នាថ្ងៃទី ៩ ខែមីនា សមាគមមិត្តភាពវៀតណាម - កម្ពុជា បានសហការជាមួយសាលាមិត្តភាពលេខ ៨០ និងសាជីវកម្មអន្តរជាតិ Phuong Hoang រៀបចំពិធីប្រគល់ និងទទួលជំនួយឧបត្ថម្ភនិស្សិតកម្ពុជាដែលកំពុងសិក្សានៅទីក្រុងហាណូយ សម្រាប់ឆ្នាំសិក្សា ២០២៣ - ២០២៤ និងផ្តល់ជំនួយឧបត្ថម្ភសម្ភារៈដល់សាលាមិត្តភាពលេខ ៨០ (ទីរួមខេត្ត Son Tay ទីក្រុងហាណូយ) ក្នុងឆ្នាំ ២០២៤។
លោកស្រី Nguyen Thi Thanh អនុប្រធានគណៈកម្មាធិការចាត់តាំងមជ្ឈិម ប្រធានសមាគមមិត្ដភាពវៀតណាម-កម្ពុជា |
ក្នុងឆ្នាំសិក្សា ២០២៣ - ២០២៤ សមាគមមិត្តភាពវៀតណាម - កម្ពុជាបានជួយឧបត្ថម្ភនិស្សិតកម្ពុជាចំនួន ១៩៣ នាក់ដែលកំពុងសិក្សានៅវៀតណាម ក្នុងនោះ មាននិស្សិតកម្ពុជា ១០២ នាក់នៅទីក្រុងហាណូយ។ ក្នុងក្របខ័ណ្ឌនៃពិធីនេះ ក្រុមគ្រួសារ អង្គការ និងសប្បុរសធម៌វៀតណាម បានជួបផ្ទាល់ និងជួយឧបត្ថម្ភនិស្សិតកម្ពុជាដែលកំពុងសិក្សានៅសាលាមិត្តភាពលេខ ៨០។
ថ្លែងមតិក្នុងពិធីនេះ លោកស្រី Nguyen Thi Thanh អនុប្រធានគណៈកម្មាធិការចាត់តាំងមជ្ឈិម ប្រធានសមាគមមិត្ដភាពវៀតណាម-កម្ពុជា បានចាត់ទុកថា ដោយមានបេសកកម្មរួមចំណែកបង្កើនការយល់ដឹង ពង្រឹងទំនាក់ទំនងសាមគ្គីភាព មិត្តភាពប្រពៃណី និងកិច្ចសហប្រតិបត្តិការលើគ្រប់វិស័យរវាងប្រជាជននៃប្រទេសទាំងពីរ សមាគមមិត្តភាពវៀតណាម-កម្ពុជា យកចិត្តទុកដាក់យ៉ាងខ្លាំងចំពោះការអនុវត្តចលនាជួយឧបត្ថម្ភនិស្សិតកម្ពុជាដែលកំពុងសិក្សានៅវៀតណាម។ ក្នុងដំណាក់កាលឆ្នាំ ២០២២-២០២៧ សមាគមខិតខំប្រឹងប្រែងជួយឧបត្ថម្ភនិស្សិតកម្ពុជាដែលកំពុងសិក្សានៅវៀតណាមចំនួនពី ៨០ ដល់ ១០០ នាក់ ក្នុងមួយឆ្នាំ។
ប្រតិភូ និងនិស្សិតកម្ពុជាត្រូវបានជួយឧបត្ថម្ភនៅក្នុងពិធី |
លោកស្រី Nguyen Thi Thanh បានឲ្យដឹងថា និស្សិតកម្ពុជា ដែលទទួលបានការជួយឧបត្ថម្ភនៅវៀតណាម ភាគច្រើនទទួលបានលទ្ធផលសិក្សាល្អ។ នៅពេលត្រឡប់មកប្រទេសវិញ និស្សិតទាំងនេះមានការងារស្ថេរភាព និងទទួលបានឱកាសអភិវឌ្ឍន៍ជាច្រើន។ លទ្ធផលនៃសកម្មភាពជួយឧបត្ថម្ភនិស្សិតកម្ពុជា រួមចំណែកជាក់ស្តែងក្នុងការកសាង "ស្ពានមិត្តភាពយូរអង្វែងពីជំនាន់មួយទៅជំនាន់មួយ រវាងប្រជាជាតិទាំងពីរ និងប្រជាជននៃប្រទេសទាំងពីរ"។
លោកស្រី ជា គឹមថា ឯកអគ្គរាជទូតកម្ពុជាប្រចាំនៅវៀតណាម បានថ្លែងអំណរគុណចំពោះសមាគមមិត្តភាពវៀតណាម-កម្ពុជា និងក្រុមគ្រួសារ បុគ្គល និងអង្គការនានាដែលបានជួយឧបត្ថម្ភនិស្សិតកម្ពុជាដែលកំពុងសិក្សានៅវៀតណាម។ លោកស្រីបានសម្តែងនូវក្តីជឿជាក់ថា និស្សិតកម្ពុជានឹងទទួលបានមនោសញ្ចេតនាយ៉ាងស្មោះស្ម័គ្រ ស្និទ្ធស្នាល និងការរួមដំណើរដ៏មានប្រសិទ្ធភាព ក្នុងដំណើរការសិក្សានៅវៀតណាម ក៏ដូចជាក្រោយពីបញ្ចប់ការសិក្សា។ ទន្ទឹមនឹងនោះ លោកស្រី ជា គឹមថា ក៏មានបំណងចង់ឱ្យនិស្សិតកម្ពុជាទាំងនេះធ្វើសមាហរណកម្មជាមួយក្រុមគ្រួសារជួយឧបត្ថម្ភ ចែករំលែកប្រពៃណីវប្បធម៌ និងសោភ័ណភាពក្នុងជីវភាពរស់នៅប្រចាំថ្ងៃរបស់ប្រជាជនកម្ពុជា៕
មតិពីមិត្តអ្នកអាន