ក្រសួងទេសចរណ៍បានចេញសេចក្ដីជូនដំណឹងដល់សមាគមឧស្សាហកម្មទេសចរណ៍ និងម្ចាស់អាជីវកម្មទេសចរណ៍គ្រប់ប្រភេទ អំពីការលើកលែងការបង់កម្រៃបន្តអាជ្ញាប័ណ្ណទេសចរណ៍គ្រប់ប្រភេទដែលមានសុពលភាពសម្រាប់ឆ្នាំ ២០២១។ ការលើកលែងនេះ ជាវិធានការដើម្បីជួយដល់វិស័យទេសចរណ៍បន្ថែមទៀតទៅលើអ្វីដែលក្រសួងធ្លាប់បានអនុគ្រោះពីមុន ខណៈវិស័យមួយនេះរងផលប៉ះពាល់យ៉ាងធ្ងន់ធ្ងរពីជំងឺកូវីដ១៩។
ភ្ញៀវទេសចរណចូលទស្សនាប្រាសាទអង្គរវត្តកន្លងមក។ រូបថត យូសុះ អាប់ឌុលរ៉ាស់ហ៊ីម
សេចក្ដីប្រកាសរបស់លោក ថោង ខុន រដ្ឋមន្ត្រីក្រសួងទេសចរណ៍ចុះថ្ងៃទី ៨ ខែមិថុនា បញ្ជាក់ថា៖ «[ក្រសួង] លើកលែងការបង់កម្រៃបន្តអាជ្ញាប័ណ្ណទេសចរណ៍គ្រប់ប្រភេទសម្រាប់ឆ្នាំ ២០២១ ចំពោះអាជ្ញាប័ណ្ណទេសចរណ៍ដែលស្ថិតក្នុងសុពលភាព។ អាជីវកម្មទេសចរណ៍គ្រប់ប្រភេទនៅតែមានកាតព្វកិច្ចដាក់ពាក្យស្នើសុំបន្តអាជ្ញាប័ណ្ណទេសចរណ៍ពីក្រសួងទេសចរណ៍ ឬរដ្ឋបាលរាជធានីខេត្ត ឬរដ្ឋបាលក្រុង ស្រុក ខណ្ឌទៅតាមទំហំអាជីវកម្មដែលក្រសួងបានធ្វើប្រតិភូកម្មកន្លងមកក្នុងអំឡុងពេលនៃការលើកលែងនេះ»។ក្រសួងបញ្ជាក់ថា ការលើកលែងនេះសម្រាប់តែការបន្តអាជ្ញាប័ណ្ណ ឆ្នាំ ២០២១ ប៉ុណ្ណោះដោយឡែកចំពោះឆ្នាំ ២០២០ នេះអាជីវកម្មដែលសុំអាជ្ញាប័ណ្ណថ្មី ឬបន្ត ឬស្នើសុំអាជ្ញាប័ណ្ណថ្មីសម្រាប់ឆ្នាំ ២០២១ នៅតែត្រូវបង់កម្រៃអាជ្ញាប័ណ្ណដដែល។
ក្រសួងបន្តថា អាជីវកម្មទេសចរណ៍ដែលហួសអាជ្ញាប័ណ្ណ ឬបានប្រព្រឹត្តបទល្មើសផ្សេងត្រូវតែបង់ប្រាក់ផាកពិន័យ ប៉ុន្តែសេវាសម្រាប់បន្តអាជ្ញាប័ណ្ណសម្រាប់ឆ្នាំ ២០២១ នៅតែត្រូវបានលើកលែងដដែល។ ការលើកលែងនេះនឹងត្រូវអនុវត្តចាប់ពីថ្ងៃទី ១ ខែ មករា ២០២១ រហូតដល់ថ្ងៃទី ៣១ ខែ ធ្នូ ២០២១។
លោក តុប សុភ័ក អ្នកនាំពាក្យក្រសួងទេសចរណ៍បានថ្លែងពីម្សិលមិញថា ការលើកលែងការបង់កម្រៃបន្តអាជ្ញាប័ណ្ណទេសចរណ៍នេះ បើគិតជាទឹកប្រាក់មានប្រមាណ ១ លានដុល្លារ។ លោកបញ្ជាក់ថា សេវាកម្មទេសចរណ៍មាន ១០ ប្រភេទរាប់បញ្ចូលតាំងពីរមណីយដ្ឋាន សេវាកម្មស្នាក់នៅដូចជា សណ្ឋាគារ ផ្ទះសំណាក់ ភោជនីយដ្ឋាន និងអាហារដ្ឋាន កន្លែងកម្សាន្ត KTV ខារ៉ាអូខេ ជាដើម។ ទោះយ៉ាងណាក្រសួងទេសចរណ៍គ្រប់គ្រងតែសេវាកម្មទេសចរណ៍ខ្នាតធំប៉ុណ្ណោះ មានដូចជាផ្ទះសំណាក់ និងសណ្ឋាគារដែលមានចាប់ពី ២១ បន្ទប់ឡើងទៅ។ ចំពោះសេវាកម្មខ្នាតតូចជាងនេះត្រូវបានធ្វើប្រតិភូកម្មមកនៅក្រោមរដ្ឋបាលថ្នាក់ក្រោមជាតិ។
សេវាកម្មទេសចរណ៍ភាគច្រើនមានអាជ្ញាប័ណ្ណសម្រាប់តែរយៈពេល ១ ឆ្នាំប៉ុណ្ណោះ ប៉ុន្តែក៏មានសេវាកម្មខ្លះមានអាជ្ញាប័ណ្ណសម្រាប់រយៈពេល ២ ឆ្នាំ។ មិនថាអាជីវកម្មដែលមានសុពលភាព ១ ឬ ២ ឆ្នាំទេ រាល់អាជីវកម្មទាំងអស់ ដែលបន្តសុពលភាពនៅឆ្នាំ ២០២១ នឹងទទួលបានការលើកលែងកម្រៃបន្តអាជ្ញាប័ណ្ណដូចគ្នា។ នេះបើតាមលោក តុប សុភ័ក ដដែល។
ទោះយ៉ាងណាលោកបញ្ជាក់ថា៖ «គាត់ [អាជីវកម្មទេសចរណ៍] នៅតែត្រូវធ្វើលិខិតអីដូចរាល់ដង ធ្វើលិខិតមករដ្ឋមន្ត្រីដើម្បីសុំបន្តអាជ្ញាប័ណ្ណដដែល គ្រាន់តែមិនបង់កម្រៃ។ អាជ្ញាប័ណ្ណភាគច្រើនយើងបានធ្វើវិមជ្ឈការទៅថ្នាក់រាជធានី-ខេត្តរួចហើយ»។
（ប្រភពព័ត៌មាន: postkhmer.com）
មតិពីមិត្តអ្នកអាន