World Vision ជួយឧបត្ថម្ភប្រជាពលរដ្ឋ Dao San ឱ្យស្តារឡើងវិញក្រោយគ្រោះទឹកជំនន់ហូរគំហុក

ដៃទទេក្រោយមួយយប់

ចាប់ពីយប់ថ្ងៃទី ១៥ ខែកក្កដា ដល់ថ្ងៃទី ១៩ ខែកក្កដា ភ្លៀងធ្លាក់ពីបង្គួរទៅខ្លាំងជាបន្តបន្ទាប់បានកើតឡើងនៅលើភូមិសាស្ត្រខេត្ត Lai Chau ដោយបង្កជាគ្រោះទឹកជំនន់ហូរគំហុកនៅតាមឃុំជាច្រើន ក្នុងនោះមាន Dao San ផងដែរ។

ចំពោះក្រុមគ្រួសារបងប្រុស Khoa ជនជាតិ Dao ការចងចាំអំពីគ្រោះទឹកជំនន់នៅតែដក់ជាប់មិនទាន់រសាយបាត់ឡើយ។

នៅវេលាម៉ោងប្រមាណ ៣ ទៀបភ្លឺ ពេលឮសំឡេងភ្លៀងធ្លាក់ខ្លាំង និងខ្យល់បោកបក់ខ្លាំង លោកបានបើកទ្វារពិនិត្យមើល ហើយស្រាប់តែប្រទះឃើញទឹកហៀរចេញពីស្រះចិញ្ចឹមត្រីនានាជន់ជោរមក ចំណែកដីចម្ការចាប់ផ្តើមបាក់ស្រុត។ ប្តីប្រពន្ធទាំងពីរនាក់មិនទាន់ប្រមូលទុកដាក់ទ្រព្យសម្បត្តិបានទាន់ពេលនោះឡើយ បានត្រឹមតែបីក្មួយតូចៗពីរនាក់រត់ឡើងទៅលើភ្នំថ្មខ្ពស់ ដើម្បីគេចវេះពីខ្សែទឹកហូរគំហុក។

រហូតដល់ម៉ោង ៥ ទៀបភ្លឺ កម្លាំងសមត្ថកិច្ចបានទៅដល់កន្លែងកើតហេតុ និងជួយនាំយកក្រុមគ្រួសារទៅកាន់ទីតាំងប្រកបដោយសុវត្ថិភាព។

ក្រោយគ្រោះទឹកជំនន់ ម៉ូតូ ម៉ាស៊ីនបោកស្រូវ និងកសិផលដែលបានសន្សំទុករបស់ក្រុមគ្រួសារ សុទ្ធតែត្រូវបានទឹកហូរកាត់យកទៅអស់។ វាលស្រែ និងស្រះចិញ្ចឹមត្រីក៏ត្រូវបានដីថ្មហូរកប់លុបផងដែរ។

បងស្រី May ភរិយារបស់បងប្រុស Khoa បានរៀបរាប់ទាំងក្តុកក្តួលថា៖ «ឈឺចិត្តខ្លាំងណាស់! ឈឺចិត្តអស់រយៈពេល ២ ខែជាប់គ្នាញ៉ាំបាយមិនចូលឡើយ ទ្រព្យសម្បត្តិបាត់បង់អស់រលីងហើយ»។

ផ្ទះសម្បែងជាមួយនឹងដីមួយផ្នែកដែលត្រូវបាក់ស្រុតរបស់ក្រុមគ្រួសារបងប្រុស Lo។

ក្រុមគ្រួសារបងប្រុស Lo ដែលជាជនជាតិ Dao ដូចគ្នា ក៏រងការខូចខាតយ៉ាងធ្ងន់ធ្ងរផងដែរ ដោយមានផ្ទៃដីស្រែចំនួន ១.៥០០ ម៉ែត្រការ៉េ និងផ្ទៃដីដាំក្រវាញទំហំ ១.០០០ ម៉ែត្រការ៉េ ដែលជិតដល់ពេលប្រមូលផល ត្រូវបានកប់លុប។ ផ្នែកមួយនៃលំនៅឋានក៏ត្រូវបានបាក់ស្រុត។

