យុគសម័យ - រដ្ឋាភិបាលវៀតណាម កំពុងពិចារណា ក្នុងការពន្យារពេលយកពន្ធ រយៈពេល ៥ខែ ចំពោះអាជីវកម្មទាំងឡាយដែលរងផលប៉ះពាល់ ដោយបញ្ហាមេរោគ Covid-19 ខណៈដែលពន្ធដែលនឹងត្រូវពន្យារពេល ប្រមូលយកនេះ គឺមានតម្លៃប្រមាណ ១.៣០០ លានដុល្លារអាមេរិក។ នេះបើយោងតាមសារព័ត៌មាន Forbesvietnam ដែលបានផ្សាយនៅថ្ងៃនេះ។
សហគ្រាសវាយនភ័ណ្ឌ និងសម្លៀកបំពាក់វៀតណាម ប្រឈមនឹងការបិទទ្វារដោយសារវីរុស Covid 19។ (ប្រភព៖ baoquocte)
បើតាមសេចក្ដីព្រាងពីក្រសួងហិរញ្ញវត្ថុវៀតណាម ដែលត្រូវបានសារព័ត៌មាន Forbesvietnam យកមកផ្សាយបន្ដ បានបញ្ជាក់ឲ្យដឹងថា មានប្រាក់ពន្ធប្រមាណជាង ៩៧០ លានដុល្លារអាមេរិក នៃប្រាក់ពន្ធសរុបដែលត្រូវរដ្ឋពន្យារពេលប្រមូលយកនោះ គឺនឹងពន្យារពេលចន្លោះពី ខែមីនា ដល់ខែមិថុនា ដោយមានអនុគ្រោះលើអាជីវកម្មនៅក្នុងវិស័យដូចជា កសិកម្ម, ការកែច្នៃម្ហូបអាហារ, វាយនភណ្ឌ, ស្បែកជើង, ការផលិតស្បែក គ្រឿងអេឡិចត្រូនិក, រថយន្ដ, អាកាសចរណ៍, ផ្លូវដែក, ផ្លូវថ្នល់, ឡូជីស្ទិក, ភោជនីយដ្ឋាន និងទេសចរណ៍ជាដើម។
ជាមួយគ្នានេះ សម្រាប់ការបង់ពន្ធលើតម្លៃបន្ថែមប្រមាណ ១៣០ លានដុល្លារអាមេរិក និងពន្ធលើប្រាក់ចំណូលរបស់បុគ្គលម្នាក់ៗ នឹងត្រូវពន្យារពេលប្រមូលយក រហូតដល់ថ្ងៃទី១៥ ខែធ្នូ។
ដោយឡែក ចំពោះប្រាក់ពន្ធ ប្រមាណ ជាង ១៩០ លានដុល្លារអាមេរិកផ្សេងទៀត ទាក់ទងនឹងកម្រៃពន្ធពីការលក់ដីធ្លី ក៏នឹងត្រូវពន្យារពេលដល់ថ្ងៃទី ៣១ ខែតុលាផងដែរ។ ប៉ុន្ដែ ដោយសារតែ អាជីវកម្មទាំងអស់ ត្រូវបំពេញកាតព្វកិច្ចពន្ធរបស់ពួកគេ នៅមុនដំណាច់ឆ្នាំនេះ ដូច្នេះ ប្រាក់ចំណូលពន្ធរបស់រដ្ឋាភិបាលវៀតណាមនៅឆ្នាំនេះ ទំនងជាមិនរងផលប៉ះពាល់នោះទេ។
ការពន្យារពេលយកពន្ធនេះ វាគឺជាផ្នែកមួយនៃកិច្ចខិតខំប្រឹងប្រែង របស់រាជរដ្ឋាភិបាល ក្នុងការកាត់បន្ថយការខាតបង់សេដ្ឋកិច្ច ដែលបង្កឡើងដោយ Covid-19 ហើយបញ្ហានេះ នឹងធ្វើឲ្យកំណើនសេដ្ឋកិច្ចវៀតណាម នៅឆ្នាំនេះ អាចនឹងធ្លាក់ចុះ មកនៅ ៥,៩៦% ដែលជាកំណើនទាប ក្នុងរយៈពេល៧ឆ្នាំកន្លងមកនេះ។
សូមបញ្ជាក់ថា កំណើនសេដ្ឋកិច្ចវៀតណាម កាលពីឆ្នាំ ២០១៩ កន្លងទៅ សម្រេចបាន៧,០២% ដែលជាកំណើនខ្ពស់បំផុតទី២ ក្នុងរយៈពេល ១ទសវត្សរ៍ចុងក្រោយនេះ៕
（ដោយវិច្ឆិកា）
មតិពីមិត្តអ្នកអាន