យុគសម័យ - នាថ្ងៃទី ២៣ ខែធ្នូ នាយករដ្ឋមន្ត្រីជប៉ុនលោក Abe Shizo និងប្រធានរដ្ឋចិនលោក Xi Jinping បានឯកភាពគ្នា ជំរុញទំនាក់ទំនងរវាងប្រទេសទាំងពីរឱ្យឈានដល់កម្ពស់ថ្មី ក្នុងបរិបទដែលទីក្រុងតូក្យូ កំពុងត្រៀមសម្រាប់ដំណើរទស្សនកិច្ចផ្លូវរដ្ឋរបស់ថ្នាក់ដឹកនាំចិនទៅកាន់ជប៉ុននារដូវផ្ការីកខាងមុខ។
នាយករដ្ឋមន្រ្តីជប៉ុនលោក Abe Shizo (ឆ្វេង) ក្នុងជំនួបជាមួយប្រធានរដ្ឋចិន លោក Xi Jinping នៅទីក្រុង Osaka នាថ្ងៃទី ២៧ ខែមិថុនា ឆ្នាំ ២០១៩ (រូបថតៈ AFP/TTXVN)
ថ្លែងនៅក្នុងការចាប់ផ្តើមនៃកិច្ចប្រជុំនៅទីក្រុងប៉េកាំង លោក Abe បានលើកឡើងថា រដ្ឋាភិបាលជប៉ុនមានការ "យកចិត្តទុកដាក់យ៉ាងខ្លាំង" ចំពោះដំណើរទស្សនកិច្ច របស់ប្រធានរដ្ឋចិនលោក Xi Jinping ទៅកាន់ប្រទេសជប៉ុន។ លោក Abe បាននិយាយថា “យើងចង់កសាងទំនាក់ទំនងដែលសមស្របសម្រាប់យុគសម័យថ្មីរបស់ជប៉ុននិងចិន”។
ចំណែកខ្លួនវិញ លោក Xi Jinping បានសម្តែងថា ចិនត្រៀមខ្លួនជាស្រេច រក្សាទំនាក់ទំនងយ៉ាងជិតស្និទ្ធជាមួយជប៉ុន ដើម្បីនាំទំនាក់ទំនងចិន - ជប៉ុនឈានដល់កម្ពស់ថ្មីមួយ។
បន្ទាប់ពីកិច្ចពិភាក្សា លោក Abe បានទទួលទានអាហារពេលល្ងាចជាមួយលោក Xi Jinping មុនពេលទៅដល់ទីក្រុង Chengdu ភាគនិរតីនៃប្រទេសចិន ដើម្បីចូលរួមកិច្ចប្រជុំកំពូលត្រីភាគីចិន - ជប៉ុន - កូរ៉េខាងត្បូង ដែលគ្រោងធ្វើឡើងនាថ្ងៃទី ២៤ ខែធ្នូ។
នេះគឺជាជំនួបលើកដំបូង រវាងនាយករដ្ឋមន្រ្តីជប៉ុន លោក Abe និងប្រធានរដ្ឋចិន លោក Xi Jinping កិតតាំងពីជំនួបនៅ Osaka (ជប៉ុន) នៅខាងក្រៅនៃកិច្ចប្រជុំកំពូលក្រុមសេដ្ឋកិច្ចអភិវឌ្ឍន៍និងទើបលេចចេញ (G20) កាលពីខែមិថុនាកន្លងមក។ កិច្ចប្រជុំទ្វេភាគីនេះ មានគោលបំណងដើម្បីត្រៀមសម្រួលបរិយាកាស សម្រាប់ដំណើរទស្សនកិច្ចផ្លូវរដ្ឋរបស់ប្រធានរដ្ឋចិនទៅកាន់ប្រទេសជប៉ុន នៅពេលដែលទំនាក់ទំនងរវាងប្រទេសទាំងពីរ កាន់តែមានភាពកក់ក្តៅ ក្នុងបរិបទនៃភាពតានតឹងពាណិជ្ជកម្មរវាងសហរដ្ឋអាមេរិកនិងចិន។
យោងតាមមជ្ឈដ្ឋានមន្រ្តីជប៉ុន ទីក្រុងតូក្យូនិងទីក្រុងប៉េកាំង កំពុងស្វែងរកមធ្យោបាយដើម្បីធ្វើឱ្យកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅនិងលើកកម្ពស់ការផ្លាស់ប្តូរវប្បធម៌និងការជួបប្រាស្រ័យរវាងប្រជាជននិងប្រជាជន៕
（ដោយ ស្រីព្រេជ）
មតិពីមិត្តអ្នកអាន