ទីក្រុង Da Nang បញ្ចេញឱ្យអស់ពីសមត្ថភាពនូវប្រភពធនធានមិនមែនរដ្ឋាភិបាលបរទេសសម្រាប់ការបំប្លែងបៃតង

សិក្ខាសាលានេះ មានការចូលរួមពីអង្គការអន្តរជាតិ និងអង្គការមិនមែនរដ្ឋាភិបាលបរទេសជិត ១០០ អង្គការ ដែលកំពុងធ្វើសកម្មភាពនៅប្រទេសវៀតណាម។

សិក្ខាសាលានេះ មានប្រធានបទ «ការងារមិនមែនរដ្ឋាភិបាលបរទេសក្នុងបរិបទថ្មី សំដៅទៅរកខឿនសេដ្ឋកិច្ចបៃតង សេដ្ឋកិច្ចវិលជុំ និងការអភិវឌ្ឍប្រកបដោយចីរភាព - និន្នាការចាំបាច់ទូទាំងសកលលោក» ដោយសហភាពបណ្តាអង្គការមិត្តភាពក្រុង Da Nang សហការជាមួយគណៈសម្របសម្រួលជំនួយប្រជាជន (PACCOM) ចំណុះសហភាពបណ្តាអង្គការមិត្តភាពវៀតណាម និងអង្គការ Catalyste+ (ប្រទេសកាណាដា) រៀបចំឡើង។

នៅក្នុងព្រឹត្តិការណ៍នេះ បណ្តាប្រតិភូបានចូលរួមសម័យពិភាក្សាឯកទេសចំនួន ៣ អំពីគោលការណ៍ តម្រង់ទិសការងារមិនមែនរដ្ឋាភិបាលបរទេសរបស់វៀតណាម និងក្រុង Da Nang ក្នុងដំណាក់កាលថ្មី, និន្នាការអភិវឌ្ឍន៍នៅលើពិភពលោក, ការផ្លាស់ប្តូរបទពិសោធន៍ ពង្រឹងការតភ្ជាប់ និងស្វែងរកឱកាសកិច្ចសហប្រតិបត្តិការ។

ថ្លែងនៅក្នុងសិក្ខាសាលា លោក Nguyen Ngoc Binh ប្រធានសហភាពបណ្តាអង្គការមិត្តភាពក្រុង Da Nang បានយល់ឃើញថា ការបំប្លែងទៅរកសេដ្ឋកិច្ចបៃតង សេដ្ឋកិច្ចវិលជុំ បានក្លាយជានិន្នាការចាំបាច់ ដើម្បីធានាការអភិវឌ្ឍប្រកបដោយចីរភាព។

តាមលោក សំណូមពរនេះក៏បានដាក់ចេញនូវតម្រូវការច្នៃប្រឌិតថ្មីនូវវិធីសាស្ត្រអនុវត្តការងារការទូតប្រជាជនតាមទិសដៅកិច្ចសហប្រតិបត្តិការជាក់ស្តែងជាងមុន កៀរគរឱ្យមានប្រសិទ្ធភាពនូវគំនិតផ្តួចផ្តើម បច្ចេកវិទ្យា និងប្រភពធនធានអន្តរជាតិ ដើម្បីបម្រើការអភិវឌ្ឍសេដ្ឋកិច្ច-សង្គម។

ការងារការទូតប្រជាជនរបស់ទីក្រុងកំពុងបំប្លែងចេញពីការជួបប្រាស្រ័យមិត្តភាពសុទ្ធសាធ ទៅជាការបង្កើតឡើងនូវផលប្រយោជន៍ជាក់ស្តែង ការពង្រីកកិច្ចសន្ទនា និងការជំរុញកិច្ចសហប្រតិបត្តិការប្រកបដោយប្រសិទ្ធភាព។

នៅលើស្មារតីនោះ សហភាពបណ្តាអង្គការមិត្តភាពក្រុង Da Nang បានកំណត់ថា ជំនួយមិនមែនរដ្ឋាភិបាលបរទេស មិនត្រឹមតែជាប្រភពឧបត្ថម្ភហិរញ្ញវត្ថុរយៈពេលខ្លីប៉ុណ្ណោះទេ ប៉ុន្តែថែមទាំងនាំមកនូវចំណេះដឹង បច្ចេកវិទ្យា និងបទពិសោធន៍អន្តរជាតិ តាមរយៈនោះ បំពេញបន្ថែមនូវប្រភពធនធានសម្រាប់ការអភិវឌ្ឍសេដ្ឋកិច្ច-សង្គម ព្រមទាំងពង្រឹងចំណងមិត្តភាព ការយោគយល់គ្នារវាងប្រជាជន Da Nang ជាមួយនឹងប្រជាជននៃបណ្តាប្រទេស និងបណ្តាអង្គការអន្តរជាតិ។