បងប្រុស Lo បានរៀបរាប់ថា ក្រោយពេលមានភ្លៀងធ្លាក់ខ្លាំងអស់រយៈពេលពីរថ្ងៃ ផ្នែកយ៉ផ្ទះស្រាប់តែបាក់រលំចុះចំកណ្តាលសំឡេងដីថ្មបាក់។ លោកនិងឪពុកបានបីកូនតូចៗពីរនាក់យកទៅផ្ញើនៅផ្ទះសាច់ញាតិបានទាន់ពេល ខណៈដែលទ្រព្យសម្បត្តិត្រូវបោះបង់ចោលនៅពីក្រោយ។

ជាសំណាងល្អ ផ្ទះសម្បែងរងការបាក់ស្រុតតែមួយផ្នែកប៉ុណ្ណោះ។ ទោះជាយ៉ាងណាក៏ដោយ សមាជិកចំនួន ៧ នាក់នៅក្នុងគ្រួសារ បច្ចុប្បន្ននៅតែត្រូវរស់នៅក្បែរមាត់ជ្រោះដ៏ជ្រៅរាប់សិបម៉ែត្រ ប្រឈមមុខនឹងហានិភ័យនៃអសន្តិសុខ។

ពីការអំពាវនាវ ឈានទៅរកការជួយឧបត្ថម្ភនៅទីតាំងជាក់ស្តែង

ចំពោះមុខការខូចខាតយ៉ាងធ្ងន់ធ្ងរ និងការវិវត្តដ៏ស្មុគស្មាញនៃអាកាសធាតុ នាថ្ងៃទី ៣ ខែសីហា គណៈសម្របសម្រួលជំនួយប្រជាជន (PACCOM) បានចេញលិខិតអំពាវនាវដល់បណ្តាអង្គការមិនមែនរដ្ឋាភិបាលបរទេសប្រចាំនៅវៀតណាម ឱ្យរួមដៃគ្នាជួយឧបត្ថម្ភប្រជាពលរដ្ឋនៅតំបន់រងគ្រោះទឹកជំនន់។

នៅថ្ងៃទី ១៣ ខែសីហា អង្គការ World Vision បានឆ្លើយតបជាផ្លូវការ និងប្តេជ្ញាផ្តល់ជំនួយសង្គ្រោះបន្ទាន់។

ពីរសប្តាហ៍ក្រោយមក នាថ្ងៃទី ២៨ ខែសីហា គណៈកម្មាធិការប្រជាជនខេត្ត Lai Chau បានចេញសេចក្តីសម្រេចអនុម័តគម្រោង។

ភ្លាមៗនៅក្នុងខែកញ្ញា ឆ្នាំ ២០២៦ អង្គការ World Vision បានសហការជាមួយកាកបាទក្រហម និងអាជ្ញាធរមូលដ្ឋាន ធ្វើការពិនិត្យ ផ្ទៀងផ្ទាត់ និងវាយតម្លៃបញ្ជីឈ្មោះគ្រួសារដែលទទួលផលតាមលក្ខណៈវិនិច្ឆ័យ ដើម្បីធានាការជួយឧបត្ថម្ភចំមុខសញ្ញា។

តំណាងបណ្តាអង្គការចុះសួរសុខទុក្ខ និងប្រគល់អំណោយឧបត្ថម្ភជូនគ្រួសារប្រជាពលរដ្ឋដែលរងផលប៉ះពាល់ដោយសារគ្រោះធម្មជាតិនៅឃុំ Dao San។

ឆ្លងតាមដំណើរការនេះ អង្គការ World Vision បានសម្រេចជួយឧបត្ថម្ភដល់ឃុំចំនួន ២ ដែលរងផលប៉ះពាល់ធ្ងន់ធ្ងរបំផុតនៅ Lai Chau ក្នុងនោះមានគ្រួសារចំនួន ១៣០ គ្រួសារនៅឃុំ Dao San។

