កោះស្ដេច គឺជា កោះធម្មជាតិមួយ ឋិតនៅក្នុងភូមិ កោះស្តេច ឃុំកោះស្ដេច ស្រុកគីរីសាគរ ដែលលាតសន្ធឹងតាមបណ្ដោយសមុទ្រមានចម្ងាយប្រមាណជាង ៨១ គីឡូម៉ែត្រ ពីទីរួមខេត្តកោះកុង។ កោះស្ដេច មានចំងាយប្រមាណជា ២៥០ គីឡូម៉ែត្រពីរាជធានីភ្នំពេញ ដោយត្រូវធ្វើដំណើរជាពីរដំណាក់កាល គឺផ្លូវគោក និង ផ្លូវទឹក ដោយជិះអូប័រ (ទូកតូចដែលមានល្បឿនលឿន)។ រមណីយដ្ឋានកោះស្ដេច មានឆ្នេរខ្សាច់សស្អាត មានផ្ទះសំណាក់ និង ទេសភាពស្រស់ស្អាតសម្រាប់លំហែលំហើយ ព្រោះមានកោះជាច្រើននៅជុំវិញ និង ព្រៃធម្មជាតិ។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
ទន្ទឹមគ្នានេះ ភ្ញៀវទេសចរអាចជួលទូកជិះទៅស្ទូចត្រី មុជទឹកសមុទ្រ មើលផ្កាថ្ម និង ប្រព័ន្ធជីវចម្រុះ នៅបាតសមុទ្រ ព្រមទាំងមានទូកយន្តសម្រាប់ដឹកអ្នកទេសចរជាតិ និង អន្តរជាតិ ពីកោះស្ដេចទៅទស្សនាតំបន់កោះនានា ឋិតនៅប្រជុំកោះក្បែរៗនោះទៀតផង។ មួយវិញទៀត នៅរមណីយដ្ឋាន កោះស្ដេច ភ្ញៀវទេសចរទាំងឡាយ ក៏អាចមើលថ្ងៃរៀបលិចដ៏ស្រស់ស្អាត ដែលជាទីកម្សាន្ត បំបាត់ទុក្ខកង្វល់របស់ប្រិយមិត្ត បន្ទាប់ពីបំពេញការងារយ៉ាងនឿយហត់ពេញមួយសប្ដាហ៍កន្លងមក។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
ក្រោមការបណ្តាក់ទុនវិនិយោគ និងអភិវឌ្ឍន៍ពីក្រុមហ៊ុនចិន «យូញៀន គ្រុប» ( UNION GROUP ) កោះស្តេចស្ថិតនៅស្រុកគិរីសាគរ ខេត្តកោះកុង នឹងក្លាយជារមណីយដ្ឋានទេសចរណ៍ក្នុងលំហសមុទ្រ ដែលគួរឲ្យទាក់ទាញបំផុត ។ កោះស្តេចត្រូវក្រុមហ៊ុនវិនិយោគ UNION GROUP ដាក់ទុនវិនិយោគជាច្រើនលានដុល្លារ ដើម្បីអភិវឌ្ឍន៍ឲ្យក្លាយជារមណីយដ្ឋានធម្មជាតិដ៏ទំនើប និងមានភាពល្បីល្បាញនៅកម្ពុជា គួបផ្សំទៅនឹងការអភិវឌ្ឍច្រកសេដ្ឋកិច្ចដឹកជញ្ជូនខ្នាតអន្តរជាតិដ៏ធំភ្លាប់ទៅនឹងពិភពលោក។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
