វៀតណាមទទួលបានថវិកាជាង ៣០ លានដុល្លារ ដើម្បីប្រឆាំងនឹងការប្រែប្រួលអាកាសធាតុ

គ្រោះរាំងស្ងួតកំពុងកើតឡើង នៅតាមតំបន់ជាច្រើន (រូបថតៈ Vietnamplus)

ក្រសួងកសិកម្មនិងអភិវឌ្ឍជនបទបាននិយាយឲ្យដឹងថា នៅក្នុងកិច្ចប្រជុំគណៈកម្មាធិការដឹកនាំលើកទី ២៥ នៅថ្ងៃទី ១១ ខែមីនាឆ្នាំ ២០២០ នៅទីក្រុង Geneva ប្រទេសស្វីស មូលនិធិអាកាសធាតុបៃតងបានអនុម័តផ្តល់ថវិការចំនួន ៣០,២ លានដុល្លារសម្រាប់គម្រោង “ពង្រឹងលទ្ធភាពធន់ទ្រាំនៃផលិតកម្មកសិកម្មខ្នាតតូច នៅពេលប្រឈមមុខនឹងអសន្តិសុខទឹក ដោយសារតែការប្រែប្រួលអាកាសធាតុនៅតំបន់ Tay Nguyen និងតំបន់ឆ្នេរសមុទ្រនៅខាងត្បូងនៃភាគកណ្តាល នៅប្រទេសវៀតណាម” (SACCR) ។

គម្រោងនេះមានវិធីសាស្រ្តរួមបញ្ចូលគ្នានិងប្រកបដោយភាពច្នៃប្រឌិត ដើម្បីលើកកម្ពស់ភាពធន់ទ្រាំនឹងបំរែបំរួលអាកាសធាតុ ដោយក្រសួងកសិកម្មនិងអភិវឌ្ឍន៍ជនបទ និងក្រសួងផែនការនិងវិនិយោគដែលជាស្ថាប័នស្នូលរបស់មូលនិធិអាកាសធាតុបៃតង​ (NDA)) ត្រូវបានរៀបចំឡើង និងមានជំនួយខាងបច្ចេកទេសពីកម្មវិធីអភិវឌ្ឍន៍សហប្រជាជាតិ (UNDP) និងធនាគារអភិវឌ្ឍន៍អាស៊ី។

គម្រោងនេះនឹងត្រូវអនុវត្ត ក្នុងរយៈពេល ៦ ឆ្នាំ ហើយនឹងផ្តល់ផលប្រយោជន៍ដោយផ្ទាល់ដល់ប្រជាជនជាង ២២២.៤០០ នាក់ នៅខេត្ត Dak Lak, Dak Nong, Binh Thuan, Ninh Thuan និងខេត្ត Khanh Hoa មានគោលបំណង៖ ធ្វើទំនើបកម្មប្រព័ន្ធធារាសាស្រ្ត ធ្វើឱ្យប្រសើរឡើងនូវសន្តិសុខទឹកនិងជីវភាព បង្កើនចំណេះដឹងអំពីហានិភ័យអាកាសធាតុនិងអនុវត្តបច្ចេកទេសកសិកម្មធន់ទ្រាំនឹងការប្រែប្រួលអាកាសធាតុ និងការទទួលបានព័ត៌មានអាកាសធាតុកសិកម្មនិងព័ត៌មានទីផ្សារ។

មនុស្សជាង ៣៣៥.០០០ នាក់នឹងទទួលបានផលប្រយោជន៍ដោយប្រយោលពីការបង្កើនសមត្ថភាព តាមរយៈការបណ្តុះបណ្តាលនិងជំនួយខាងបច្ចេកទេស បង្កើនការទទួលបានព័ត៌មានស្តីពីហានិភ័យអាកាសធាតុ និងការផ្សព្វផ្សាយយ៉ាងទូលំទូលាយនូវការអនុវត្តល្អ ៗ របស់កវិស័យសិកម្មឆ្លាតវៃដែលបន្សាំទៅនឹងការប្រែប្រួលអាកាសធាតុ។

គម្រោងនេះក៏បំពេញបន្ថែមនូវការខិតខំរបស់រដ្ឋាភិបាលវៀតណាម ក្នុងការបង្កើនភាពធន់ទ្រាំសម្រាប់តំបន់នៅឆ្នេរសមុទ្រដែលងាយរងគ្រោះ។

តំណាងក្រសួងកសិកម្មនិងអភិវឌ្ឍន៍ជនបទបានមានប្រសាសន៍ថា គម្រោង SACCR នឹងជួយកសិករខ្នាតតូចរបស់យើងឱ្យមានប្រសិទ្ធភាពក្នុងការសម្របខ្លួនទៅនឹងការប្រែប្រួលទឹកភ្លៀងនិងគ្រោះរាំងស្ងួតដែលបណ្តាលមកពីការប្រែប្រួលអាកាសធាតុ។

តំបន់ Tay Nguyen និងតំបន់នៅខាងត្បូងនៃភាគកណ្តាលនឹងជួបគ្រោះរាំងស្ងួតកាន់តែធ្ងន់ធ្ងរនៅរដូវប្រាំង និងទឹកជំនន់កាន់តែធ្ងន់ធ្ងរនៅរដូវវស្សា។ ហេតុដូច្នេះ កសិករត្រូវប្រឈមមុខនឹងការថយចុះទិន្នផលដំណាំដែលប៉ះពាល់ដល់សន្តិសុខស្បៀងនិងប្រាក់ចំណូល./.

（បកប្រែដោយឌីណា）

（ប្រភពព័ត៌មាន: thoidai.com.vn）

（បកប្រែដោយឌីណា）