កម្ពស់ធនធានជនជាតិវៀតណាមទូទាំងសកលលោកសម្រាប់ទីក្រុង Ho Chi Minh

ក្នុងឆ្នាំ ២០២៥ បរិមាណប្រាក់បញ្ញើអាណិកជនមកកាន់ប្រទេសវៀតណាមត្រូវបានប៉ាន់ប្រមាណថាសម្រេចបានជិត ១៨ ពាន់លានដុល្លារអាមេរិក ដែលក្នុងនោះ ទីក្រុង Ho Chi Minh ស្រូបយកជាង ៥០% ជាមួយនឹងទឹកប្រាក់ប្រមាណ ១០,៣ ពាន់លានដុល្លារអាមេរិក។

ប្រភពទុននេះបានរួមចំណែកបំពេញបន្ថែមធនធានដល់ខឿនសេដ្ឋកិច្ច ធ្វើឱ្យមានស្ថិរភាពជញ្ជីងទូទាត់ ព្រមទាំងឆ្លុះបញ្ចាំងពីទំនុកចិត្តរបស់សហគមន៍ជនជាតិវៀតណាមនៅក្រៅប្រទេសចំពោះបរិយាកាសវិនិយោគ ស្ថិរភាពសេដ្ឋកិច្ច និងទិសដៅអភិវឌ្ឍន៍របស់ទីក្រុង។

ទោះជាយ៉ាងណាក៏ដោយ ការរួមចំណែករបស់អាណិកជនមិនបានឈប់ត្រឹមតែលំហូរសាច់ប្រាក់ផ្ញើមកវិញប្រចាំឆ្នាំនោះឡើយ។ និន្នាការផ្លាស់ប្តូរពី «ប្រាក់បញ្ញើអាណិកជន» ទៅជា «កម្លាំងអាណិកជន» កំពុងបង្ហាញឡើងកាន់តែច្បាស់ ជាមួយនឹងការចូលរួមរបស់បញ្ញវន្ត សហគ្រិន និងអ្នកជំនាញអាណិកជនក្នុងការវិនិយោគ ការផ្ទេរបច្ចេកវិទ្យា ការតភ្ជាប់ប្រព័ន្ធអេកូឡូស៊ីនវានុវត្តន៍ ការទូតប្រជាជននិងប្រជាជន ការផ្សព្វផ្សាយរូបភាពប្រទេសជាតិ និងការថែរក្សាវប្បធម៌ប្រពៃណី។

កសាង «ស្ពានមេតភ្ជាប់សេដ្ឋកិច្ច» ពីសហគមន៍អាណិកជន

បណ្ឌិត Tran Hai Linh ប្រធានសមាគមសហគ្រិន និងវិនិយោគ វៀតណាម - កូរ៉េខាងត្បូង (VKBIA) និងជាប្រធានស្ថាបនិកសមាគមអ្នកជំនាញ និងបញ្ញវន្ត វៀតណាម - កូរ៉េខាងត្បូង (VKEIA) បានឱ្យដឹងថា បច្ចុប្បន្នទីក្រុង Ho Chi Minh បានទាក់ទាញសហគ្រាសជាង ៣.០០០ ដែលវិនិយោគដោយអាណិកជន ជាមួយនឹងទុនសរុបជាង ៤៥.០០០ ពាន់លានដុង។

យោងតាមលោក តម្លៃរបស់សហគ្រិនអាណិកជនមិនត្រឹមតែស្ថិតនៅលើប្រភពទុននោះទេ ប៉ុន្តែថែមទាំងស្ថិតនៅលើសមត្ថភាពក្នុងការនាំមកដំណាលគ្នានូវបច្ចេកវិទ្យា ចំណេះដឹងគ្រប់គ្រង ស្តង់ដារអន្តរជាតិ បណ្តាញអតិថិជន ដៃគូ សមត្ថភាពក្នុងការទាក់ទងមូលនិធិវិនិយោគ វិទ្យាស្ថានស្រាវជ្រាវ សាកលវិទ្យាល័យ សាជីវកម្មពហុជាតិ និងខ្សែច្រវាក់ផ្គត់ផ្គង់សកលលោកផងដែរ។

