យុគសម័យ - នារសៀលថ្ងៃទី ១៧ ខែធ្នូឆ្នាំ ២០១៩ នៅទីក្រុងហាណូយបានប្រព្រឹត្តទៅកិច្ចប្រជុំ វាយតម្លៃលទ្ធផលកិច្ចសហការក្នុងការអនុវត្តកិច្ចព្រមព្រៀងរវាងវៀតណាមនិងកម្ពុជាស្តីពីកិច្ចសហប្រតិបបត្តិការទ្វេភាគីដើម្បីប្រយុទ្ធប្រឆាំងអំពើជួញដូរមនុស្សនិងការពារជនរងគ្រោះសម្រាប់ឆ្នាំ ២០១៧ - ២០១៩។
លោកឧត្តមសេនីយ៍ឯកបម្រុង Le Quy Vuong អនុរដ្ឋមន្រ្តីក្រសួងនគរបាលវៀតណាម
អញ្ជើញចូលរួមកិច្ចប្រជុំនេះមានវត្តមានរបស់លោកឧត្តមសេនីយ៍ឯកបម្រុង Le Quy Vuong អនុរដ្ឋមន្រ្តីក្រសួងនគរបាលវៀតណាម និងលោកជំទាវ ហ៊ូសាមិត្ត រដ្ឋលេខាធិការក្រសួងកិច្ចការនារីកម្ពុជា។ អញ្ជើញថ្លែងមតិនៅក្នុងកិច្ចប្រជុំនេះ លោក Le Quy Vuong និងលោកជំទាវ ហ៊ូសាមិត្ត បានបញ្ជាក់ពីស្មារតីសាមគ្គីភាព មិត្តភាពនិងកិច្ចសហប្រតិបត្តិការគ្រប់ជ្រុងជ្រោយរវាងរដ្ឋាភិបាលវៀតណាមនិងរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងឧក្រិដ្ឋកម្មនិយាយរួម ក៏ដូចជាការបង្ការនិងកាត់បន្ថយអំពើជួញដូរមនុស្សនិយាយដោយឡែក។
លោកជំទាវ ហ៊ូសាមិត្ត រដ្ឋលេខាធិការក្រសួងកិច្ចការនារីកម្ពុជា
នេះគឺជាការប្តេជ្ញាចិត្តខាងនយោបាយដ៏រឹងមាំរបស់ប្រទេសទាំងពីរ ដើម្បីកសាងគោលនយោបាយសហប្រតិបត្តិការប្រកបដោយចីរភាពនិងប្រសិទ្ធភាពក្នុងការប្រយុទ្ធប្រឆាំងនឹងអំពើជួញដូរមនុស្សឆ្លងព្រដែនផងដែរ ។ទន្ទឹមនឹងនេះវាជាមូលដ្ឋានគ្រឹះដ៏សំខាន់សម្រាប់ក្រសួង ស្ថាប័នមូលដ្ឋានរបស់វៀតណាមនិងកម្ពុជាមានលក្ខខណ្ឌសម្របសម្រួលគ្នាក្នុងការអនុវត្តកិច្ចព្រមព្រៀងប្រកបដោយប្រសិទ្ធភាពរវាងប្រទេសទាំងពីរ ដោយផ្តោតការយកចិត្តទុកដាក់លើការផ្លាស់ប្តូរព័ត៌មានដែលពាក់ព័ន្ធនឹងសកម្មភាពនៃឧក្រិដ្ឋកម្មជួញដូរមនុស្សក៏ដូចជាសម្របសម្រួលគ្នាក្នុងការការស៊ើបអង្កេតការចាប់ខ្លួនជនល្មើស និងជួយសង្គ្រោះនិងធ្វើមាតុភូមិនិវត្តន៍ជនរងគ្រោះផងដែរ។
វៀតណាម - កម្ពុជាបានអនុម័តលើផែនការអាទិភាពដើម្បីសម្របសម្រួលការអនុវត្តកិច្ចព្រមព្រៀងទ្វេភាគីរវាងប្រទេសទាំងពីរក្នុងដំណាក់កាល ២០២០-២០២២
លោក Le Quy Vuong ក៏បានសង្កត់ធ្ងន់ថាវៀតណាមប្តេជ្ញាសម្របសម្រួលជាមួយអាជ្ញាធរនៃរាជរដ្ឋាភិបាលកម្ពុជា ដើម្បីអនុវត្តខ្លឹមសារនៃកិច្ចព្រមព្រៀងទាំងនេះឱ្យបានហ្មត់ចត់និងមានប្រសិទ្ធភាព ជាពិសេសផែនការអាទិភាពក្នុងការសម្របសម្រួលគ្នាអនុវត្តកិច្ចព្រមព្រៀងក្នុងដំណាក់កាល ២០២០-២០២២។
ទិដ្ឋភាពនៃកិច្ចប្រជុំ
ម្យ៉ាងវិញទៀត ជាមួយនឹងការគាំទ្រនិងកិច្ចសហការយ៉ាងជិតស្និទ្ធពីរាជរដ្ឋាភិបាលនិងអាជ្ញាធរមានសមត្ថកិច្ចកម្ពុជា រួមទាំងជំនួយនិងការគាំទ្រពីអង្គការអន្តរជាតិនោះ សកម្មភាពអាទិភាពសម្រាប់ការសម្របសម្រួលអនុវត្តកិច្ចព្រមព្រៀងនឹងត្រូវបានអនុវត្តប្រកបដោយប្រសិទ្ធភាព ដើម្បីរួមចំណែកដល់ការពូនជ្រុំចំណងសាមគ្គីភាព មិត្តភាពជាប្រពៃណីនិងកិច្ចសហប្រតិបត្តិការគ្រប់ជ្រុងជ្រោយរវាងវៀតណាមនិងកម្ពុជាឲ្យកាន់តែល្អប្រពៃថែមទៀតផងដែរ៕
（យោងតាម៖ bocongan.gov.vn - បកប្រែដោយ ហេងវុធ្ធី）
មតិពីមិត្តអ្នកអាន