ក្នុងបរិបទនៃការឆ្លងរាលដាល់នៃជំងឺរាតត្បាត COVID-19 កំពុងមានភាពស្មុគស្មាញនៅទូទាំងពិភពលោក ក្រសួងទេសចរណ៍កម្ពុជានិងរាជបណ្ឌិត្យសភាកម្ពុជាបានឯកភាពគ្នាដើម្បីចុះហត្ថលេខាលើអនុស្សរណៈនៃការយោគយល់ (MoU) ឆាប់ៗដើម្បីជំរុញវិស័យទេសចរណ៍នៅកម្ពុជា។
កិច្ចប្រជុំរវាងក្រសួងទេសចរណ៍កម្ពុជានិងរាជបណ្ឌិត្យសភាកម្ពុជា
នៅក្នុងកិច្ចប្រជុំដែលដឹកនាំដោយឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជាបានឲ្យដឹងថា ស្ថាប័នទាំងពីរនឹងរៀបចំវគ្គបណ្តុះបណ្តាលស្តីពីទេសចរណ៍ដោយផ្អែកលើស្តង់ដារអាស៊ាននិងអន្តរជាតិ។ កម្មវិធីនេះនឹងត្រូវធ្វើឡើងនៅរាជបណ្ឌិត្យសភាកម្ពុជាដែលមានទីតាំងស្ថិតនៅលើមហាវិថីសហព័ន្ធរុស្ស៊ី ក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ខណៈដែលវគ្គសិក្សានឹងចាប់ផ្តើមនៅពេលដែលការឆ្លងរាលដាលនៃវីរុស កូវីដ-១៩ បញ្ចប់។ស្ថាប័នទាំងពីរក៏បានយល់ព្រមក្នុងការសាងសង់មជ្ឈមណ្ឌលសម្រាប់ភ្ញៀវទេសចរចិន (China Ready Center (CRC)) នៅរាជបណ្ឌិត្យសភាកម្ពុជា។ លើសពីនេះទៅទៀត ស្ថាប័នទាំងពីរក៏នឹងរៀបចំការសិក្សាស្រាវជ្រាវ បណ្តុះបណ្តាល និងការអនុវត្តជាក់ស្តែងលើវិស័យទេសចរណ៍ផងដែរ។
ប្រទេសកម្ពុជាបានបង្កើតមជ្ឈមណ្ឌលសម្រាប់ភ្ញៀវទេសចរចិន CRC នេះឡើងដើម្បីបំពេញតម្រូវការដល់ទេសចរចិនប្រមាណជា ២ លាននាក់ដែលរំពឹងថានឹងមកទស្សនាប្រទេសនេះជារៀងរាល់ឆ្នាំ ក៏ដូចជាបង្កើនជំនាញរបស់ប្រតិបត្តិករទេសចរណ៍ក្នុងស្រុកដែលធ្វើការជាមួយអតិថិជនជាជនជាតិចិន។
បើតាមលោកបណ្ឌិត សុខ ទូច រាជបណ្ឌិត្យសភាកម្ពុជាមានភារកិច្ចត្រូវគ្រប់គ្រងនិងពង្រីកការស្រាវជ្រាវវិទ្យាសាស្ត្រលើគ្រប់វិស័យនិងសហការជាមួយការស្រាវជ្រាវរបស់ស្ថាប័នពាក់ព័ន្ធ អង្គការជាតិ អន្តរជាតិ និងដៃគូអភិវឌ្ឍន៍នានា។
