យុគសម័យ- សន្ទស្សន៍របស់ផ្សារហ៊ុន Nasdaq បានធ្លាក់ចុះកាលពីថ្ងៃចន្ទ ខណៈដែលក្រុមហ៊ុន Google ក្រុមហ៊ុន Facebook និងក្រុមហ៊ុន Amazon បានរងគ្រោះជាមួយនឹងការធ្លាក់ចុះតម្លៃហ៊ុនដោយសារសេចក្តីរាយការណ៍នានាថា ក្រុមមន្ត្រីប្រឆាំងនឹងការធ្វើអាជីវកម្មផ្តាច់មុខរបស់អាមេរិក កំពុងចាត់វិធានការត្រួតពិនិត្យមើលក្រុមហ៊ុនបច្ចេកវិទ្យាធំៗ។
សន្ទស្សន៍ហ៊ុន Nasdaq Composite បានធ្លាក់ចុះ ១,៦ ភាគរយ មកនៅត្រឹម ៧ ៣៣៣,០២ ពិន្ទុ។
សន្ទស្សន៍ហ៊ុន Dow Jones Industrial Average ដែលតាមដានតម្លៃភាគហ៊ុនរបស់ក្រុមហ៊ុនធំៗចំនួន ៣០ របស់អាមេរិកដែលចុះបញ្ជីក្នុងផ្សារហ៊ុនក្រុងញូវយ៉ក និងផ្សារហ៊ុន Nasdaq បានកើនឡើងតិចជាង ០,១ ភាគរយ ដែលបញ្ចប់នៅត្រឹម ២៤ ៨១៩,៧៨ ពិន្ទុ ខណៈដែលសន្ទស្សន៍ហ៊ុន S&P 500 បានធ្លាក់ចុះ ០,៣ ភាគរយ មកនៅត្រឹម ២ ៧៤៤,៤៥ ពិន្ទុ។
តារាងសន្ទស្សន៍ភាគហ៊ុនរបស់អាមេរិកបង្ហាញពីការធ្លាក់ថ្លៃ ជុំវិញករណីអាជីកម្មផ្តាច់មុខ។
កាសែត Wall Street Journal ដែលដកស្រង់ប្រភពមិនបញ្ចេញឈ្មោះ បានរាយការណ៍ថា ក្រសួងយុត្តិធម៌អាមេរិក និងគណៈកម្មការពាណិជ្ជកម្មសហព័ន្ធបានព្រមព្រៀងសម្របសម្រួលឲ្យមានការអនុវត្តប្រឆាំងការធ្វើអាជីវកម្មផ្តាច់មុខចំពោះក្រុមហ៊ុនបច្ចេកវិទ្យាធំៗបំផុត ដោយក្រសួងយុត្តិធម៌ចាត់វិធានការជាមួយក្រុមហ៊ុន Google ហើយគណៈកម្មការ ពាណិជ្ជកម្មសហព័ន្ធចាត់វិធានការជាមួយក្រុមហ៊ុន Facebook និងក្រុមហ៊ុន Amazon។
សេចក្តីរាយការណ៍នេះបានកើតមានឡើងបន្ទាប់ពីមានភាពចម្រូងចម្រាសជាច្រើនពាក់ព័ន្ធនឹងក្រុមហ៊ុនទាំងនេះ និងកើតមានឡើង ខណៈដែលបេក្ខភាពប្រធានាធិបតីមួយចំនួនអំពាវនាវឲ្យក្រុមហ៊ុនធំៗទាំងនោះបំបែកចេញពីគ្នា។
ភាគហ៊ុនរបស់ក្រុមហ៊ុន Facebook បានធ្លាក់ថ្លៃ ៧,៥ ភាគរយ ភាគហ៊ុនរបស់ក្រុមហ៊ុន Alphabet ដែលជាក្រុមហ៊ុនមេរបស់ Google បានធ្លាក់ថ្លៃ ៦,១ ភាគរយ ហើយភាគហ៊ុនរបស់ក្រុមហ៊ុន Amazon បានធ្លាក់ថ្លៃ ៤,៦ ភាគរយ។
ភាគហ៊ុនក្រុមហ៊ុនបច្ចេកវិទ្យាធំៗផ្សេងទៀតក៏ធ្លាក់ចុះខ្លាំងដែរ រួមទាំងក្រុមហ៊ុន Apple, Netflix, Salesforce និង Microsoft៕
（ប្រភព៖ postkhmer.com សរុបដោយសំណាង）
មតិពីមិត្តអ្នកអាន