យុគសម័យ - កិច្ចពិភាក្សារវាងប្រតិភូនាយទាហានវ័យក្មេងនៃកងទ័ពប្រជាជនវៀតណាមជាមួយប្រតិភូនាយទាហានវ័យក្មេងនៃកងយោធពលខេមរភូមិន្ទ បានប្រព្រឹត្តទៅនា នារសៀល ថ្ងៃទី២៨ ខែកញ្ញា នៅទីក្រុងហាណូយ។
ទិដ្ឋភាពនៃជំនួបពិភាក្សា (រូបថតៈ www.qdnd.vn)
គណៈប្រតិភូនាយទាហានវ័យក្មេងនៃកងទ័ពប្រជាជនវៀតណាម ដឹកនាំដោយ លោកវរសេនីយ៍ទោ Tran Viet Nang អនុប្រធានគណៈកម្មការយុវជនយោធា បានជួបពិភាក្សាជាមួយគណៈប្រតិភូនាយទាហានវ័យក្មេង នៃកងយោធពលខេមរភូមិន្ទ ដឹកនាំដោយលោកវរសេនីយ៍ឯក ធុយ វណ្ណហន នាយរងករិយាល័យទី៥ កងពលតូចអន្តរគមន៍លេខ៧០។
នៅក្នុងជំនួបពិភាក្សានេះ លោកវរសេនីយ៍ទោ Tran Viet Nang និងលោកវរសេនីយ៍ឯក ធុយ វណ្ណហន បានផ្តល់ជូននូវព័ត៌មានទូទៅស្តីពីស្ថានភាពរបស់នាយទាហានវ័យក្មេងនៃប្រទេសនិមួយៗ។ ភាគីទាំងពីរបានឯកភាពថា នាយទាហានវ័យក្មេងគឺជាកម្លាំងស្នូលដែលដើរតួនាទីយ៉ាងសំខាន់ក្នុងកិច្ចការកសាង និងការការពារប្រទេសជាតិ។
ភាគីទាំងពីរឯកភាពថា នាពេលខាងមុខ នឹងបន្តលើកកម្ពស់ការអប់រំ និងផ្សព្វផ្សាយឲ្យនាយទាហានវ័យគ្មេង យុវជន និងប្រជាជននៃប្រទេសទាំងពីរ អំពី សារៈសំខាន់ នៃការពង្រឹងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការលើគ្រប់ជ្រុងជ្រោយរវាងប្រទេសទាំងពីរ ក៏ដូចជាកងទ័ពទាំងពីរ ក្នុងស្ថានភាពថ្មី។ មិនត្រឹមតែប៉ុណ្ណោះ ភាគីទាំងពីរនឹងជម្រុញការផ្លាស់ប្តូរគណៈប្រតិភូគ្រប់ជាន់ថ្នាក់ ដូចជារៀបចំការជួបប្រាស្រ័យរវាងយុវវ័យនៃប្រទេសទាំងពីរ ជាពិសេសការជួបប្រាស្រ័យរវាងនាយទាហានវ័យក្មេងនៃប្រទេសទាំងពីរផងដែរ។
គណៈប្រតិភូនាយទាហានវ័យក្មេងកម្ពុជា (រូបថតៈ www.qdnd.vn)
ភាគីទាំងពីរនឹងបន្តផ្តល់យោបល់ជូនក្រសួងការពារប្រទេសវៀតណាម និងកងយោធពលខេមរភូមិន្ទ ក្នុងការលើកកម្ពស់កិច្ចសហប្រតិបត្តិការលើវិស័យបណ្តុះបណ្តាលឲ្យនាយទាហានវ័យក្មេងអំពីការងារសម្ព័ន្ធយុវជន ការងារចលនាយុវជន និងការងារផ្សេងៗទៀត ហើយចូលរួមយ៉ាងសកម្មក្នុងការស្វែងរក ប្រមូល និងធ្វើមាតុភូមិនិវត្តន៍អដ្ឋិធាតុ កងទ័ពស្ម័គ្រចិត្តនិងជំនាញការវៀតណាម ដែលពលីជីវិតប្រទេសកម្ពុជា នាសម័យសង្គ្រាម។
នៅក្នុងជំនួបនេះ លោកវរសេនីយ៍ឯក ធុយ វណ្ណហន ប្រធានគណៈប្រតិភូនាយទាហានវ័យក្មេងនៃកងយោធពលខេមរភូមិន្ទ ក៏បានសម្តែងនូវគោលបំណង រឹតបន្តឹងជាបន្ត កិច្ចសហប្រតិបត្តិការជាមួយជួរនាយទាហានវ័យក្មេងកងទ័ពប្រជាជនវៀតណាម ដើម្បីបង្កើនការផ្លាស់ប្តូរព័ត៌មាន រួមចំណែកទៅក្នុងកិច្ចសហប្រតិបត្តិការយ៉ាងល្អប្រសើររវាងប្រទេសទាំងពីរ និងរវាងកងទ័ពទាំងពីរនាពេលខាងមុខ៕
（យោងតាម http://www.qdnd.vn）
មតិពីមិត្តអ្នកអាន