រដ្ឋាភិបាលអង់គ្លេសបានបើកការិយាល័យថ្មីរបស់ខ្លួនដែលហៅថា Foreign, Commonwealth & Development Office (FCDO)។ ការិយាល័យនេះមានគោលបំណងក្នុងការប្រើប្រាស់ការទូតនិងផ្ដល់ជំនាញរបស់ចក្រភពអង់គ្លេសដើម្បីកសាងកុងសង់ស៊ីសជាអន្តរជាតិឱ្យកាន់តែរឹងមាំដើម្បីប្រឆាំងនឹងផលប៉ះពាល់ដ៏សាហាវនៃមេរោគកូរ៉ូណា ជម្លោះ និងការប្រែប្រួលអាកាសធាតុនៅកម្ពុជា។
អគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា លោកស្រី ទីណា រេដស័រ Tina Redshaw នៅស្ថានទូតអង់គ្លេសប្រចាំនៅប្រទេសកម្ពុជាក្នុងកិច្ចសម្ភាសជាមួយកាសែតខ្មែរថាមស៍។
ថ្លែងប្រាប់កាសែតខ្មែរថាមស៍ អគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា លោកស្រី ទីណា រេដស័រ (Tina Redshaw) មានប្រសាសន៍ថាការិយាល័យ FCDO ថ្មី នាំមកនូវកិច្ចខិតខំប្រឹងប្រែងអន្តរជាតិដើម្បីបង្កើនឥទ្ធិពលរបស់ចក្រភពអង់គ្លេសនៅជុំវិញពិភពលោក ដោយធានាថាចក្រភពអង់គ្លេសមានសកម្មភាពនិងមានឥទ្ធិពលតែមួយនៅក្រៅប្រទេស។
«យើងប្តេជ្ញាចិត្តក្នុងការអនុវត្តសកម្មភាពរបស់យើងឆ្ពោះទៅរកភាពប្រសើរឡើងវិញពីជំងឺរាតត្បាតខណៈដែលការិយាល័យថ្មីនេះនឹងអនុញ្ញាតឱ្យយើងចាប់យកឱកាសអំឡុងពេលដែលយើងត្រៀមខ្លួនធ្វើជាប្រធានក្នុងកិច្ចប្រជុំ G7 និងធ្វើជាម្ចាស់ផ្ទនៃសន្និសីទ COP26 នៅឆ្នាំក្រោយ។ នៅឆ្នាំនេះយើងបានកែសម្រួលថវិកាជំនួយរួចហើយដើម្បីឆ្លើយតបនឹងការរីករាលដាលនៃវីរុសកូវីដ១៩ ដោយសន្យាថានឹងផ្ដល់ជាទំហំទឹកប្រាក់ចំនួន ៧៧៤ លានអឺរ៉ូ (១,០២ ពាន់លានដុល្លារ) ដើម្បីជួយបញ្ឈប់ការរីករាលដាលនៃមេរោគមួយនេះនៅជុំវិញពិភពលោក ស្វែងរកវ៉ាក់សាំង និងជួយសង្គ្រោះអាយុជីវិតមនុស្ស»។
ជាមួយគ្នានេះផងដែរ លោកស្រីអគ្គរាជទូតក៏បានលើកឡើងពីតម្រូវការសម្រាប់ចក្រភពអង់គ្លេសក្នុងការជួយប្រទេសកម្ពុជាក្នុងការវិនិយោគលើវិស័យវិទ្យាសាស្ត្រ ការអប់រំ និងការផ្តល់អំណាចដល់ស្ត្រីដើម្បីកសាងសមត្ថភាពយុវជនកម្ពុជាសម្រាប់ការងារនាពេលអនាគត។
«តាមរយៈអាហារូបករណ៍ Chevening របស់យើង យើងនឹងបន្តផ្តល់ឱកាសដល់អ្នកមានទេពកោសល្យវ័យក្មេងដើម្បីទទួលបានបទពិសោធន៍ក្នុងការសិក្សានិងរស់នៅក្នុងចក្រភពអង់គ្លេស ហើយបន្ទាប់មកអនុវត្តនូវអ្វីដែលពួកគេបានរៀនសូត្រនៅពេលពួកគេត្រឡប់មកប្រទេសកម្ពុជាវិញ។ ស្ថានទូតក៏លើកកម្ពស់ការផ្តល់សិទ្ធិអំណាចដល់ស្ត្រីនិងសមភាពយេនឌ័រតាមរយៈការគាំទ្រស្ត្រីនិងសហគ្រិនឱ្យទទួលបានផលចំណេញពីអាជីវកម្មរបស់ពួកគេផងដែរ»។
ចក្រភពអង់គ្លេសបានប្តេជ្ញាចិត្តក្នុងការចំណាយទំហំទឹកប្រាក់ចំនួន ០,៧ ភាគរយនៃចំណូលជាតិរបស់ខ្លួនលើជំនួយនិងការបង្កើតការិយាល័យ FCDO ដោយសង្ឃឹមថានឹងនាំមកនូវឥទ្ធិពលការទូតនិងជំនាញអភិវឌ្ឍន៍មកកាន់ព្រះរាជាណាចក្រកម្ពុជា។
រដ្ឋមន្ត្រីក្រសួងការបរទេសអង់គ្លេសលោក Dominic Raab នឹងជួយដល់ចក្រភពអង់គ្លេសក្នុងការប្រយុទ្ធប្រឆាំងនឹងការព្រួយបារម្ភធ្ងន់ធ្ងរកើតឡើងដោយសារតែករណីនៃវីរុសកូវីដ១៩ និងគ្រោះទុរភិក្ស។
លោកថា៖ «ករណីនៃវីរុសកូរ៉ូណានិងគ្រោះទុរភិក្សគំរាមកំហែងដល់មនុស្សរាប់លាននាក់នៅក្នុងប្រទេសក្រីក្រមួយចំនួននៅលើពិភពលោក ហើយផ្តល់នូវបញ្ហាដោយផ្ទាល់ដែលប៉ះពាល់ដល់ចក្រភពអង់គ្លេសរួមទាំងអំពើភេរវកម្មនិងលំហូរចំណាកស្រុកជាដើម»។
«Global Britain របស់ចក្រភពអង់គ្លេសជាឧទាហរណ៍និងនាំសហគមន៍អន្តរជាតិរួមគ្នាដោះស្រាយការគំរាមកំហែងដ៏គ្រោះថ្នាក់ទាំងនេះ ពីព្រោះវាជារឿងត្រឹមត្រូវដែលត្រូវធ្វើហើយវាការពារផលប្រយោជន៍របស់ប្រជាជននៃចក្រភពអង់គ្លេស»។
«យើងអាចធ្វើការដោះស្រាយបញ្ហាប្រឈមទាំងនេះបានដោយការរួមបញ្ចូលកម្លាំងការទូតរបស់យើងជាមួយនឹងជំនួយដ៏ឈានមុខគេនៅលើពិភពលោក»៕
（ប្រភពព័ត៌មាន: khmertimeskh.com）
មតិពីមិត្តអ្នកអាន