យុគសម័យ - ចាប់ពីថ្ងៃទី ១២ ដល់ថ្ងៃទី ១៤ ខែកក្កដា នៅ Mikulov ភាគខាងត្បូង Moravia សាធារណរដ្ឋឆែក បានប្រព្រឹត្តទៅជំនួបប្រាស្រ័យទាក់ទងខាងការទូតក្រោមគំនិតផ្តួចផ្តើមរបស់លោក Jan Zahradil ប្រធានក្រុមសមាជិកសភាមិត្តភាពសហភាពអឺរ៉ុប (EU) - វៀតណាម និងសម្ព័ន្ធភាពនៃសមាគមវៀតណាមប្រចាំនៅអឺរ៉ុប ដោយមានការចូលរួមពីឯកអគ្គរដ្ឋទូតវៀតណាម ចំនួន ៥ រូបប្រចាំនៅបណ្តាប្រទេសចំណុះក្រុម Visegrad (V4 រួមមានសាធារណរដ្ឋឆេក ស្លូវ៉ាគី ហុងគ្រី ប៉ូឡូញ) និងប្រទេសអូទ្រីស។
ឯកអគ្គរដ្ឋទូតវៀតណាមប្រចាំនៅសាធារណរដ្ឋឆែក លោក Ho Minh Tuan (រូបថត៖ baoquocte)
ថ្លែងនៅក្នុងព្រឹត្តិការណ៍នេះ សមាជិកសភាអឺរ៉ុបលោក Jan Zahradil បានមានប្រសាសន៍ថា "ការជួបជុំគ្នានេះគឺជាភាពជោគជ័យដ៏ធំមួយរបស់យើង។ នាថ្ងៃទី ៣០ ខែមិថុនា វៀតណាមនិងសហភាពអឺរ៉ុបបានចុះហត្ថលេខាលើកិច្ចព្រមព្រៀងពាណិជ្ជកម្មសេរី (EVFTA) និងកិច្ចព្រមព្រៀងគាំពារវិនិយោគ (EVIPA) ហើយខ្ញុំសង្ឃឹមថាបណ្តាប្រទេសជាសមាជិកនឹងផ្តល់សច្ចាប័នលើកិច្ចព្រមព្រៀងនេះឲ្យបានឆាប់ៗ"។ លោក Zahradil បានបន្តទៀតថាថាព្រឹត្តិការណ៍នេះគួរតែរៀបឡើងជា ប្រចាំឆ្នាំ ដោយបញ្ជាក់ថាលោកនឹងព្យាយាមជំរុញទំនាក់ទំនងរវាងវៀតណាមនិងសហភាពអឺរ៉ុប ឲ្យកាន់តែល្អប្រសើរថែមទៀត ក៏ដូចជាចាត់តាំងឡើងវិញនូវក្រុមសមាជិកសភាមិត្តភាពអឺរ៉ុប - វៀតណាមក្នុងអាណត្តិថ្មី។
ឯកអគ្គរដ្ឋទូតវៀតណាមប្រចាំនៅសាធារណរដ្ឋឆែក លោក Ho Minh Tuan បានថ្លែងអំណរគុណនិងវាយតម្លៃខ្ពស់ចំពោះគំនិតផ្តួចផ្តើមនៃព្រឹត្តិការណ៍នេះរបស់លោក Jan Zahradil ព្រមទាំងអបអរសាទរចំពោះលទ្ធផលដែលសម្រេចបានក្នុងការបោះឆ្នោតសភាអឺរ៉ុបកន្លងទៅនេះ។ លោកក៏បានថ្លែងអំណរគុណចំពោះការរួមចំណែករបស់លោក Jan Zahradil ចំពោះទំនាក់ទំនងប្រពៃណីរវាងវៀតណាមនិងឆែក ជាពិសេសក្នុងការចរចារនិងចុះហត្ថលេខាលើកិច្ចព្រមព្រៀង EVFTA ។ លោក Ho Minh Tuan បានអះអាងថាដោយមានចំណងមិត្តភាពល្អនិងមនោសញ្ចេតនាដ៏កក់ក្តៅរបស់លោក Jan Zahradil និងសមាជិកសភាសហភាពអឺរ៉ុបផ្សេងៗទៀត កិច្ចព្រមព្រៀង EVFTA នឹងត្រូវអនុម័តឲ្យបានឆាបៗនាចុងឆ្នាំនេះផងដែរ៕
（យោងតាម baoquocte.vn បកប្រែដោយ ហេង វុធ្ធី）
មតិពីមិត្តអ្នកអាន