ប្រតិភូអាណិកជនចូលរួមកិច្ចជួបជុំប្រតិភូជនជាតិវៀតណាមនៅក្រៅប្រទេស អបអរសាទរបុណ្យចូលឆ្នាំថ្មីប្រពៃណីជាតិ ឆ្នាំមមី នព្វស័ក ឆ្នាំ ២០២៦ នៅទីក្រុង Ho Chi Minh។

គុណសម្បត្តិមួយទៀត គឺសមត្ថភាពក្នុងការយល់ដឹងពីទីផ្សារទាំងពីរក្នុងពេលដំណាលគ្នា។ សហគ្រិនអាណិកជន មិនត្រឹមតែយល់ច្បាស់ពីប្រទេសវៀតណាមប៉ុណ្ណោះទេ ប៉ុន្តែថែមទាំងយល់ដឹងយ៉ាងស៊ីជម្រៅអំពីច្បាប់ វប្បធម៌ធុរកិច្ច ស្តង់ដារបច្ចេកទេស ប្រព័ន្ធចែកចាយ និងរបៀបធ្វើសេចក្តីសម្រេចចិត្តនៅក្នុងប្រទេសសាមីទៀតផង។

យោងតាមបណ្ឌិត Tran Hai Linh សមត្ថភាពនេះមានភាពចាំបាច់ជាពិសេសនៅពេលដែលសហគ្រាសវៀតណាមពង្រីកខ្លួនទៅកាន់ទីផ្សារអន្តរជាតិ។

ជាក់ស្តែងបង្ហាញថា សហគ្រាសក្នុងស្រុកជាច្រើនមានផលិតផលល្អ ប៉ុន្តែនៅខ្វះខាតព័ត៌មានទីផ្សារ ដៃគូដែលអាចទុកចិត្តបាន និងការយល់ដឹងអំពីស្តង់ដារអន្តរជាតិ។ ការតភ្ជាប់ជាមួយសហគ្រិនអាណិកជនដែលមានកិត្យានុភាព និងយល់ដឹងច្បាស់ពីទីផ្សារសាមី អាចជួយកាត់បន្ថយពេលវេលានៃដំណើរការឈានចូលទីផ្សារ កាត់បន្ថយការចំណាយលើការសាកល្បង និងបង្កើនលទ្ធភាពទទួលបានជោគជ័យ។

ពីចំណុចនោះ លោកបានស្នើថា ទីក្រុង Ho Chi Minh អាចចាត់ទុកសហគមន៍សហគ្រិនវៀតណាមនៅលើពិភពលោកជាបណ្តាញនៃ «ស្ពានមេតភ្ជាប់សេដ្ឋកិច្ច» ដោយបោះជំហានបង្កើតបណ្តាញសហគ្រិនវៀតណាមសកលលោកជាបណ្តើរៗ ទៅតាមចង្កោមវិស័យនានា ដូចជា ហិរញ្ញវត្ថុ-fintech, ឧបករណ៍ពាក់កណ្តាលចម្លង-AI, ជីវបច្ចេកវិទ្យា-សុខាភិបាល, ការអប់រំ-ធនធានមនុស្ស, ភស្តុភារកម្ម-ខ្សែច្រវាក់ផ្គត់ផ្គង់, បច្ចេកវិទ្យាបៃតង-ថាមពល និងនវានុវត្តន៍-ការវិនិយោគប្រថុយប្រថាន។

លោកស្រីបណ្ឌិត Luong Bach Van អតីតអនុប្រធានគណៈកម្មាធិការរណសិរ្សមាតុភូមិវៀតណាមប្រចាំទីក្រុង Ho Chi Minh និងជាអតីតប្រធានសមាគមទំនាក់ទំនងជាមួយជនជាតិវៀតណាមនៅក្រៅប្រទេសប្រចាំទីក្រុង បានយល់ឃើញថា អាណិកជនចាំបាច់ត្រូវតែត្រូវបានមើលឃើញថាជាតួអង្គអភិវឌ្ឍន៍មួយ ជាដៃគូរយៈពេលវែងដែលរួមគ្នាចូលរួមកសាងអនាគតរបស់ទីក្រុង។

