ដំណើរទស្សនកិច្ចជាផ្លូវការនៅកម្ពុជារបស់លោក Pham Minh Chinh នាយករដ្ឋមន្ត្រីវៀតណាម មានសារៈសំខាន់ក្នុងទិដ្ឋភាពជាច្រើន

ឧបនាយករដ្ឋមន្ត្រីវៀតណាម លោក Pham Binh Minh ទទួលជួបប្រធានគណៈប្រតិភូប្រជាជនកម្ពុជា

នាយករដ្ឋមន្ត្រីវៀតណាមលោក Pham Minh Chinh អញ្ជើញដឹកនាំ​កិច្ចប្រជុំ​រដ្ឋាភិបាល​ប្រចាំខែតុលា

លោក Nguyen Minh Vu អនុរដ្ឋមន្ត្រីប្រចាំការក្រសួងការបរទេសវៀតណាម។​

អ្នកយកព័ត៌មាន៖ តើមួយណាជាចំណុចលេចធ្លោនៃដំណើរទស្សនកិច្ចនៅកម្ពុជាលើកនេះរបស់លោកនាយករដ្ឋមន្ត្រី ជាពិសេសក្នុងបរិបទក្រោយរយៈពេល៣ឆ្នាំនៃការរងផលប៉ះពាល់ដោយជំងឺរាតត្បាត Covid-19 ?

លោក Nguyen Minh Vu ៖ វៀតណាម និងកម្ពុជា គឺជាប្រទេសជិតខាង មានព្រំដែនជាប់គ្នា និងមានទំនាក់ទំនងជិតស្និទ្ធលើគ្រប់វិស័យ។ ដំណើរទស្សនកិច្ចជាផ្លូវការនៅកម្ពុជាលើកនេះ គឺជាដំណើរទស្សនកិច្ចលើកដំបូងរបស់លោក Pham Minh Chinh ក្នុងនាមជានាយករដ្ឋមន្ត្រី ហើយមានអត្ថន័យសំខាន់ៗជាច្រើនវិស័យ។

ដំណើរទស្សនកិច្ចលើកនេះបានធ្វើឡើងក្នុងអំឡុង “ឆ្នាំមិត្តភាពវៀតណាម - កម្ពុជា ឆ្នាំ២០២២” ដើម្បីអបអរសាទរខួបលើកទី ៥៥ នៃការបង្កើតទំនាក់ទំនងការទូតរវាងប្រទេសទាំងពីរ។ នេះជាឱកាសសម្រាប់នាយករដ្ឋមន្ត្រីនៃប្រទេសទាំងពីរពិនិត្យមើលឡើងវិញនូវទំនាក់ទំនងរួម ។​ ផ្ដើមចេញពីនេះនឹងកំណត់នូវកម្លាំងចលករថ្មី សក្ដានុពលថ្មី និងវិធានការថ្មី ដើម្បីជំរុញទំនាក់ទំនងនៃប្រទេសទាំងពីរឱ្យឈានចូលដំណាក់កាលថ្មីប្រកបដោយប្រសិទ្ធភាព និងមានទំនុកចិត្តជាងទៀត។ ក្នុងក្របខ័ណ្ឌនៃដំណើរទស្សនកិច្ចនេះ កិច្ចព្រមព្រៀងសំខាន់ៗជាច្រើនក្នុងវិស័យផ្សេងៗនឹងត្រូវបានចុះហត្ថលេខា។

អ្នកយកព័ត៌មាន៖ បើតាមលោកអនុរដ្ឋមន្ត្រី តើកិច្ចសហប្រតិបត្តិការលើវិស័យណាខ្លះដែលរំពឹងទុកជាងគេក្នុងដំណើរទស្សនកិច្ចនេះ?

លោក Nguyen Minh Vu៖ ក្នុងទំនាក់ទំនងទូលំទូលាយលើវិស័យជាច្រើន បណ្តាញជាច្រើន និងកម្រិតជាច្រើន ហើយឈរលើមូលដ្ឋាននៃទំនាក់ទំនងនយោបាយដ៏ល្អនោះ កិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ និងកិច្ចសហប្រតិបត្តិការការពារជាតិ-សន្តិសុខ-ព្រំដែន នឹងបន្តត្រូវបានជម្រុញយ៉ាងខ្លាំងនៅក្នុងពេលខាងមុខ។

ចំណុចសំខាន់មួយនៃដំណើរទស្សនកិច្ចលើកនេះ គឺការដែលនាយករដ្ឋមន្រ្តីទាំងពីរនឹងរួមគ្នាចូលរួម និងថ្លែងសុន្ទរកថានៅក្នុងវេទិកាជំរុញពាណិជ្ជកម្ម និងវិនិយោគវៀតណាម-កម្ពុជា ដែលបង្ហាញពីចំណាប់អារម្មណ៍ពិសេសចំពោះសហគមន៍ធុរកិច្ច និងការប្តេជ្ញាចិត្តរបស់រដ្ឋាភិបាលនៃប្រទេសទាំងពីរក្នុងការធ្វើឱ្យកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគក្លាយជាសសរស្តម្ភក្នុងទំនាក់ទំនងទ្វេភាគី។