សំណើ ៤ ក្រុមនៃកិច្ចសហប្រតិបត្តិការ

ថ្លែងនៅក្នុងសិក្ខាសាលា លោក Nguyen Ngoc Hung អនុប្រធានសហភាពបណ្តាអង្គការមិត្តភាពវៀតណាម និងជាអនុប្រធានគណៈកម្មាធិការទទួលបន្ទុកការងារអង្គការមិនមែនរដ្ឋាភិបាលបរទេស បានអះអាងថា ការងារមិនមែនរដ្ឋាភិបាលបរទេស គឺជាផ្នែកមួយដ៏សំខាន់នៃកិច្ចការបរទេសប្រជាជន ដែលសម្របសម្រួល និងបំពេញបន្ថែមឱ្យកិច្ចការបរទេសរបស់បក្ស និងការទូតរបស់រដ្ឋ។

វៀតណាមតែងតែលើកទឹកចិត្ត និងបង្កើតលក្ខខណ្ឌអំណោយផល ដើម្បីឱ្យបណ្តាអង្គការមិនមែនរដ្ឋាភិបាលបរទេសធ្វើសកម្មភាពស្របទៅនឹងអាទិភាព និងតម្រូវការរបស់វៀតណាម។

តាមលោក Nguyen Ngoc Hung តម្លៃនៃកិច្ចសហប្រតិបត្តិការមិនត្រឹមតែស្តែងចេញតាមរយៈចំនួនគម្រោង ឬថវិកាជំនួយប៉ុណ្ណោះទេ ប៉ុន្តែថែមទាំងស្តែងឡើងតាមរយៈជំនឿទុកចិត្តដែលត្រូវបានពូនជ្រុំ ចំណេះដឹងដែលត្រូវបានចែករំលែក និងបណ្តាការផ្លាស់ប្តូរជាវិជ្ជមានយូរអង្វែងនៅក្នុងសហគមន៍។

បណ្តាអង្គការមិនមែនរដ្ឋាភិបាលបរទេស ក៏បានរួមចំណែកតភ្ជាប់ប្រជាជនវៀតណាមជាមួយប្រជាជនពិភពលោក ចែករំលែកព័ត៌មានប្រកបដោយតម្លាភាព និងសត្យានុម័តអំពីប្រទេសជាតិ មនុស្ស និងបុព្វហេតុផ្លាស់ប្តូរថ្មីរបស់វៀតណាម តាមរយៈនោះ ពង្រឹងមូលដ្ឋានគ្រឹះសង្គមសម្រាប់ទំនាក់ទំនងមិត្តភាព និងកិច្ចសហប្រតិបត្តិការអន្តរជាតិ។

ដោយវាយតម្លៃថា Da Nang គឺជាមូលដ្ឋានប្រកបដោយថាមវន្ត មានហេដ្ឋារចនាសម្ព័ន្ធប្រទាក់ក្រឡាសមស្រប ប្រភពធនធានមនុស្សល្អ និងការគិតគូរផ្នែកអភិបាលកិច្ចបើកចំហ លោក Nguyen Ngoc Hung បានយល់ឃើញថា ទីក្រុងមានលក្ខខណ្ឌអំណោយផលជាច្រើន ដើម្បីសាកល្បងបណ្តាគំរូនៃកិច្ចសហប្រតិបត្តិការមិនមែនរដ្ឋាភិបាលបរទេសជំនាន់ថ្មី។

ចំពោះមុខបញ្ហាប្រឈមនៃការប្រែប្រួលអាកាសធាតុ បរិស្ថាន និងការផ្លាស់ប្តូររចនាសម្ព័ន្ធពលកម្ម លោកបានស្នើឡើងនូវ ៤ ក្រុមគំនិតផ្តួចផ្តើមស្នូល៖