នៅថ្ងៃទី ២៨ ខែកញ្ញា អង្គការ World Vision បានសហការជាមួយអាជ្ញាធរមូលដ្ឋាន និងស្ថាប័នមានសមត្ថកិច្ចនានា ប្រគល់ប្រាក់ឧបត្ថម្ភជាសាច់ប្រាក់ពហុបំណង ជូនដល់បណ្តាគ្រួសារដែលរងផលប៉ះពាល់យ៉ាងធ្ងន់ធ្ងរដោយសារគ្រោះធម្មជាតិនៅ Dao San។

តាមផែនការ ប្រាក់ឧបត្ថម្ភត្រូវបានបើកផ្តល់ជាច្រើនដំណាក់កាល ដោយចាប់ផ្តើមពីចុងខែកញ្ញា រហូតដល់ដំណាច់ខែតុលា ឆ្នាំ ២០២៦។

ផ្អែកលើអនុសាសន៍របស់ក្រសួងកសិកម្ម និងអភិវឌ្ឍន៍ជនបទ ស្តីពីកម្រិតឧបត្ថម្ភចាប់ពី ២,៥ លានដុង រហូតដល់អតិបរមាស្មើនឹង ២០០ ដុល្លារអាមេរិក ពោលគឺប្រមាណ ៥,១ លានដុងក្នុងមួយគ្រួសារ អង្គការ World Vision និងដៃគូមូលដ្ឋាននានាបានឯកភាពលើកម្រិតឧបត្ថម្ភ ៤ លានដុងក្នុងមួយគ្រួសារ។

ប្រភពថវិកានេះត្រូវបានរំពឹងទុកថានឹងជួយដល់ក្រុមគ្រួសារនានាឱ្យម្ចាស់ការដោះស្រាយតម្រូវការបន្ទាន់បំផុត ព្រមទាំងបោះជំហានមួយៗជំនះពុះពារលើផលវិបាក និងស្តារជីវភាពរស់នៅឡើងវិញក្រោយគ្រោះធម្មជាតិ។

បងស្រី May បានឱ្យដឹងថា៖ «ផ្ទះសម្បែងបាក់ស្រុត ទ្រព្យសម្បត្តិបាត់បង់អស់ដោយសារទឹកជំនន់ហូរកាត់យកទៅ មនុស្សមួយផ្ទះគ្មានអ្វីហូបទៀតឡើយ យើងខ្ញុំកើតទុក្ខខ្លាំងណាស់។ ប៉ុន្តែនៅពេលទទួលបានការជួយឧបត្ថម្ភទាន់ពេលវេលានេះ ខ្ញុំមានអារម្មណ៍ថាកក់ក្តៅ និងទទួលបានការលើកទឹកចិត្តយ៉ាងខ្លាំង។ ក្រុមគ្រួសារនឹងមានធនធានបន្ថែមដើម្បីធ្វើស្រះត្រីឡើងវិញ និងឆាប់ស្តារសេដ្ឋកិច្ច»។

ចំពោះបងប្រុស Lo ប្រាក់ឧបត្ថម្ភនឹងត្រូវបានបែងចែកសម្រាប់តម្រូវការជាក់ស្តែងបំផុត។

លោកបានរៀបរាប់ថា៖ «ប្រាក់មួយចំណែកខ្ញុំនឹងយកទៅទិញពូជដើមក្រវាញមកដាំឡើងវិញ ចំណែកប្រាក់ដែលនៅសល់នឹងយកទៅជួសជុល និងពង្រឹងផ្ទះសម្បែងឱ្យកាន់តែរឹងមាំ និងមានសុវត្ថិភាពជាងមុន»។