ចំពោះកិច្ចសហប្រតិបត្តិការលើវិស័យការពារជាតិ-សន្តិសុខ-ព្រំដែន រំពឹងថា ភាគីទាំងពីរនឹងពិភាក្សាអំពីវិធានការសម្របសម្រួលក្នុងការបង្ការ ទប់ស្កាត់ និងបង្រ្កាបបទល្មើសគ្រប់ប្រភេទ រួមទាំងឧក្រិដ្ឋកម្មឆ្លងដែន និងឧក្រិដ្ឋកម្មគ្រឿងញៀន។ បន្តសម្របសម្រួលដើម្បីដោះស្រាយឱ្យបានហ្មត់ចត់នូវស្ថានភាពដែលពលរដ្ឋវៀតណាមត្រូវបង្ខំឱ្យធ្វើការដោយខុសច្បាប់នៅតាមអាជីវកម្មសេវាកម្សាន្តក្នុងប្រទេសកម្ពុជា ផ្លាស់ប្តូរវិធានការលើកកំពស់គតិយុត្ត បង្កើតលក្ខខណ្ឌអំណោយផលសម្រាប់ប្រជាជនដើមកំណើតវៀតណាមនៅកម្ពុជាក្នុងការរស់នៅ និងរកស៊ីប្រកបដោយស្ថិរភាព និងភាពងាយស្រួល។ បន្តសម្របសម្រួលយ៉ាងជិតស្និទ្ធក្នុងការគ្រប់គ្រង និងការពារព្រំដែន ជំរុញការខ័ណ្ឌសីមា និងបោះបង្គោលព្រំដែន កសាងព្រំដែនប្រកបដោយសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាពរវាងប្រទេសទាំងពីរ។

អ្នកយកព័ត៌មាន៖ តើលោកអនុរដ្ឋមន្ត្រីវាយតម្លៃអំពីអត្ថន័យ និងសារៈសំខាន់នៃកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំពាក់ព័ន្ធនៅកម្ពុជាយ៉ាងដូចម្តេច? តើកិច្ចពិភាក្សានឹង​ផ្តោតលើបញ្ហាអ្វីខ្លះ រួម​ទាំង​ការរំពឹងទុកអំពី​លទ្ធផលនៃកិច្ចពិភាក្សា​ទាំង​នេះ​យ៉ាងដូចម្តេចដែរ?

លោក Nguyen Minh Vu៖ កិច្ចប្រជុំកំពូលអាស៊ានទាំង​ឡាយ តែងតែមានសារៈសំខាន់ដែរ ប៉ុន្តែខ្ញុំគិតថា កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធលើកនេះ នឹងមានអត្ថន័យពិសេសជាង។

នេះគឺជាកិច្ចប្រជុំទល់មុខគ្នាលើកដំបូងរបស់ប្រមុខរដ្ឋ និងប្រមុខរដ្ឋាភិបាល នៃបណ្តាប្រទេសអាស៊ានជាមួយដៃគូ រួមទាំងមហាអំណាចជាច្រើននៅក្នុង និងក្រៅតំបន់ បន្ទាប់ពីរយៈពេលបីឆ្នាំនៃការរីករាលដាល​ជំងឺរាតត្បាត។ ក្នុងរយៈពេលកន្លងមក បណ្តាប្រទេសអាស៊ានបានជំនះការលំបាក ដែល​បង្ហាញពីភាពរឹងមាំ និងភាពខ្លួនទីពឹងខ្លួនដ៏ខ្លាំងក្លារបស់អាស៊ាន។

ការវិវឌ្ឍន៍ដ៏ស្មុគស្មាញនាពេលថ្មីៗនេះ ទាំងស្ថានភាពសន្តិសុខ និងសេដ្ឋកិច្ចក្នុងតំបន់ និងសកលលោក កំពុងតែត្រូវការមេដឹកនាំអាស៊ាន និងពិភពលោក ពិភាក្សាជាបន្ទាន់ដើម្បីស្វែងរកដំណោះស្រាយដ៏សមស្រប សំដៅស្តារសេដ្ឋកិច្ចឡើងវិញ និងដោះស្រាយបញ្ហាវិបត្តិសន្តិសុខនាពេលបច្ចុប្បន្ន។ នេះជាបញ្ហាប្រឈម ប៉ុន្តែក៏ជាឱកាសសម្រាប់អាស៊ានបន្តបញ្ជាក់ពីតួនាទីមជ្ឈភាពរបស់ខ្លួន ក៏ដូចជាសមត្ថភាពរបស់ខ្លួនក្នុងការរួមចំណែកដ៏សំខាន់ក្នុងកិច្ចខិតខំប្រឹងប្រែងដោះស្រាយបញ្ហារួម។

អ្នកយកព័ត៌មាន៖ តើលោកវាយតម្លៃតួនាទី និងកិត្យានុភាពរបស់វៀតណាមក្នុងអាស៊ានយ៉ាងដូចម្តេច រួម​ទាំង​និងគំនិតផ្តួចផ្តើម និងការរួមចំណែករបស់វៀតណាមក្នុងការកសាងសហគមន៍អាស៊ាន និងរក្សាជំហររបស់អាស៊ាននៅលើឆាកអន្តរជាតិ?