ទីមួយ សាកល្បងបណ្តាគំរូសេដ្ឋកិច្ចវិលជុំនៅទីក្រុង ដោយរួមបញ្ចូលការអភិរក្សជីវចម្រុះ ជាមួយនឹងការអភិវឌ្ឍទេសចរណ៍បៃតង និងសេដ្ឋកិច្ចសមុទ្របៃតង។

ការយកចិត្តទុកដាក់ស្នូល គឺការកាត់បន្ថយ ការប្រើប្រាស់ឡើងវិញ និងការវិលជុំកាកសំណល់ប្លាស្ទិក ជំរុញផលិតកម្ម និងការប្រើប្រាស់ប្រកបដោយការទទួលខុសត្រូវ ផ្សារភ្ជាប់ការអភិវឌ្ឍជាមួយនឹងការអភិរក្សប្រព័ន្ធអេកូឡូស៊ីនៅឧបទ្វីប Son Tra តំបន់អភិរក្ស Ba Na - Nui Chua ទន្លេ Tranh ទន្លេ Thanh ច្រករបៀងជីវចម្រុះ Trung Truong Son និងបណ្តាតំបន់ពាក់ព័ន្ធ។

ទីពីរ អភិវឌ្ឍបណ្តាគំរូបន្ស៊ាំនឹងការប្រែប្រួលអាកាសធាតុ និងមុខរបរចិញ្ចឹមជីវិតបៃតងផ្អែកលើសហគមន៍ ដោយផ្តល់អាទិភាពដល់តំបន់ជាប់មាត់សមុទ្រ និងតំបន់ព្រៃភ្នំ។

បណ្តាគម្រោងចាំបាច់ត្រូវតម្រង់ទិសឆ្ពោះទៅរកការលើកកម្ពស់សមត្ថភាពស្តារឡើងវិញដោយខ្លួនឯង និងការរក្សាដំណើរការសកម្មភាពរបស់សហគមន៍ បើទោះបីជាប្រភពហិរញ្ញប្បទានត្រូវបានបញ្ចប់ក៏ដោយ។

ទីបី ជំរុញការកសាងប្រព័ន្ធអេកូឡូស៊ីបង្កើតធុរកិច្ចថ្មី អាកាសធាតុប្រកបដោយបរិយាបន្ន។

បណ្តាអង្គការមិនមែនរដ្ឋាភិបាលបរទេស អាចបញ្ចេញឱ្យអស់ពីសមត្ថភាពនូវតួនាទីតភ្ជាប់ គាំទ្របច្ចេកទេស សហការជាមួយសាកលវិទ្យាល័យ វិទ្យាស្ថានស្រាវជ្រាវ មណ្ឌលបណ្តុះធុរកិច្ចនៅ Da Nang ដើម្បីអភិវឌ្ឍសហគ្រាសទាំងឡាយដែលមានសមត្ថភាពឆ្លើយតបទៅនឹងការប្រែប្រួលអាកាសធាតុ ព្រមទាំងពង្រីកឱកាសទទួលបានប្រភពហិរញ្ញវត្ថុបៃតងអន្តរជាតិ។

ទីបួន ច្នៃប្រឌិតថ្មីបណ្តាកម្មវិធីសន្តិសុខសង្គមដែលផ្សារភ្ជាប់នឹងការបំប្លែងបៃតង។

ទន្ទឹមនឹងការបន្តគាំទ្រវិស័យសុខាភិបាល អប់រំ និងក្រុមជនងាយរងគ្រោះ ចាំបាច់ត្រូវបញ្ជ្រាបការបណ្តុះបណ្តាលបំណិនបៃតង និងការតម្រង់ទិសវិជ្ជាជីវៈក្នុងវិស័យសេដ្ឋកិច្ចវិលជុំសម្រាប់យុវជន-កុមារដែលមានកាលៈទេសៈលំបាក ដោយជួយលើកកម្ពស់សមត្ថភាពចូលរួមក្នុងទីផ្សារពលកម្ម។

តាមលោក Nguyen Ngoc Hung ប្រសិនបើត្រូវបានអនុវត្តដោយជោគជ័យ បណ្តាគំរូសាកល្បងនៅ Da Nang អាចផ្តល់នូវមូលដ្ឋានជាក់ស្តែង ដើម្បីសុក្រឹតគោលនយោបាយ និងពង្រីកទំហំអនុវត្តនៅតំបន់ភាគកណ្តាល ក៏ដូចជានៅទូទាំងប្រទេស។