ក្នុងរយៈពេលកន្លងមកនេះ ស្របជាមួយនឹងសកម្មភាពវិនិយោគ សហគមន៍បញ្ញវន្ត និងសហគ្រិនអាណិកជនបានចូលរួមតភ្ជាប់គម្រោងស្រាវជ្រាវ ការផ្ទេរបច្ចេកវិទ្យា មូលនិធិវិនិយោគប្រថុយប្រថាន និងគំរូធុរកិច្ចបង្កើតថ្មី ជាច្រើន មកកាន់ទីផ្សារទីក្រុង Ho Chi Minh។

ទន្ទឹមនឹងនោះ អាណិកជនក៏ដើរតួនាទីជាស្ពានមេនាំយកផលិតផល និងម៉ាកយីហោវៀតណាមទៅកាន់ទីផ្សារសកលលោក ព្រមទាំងចូលរួមផ្តល់យោបល់ពិគ្រោះ និងការរិះគន់កែលម្អគោលនយោបាយ ដើម្បីកែលម្អបរិយាកាសវិនិយោគផងដែរ។

ពី «ការអំពាវនាវ» ឆ្ពោះទៅកាន់ «ការបញ្ជាទិញ» ធនធានអាណិកជន

ក្រៅពីវិស័យសេដ្ឋកិច្ច សហគមន៍ជនជាតិវៀតណាមនៅក្រៅប្រទេស ក៏បានរួមចំណែកក្នុងការថែរក្សាអត្តសញ្ញាណវប្បធម៌ និងការកសាងធនធានមនុស្សសម្រាប់អនាគតផងដែរ។

ក្នុងរយៈពេលប៉ុន្មានឆ្នាំកន្លងមកនេះ ទីក្រុង Ho Chi Minh បានរៀបចំកម្មវិធីតភ្ជាប់យុវជនជំនាន់ក្រោយនៃអាណិកជន ដែលក្នុងនោះមានជំរំរដូវក្តៅសម្រាប់យុវជន-កុមារជនជាតិវៀតណាមនៅក្រៅប្រទេស។

តាមរយៈសកម្មភាពផ្លាស់ប្តូរ និងបទពិសោធន៍ជាក់ស្តែង យុវជនជំនាន់ក្រោយទទួលបានឱកាសបន្ថែមក្នុងការស្វែងយល់អំពីប្រវត្តិសាស្ត្រ ប្រពៃណីជាតិ និងការអភិវឌ្ឍរបស់ទីក្រុង Ho Chi Minh ព្រមទាំងថែរក្សាភាសាវៀតណាម និងបង្កើនភាពផ្សារភ្ជាប់ជាមួយមាតុភូមិ។

កញ្ញា Dang Tu Quynh ប្រធានសមាគមយុវជន-និស្សិតវៀតណាមប្រចាំប្រទេសជប៉ុន បន្ទាប់ពីបានចូលរួមក្នុងជំរំរដូវក្តៅយុវជន-កុមារអាណិកជន និងយុវជនទីក្រុង Ho Chi Minh ឆ្នាំ ២០២៦ បានយល់ឃើញថា ទោះបីជាកើត និងធំធាត់នៅទីណាក៏ដោយ ក៏យុវជនជំនាន់ក្រោយនៃជនជាតិវៀតណាមនៅក្រៅប្រទេស នៅតែរក្សាបាននូវភាពផ្សារភ្ជាប់យ៉ាងជិតស្និទ្ធជាមួយប្រភពដើមកំណើត និងបំណងប្រាថ្នារួមចំណែកដល់មាតុភូមិ។

ដើម្បីទាញយកផលប្រយោជន៍ឱ្យកាន់តែប្រសើរពីប្រភពធនធាននេះ បណ្ឌិត Tran Hai Linh បានយល់ឃើញថា ទីក្រុង Ho Chi Minh ចាំបាច់ត្រូវផ្លាស់ប្តូរពីវិធីសាស្ត្រ «ការអំពាវនាវដល់អាណិកជន» ទៅជា «ការបញ្ជាទិញធនធានពីអាណិកជន» វិញ។

