«កោះសាមសិប» ជាតំបន់អេកូទេសចរណ៍ថ្មីមួយ លាតសន្ធឹងតាមដងទន្លេមេគង្គ ជាប់ព្រំប្រទល់ខេត្តក្រចេះ និងស្ទឹងត្រែង។ កោះនេះ ស្ថិតក្នុងកម្រងកោះមួយ នៅក្នុងចំណោម កោះទាំងអស់ ដែលស្ថិតនៅក្នុងភូមិចំនួនបី គឺខ្សាច់លាវ កោះខ្ញែរ និងពន្ធជា នៃឃុំអូរគ្រៀង ស្រុកសំបូរ ខេត្តក្រចេះ។
ទិដ្ឋភាពរួមនៃកោះ សាមសិប។ (រូបថត៖ kratie.gov.kh)
បង្កើតឡើងនៅឆ្នាំ២០១៨ ដោយមានការគាំទ្រដោយអង្គការ NTFP-EP Cambodia និងអង្គការ WWF «កោះសាមសិប» ជាតំបន់ប្រជុំទៅដោយកោះតូចធំជាច្រើនដែលគ្របដណ្ដប់ដោយព្រៃឈើតូចធំ និងជាបណ្ដុំសរសៃទឹក និងជីវចម្រុះនៃដងទន្លេមេគង្គ។
ដើម្បីធ្វើដំណើរមកដល់កោះសាមសិប ភ្ញៀវទេសចរជាតិ-អន្តរជាតិ ត្រូវជិះទូកសហគមន៍ រយៈពេលជាង១ម៉ោង តាមដងទន្លេមេគង្គ។ នៅទីនេះអ្នកទេសចរ អាចជិះទូកមើលសម្រស់ព្រៃលិចទឹក មើលថ្ងៃលិច និងថ្ងៃរះ, ថតរូបសត្វស្លាបដែលជិតផុតពូជ, គយគន់ព្រៃលិចទឹក,និងបោះតង់សម្រាកនៅលើឆ្នេរខ្សាច់សក្បុស។
សហគមន៍អេកូទេសចរណ៍កោះសាមសិបបង្កើតឡើងដោយផ្អែកទៅលើធនធានសក្តានុពលរបស់សហគមន៍ព្រៃឈើ និងសហគមន៍នេសាទខ្សាច់លាវ កោះខ្ញែរ និងពន្ធជា។ សហគមន៍នេះ សំបូរទៅដោយព្រៃឈើជាច្រើនប្រភេទរជាប្រភេទ ដែលជាប្រភេទព្រៃរបោះ និងពាក់កណ្តាលស្រោង ដែលជាជម្រកសត្វព្រៃដ៍សំខាន់ដូចជា សត្វខ្ទីង ប្រើស ជ្រូកព្រៃ ក្ងោក ត្មាតត្រយ៉ងចំកំកស និងសម្បូរទៅដោយសត្វស្លាបរាប់រយប្រភេទ និងត្រីដ៏សម្បូរបែប។ល។ ចំណែកក្នុងដែនសហគមន៍នេសាទទាំងបីវិញ សំបូរដោយអន្លង់ទឹកជ្រៅ ទឹកជួរ សំបូរកោះ នឹងព្រៃលិចទឹកដែលជាជម្រកត្រីពងកូនដ៏សំខាន់។ជារួមក្នុងក្នុងតំបន់នេះសំបូរ ទៅដោយធនធានធម្មជាតិដូចជា ព្រៃឈើ ទន្លេ ព្រែក អូរ សត្វព្រៃ សត្វស្លាប និងត្រីជាច្រើនប្រភេទដែលរស់នៅក្នុងទន្លេមេគង្គ។ ចំណែកឯធនធានវប្បធម៌វិញមានដូចជា ពិធីបុណ្យចូលឆ្នាំ ពិធីសែនព្រេន ឡើងអ្នកតា ភ្លេងបុរាណ មន្តអាគម និងអាពាហ៍ពិពាហ៍ជាដើម និងប្រពៃណីជនជានដើមភាគតិច។ ក្រៅពីនេះប្រជាជនក្នុងតំបន់នេះមានវប្បធម៌ដ៏ល្អ គឺការចេះជួយគ្នាទៅវិញទៅមក មិនប្រកាន់បក្សពួក រួសរាយរាក់ទាក់ភ្ញៀវ មានសុជីវធម៌ មិនកេងបន្លំគ្នាដែលជាគំរូដ៏ល្អ./.
ការបោះជំរុំលើវាលខ្សាច់។ (រូបថត៖ kratie.gov.kh)
ជិះទូកមើលសម្រស់ព្រៃលិចទឹក មើលថ្ងៃលិច និងថ្ងៃរះ,។ (រូបថត៖ Thmey Thmey.com)
ជាជម្រកដ៏សំខាន់សម្រាប់សត្វស្លាបប្រមាណ២១៨ប្រភេទ។ (រូបថត៖ Thmey Thmey.com)
ទេសចរអាចជិះទូកមើលសត្វស្លាបច្រើនប្រភេទ បោះតង់នៅលើកោះដែលរៀបចំដោយប្រធានសហគមន៍ មើលទេសភាពថ្ងៃលិចតាមមាត់ទន្លេរ និងពិសារអាហារដែលរៀបចំដោយប្រជាសហគមន៍ និងមានផ្ទះស្នាក់សហគមន៍ផងដែរ។
（បូកសរុបដោយឌីណា）
មតិពីមិត្តអ្នកអាន