យុគសម័យ - អ្នកសារព័ត៌មានកម្ពុជាចំនួន៣០រូប ត្រូវបានអញ្ចើញឱ្យចូលរួមក្នុងវគ្គបណ្ដុះបណ្ដាលជំនាញសសេរព័ត៌មានរយៈពេលខ្លី នៅក្រុងហូជីមិញ ប្រទេសវៀតណាម ដើម្បីពង្រឹង ជំនាញ សរសេរព័ត៌មានក្នុងក្របខ័ណ្ឌប្រទេសជាសមាជិកអាស៊ាន។
ថ្លែងក្នុងវគ្គបំប៉នសមត្ថភាព ការធ្វើកាសែតអំពីព្រឹត្តិការណ៍ធំៗ នាព្រឹកថ្ងៃទី ២៤ ខែកញ្ញា ឆ្នាំ២០១៨ នៅទីក្រុង ហូជីមិញ ប្រទេសវៀតណាម លោក Nguyen Van Hieu អគ្គនាយករងនៃអគ្គនាយកដ្ឋានព័ត៌មាន នៃក្រសួងព័ត៌មាន និងផ្សព្វផ្សាយវៀតណាម បានលើកឡើងថា វគ្គបណ្ដុះបណ្ដាលនេះ ធ្វើឡើងក្នុងគោលបំណង ពង្រឹង និងពង្រីកកិច្ចសហប្រតិបត្តិការរវាង ប្រទេសទាំងពីរ ក្នុងន័យចូលរួមផ្លាស់ប្តូរបទពិសោធន៍នៃការសរសេរព័ត៌មានរបស់អ្នក កាសែតកម្ពុជា និងវៀតណាម។ លោកបន្ថែមថា នេះជាវគ្គបណ្ដុះបណ្ដាលលើកទីពីរហើយ ក្រោយពីប្រទេសទាំងពីរចុះអនុស្សរណៈយោគយល់គ្នា កាលពីឆ្នាំ២០១៦ ដើម្បីពង្រឹងជំនាញវិជ្ជាជីវៈសារព័ត៌មាន។
ហើយវគ្គបណ្ដុះបណ្ដាលលើកនេះ មានរយៈពេល០៥ថ្ងៃ ចាប់ពីថ្ងៃទី ២៤ ដល់ថ្ងៃទី ២៨ ខែកញ្ញា ២០១៨។ លោកជឿជាក់ថា ក្រោយវគ្គបណ្ដុះបណ្ដាលនេះ អ្នកសារព័ត៌មានកម្ពុជា នឹងកាន់តែមានសមត្ថភាពបន្ថែមក្នុងការសរសេរ និងរាយការណ៍ព័ត៌មាន ពីព្រឹត្ថិការណ៍ផ្សេងៗ ឱ្យកាន់តែមានភាពល្អប្រសើរជាងមុន ដែលនឹងអាចឈាន ទៅបម្រើបាននូវប្រយោជន៍ជាសាធារណៈដល់ប្រជាពលរដ្ឋទូទៅ។
លោក ងឿន ច័ន្ទលីនប៉ូឡែន អគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុ ក្រសួងព័ត៌មាន បានមានប្រសាសន៍ថា វគ្គបណ្ដុះបណ្ដាលនេះ នឹងអាចផ្ដល់ជាអត្ថប្រយោជន៍ថ្មីមួយទៀត សម្រាប់បង្កើននូវចំណេះដឹងវិជ្ជាជីវៈសារព័ត៌មាន ក្នុងសម័យបច្ចេកវិទ្យាបច្ចុប្បន្ន ពិសេសរបៀបនៃការសរសេរនូវអត្ថបទព័ត៌មាន ឱ្យកាន់តែឆាប់រហ័ស និងល្អប្រសើរ។ លោកបានបញ្ជាក់ថា ក្នុងវគ្គបណ្តុះបណ្តាលនេះ មានសិក្ខាកាមមកពីក្រសួងព័ត៌មានទូទាំង រាជធានី ខេត្តសរុបចំនួន៣០រូប ក្នុងនោះថ្នាក់ជាតិមានចំនួន២១រូប និងថ្នាក់ក្រោមជាតិ មានចំនួន៩រូប។
គួរបញ្ជាក់ថា ក្រសួងព័ត៌មាន និងផ្សព្វផ្សាយវៀតណាមបានចុះអនុស្សរណៈយោគយល់គ្នា ជាមួយ ក្រសួងព័ត៌មាននៃព្រះរាជាណាចក្រកម្ពុជា ដើម្បីពង្រឹងជំនាញលើការសរសេរ ព័ត៌មាន ដល់អ្នកសារព័ត៌មានរវាងប្រទេសទាំងពីរ ដែលមានរយៈពេល៤ឆ្នាំ ចាប់ពីឆ្នាំ ២០១៦ ដល់ឆ្នាំ២០២០៕
(ប្រភពព័ត៌មាន: យោងតាម information.gov.kh)
មតិពីមិត្តអ្នកអាន