វៀតណាមបានប្រគល់ម៉ាស់ចំនួន ១០០,០០០ ម៉ាសដល់ស៊ុយអែតដើម្បីប្រយុទ្ធប្រឆាំងនឹងជំងឺ Covid - 19

លោកអនុរដ្ឋមន្រ្តី To Anh Dung ប្រគល់អំណោយបរិច្ចាគរបស់រដ្ឋាភិបាលនិងប្រជាជនវៀតណាមដល់ឯករាជទូតស៊ុយអែតលោកស្រី Ann Mawe ដើម្បីជួយឧបត្ថម្ភប្រទេសស៊ុយអែតក្នុងការប្រយុទ្ធប្រឆាំងនឹងជំងឺរាតត្បាត។ (ប្រភព៖​ baoquocte)

អញ្ជើញចូលរួមក្នុងពិធីនេះមានតំណាងការិយាល័យ រដ្ឋាភិបាល ក្រសួងសុខាភិបាល ក្រសួងឧស្សាហកម្មនិងពាណិជ្ជកម្ម និងឯកអគ្គរាជទូតស៊ុយអែតប្រចាំនៅប្រទេសវៀតណាមលោកស្រី Ann Mawe។

ថ្លែងនៅក្នុងពិធីនេះ លោកអនុរដ្ឋមន្រ្តី To Anh Dung បានចែករំលែកការវិវឌ្ឍន៍ដ៏ស្មុគស្មាញនៃការរីករាលដាលនៃជំងឺ Covid – 19 កំពុងបង្កបញ្ហាប្រឈមដែលមិនធ្លាប់មានពីមុនមកសម្រាប់ប្រទេសទាំងអស់។ ក្នុងនាមជាមិត្តភក្តិប្រពៃណីរបស់ស៊ុយអែត វៀតណាមតែងតែឃ្លាំមើលស្ថានការណ៍នៃជំងឺរាតត្បាតនៅស៊ុយអែតនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលស៊ុយអែតក្នុងការឆ្លើយតបនឹងជំងឺរាតត្បាតនេះ។

ក្នុងនាមជាសមាជិកមានការទទួលខុសត្រូវរបស់សហគមន៍អន្តរជាតិ វៀតណាមតែងតែត្រៀមខ្លួនជាស្រេចក្នុងការសហប្រតិបត្តិការផ្លាស់ប្តូរបទពិសោធន៍ក្នុងការអនុវត្តវិធានការដើម្បីបង្ការនិងប្រយុទ្ធប្រឆាំងនឹងជំងឺ Covid - 19 ជាមួយប្រទេសដទៃទៀតរួមទាំងប្រទេសស៊ុយអែត។ អនុរដ្ឋមន្ត្រី To Anh Dung បានសង្កត់ធ្ងន់ថានាពេលបច្ចុប្បន្ន តួនាទីនៃកិច្ចសហប្រតិបត្តិការនិងសាមគ្គីភាពអន្តរជាតិមានសារៈសំខាន់ណាស់ក្នុងការធានាសុខភាពប្រជាជន។

ក្នុងរយៈពេលជាង ៥០ ឆ្នាំចាប់តាំងពីការបង្កើតទំនាក់ទំនងការទូត ទំនាក់ទំនងវៀតណាម - ស៊ុយអែត មានការរីកចម្រើននិងល្អប្រសើរ។ រដ្ឋាភិបាលនិងប្រជាជនវៀតណាមតែងតែវាយតម្លៃខ្ពស់និងកោតសរសើរចំពោះ ការគាំទ្រនិងជំនួយរបស់រដ្ឋាភិបាលនិងប្រជាជនស៊ុយអែតនាពេលកន្លងមកក៏ដូចជាក្នុងដំណើរការអភិវឌ្ឍន៍និងសមាហរណកម្មអន្តរជាតិឥឡូវនេះ។ លោកអនុរដ្ឋមន្រ្តីបានលើកឡើងថានេះគឺជាអំណោយដើម្បីបង្ហាញពីទឹកចិត្តដ៏ស្មោះត្រង់របស់ប្រជាជនវៀតណាមដោយមានបំណងចង់ចូលរួមចំណែកជួយប្រជាជនស៊ុយអ៊ែតក្នុងការការពារសុខភាពរបស់ប្រជាជននិងឆ្លងផុតសម័យដ៏លំបាកនេះ។

ឯកអគ្គរាជទូតស៊ុយអែត លោកស្រី Ann Mawe បានសម្តែងនូវអារម្មណ៍និងថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជនវៀតណាមចំពោះជំនួយដ៏មានអត្ថន័យចំពោះរដ្ឋាភិបាលនិងប្រជាជនស៊ុយអែតនាពេលនេះ។ កាយវិការដ៏ថ្លៃថ្នូនេះគឺជាសក្ខីភាពដ៏រស់រវើកចំពោះទំនាក់ទំនងមិត្តភាព ប្រពៃណី កិច្ចសហប្រតិបត្តិការយ៉ាងជិតស្និទ្ធ អាចទុកចិត្តបាន និងមានប្រសិទ្ធភាពរវាងវៀតណាមនិងស៊ុយអែតលើវិស័យជាច្រើនរួមទាំងវិស័យសុខាភិបាលផងដែរ។

លោកស្រីឯកអគ្គរាជទូតបានវាយតម្លៃខ្ពស់ចំពោះលទ្ធផលលេចធ្លោរបស់រដ្ឋាភិបាលវៀតណាមក្នុងការប្រយុទ្ធប្រឆាំងនឹងជំងឺរាតត្បាត ហើយសម្តែងក្តីសង្ឃឹមថាជាមួយនឹងការខិតខំនិងសាមគ្គីភាព ប្រទេសនានានឹងឈ្នះជំងឺរាតត្បាតនេះជាមួយគ្នា និងកិច្ចសហប្រតិបត្តិការរវាងប្រទេសទាំងពីរលើកម្រិតទ្វេភាគីនិងពហុភាគីនឹងបន្តអភិវឌ្ឍកាន់តែខ្លាំងនាពេលអនាគត៕

（ប្រែសម្រូលដោយវិច្ឆិកា）

（ប្រភពព័ត៌មាន: thoidai.com.vn）

（ប្រែសម្រូលដោយវិច្ឆិកា）