សមាជិកនៃជំរំរដូវក្តៅយុវជន-កុមារអាណិកជនទីក្រុង Ho Chi Minh ឆ្នាំ ២០២៦ នៅសារមន្ទីរ Con Dao។

យោងតាមនោះ ទីក្រុងអាចប្រកាសនូវបញ្ហាអភិវឌ្ឍន៍ជាក់ស្តែង ដើម្បីឱ្យសហគ្រិន និងអ្នកជំនាញអាណិកជនស្នើឡើងនូវដំណោះស្រាយ រួមគ្នាអនុវត្ត និងវាយតម្លៃដោយលទ្ធផលជាក់ស្តែង។

បណ្តាវិស័យដែលអាចដាក់ការបញ្ជាទិញ រួមមាន AI ក្នុងការគ្រប់គ្រងទីក្រុង, ភស្តុភារកម្មបៃតងសម្រាប់ប្រព័ន្ធកំពង់ផែ, ឧបករណ៍ពាក់កណ្តាលចម្លង និងការរចនាបន្ទះឈីប, ហិរញ្ញវត្ថុឌីជីថល, ជីវបច្ចេកវិទ្យាក្នុងវិស័យសុខាភិបាល, ថាមពលស្អាត ឬការគាំទ្រដល់ startup ទីក្រុង Ho Chi Minh ក្នុងការទទួលបានមូលនិធិវិនិយោគអន្តរជាតិ។

ទន្ទឹមនឹងនោះ បណ្ឌិត Tran Hai Linh និងសហគ្រិនអាណិកជនមួយចំនួនបានស្នើឱ្យសិក្សាស្រាវជ្រាវកសាងច្រកចេញចូលតែមួយ សម្រាប់ការវិនិយោគ និងនវានុវត្តន៍របស់ជនជាតិវៀតណាមនៅក្រៅប្រទេស។

យោងតាមមតិយោបល់នានា ចំណុចរាំងស្ទះមួយក្នុងចំណោមចំណុចរាំងស្ទះនាពេលបច្ចុប្បន្ន គឺអាណិកជនជាច្រើនមានគំនិត ដៃគូ និងធនធាន ប៉ុន្តែនៅពេលអនុវត្តនៅវៀតណាម ត្រូវទាក់ទងស្ថាប័នជាច្រើន និងស្វែងយល់ដោយខ្លួនឯងអំពីនីតិវិធីជាច្រើន ជាពិសេសគឺនីតិវិធីរដ្ឋបាល។

ថ្នាក់ដឹកនាំទីក្រុង Ho Chi Minh បានបញ្ជាក់ជាច្រើនលើកច្រើនសារថា សមិទ្ធផលអភិវឌ្ឍន៍របស់ទីក្រុងមានការរួមចំណែកយ៉ាងសំខាន់ពីសហគមន៍សហគ្រាស អ្នកវិទ្យាសាស្ត្រ អ្នកជំនាញ បញ្ញវន្ត និងអាណិកជន តាមរយៈការវិនិយោគ ការផ្ទេរចំណេះដឹង ការតភ្ជាប់ទីផ្សារ និងការផ្សព្វផ្សាយរូបភាពរបស់ទីក្រុង។

សមាជិកគណៈកម្មាធិការមជ្ឈិមបក្ស ប្រធានគណៈកម្មាធិការប្រជាជនទីក្រុង Ho Chi Minh លោក Nguyen Van Duoc បានសម្តែងនូវបំណងប្រាថ្នាឱ្យសហគមន៍ជនជាតិវៀតណាមនៅក្រៅប្រទេស បន្តលើកកម្ពស់ស្មារតីស្នេហាជាតិ មោទនភាពជាតិ រួមដំណើរជាមួយគណៈកម្មាធិការបក្ស អាជ្ញាធរ និងប្រជាជនទីក្រុងក្នុងដំណើរការអភិវឌ្ឍន៍។