បន្តរួមដំណើរជាមួយប្រជាពលរដ្ឋ Dao San

លោក Doseba Sinay ប្រធានតំណាងអង្គការ World Vision International ប្រចាំនៅវៀតណាម បានឱ្យដឹងថា ភ្លាមៗនៅពេលទទួលបានព័ត៌មានអំពីភ្លៀងធ្លាក់ខ្លាំង ទឹកជំនន់ហូរគំហុក និងការបាក់ស្រុតដីយ៉ាងធ្ងន់ធ្ងរនៅ Lai Chau កាលពីខែកក្កដា លោកនិងមនុស្សជាច្រើនបានតាមដានស្ថានការណ៍យ៉ាងយកចិត្តទុកដាក់។

តាមលោក រូបភាពនៃផ្ទះសម្បែង ហេដ្ឋារចនាសម្ព័ន្ធដែលរងការខូចខាត និងក្រុមគ្រួសារនានាដែលត្រូវប្រឈមមុខនឹងភាពមិនប្រាកដប្រជាជាច្រើន បានបង្កនូវក្តីរំជួលចិត្តយ៉ាងខ្លាំង។

បងស្រី May កំពុងស្តារសេដ្ឋកិច្ចគ្រួសារឡើងវិញ។

ក៏ក្នុងអំឡុងពេលនោះដែរ អង្គការ World Vision International ប្រចាំនៅវៀតណាម បានទទួលលិខិតអំពាវនាវសុំការជួយឧបត្ថម្ភពី PACCOM និង VUFO ស្តីពីផលប៉ះពាល់នៃគ្រោះធម្មជាតិចំពោះសហគមន៍នានានៅ Lai Chau ក្នុងនោះមាន Dao San ផងដែរ។

លោក Doseba Sinay បានចែករំលែកថា៖ «តួលេខ និងរបាយការណ៍នានាបានបង្ហាញថា គ្រួសារជាច្រើនបានរងនូវការបាត់បង់យ៉ាងធំធេង។ ប៉ុន្តែនៅពីក្រោយតួលេខនីមួយៗ គឺជារឿងរ៉ាវមួយអំពីការលំបាក អំពីឆន្ទៈ និងភាពអង់អាចក្លាហាន។ ចំណុចទាំងនោះបានប៉ះដល់បេះដូងរបស់យើងខ្ញុំ និងពង្រឹងការប្តេជ្ញាចិត្តរបស់ World Vision International ប្រចាំនៅវៀតណាម ក្នុងការរួមដំណើរជាមួយសហគមន៍នានាដែលរងផលប៉ះពាល់ក្នុងដំណាក់កាលដ៏លំបាកនេះ។ ទោះបីជាការរួមចំណែករបស់យើងខ្ញុំអាចនៅមានកម្រិតនៅឡើយ បើធៀបទៅនឹងទំហំនៃការបាត់បង់ ប៉ុន្តែនេះគឺជាទឹកចិត្តនៃការចែករំលែករបស់យើងខ្ញុំជាមួយគ្រួសារដែលរងគ្រោះ និងជាការប្តេជ្ញារួមដំណើរជាមួយបងប្អូនប្រជាពលរដ្ឋនៅលើមាគ៌ាស្តារឡើងវិញ និងកសាងជីវភាពរស់នៅឡើងវិញ»។

លោកបានអះអាងថា World Vision International ប្រចាំនៅវៀតណាម នឹងបន្តរួមដំណើរជាមួយប្រជាពលរដ្ឋ Dao San ជួយឧបត្ថម្ភដល់ការខិតខំប្រឹងប្រែងដើម្បីជួយកុមារ និងក្រុមគ្រួសារដែលងាយរងគ្រោះឱ្យស្តារឡើងវិញ បង្កើនភាពធន់ និងឆ្ពោះទៅកាន់អនាគតប្រកបដោយក្តីសង្ឃឹម និងជំនឿទុកចិត្ត។

លោក Trinh Khac Tan ប្រធានគណៈកម្មាធិការប្រជាជនឃុំ Dao San បានឱ្យដឹងថា មូលដ្ឋានគឺជាឃុំព្រំដែនតំបន់ខ្ពង់រាប ដីទួលចោត មានការកាត់ពុះយ៉ាងខ្លាំង ស្ថិតនៅកម្ពស់ជាង ១.៥០០ ម៉ែត្រ។ ស្រទាប់ភូគព្ភសាស្ត្រខ្សោយ ភាគច្រើនជាដីភ្នំចោត និងដីល្បាយខ្សាច់ ដូច្នេះងាយនឹងកើតមានការហូរច្រោះ និងបាក់ស្រុតដី។ អត្រាគ្រួសារក្រីក្ររបស់ឃុំនៅតែមានកម្រិតខ្ពស់។