លោកលី តៅ អគ្គនាយកក្រុមហ៊ុនយូញៀនគ្រុប កាលពីពេល ថ្មីៗនេះបង្ហាញឲ្យដឹងថា តំបន់កោះស្តេចគ្មានព្រៃឈើនិងរ៉ែក្រោមដីសម្រាប់ជាថ្នូរទៅនឹងការអភិវឌ្ឍដ៏ធំនៅទីនោះឡើយ ផ្ទុយទៅវិញទីតាំងភូមិសាស្ត្រដី ព្រៃ ភ្នំ ឆ្នេរនៅទីនោះ ជាទីតាំងមានហុងស៊ុយ មានលាភសំណាងដល់ក្រុមហ៊ុន UNION GROUP តាមរយៈការឆ្លុះបញ្ចាំងឃើញថា ទីនោះមើលពីលើឃើញដូចនាគក្បាល៧ ។ ទីតាំងភូមិសាស្ត្រល្អបែបនោះ គ្មានទេលើពិភពលោក។ លោកលី តៅ ប្រាប់ថា ជំហានដំបូងក្នុងរយៈពេលជាង៣ឆ្នាំចុងក្រោយនេះផ្ទៃដីជាប់ឆ្នេរប្រមាណ១៥.000ម៉ែត្រការ៉េ ក្រុមហ៊ុនបានសម្រេចធ្វើទីលានវាយកូនគោលរួចហើយ មាន១៨រន្ធ រួមទាំងកសាងផ្លូវថ្នល់ដ៏ធំមួយប្រវែង៦0គីឡូម៉ែត្រភា្ជប់ពីផ្លូវជាតិលេខ៤៨ ទៅកាន់តំបន់ឆ្នេរ និងធ្វើប្រព័ន្ធទឹកភ្លើងដោយចំណាយអស់ប្រមាណ៣០០លានដុល្លារអាមេរិក ។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
ជាមួយនឹងការចិញ្ចឹមកម្មករ បុគ្គលិកខ្មែរ និងអ្នកជំនាញការបច្ចេកទេសចិនប្រមាណ ៣០០នាក់ លោកលី តៅ បានលើកទិសដៅអភិវឌ្ឍន៍នៅទីនោះថា កម្ពុជាកំពុងមានអ្នកទេសចរកើនច្រើនឡើងពីមួយឆ្នាំទៅមួយឆ្នាំ ដូច្នេះលោកនឹងអភិវឌ្ឍរមណីយដ្ឋានទេសចរណ៍ឲ្យបានលឿនតាមខ្នាតអន្តរជាតិ ប្រែក្លាយទៅជាមជ្ឈមណ្ឌលវិស្សមកាលមួយបម្រើអ្នកទេសចរ ។ លោកអគ្គនាយកមានគម្រោងបោះទុនប្រមាណ១.០០០លានដុល្លារបន្ថែមសម្រាប់សាងសង់សណ្ឋាគារផ្កាយ៥ ចំនួន៣ ដែលមាន ១.000បន្ទប់ កាស៊ីណូ សួនសម្រាប់ក្មេងកម្សាន្ត និងកែលម្អឆ្នេរឲ្យបានស្អាត ដោយលោកចាត់ទុកថា ទីនោះជាឆ្នេរល្អបំផុតប្រវែង៩0គីឡូម៉ែត្រ គ្របដណ្តប់លើ១ភាគ៣ នៃឆ្នេរស្អាតប្រវែង៤៤0គីឡូម៉ែត្ររបស់កម្ពុជា ។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
លោកលី តៅ បានកំណត់យុទ្ធសាស្ត្រពង្រីកផ្ទៃដីតំបន់កោះស្តេច ក្នុងរយៈពេល១0ឆ្នាំខាងមុខ ឲ្យក្លាយទៅជាកំពង់ផែអន្តរជាតិ ដែលអាចផ្ទុកទំនិញសម្រាប់ឆ្លងកាត់ដឹកជញ្ជូនឲ្យបាន១ម៉ឺនតោនទៅ២ម៉ឺនតោន ព្រមទាំងអាកាសយានដ្ឋានអន្តរជាតិមួយក៏មានគម្រាងសាងសង់នៅទីនោះផងដែរ ក្នុងតម្លៃវិនិយោគ ប្រមាណ៣.០០០លានដុល្លារអាមេរិក ។