ដើម្បីធ្វើឱ្យបណ្តាតម្រង់ទិសទាំងនេះក្លាយជាការពិត Da Nang ចាំបាច់ត្រូវម្ចាស់ការកំណត់នូវបញ្ហាប្រឈមជាក់ស្តែងនៃការបំប្លែងបៃតង រួមជាមួយដៃគូនានារៀបចំរចនាគម្រោងចាប់តាំងពីដំណាក់កាលបង្កើតគំនិត ពង្រឹងការសម្របសម្រួលអន្តរវិស័យ កាត់បន្ថយពេលវេលាដោះស្រាយសំណុំឯកសារ និងឯកភាពអនុវត្តបណ្តាបទប្បញ្ញត្តិច្បាប់។

ទីក្រុងក៏ចាំបាច់ត្រូវបង្កើតលក្ខខណ្ឌសាកល្បងបណ្តាគំនិតផ្តួចផ្តើមថ្មីៗ បូកសរុប និងចែករំលែកបទពិសោធន៍ ព្រមទាំងរៀបចំយន្តការ និងប្រភពធនធានសមស្របសម្រាប់សកម្មភាពតភ្ជាប់ និងការចលនាកៀរគរជំនួយមិនមែនរដ្ឋាភិបាលបរទេស។

ចំពោះភាគីសហភាពបណ្តាអង្គការមិត្តភាពវៀតណាម និងគណៈកម្មាធិការទទួលបន្ទុកការងារអង្គការមិនមែនរដ្ឋាភិបាលបរទេស លោក Nguyen Ngoc Hung បានអះអាងថា នឹងបន្តម្ចាស់ការចលនាដៃគូ ទទួលស្តាប់ ដោះស្រាយការលំបាកក្នុងដំណើរការកិច្ចសហប្រតិបត្តិការ ចូលរួមកសាងបរិស្ថានគោលនយោបាយប្រកបដោយស្ថិរភាព តម្លាភាព និងរួមដំណើរជាមួយបណ្តាអង្គការមិនមែនរដ្ឋាភិបាលបរទេសដែលកំពុងធ្វើសកម្មភាពស្របច្បាប់នៅប្រទេសវៀតណាម។

សំដៅឆ្ពោះទៅរកទីក្រុងវិលជុំនៅឆ្នាំ ២០៤៥

តាមលោក Nguyen Dinh Vinh អនុលេខាប្រចាំការនៃគណៈកម្មាធិការបក្សក្រុង និងជាប្រធានគណៈកម្មាធិការរណសិរ្សមាតុភូមិវៀតណាមក្រុង Da Nang គោលដៅបំប្លែងបៃតង និងការអភិវឌ្ឍប្រកបដោយចីរភាព ត្រូវបានផ្សារភ្ជាប់ជាមួយនឹងផែនការមេទីក្រុងដំណាក់កាល ២០២១-២០៣០ ចក្ខុវិស័យដល់ឆ្នាំ ២០៥០។

ស្របពេលជាមួយគ្នានេះ ទីក្រុងបានកសាងផែនទីបង្ហាញផ្លូវអភិវឌ្ឍសេដ្ឋកិច្ចវិលជុំឆ្លងកាត់ ៣ ដំណាក់កាល៖ ចាប់ផ្តើមដំណើរការពីឆ្នាំ ២០២២ ដល់ឆ្នាំ ២០២៥, អភិវឌ្ឍពីឆ្នាំ ២០២៥ ដល់ឆ្នាំ ២០៣០, បង្កើនល្បឿនលើទំហំទូទាំងទីក្រុងពីឆ្នាំ ២០៣០ ដល់ឆ្នាំ ២០៤៥។

តាមតម្រង់ទិសនេះ Da Nang ខិតខំប្រឹងប្រែងដើម្បីសម្រេចបានជាមូលដ្ឋាននូវបណ្តាលក្ខណៈវិនិច្ឆ័យនៃទីក្រុងវិលជុំមួយនាចុងឆ្នាំ ២០៤៥។

