យុគសម័យ - នាវាពិឃាតចំនួនពីរគ្រឿងនិងនាវាផ្គត់ផ្កង់ភស្តុភាមួយគ្រឿងរបស់រុស្ស៊ី បានចូលចតនៅកំពុងផែខេត្តព្រះសីហានុ ចាប់ផ្តើមដំណើរទស្សនកិច្ចនៅកម្ពុជា រយៈពេល៥ថ្ងៃមុនបន្តដំណើរទៅមុខទៀត។
រូបថតៈ freshnewsasia.com
នៅរសៀលថ្ងៃទី២២ ខែឧសភា ឆ្នាំ២០១៨នេះ នាវាពិឃាតចំនួន២គ្រឿង និងនាវាផ្គត់ផ្គង់ភស្ដុភារមួយគ្រឿងរបស់ប្រទេសរុស្ស៊ី បានចូលចតនៅកំពង់ផែខេត្តព្រះសីហនុ ដើម្បីអនុវត្តដំណើរទស្សនកិច្ចរយៈពេល៥ថ្ងៃនៅកម្ពុជា ចាប់ពីថ្ងៃទី២២ដល់ថ្ងៃ២៦ឧសភា សំដៅបង្កើនទំនាក់ទំនងរវាងកងកម្លាំងជើងទឹកនៃប្រទេសទាំងពីរ។
នាវាទាំង៣គ្រឿងនេះ ផ្ទុកនាវិកទាំងអស់មានចំនួន៨១៩នាក់ដឹកនាំដោយលោកវរនាវីឯក Oleg korolev មេបញ្ជាការកងនាវាចម្បាំងរុស្ស៊ីប្រចាំតំបន់ប៉ាស៊ីហ្វិក។
នាវាទាំងបីនេះរួមមាន នាវាទី១៖ ឈ្មោះ Admiral Vinogradov លេខ៥៧២ ជានាវាពិឃាត មានបណ្តោយ១៦៣ម៉ែត្រ, ទទឹង១៩ម៉ែត្រ, ជម្រៅទឹក៧.៨ម៉ែត្រ, ទម្ងន់ផ្ទុក៧,៩០០តោន មានចំនួននាវិក៣៧៨នាក់។ នាវាទី២៖ ឈ្មោះ Adimral Tribus លេខ៥៦៤ ជានាវាពិឃាត មានបណ្តោយ១៦៣ម៉ែត្រ, ទទឹង១៩ម៉ែត្រ, ជម្រៅទឹក៧.៨ម៉ែត្រ, ទម្ងន់ផ្ទុក៧,៤៨០តោន និងមាននាវិក៣៧៨នាក់ និងនាវាទី៣៖ ឈ្មោះ Pechem Kolpashikov ជានាវាផ្គត់ផ្គង់ភស្តុភារ មានបណ្តោយ១៣០ម៉ែត្រ, ទទឹង២០ម៉ែត្រ និងមាននាវិកចំនួន៦៣នាក់។
ក្នុងរយៈពេលស្នាក់នៅកម្ពុជា ក្រុមនាវិករុស្ស៊ីនឹងជួបសំណេះសំណាលជាមួយអភិបាលខេត្តព្រះសីហានុ បញ្ជាការកំពង់ផែព្រះសីហានុនិងមន្ត្រីជាន់ខ្ពស់ក្រសួងការពារជាតិកម្ពុជា ក៏ដូចជាចូលរួមសកម្មភាពជួបប្រាស្រ័យកីឡាជាមួយកម្លាំងទ័ពជើងទឹកកម្ពុជាផងដែរ៕
រូបថតៈ freshnewsasia.com
រូបថតៈ freshnewsasia.com
(ដោយ ស្រីព្រេជ)
មតិពីមិត្តអ្នកអាន