លោកថោង ខុន រដ្ឋមន្ត្រីក្រសួងទេសចរណ៍ បានចាប់អារម្មណ៍ថា លោកគាំទ្រទៅលើគម្រោងអភិវឌ្ឍរមណីយដ្ឋានតំបន់ឆ្នេរតាមបែបទេសចរណ៍វិស្សមកាលដែលកំពុងជំរុញល្បឿនយ៉ាងសកម្មដូចសព្វថ្ងៃនេះ ។ ដូច្នេះវាស្របពេលដែលខេត្តកោះកុងទាំងមូល ត្រៀមនឹងរៀបចំធ្វើបុណ្យសមុទ្រនៅខែធ្នូឆ្នាំ២០១៤ អាចបង្កឱកាសទទួលភ្ញៀវអន្តរជាតិ និងភ្ញៀវអង្គទូតនានា ចូលទៅទស្សនានិងវាយកូនគោលនៅទីនោះ និងបង្កើតឲ្យមានកម្មវិធីកីឡាលើទឹកនៅទីនោះផងដែរ ។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
លោករដ្ឋមន្ត្រីអះអាងថា នេះជាគោលដៅទេសចរណ៍ ឬក៏ជាផលិតផលទេសចរណ៍ថ្មីមួយទៀត សម្រាប់ទាក់ទាញអ្នកទេសចរបរទេសនៅច្រករបៀងទិសខាងត្បូងឲ្យកាន់តែមើលឃើញពីសក្តានុពលទេសចរណ៍របស់កម្ពុជា ។ ទន្ទឹមនឹងនេះលោកថោង ខុន រំពឹងថា នៅឆ្នាំ២០២០ អ្នកទេសចរចិននឹងចេញដើរលេងច្រើនជាងអ្នកទេសចរនានាលើពិភពលោក ។ ចំពោះកម្ពុជាក៏បានយកចិត្តទុកដាក់ទៅលើអាទិភាពទាក់ទាញអ្នកទេសចរចិន ឲ្យបានច្រើនក្រោមរូបភាពដាក់យុទ្ធសាស្ត្រជាច្រើនដោយសហការជាមួយផ្នែកឯកជន ។យោងតាមតួលេខពីក្រសួងទេសចរណ៍ឲ្យដឹងថា គិតពីត្រឹមឆ្នាំ១៩៩៤ ដល់ឆ្នាំ២០១២ ការវិនិយោគទុនរបស់ចិន មកកម្ពុជា មានទឹកប្រាក់ប្រមាណ៩.០០០លានដុល្លារអាមេរិក។ ក្នុងនោះការវិនិយោគលើវិស័យទេសចរណ៍ មាន៤៨ភាគរយនៃការវិនិយោគសរុបរបស់ប្រទេសចិន។ ដោយឡែកគិតត្រឹមឆ្នាំ២០១៣ អ្នកទេសចរចិនមកទស្សនានៅកម្ពុជា ស្ថិតក្នុងទីផ្សារទេសចរធំទី៣ នៃទីផ្សារធំៗទាំង១០មកកម្ពុជា។
កោះស្ដេច ជារមណីយដ្ឋាន ធម្មជាតិ និង ប្រជុំកោះ
កាលពី១០ទៅ២០ឆ្នាំមុន តំបន់កោះសេ្តច គឺជាច្រកល្បីល្បាញឈ្មួញរកស៊ីនាំទំនិញគេចពន្ធពីលំហសមុទ្រចូលកម្ពុជាយ៉ាងសន្ធឹកសន្ធាប់ តែឥឡូវនេះតំបន់កោះស្តេចកំពុងបោះជំហានទៅរកការអភិវឌ្ឍមួយមានតម្លាភាព។ តំបន់កោះស្តេចបច្ចុប្បន្នកំពុងអភិវឌ្ឍន៍ក្នុងសភាពលាក់ខ្លួន ស្ទើរតែមានមនុស្សតិចណាស់បានឃើញការអភិវឌ្ឍនៅទីនោះ ។ ទោះជាយ៉ាងណាក្តី ការអភិវឌ្ឍតំបន់កោះស្តេចបានលេចឮដល់កាសែតនៅអឺរ៉ឺប និងបានផ្សព្វផ្សាយពាសពេញពិភពលោករួចជាស្រេចទៅហើយ ៕
（សរុបដោយ ហេង វុធ្ធ）
（ប្រភពព័ត៌មាន: visitcambodia.travel និង kohsantepheapdaily.com.kh）
មតិពីមិត្តអ្នកអាន