើងថា ក្នុងជីវភាពខាងវប្បធម៌របស់សហគមន៍និងបុគ្គលនីមួយៗ ប្រជាជនខ្មែរមានការយកចិត្តទុកដាក់យ៉ាងខ្លាំងចំពោះវត្តអារាម ពីព្រោះ វត្តជាជាមជ្ឈមណ្ឌលប្រតិបត្តិសកម្មភាពសហគមន៍ ដែលបង្ហាញពីវប្បធម៌ - សាសនា មានលក្ខណៈអប់រំនិងការផ្សារភ្ជាប់សង្គមរបស់សហគមន៍។ ជាទូទៅវត្ត វត្តអារាមរបស់ប្រជាជនខ្មែរ មិនត្រឹមតែមានតួនាទីសាសនាប៉ុណ្ណោះទេ ថែមទាំងមានតួនាទីសំខាន់អំពីវប្បធម៌ - សង្គមក្នុងសហគមន៍ទៀតផង។
ការតភ្ជាប់ ពង្រឹងនិងពង្រីកវប្បធម៌ប្រពៃណី
បច្ចុប្បន្ននេះ សហគមន៍ជនជាតិខ្មែរនៅទីក្រុងហូជីមិញនៅតែគោរពតាមព្រះពុទ្ធសាសនាថេរវាទ ប៉ុន្តែផ្នត់រស់នៅ ជីវភាពវប្បធម៌របស់ប្រជាជនខ្មែរដែលរស់នៅច្រើនឆ្នាំនៅក្នុងទីក្រុងតែងតែមានភាពខុសគ្នា ដោយសារតែការសម្របខ្លួនទៅនឹងស្ថានភាពរស់នៅទីក្រុង។ នៅក្នុងបរិបទនេះ វត្តអារាមខ្មែរនៅក្នុងទីក្រុង បានក្លាយទៅទីតាំងតភ្ជាប់គ្នា ដែលរួមចំណែករក្សាទំនៀមទម្លាប់និងវប្បធម៌ប្រពៃណីរបស់ប្រជាជនខ្មែរអស់ជាច្រើនជំនាន់។
សកម្មភាពណែនាំរៀបចម្អិនអាហារប្រពៃណីរបស់ប្រជាជនខ្មែរនៅក្នុងបុណ្យចូលឆ្នំាប្រពៃណី ដែលបានរៀបចំឡើងនៅវត្តចន្ទរង្សី
បច្ចុប្បន្ននេះ នៅទីក្រុងហូជីមិញមានវត្តអារាមខ្មែរចំនួនពីរ គឺវត្តចន្ទរង្សី នៅខ័ណ្ឌទី ៣ និងវត្តពោធិវង្សនៅ ខ័ណ្ឌ Tan Binh។ វត្តទាំងពីរនេះ ជាមជ្ឈមណ្ឌលវប្បធម៌និងសាសនា នៃសហគមន៍ប្រជាជនខ្មែរនៅទីក្រុងហូជីមិញនិងតំបន់ជុំវិញ។ ជារៀងរាល់ឆ្នាំ នៅកន្លែងទាំងពីរនេះ តែងតែបានប្រព្រឹត្តទៅនូវព្រឹត្តិការណ៍ជាច្រើន ដែលទាក់ទងទៅនឹងសកម្មភាពវប្បធម៌ប្រពៃណីសាសនានិងជំនឿរបស់ជនរួមជាតិជាជនជាតិខ្មែរ និងជាកន្លែងសម្រាប់ថ្នាក់បង្រៀនអក្សរខ្មែរ និងអប់រំអំពីសីលធម៌ពុទ្ធសាសនាផងដែរ។
មិត្ត Tran Ngoc Tran (នៅស្រុក Binh Thoi ខេត្ត Ca Mau) ជានិស្សិតខ្មែរម្នាក់ដែលកំពុងសិក្សានៅមហាវិទ្យាល័យវប្បធ៌មក្រុងហូជីមិញបានអោយដឹងថា: “នៅថ្ងៃដែលព្រះច័ន្ទពេញបូរមីឬថ្ងៃឈប់សម្រាក ខ្ញុំតែងតែទៅវត្តចន្ទរង្សី ដើម្បីស្វែងយល់បន្ថែមអំពីអត្ថន័យនៃសកម្មភាពវប្បធម៌តាមបែបប្រពៃណី ដូចជាពិធីស្រង់ព្រះ នៅថ្ងៃបុណ្យចូលឆ្នាំថ្មីប្រពៃណី ចម្អិនម្ហូបតាមប្រពៃណីរៀនក្បាច់រាំជាដើម”។ នៅពេលសម្រាកវិស្សមកាល Tran និងនិស្សិតខ្មែរមួយចំនួន នឹងទៅកាន់វត្តអារាម ដើម្បីជួយព្រះសង្ឃ បង្រៀនភាសាខ្មែរសម្រាប់ប្អូនៗកុមារ។ Tran បានចាត់ទុក នេះជាភារកិច្ចរបស់ជំនាន់ក្រោយៗ ដែលរួមចំណែករក្សាប្រពៃណីជនជាតិខ្មែរក្នុងជីវភាពទំនើបបច្ចុប្បន្ន៕
（រូបថតនិងអត្ថបទ Xuan Khu (TTXVN) បកប្រែដោយ សមុទ្រ）
មតិពីមិត្តអ្នកអាន