រដ្ឋាភិបាលវៀតណាម បានបង្ហាញពីគម្រោងអភិវឌ្ឍហេដ្ឋារចនាសម្ព័ន្ធទ្រង់ទ្រាយធំ នៅតាមបណ្តោយព្រំដែនខេត្ត Gia Lai ជាមួយតំបន់នានារបស់ប្រទេសកម្ពុជា ដើម្បីជំរុញទំនាក់ទំនងពាណិជ្ជកម្មជាមួយខេត្តជាប់ព្រំដែនរបស់កម្ពុជា។
 សមាគមមិត្តភាពវៀតណាម - កម្ពុជាផ្តល់ថវិកាចំនួន ១២០ លានដុងជួយឧបត្ថម្ភអណិកជនវៀតណាមនៅកម្ពុជា |
 វៀតណាម - កម្ពុជាសន្យារួមគ្នាប្រយុទ្ធនិងជំងឺកូវីដ-១៩ នៅតាមព្រំដែន |
 |
| រូបថតឧទាហរណ៍ |
ប្រភពដដែលបានឲ្យដឹងថា ផែនការនេះស្ថិតនៅក្រោមកម្មវិធីអភិវឌ្ឍហេដ្ឋារចនាសម្ព័ន្ធពាណិជ្ជកម្មតាមព្រំដែនរបស់វៀតណាមដល់ឆ្នាំ២០២៥ និងចក្ខុវិស័យដល់ឆ្នាំ២០៣០។ ក្នុងនោះ គណៈកម្មាការប្រជាជននៃខេត្តខ្ពង់រាបភាគកណ្តាល Gia Lai ទើបតែដាក់ចេញនូវផែនការនេះ ក្រោយត្រូវបានអនុម័តដោយនាយករដ្ឋមន្រ្តី។
ផែនការអភិវឌ្ឍនេះ នឹងពង្រឹងកិច្ចសហប្រតិបត្តិការជិតស្និទ្ធរវាងតំបន់ព្រំដែនក្នុងវិស័យសេដ្ឋកិច្ចពាណិជ្ជកម្ម និងវប្បធម៌សង្គម រួមចំណែកធ្វើឱ្យប្រសើរឡើងនូវការរស់នៅរបស់ប្រជាជននៅតាមព្រំដែន ក៏ដូចជាធានាការការពារជាតិ សណ្តាប់ធ្នាប់សង្គម និងសុវត្ថិភាពនៅមូលដ្ឋាន។
យោងតាមផែនការ រដ្ឋបាលខេត្ត Gia Lai នឹងត្រូវសហការជាមួយក្រសួងឧស្សាហកម្ម និងពាណិជ្ជកម្ម ដើម្បីកសាងហេដ្ឋារចនាសម្ព័ន្ធពាណិជ្ជកម្មព្រំដែនទាំងនេះ។ នាពេលខាងមុខ អាជ្ញាធរខេត្តនឹងគាំទ្រដល់ការផ្លាស់ប្តូរ និងចរាចរទំនិញ និងកិច្ចព្រមព្រៀងកិច្ចសហប្រតិបត្តិការរវាងតំបន់ព្រំដែននៃខេត្ត Gia Lai និងខេត្តរតនគីរី របស់កម្ពុជា។
បើតាមរបាយការណ៍បូកសរុបលទ្ធផលការងារពាណិជ្ជកម្ម ឆ្នាំ២០២០ និងទិសដៅការងារពាណិជ្ជកម្មឆ្នាំ២០២១ របស់ក្រសួងពាណិជ្ជកម្មកម្ពុជា ក្នុងពេលវិបត្តិកូវីដ១៩នៃឆ្នាំ២០២០ ទំហំពាណិជ្ជកម្មរវាងកម្ពុជា និងវៀតណាម មានប្រមាណជាង ៣ពាន់លានដុល្លារ ថយចុះប្រមាណ ១.១៣%។
ចូលមកដើមឆ្នាំ២០២១ ទំហំពាណិជ្ជកម្មកម្ពុជាវៀតណាម គឺរក្សាបានកំណើនខ្ពស់។ បើតាមទិន្នន័យពីការិយាល័យពាណិជ្ជកម្មវៀតណាមនៅកម្ពុជា ដែលត្រូវបានចុះផ្សាយដោយសារព័ត៌មានវៀតណាម កាលពីចុងខែមីនា បានឲ្យដឹងថា ទំហំពាណិជ្ជកម្មទ្វេភាគីកម្ពុជាវៀតណាម មានកំណើន៦៤% ឬមានទំហំប្រមាណ ១.៣៣ពាន់លានដុល្លារ ក្នុងរយៈពេល២ខែ ដើមឆ្នាំ២០២១។
ទំនិញដែលកម្ពុជានាំចូលពីប្រទេសវៀតណាមរួមមាន ដែកថែប ប្រេងនិងឧស្ម័ន ផលិតផលវាយនភ័ណ្ឌកាត់ដេរ ទំនិញប្រើប្រាស់ និងផលិតផលកសិកម្មផ្សេងទៀតដូចជា ត្រីសាច់ និងបន្លែជាដើម។ ចំណែកឯកម្ពុជាបាននាំចេញ ស្រូវ គ្រាប់ស្វាយចន្ទី កៅស៊ូ និងផលិតផលឈើជាដើម៕
swiftnewsdaily/VNA
មតិពីមិត្តអ្នកអាន