លោកបានបន្តឲ្យដឹងថា រាជបណ្ឌិត្យសភាកម្ពុជានឹងរៀបចំវេទិកាវិទ្យាសាស្ត្រសម្រាប់គ្រប់វិស័យ ផ្តល់ការចូលរួមចំណែកក្នុងការអភិវឌ្ឍប្រទេសជាតិ ផ្តល់ការបណ្តុះបណ្តាលដើម្បីអភិវឌ្ឍធនធានមនុស្ស ប្រមូលផ្តុំនិងផ្សព្វផ្សាយការរកឃើញថ្មីៗ ការពារនិងអភិវឌ្ឍភាសានិងអក្សរសាស្ត្រខ្មែរប្រកបដោយនិរន្តរភាព ក៏ដូចជារក្សាអត្តសញ្ញាណជាតិ ស្រាវជ្រាវ អភិរក្ស និងអភិវឌ្ឍធនធានធម្មជាតិ វប្បធម៌ក្នុងចំណោមការងារផ្សេងៗទៀត។
យោងតាមរបាយការណ៍របស់ក្រសួងបានឲ្យដឹងថា ភ្ញៀវទេសចរណ៍ក្នុងស្រុកមានចំនួន ១,៤ លាននាក់ក្នុងត្រីមាសទី ១ នៃឆ្នាំនេះ ដែលជាការថយចុះចំនួន ៣៤ ភាគរយបើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈវត្តមានរបស់ភ្ញៀវទេសចរបរទេសក៏មានការធ្លាក់ចុះចំនួន ៣៨ ភាគរយស្មើនឹង ១,១៥ លាននាក់។
ចំពោះចំនួនភ្ញៀវទេសចរចិនវិញបានធ្លាក់ចុះ ៦២ ភាគរយ ពោលគឺមានចំនួន ២៥៩.៧៣២ នាក់ ខណៈភ្ញៀវទេសចរមកពីប្រទេសវៀតណាម សហរដ្ឋអាមេរិក និងកូរ៉េខាងត្បូង ក៏មានការធ្លាក់ចុះ ៤ ភាគរយ ៣៣ ភាគរយនិង ៤៦ ភាគរយ ក្នុងរយៈពេលដូចគ្នា។
ឧស្សាហកម្មទេសចរណ៍របស់ប្រទេសកម្ពុជាត្រូវបានរងការប៉ះពាល់ដោយការផ្ទុះឡើងនៃវីរុសកូវីដ-១៩ ចាប់តាំងពីចុងឆ្នាំមុន ខណៈដែលប្រទេសនេះបានដាក់ចេញនូវវិធានការណ៍និងផែនការនានាដើម្បីស្តារវិស័យនេះឡើងវិញ ជាពិសេសក្នុងខេត្តសៀមរាប ដែលជាខេត្តគោលដៅទេសចរណ៍ដ៏សំខាន់មួយ។
នៅក្នុងសន្និសីទសារព័ត៌មានមួយកាលពីពេលកន្លងទៅ លោក ទិត ចន្ថា រដ្ឋលេខាធិការក្រសួងទេសចរណ៍បានថ្លែងថា៖ «បន្ទាប់ពីការឆ្លងរីករាលដាលនៃវីរុសកូវីដ-១៩ បញ្ចប់ក្នុងរយៈពេល ៤ ឬ ៥ ខែខាងមុខ ចំនួនភ្ញៀវទេសចរបរទេសមកកាន់កម្ពុជានឹងមានការកើនឡើងពីពីរទៅបីដង។»
គួរបញ្ជាក់ឲ្យដឹងផងដែរថា វិស័យទេសចរណ៍នៅកម្ពុជាកាលពីឆ្នាំកន្លងទៅមានការកើនឡើងចំនួន ៦,៦ ភាគរយ ជាមួយនិងភ្ញៀវទេសចរបរទេសចំនួន ៦,៦ លាននាក់ ដែលបានបង្កើតប្រាក់ចំណូល ចំនួន៥ ពាន់លានដុល្លារសហរដ្ឋអាមេរិក។ ទោះយ៉ាងណា ស្ថានការណ៍នៃវីរុស កូវីដ-១៩ នឹងកាត់បន្ថយតួលេខនៅឆ្នាំនេះចំនួនប្រហែលជា ១០ ភាគរយ៕
（សរុបដោយសាមេត）
មតិពីមិត្តអ្នកអាន