យុគសម័យ - នាថ្ងៃទី ៣១ ខែសីហា កិច្ចប្រជុំថ្នាក់អនុប្រធានក្រុមការងារជាន់ខ្ពស់វៀតណាម - រុស្ស៊ីស្តីពីគម្រោងវិនិយោគអាទិភាពត្រូវបានធ្វើឡើងតាមរយៈប្រព័ន្ធវីដេអូ ដែលដឹកនាំដោយអនុរដ្ឋមន្ត្រីក្រសួងឧស្សាហកម្មនិងពាណិជ្ជកម្មវៀតណាមលោក Hoang Quoc Vuong និងអនុរដ្ឋមន្រ្តីក្រសួងអភិវឌ្ឍន៍សេដ្ឋកិច្ចនៃសហព័ន្ធរុស្ស៊ីលោក Vladimir Ilyichev។
ទដ្ឋភាពនៃកិច្ចប្រជុំនេះ
នៅក្នុងជំនួបនេះភាគីទាំងពីរបានពិភាក្សាអំពីការអនុវត្តគម្រោងវិនិយោគរួមគ្នាក្នុងបញ្ជីអាទិភាព រួមមានការសាងសង់មជ្ឈមណ្ឌលវិទ្យាសាស្ត្រនិងបច្ចេកវិទ្យានុយក្លេអ៊ែរនៅវៀតណាម ការបង្កើតក្រុមហ៊ុនដំឡើងរថយន្តរួមគ្នានៅវៀតណាម និងការចូលរួមរបស់ក្រុមហ៊ុនរុស្ស៊ីក្នុងការអភិវឌ្ឍន៍រដ្ឋាភិបាលអេឡិចត្រូនិកនៅវៀតណាម។
ភាគីទាំងពីរក៏បានលើកឡើងពីទស្សនវិស័យនៃកិច្ចសហប្រតិបត្តិការក្នុងវិស័យថ្មីៗនិងសមត្ថភាពក្នុងការអនុវត្តគម្រោងដែលបានអនុម័ត។ ភាគីរុស្ស៊ីបានធ្វើសំណើទាក់ទងនឹងគម្រោងនានាក្នុងវិស័យព្យាបាលកាកសំណល់ ឌីជីថលនិងធានាសន្តិសុខសាធារណៈ ថាមពលអគ្គីសនីនិងការបញ្ចប់បណ្តាញបញ្ជូនថាមពល។ លោកអនុរដ្ឋមន្ត្រី Vladimir Ilyichev ក៏បានស្នើដល់សមភាគីវៀតណាមគាំទ្រដល់គំនិតផ្តួចផ្តើមអំពីការរៀបចំការប្រកួតប្រជែងគណិតវិទ្យាអូឡាំពិកតាមអនឡាញសម្រាប់សិស្សមកពីក្រុមសេដ្ឋកិច្ចរីកចំរើន (BRICS +) ដែលត្រូវបានអនុវត្តលើមូលដ្ឋានអប់រំរុស្ស៊ី UCHI.RU. យោងតាមព័ត៌មានពីក្រសួងអភិវឌ្ឍន៍សេដ្ឋកិច្ចនៃសហព័ន្ធរុស្ស៊ី សិស្សវៀតណាមបានចូលរួមយ៉ាងសកម្មនៅក្នុងគណិតវិទ្យាអូឡាំពិកចាប់តាំងពីខែមេសាឆ្នាំ ២០២០ ។
នៅក្នុងកិច្ចប្រជុំនេះ គណៈប្រតិភូបានពិភាក្សាពីលទ្ធភាពនៃកិច្ចសហប្រតិបត្តិការក្នុងការបង្ការនិងទប់ស្កាត់នឹងវីរុស SARS-COV-2 រួមទាំងការផ្គត់ផ្គង់និងការអនុវត្តការផលិតវ៉ាក់សាំងបង្ការ COVID-19 របស់រុស្ស៊ីនៅវៀតណាម។
យោងតាមព័ត៌មានពីស្ថាប័នសមត្ថកិច្ចរុស្ស៊ី ទោះបីជាមានការរីករាលដាលនៃ COVID-19 ក៏ដោយនៅក្នុងឆមាសទីមួយនៃឆ្នាំ ២០២០ ពាណិជ្ជកម្មរវាងរុស្ស៊ីនិងវៀតណាមបានកើនឡើង ៤,៧% ស្មើនឹង ២,៣ ពាន់លានដុល្លារអាមេរិក។ ជាពិសេស រុស្ស៊ីបានបង្កើនការនាំចេញទៅកាន់វៀតណាមចំនួន ៤៣% (៦៨២ លានដុល្លារ) ដែលរួមមាន អាហារ គ្រឿងម៉ាស៊ីន និងលោហធាតុ៕（បកប្រែដោយសាមេត）
（ប្រភពព័ត៌មាន: baotintuc.vn）
មតិពីមិត្តអ្នកអាន