ថ្នាក់ដឹកនាំទីក្រុងបានស្នើឱ្យផ្តល់អាទិភាពដល់ការចលនាកៀរគរប្រភពជំនួយមិនមែនរដ្ឋាភិបាលបរទេស សម្រាប់បណ្តាគម្រោងអភិវឌ្ឍន៍បៃតង សេដ្ឋកិច្ចវិលជុំ បញ្ចេញឱ្យអស់ពីសមត្ថភាពនូវតួនាទីរបស់សហភាពបណ្តាអង្គការមិត្តភាពទីក្រុង ក្នុងការតភ្ជាប់ដៃគូជាមួយបណ្តាមន្ទីរ អង្គភាពជំនាញ និងមូលដ្ឋាន ដើម្បីធ្វើឱ្យជាក់ស្តែងទៅជាបណ្តាកម្មវិធី និងផែនការកិច្ចសហប្រតិបត្តិការ។

ទីក្រុង Da Nang មានបំណងប្រាថ្នាឱ្យបណ្តាអង្គការមិនមែនរដ្ឋាភិបាលបរទេស ពង្រឹងការផ្ទេរចំណេះដឹង បច្ចេកវិទ្យាបៃតង ឧទ្ទេសនាមបណ្តាគំរូសេដ្ឋកិច្ចវិលជុំប្រកបដោយប្រសិទ្ធភាពនៅលើពិភពលោក ជួយឧបត្ថម្ភលើកកម្ពស់សមត្ថភាពសម្រាប់ជួរកម្មាភិបាលមូលដ្ឋាន សហគ្រាសធុនតូចនិងមធ្យម ស្របពេលជាមួយគ្នានេះ ផ្សព្វផ្សាយបំណិនអនុវត្តសេដ្ឋកិច្ចបៃតង សេដ្ឋកិច្ចវិលជុំដល់ប្រជាជន។

លោក Nguyen Dinh Vinh ក៏បានស្នើឱ្យបណ្តាមន្ទីរ អង្គភាពជំនាញ និងមូលដ្ឋានបន្តកែទម្រង់រដ្ឋបាល លើកកម្ពស់ការទទួលខុសត្រូវក្នុងការសម្របសម្រួល បង្កើតលក្ខខណ្ឌអំណោយផល ដើម្បីឱ្យបណ្តាអង្គការមិនមែនរដ្ឋាភិបាលបរទេសអនុវត្តកម្មវិធី និងគម្រោងនានានៅលើភូមិសាស្ត្រ។

ពង្រីកការសម្របសម្រួលក្នុងកិច្ចការបរទេសប្រជាជន

នៅក្នុងសិក្ខាសាលា សហភាពបណ្តាអង្គការមិត្តភាពក្រុង Da Nang និងទស្សនាវដ្តី យុគសម័យ បានចុះហត្ថលេខាលើកិច្ចព្រមព្រៀងសម្របសម្រួលអនុវត្តសកម្មភាពកិច្ចការបរទេសប្រជាជនដំណាក់កាល ២០២៦-២០៣០។

ភាគីទាំងពីរបានឯកភាពសម្របសម្រួលលើ ៥ វិស័យស្នូល រួមមាន៖ ព័ត៌មាន និងការឃោសនាកិច្ចការបរទេស, ការរៀបចំវគ្គបណ្តុះបណ្តាល បំប៉នចំណេះដឹង បំណិន និងជំនាញវិជ្ជាជីវៈសារព័ត៌មាន-ផ្សព្វផ្សាយកិច្ចការបរទេស, ការឧបត្ថម្ភផ្នែកសារព័ត៌មាន ឬសហការរៀបចំព្រឹត្តិការណ៍កិច្ចការបរទេសប្រជាជន, ការតភ្ជាប់ និងពង្រីកបណ្តាញដៃគូ ព្រមទាំងការចលនាកៀរគរប្រភពធនធាន, ការសម្របសម្រួលចូលរួមក្នុងបណ្តាគណៈប្រតិភូបំពេញបេសកកម្ម ព្រឹត្តិការណ៍កិច្ចការបរទេសសំខាន់ៗ និងសកម្មភាពជាក់ស្តែងដែលរៀបចំឡើងដោយទីក្រុង Da Nang និងសហភាពបណ្តាអង្គការមិត្តភាពទីក្រុង។

ក៏នៅក្នុងក្របខ័ណ្ឌនៃកម្មវិធីនេះដែរ សហភាពបណ្តាអង្គការមិត្តភាពទីក្រុង Da Nang បានចុះហត្ថលេខាលើកំណត់ហេតុនៃការយោគយល់គ្នាស្តីពីកិច្ចសហប្រតិបត្តិការលើកទី ៣ ជាមួយអង្គការ Save the Children International (SCI) និងអង្គការ VinaCapital Foundation (VCF)។