តាមលទ្ធផលនៃការអង្កេត Dao San មាន ១៣០ គ្រួសារដែលទទួលបានការជួយឧបត្ថម្ភ ក្នុងកម្រិត ៤ លានដុងក្នុងមួយគ្រួសារ។

លោក Trinh Khac Tan បានវាយតម្លៃថា នេះគឺជាការជួយឧបត្ថម្ភប្រកបដោយអត្ថន័យចំពោះប្រជាពលរដ្ឋក្នុងកាលៈទេសៈបច្ចុប្បន្ន ព្រមទាំងមានបំណងចង់ឱ្យអង្គការ World Vision បន្តរួមដំណើរជាមួយ Dao San លើវិស័យសុខាភិបាល ការអប់រំ រួមចំណែកជួយឧបត្ថម្ភប្រជាពលរដ្ឋលុបបំបាត់ភាពអត់ឃ្លាន និងកាត់បន្ថយភាពក្រីក្រ៕

ការប្រគល់អំណោយចំនួន ១០០ ចំណែក ជូនដល់អាណិកជន និងប្រជាពលរដ្ឋដែលមានជីវភាពខ្វះខាត នៅក្នុងខេត្តចំប៉ាសាក់ (ប្រទេសឡាវ) យុគសម័យ - នាថ្ងៃទី ២៨ ខែឧសភា នៅក្នុងក្របខ័ណ្ឌនៃកម្មវិធីបំពេញការងារនៅតាមបណ្តាមូលដ្ឋាននៃប្រទេសសាធារណរដ្ឋប្រជាធិបតេយ្យប្រជាមានិតឡាវ គណៈប្រតិភូគណៈកម្មាធិការរណសិរ្សមាតុភូមិវៀតណាម ទីក្រុងហូជីមិញ បានអញ្ជើញទៅសួរសុខទុក្ខសមាគមប្រជាជនវៀតណាមខេត្តចំប៉ាសាក់ និងបានប្រគល់អំណោយចំនួន ១០០ ចំណែក ជូនដល់អាណិកជន និងប្រជាពលរដ្ឋដែលមានជីវភាពខ្វះខាតនៅក្នុងមូលដ្ឋាន។

ការវគ្គបណ្តុះបណ្តាល និងការធ្វើសមយុទ្ធឆ្លើយតបនឹងពហុគ្រោះមហន្តរាយ ជូនដល់ប្រជាពលរដ្ឋចំនួន ៥០០ នាក់ នៅក្នុងខេត្ត Gia Lai យុគសម័យ - ចាប់ពីថ្ងៃទី ២៧ ដល់ថ្ងៃទី ៣០ ខែឧសភា អង្គការអន្តរជាតិទេសន្តរប្រវេសន៍ (IOM) ប្រចាំនៅវៀតណាម បានសហការជាមួយនាយកដ្ឋានគ្រប់គ្រងទំនប់ទឹក និងបង្ការ ទប់ស្កាត់គ្រោះមហន្តរាយ (VDDMA) នៃក្រសួងកសិកម្ម និងបរិស្ថាន ចាត់តាំងនូវកម្រងសកម្មភាពវគ្គបណ្តុះបណ្តាល និងការធ្វើសមយុទ្ធឆ្លើយតបនឹងពហុគ្រោះមហន្តរាយ នៅក្នុងឃុំ Cat Tien និងឃុំ Ngo May នៃខេត្ត Gia Lai សំដៅពង្រឹងសមត្ថភាពត្រៀមលក្ខណៈជាស្រេចក្នុងការឆ្លើយតបសម្រាប់សហគមន៍។

ម៉ាញដាត