លោក Nguyen Minh Vu៖ ក្រឡេកទៅមើលដំណើរ ២៧ ឆ្នាំនៃការចូលរួម និងចូលជាសមាជិកអាស៊ាន ចាប់តាំងពីឆ្នាំ ១៩៩៥ ដោយឆ្លងកាត់ការឡើងចុះ និងភាពប្រែប្រួលជាច្រើនក្នុងពិភពលោក និងក្នុងតំបន់ យើងអាចនិយាយដោយមោទនភាពថា យើងបានបង្ហាញយ៉ាងច្បាស់នូវទិសស្លោកស្តីពីកិច្ចសហប្រតិបត្តិការយ៉ាងសកម្ម-ទទួលខុសត្រូវ-ច្នៃប្រឌិត-សុខដុមរមនា ក្នុងការចូលរួមអាស៊ាន។ នោះក៏ជាអាថ៌កំបាំងនៃភាពជោគជ័យរបស់វៀតណាមក្នុងអាស៊ាន ហើយទទួលបាន​ការគាំទ្រ និងការគោរពពីបណ្តា​ប្រទេសសមាជិកអាស៊ាន និងដៃគូនានា។

ក្នុងនាមជាអ្នកចូលរួមក្រោយគេ តែវៀតណាមបានជម្រុញយ៉ាងសកម្ម និងរួមចំណែកសំខាន់ក្នុងការបង្កើតសេចក្តីសម្រេចចិត្តសំខាន់ៗរបស់អាស៊ាន រួមទាំងការធ្វើឱ្យអាស៊ានក្លាយជា "ដំបូលរួម" នៃប្រទេសចំនួន ១០ ក្នុងតំបន់ កសាងធម្មនុញ្ញអាស៊ាន ផែនទីបង្ហាញ​ផ្លូវកសាងសហគមន៍អាស៊ាន ចក្ខុវិស័យសហគមន៍អាស៊ាន ឆ្នាំ២០២៥...

វៀតណាមមិនត្រឹមតែជាសមាជិកដែលមានទំនួលខុសត្រូវក្នុងការអនុវត្តយ៉ាងម៉ឺងម៉ាត់នូវការសន្យារបស់ប្លុកប៉ុណ្ណោះទេ ថែមទាំងជាប្រទេសឈានមុខគេមួយក្នុងការជំរុញកិច្ចខិតខំប្រឹងប្រែង និងដំណោះស្រាយដើម្បីបញ្ជាក់ពីការទទួលខុសត្រូវ និងការរួមចំណែករបស់អាស៊ានចំពោះបញ្ហារួមរបស់ពិភពលោក និងតំបន់។ នេះត្រូវបានឆ្លុះបញ្ចាំងយ៉ាងច្បាស់នៅក្នុងលទ្ធផលដ៏ទូលំទូលាយ និងស៊ីជម្រៅនៃឆ្នាំអាស៊ាន ដែលវៀតណាមធ្វើជាប្រធានក្នុងឆ្នាំ ២០១០ និង ២០២០។

ជាមួយនឹងវិធីសាស្រ្តប្រកបដោយតុល្យភាព និងចុះសម្រុងគ្នា វៀតណាមតែងតែត្រូវបានមើលឃើញថាដើរតួនាទីជា “ស្ពាន” ដើម្បីជួយបង្រួមភាពខុសគ្នា និងបង្កើនភាពស្រដៀងគ្នារវាងបណ្តាប្រទេសអាស៊ាន ក៏ដូចជារវាងអាស៊ាន និងដៃគូខាងក្រៅ។ នេះជាប្រពៃណីនៃនយោបាយការបរទេសរបស់វៀតណាម ដូចដែល លោក Nguyen Phu Trong អគ្គលេខាបក្ស បាននិយាយថា “ការទូតដើមឬស្សីរបស់វៀតណាម” ដែលមានលក្ខណៈបត់បែនតាមគោលការណ៍ ប៉ុន្តែថែមទាំងមានអត្ថន័យថែមទៀតក្នុងបរិបទនៃការប្រែប្រួលដ៏ស្មុគស្មាញជាច្រើននាពេលបច្ចុប្បន្ននេះ។ យើងតែងតែរក្សាជំហរប្រកបដោយតុល្យភាព ជំរុញការសន្ទនា និងកិច្ចសហប្រតិបត្តិការ និងដោះស្រាយភាពខុសគ្នា ការខ្វែងគំនិត និងជម្លោះស្របតាមច្បាប់អន្តរជាតិ។

អ្នកយកព័ត៌មាន៖ អរគុណលោកអនុរដ្ឋមន្ត្រី!

យោងតាមកាសែតកងទ័ពប្រជាជន