លោកបានឱ្យដឹងថា ទីក្រុងប្តេជ្ញាបន្តសុក្រឹតស្ថាប័ន កែលម្អបរិយាកាសវិនិយោគ-ធុរកិច្ច ធ្វើឱ្យមានតម្លាភាពនូវបណ្តាញកៀរគរ និងប្រើប្រាស់ធនធាន ព្រមទាំងធានាសិទ្ធិ និងផលប្រយោជន៍ស្របច្បាប់ សមស្របរបស់អ្នកវិនិយោគ ដែលក្នុងនោះមានសហគមន៍ជនជាតិវៀតណាមនៅក្រៅប្រទេសផងដែរ៕

ការផ្តល់អនុសាសន៍ដើម្បីឱ្យប្រភពធនធានជនជាតិវៀតណាមនៅបរទេសហូរចូលមកកាន់រដ្ឋធានីយ៉ាងពិតប្រាកដ យុគសម័យ - ប្រភពធនធានជនជាតិវៀតណាមនៅបរទេស ត្រូវបានវាយតម្លៃថាជាប្រភពធនធានដ៏សំខាន់មួយសម្រាប់ដំណើរការអភិវឌ្ឍន៍របស់ទីក្រុងហាណូយនៅក្នុងដំណាក់កាលថ្មី។ ទោះជាយ៉ាងណាក៏ដោយ ដើម្បីបំប្លែងសក្តានុពលទាំងនេះឱ្យទៅជាកម្លាំងចលករជាក់ស្តែង បើតាមការយល់ឃើញរបស់អ្នកជំនាញការ ផ្ទះការទូត និងតំណាងបណ្តាអង្គការប្រជាជនជាច្រើនរូប រដ្ឋធានីចាំបាច់ត្រូវកសាងប្រព័ន្ធទិន្នន័យ ឱ្យមានរបៀបរៀបរយ បំពេញបន្ថែមនូវយន្តការទាក់ទាញអ្នកមានទេពកោសល្យ បង្កើតបរិយាកាសអំណោយផលដើម្បីឱ្យអ្នកជំនាញការជនជាតិវៀតណាមនៅបរទេសអាចលះបង់កម្លាំងកាយចិត្ត និងបង្កើតឡើងនូវបណ្តាញទំនាក់ទំនងតភ្ជាប់ប្រកបដោយប្រសិទ្ធភាពជាមួយសហគមន៍ជនជាតិវៀតណាមនៅទូទាំងពិភពលោក។

ទីក្រុងហាណូយ ស្វែងរកដំណោះស្រាយតភ្ជាប់ប្រភពធនធានជនជាតិវៀតណាមនៅបរទេស សំដៅអភិវឌ្ឍន៍រដ្ឋធានី យុគសម័យ - នថ្ងៃទី ១០ មិថុនា នៅទីក្រុងហាណូយ សហភាពបណ្តាអង្គការមិត្តភាពទីក្រុងហាណូយ បានធ្វើជាម្ចាស់ផ្ទះរៀបចំកិច្ចពិភាក្សាតុមូល ដើម្បីប្រមូលមតិរួមចំណែកបំពេញបន្ថែមលើសេចក្តីព្រាងគម្រោង «ពង្រឹងកិច្ចការបរទេសប្រជាជនរបស់រដ្ឋធានី ពង្រីកតួនាទីរបស់រណសិរ្សមាតុភូមិវៀតណាមទីក្រុងហាណូយ ក្នុងការចលនា និងតភ្ជាប់ជនជាតិវៀតណាមនៅបរទេស បញ្ញវន្ត អ្នកជំនាញការ សហគ្រិន និងអាណិកជន ឱ្យចូលរួមក្នុងការកសាង និងអភិវឌ្ឍន៍រដ្ឋធានីនៅក្នុងដំណាក់កាលថ្មី» សំដៅធ្វើការផ្លាស់ប្តូរថ្មី និងលើកកម្ពស់ប្រសិទ្ធភាពនៃការងារកិច្ចការបរទេសប្រជាជន ព្រមទាំងបង្កើនការតភ្ជាប់ និងទាក់ទាញបណ្តាញប្រភពធនធានជនជាតិវៀតណាមនៅបរទេស ឱ្យរួមចំណែកកសាងរដ្ឋធានីនៅក្នុងដំណាក់កាលអភិវឌ្ឍន៍ថ្មី។

វ៉ាន់ណាំ