តាមខ្លឹមសារនៃកំណត់ហេតុនៃការយោគយល់គ្នាជាមួយ Save the Children International ភាគីទាំងពីរបានឯកភាពសម្របសម្រួលអនុវត្តបណ្តាសកម្មភាពក្នុងវិស័យការពារកុមារ អភិបាលកិច្ចសិទ្ធិកុមារ ការអប់រំ សុខាភិបាល និងអាហារូបត្ថម្ភ ការកាត់បន្ថយភាពក្រីក្រសម្រាប់កុមារ និងយុវជន-កុមារ ការកាត់បន្ថយហានិភ័យគ្រោះមហន្តរាយធម្មជាតិ និងការឆ្លើយតបទៅនឹងការប្រែប្រួលអាកាសធាតុ។

ក្នុងឱកាសនេះ អង្គការ Catalyste+ (ប្រទេសកាណាដា) ត្រូវបានប្រគល់ប័ណ្ណសរសើរពីប្រធានគណៈកម្មាធិការប្រជាជនទីក្រុង Da Nang ដោយសារមានស្នាដៃរួមចំណែកយ៉ាងសកម្មក្នុងការងារបំប្លែងសេដ្ឋកិច្ចបៃតង សេដ្ឋកិច្ចវិលជុំ និងការអភិវឌ្ឍប្រកបដោយចីរភាពនៅទីក្រុង៕

ទីក្រុងហាយហ្វុងចលនានូវជំនួយឥតសំណងមិនមែនរដ្ឋាភិបាលលើសពី ១.៣៦ លានដុល្លារអាមេរិក យុគសម័យ - នៅក្នុងរយៈពេល ៦ ខែដើមឆ្នាំ ២០២៦ សម្ព័ន្ធបណ្តាអង្គការមិត្តភាពទីក្រុងហាយហ្វុងបានចលនានូវជំនួយឥតសំណងមិនមែនរដ្ឋាភិបាលបរទេសលើសពី ១.៣៦ លានដុល្លារអាមេរិក នៅក្នុងនោះបើកផ្តល់ថវិកាលើសពី ១.១ លានដុល្លារអាមេរិក។ នាពេលខាងមុខ ទីក្រុងផ្តល់អាទិភាពពង្រីកកិច្ចសហប្រតិបត្តិការនៅក្នុងបណ្តាវិស័យឆ្លើយតបនិងការប្រែប្រួលអាកាសធាតុ ជីវភាពរស់នៅប្រកបដោយចីរភាព ការអប់រំ សុខាភិបាលព្រមទាំងការផ្លាស់ប្តូរឌីជីថល។

ការតភ្ជាប់ប្រភពធនធានមិនមែនរដ្ឋាភិបាលបរទេស ជាមួយអាទិភាពអភិវឌ្ឍន៍ថ្មីៗរបស់វៀតណាម យុគសម័យ - នាថ្ងៃទី ១ ខែតុលា នៅទីក្រុង Hai Phong ប្រតិភូជិត ៣០០ នាក់ មកពីអង្គការមិនមែនរដ្ឋាភិបាលបរទេសប្រមាណ ១០០ អង្គការ ព្រមទាំងតំណាងបណ្តាក្រសួង ស្ថាប័ន និងមូលដ្ឋាននានា បានចូលរួមសន្និសីទជួបប្រាស្រ័យជាមួយអង្គការមិនមែនរដ្ឋាភិបាលបរទេសឆ្នាំ ២០២៦។ សន្និសីទបានផ្តោតលើការដោះស្រាយការជាប់ជំពាក់ស្មុគស្មាញខាងស្ថាប័ន ព្រមទាំងបង្កើនការតភ្ជាប់ប្រភពធនធានអន្តរជាតិជាមួយបណ្តាអាទិភាពអភិវឌ្ឍន៍ថ្មីៗរបស់វៀតណាម ដូចជា វិទ្យាសាស្ត្រ-បច្ចេកវិទ្យា បរិវត្តកម្មឌីជីថល កំណើនបៃតង និងការអភិវឌ្ឍធនធានមនុស្ស។

ឌឿងង្វៀន