យុគសម័យ - ប្រធានាធិបតីអាមេរិក ដូណាល់ ត្រាំ នៅថ្ងៃទី២៧ ខែកក្កដា បានបង្ហាញការអរគុណចំពោះមេដឹកនាំកូរ៉េខាងជើង គីម ជុងអ៊ុន បន្ទាប់ពីកូរ៉េខាងជើងបញ្ជូនអដ្ឋិធាតុទាហានអាមេរិកមកវិញ។ ការបញ្ជូនត្រឡប់មកវិញនេះ ជាផ្នែកមួយនៃលទ្ធផលជំនួបប្រវត្តិសាស្ត្ររវាងលោក ត្រាំ និងលោក គីម នៅថ្ងៃទី១២ ខែមិថុនា នៅសិង្ហបុរី។ អាមេរិកចាត់ទុកសកម្មភាពរបស់កូរ៉េខាងជើង ជាជំហានវិជ្ជមានដើម្បីដោះស្រាយបញ្ហានុយក្លេអ៊ែរនៅឧបទ្វីបកូរ៉េ។
រូបថតៈ Reuters
នៅថ្ងៃទី២៧ ខែកក្កដា យន្តហោះយោធាអាមេរិកមួយគ្រឿងបានហោះទៅកាន់កូរ៉េខាងជើងដើម្បីដឹកត្រឡប់មកវិញនូវអដ្ឋិធាតុទាហានចំនួន៥៥នាក់ ដែលបានស្លាប់ក្នុងសម័យសង្គ្រាមកូរ៉េឆ្នាំ១៩៥០-១៩៥៣ ។ នៅថ្ងៃដដែល យន្តហោះអាមេរិកបានចុះចតនៅនៅមូលដ្ឋានអាកាស Osan ដោយទាហានអន្តរជាតិនៅកូរ៉េខាងត្បូងក្រោមឆត្រអង្គការសហប្រជាជាតិ បានទទួលយកអដិធាតុទាំងនេះ មុននឹងបញ្ជូនបន្តទៅអាមេរិកនៅសប្ដាហ៍ក្រោយ។
ការបញ្ជូនអដ្ឋិធាតុត្រឡប់វិញនេះ ធ្វើឡើងចំពេលខួបទី៦៥ឆ្នាំនៃការចុះហត្ថលេខាលើយុទ្ធសន្តិភាពបញ្ចប់សង្គ្រាមកូរ៉េ ដែលសម្លាប់ជីវិតមនុស្សជាងពីរលាននាក់។ នេះជាសញ្ញាបង្ហាញពីឆន្ទៈរបស់កូរ៉េខាងជើងក្នុងការស្វែងរកសន្តិភាពនៅឧបទ្វីបកូរ៉េ ហើយក៏ជាការបង្ហាញឲ្យឃើញពីភាពល្អប្រសើរក្នុងទំនាក់ទំនងរវាងអតីតគូសត្រូវទាំងពីរ៕
(សរុបព័ត៌មាន ដោយ ស្រីព្រេជ)
មតិពីមិត្តអ្នកអាន