នាពេលថ្មីៗនេះ ក្រសួងពាណិជ្ជកម្មកម្ពុជាបានជូនដំណឹងថា កម្ពុជាកំពុងរៀបចំផែនការលើកកម្ពស់ការវិនិយោគក្នុងការអភិវឌ្ឍសម្រាប់វិស័យកសិកម្មដើម្បីនាំចេញទៅចិន។
លោក ស៊ាង ថៃ រដ្ឋលេខាធិការក្រសួងពាណិជ្ជកម្ម (កណ្តាល) ចូលរួមកិច្ចប្រជុំស្តីពី CONNECTING SHANDONG WITH FORTUNE GLOBAL 500-ASEAN រវាងលោក Li Ganjie អភិបាលខេត្តសានតុង ប្រទេសចិន ជាមួយតំណាងប្រទេសអាស៊ានប្រចាំឆ្នាំ២០២០ ដែលធ្វើឡើងកាលពីថ្ងៃ២២កញ្ញា តាមរយៈតាមប្រព័ន្ធវីដេអូអនឡាញ។ រូបថត៖ ក្រសួងពាណិជ្ជកម្
កម្ពុជាបានសម្លឹងឃើញផលប្រយោជន៍សេដ្ឋកិច្ចបន្ថែមទៀតពីចិន តាមរយៈខេត្តសានតុងដែលមានសក្តានុពលលើវិស័យគ្រឿងចក្រ សម្រាប់យកមកប្រើប្រាស់នៅក្នុងវិស័យកសិកម្មរបស់កម្ពុជា។លោក ស៊ាង ថៃ រដ្ឋលេខាធិការក្រសួងពាណិជ្ជកម្ម ដែលជាអ្នកចូលរួមក្នុងកិច្ចប្រជុំរវាង លោក Li Ganjie អភិបាលខេត្តសានតុងនៃប្រទេសចិន ជាមួយតំណាងប្រទេសអាស៊ានប្រចាំឆ្នាំ២០២០ បានប្រាប់សារព័ត៌មានថ្មីៗថា កម្ពុជាពិតជាត្រូវការអ្នកវិនិយោគពីខេត្តសានតុងរបស់ចិន ក្នុងការវិនិយោគលើវិស័យកសិកម្ម ដូចជា ការវិនិយោគលើការកែច្នៃផលិតផលកសិកម្មសម្រេច ការថែរក្សាកសិផលឱ្យមានគុណភាព និងការវេចខ្ចប់...ជាដើម សម្រាប់នាំចេញទៅទីផ្សារអន្តរជាតិ។
កាលឆ្នាំ២០១៩ ទំហំពាណិជ្ជកម្មកម្ពុជា-ចិន ឈរនៅលំដាប់ថ្នាក់ខ្ពស់បំផុត ដោយបានការកើនឡើងរហូតដល់ ៨,៥៦ពាន់លានដុល្លារ។ ក្នុងនោះចិននាំចេញមកកម្ពុជាមាន ៧,៥៦ពាន់លានដុល្លារ ខណៈកម្ពុជានាំចូលទៅចិន ១ ពាន់លានដុល្លារ។ ដោយឡែកការនាំចេញ-ចូលរវាងកម្ពុជា និងខេត្តសានតុងវិញ គឺកម្ពុជានាំចេញទៅខេត្តសានតុង ៣៤លានដុល្លារ និងនាំចូលពីខេត្តសានតុងមកវិញ ៤១៤ លានដុល្លារ ។ នេះបើតាមទិន្នន័យរបស់ក្រសួងពាណិជ្ជកម្ម។
កម្ពុជា-ចិន បានប្តេជ្ញារួមគ្នា នឹងជំរុញទំហំពាណិជ្ជកម្មទ្វេភាគីនៃប្រទេសទាំងពីរឱ្យឡើងដល់១០ពាន់លានដុល្លារ ដែលត្រូវសម្រេចឱ្យបាននៅត្រឹមឆ្នាំ២០២៣ ខណៈកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ នឹងត្រូវចុះហត្ថលេខា នាពេលឆាប់ៗខាងមុខនេះ៕
(សរុបដោយសាមេត)
មតិពីមិត្តអ្នកអាន