សម្តេចអគ្គមហាពញាចក្រី ហេង សំរិន កើតនៅថ្ងៃទី២៥ ឧសភា ១៩៣៥ នៅនៅក្នុងភូមិអន្លង់ក្រេះ ឃុំកក់ ស្រុកពញាក្រែក ខេត្តកំពង់ចាម។ សម្តេចមានភរិយាឈ្មោះ សៅ ទី និងមានកូន៤នាក់។ សព្វថ្ងៃជា ប្រធានរដ្ឋសភាជាតិនៃព្រះរាជាណាចក្រកម្ពុជាពីឆ្នាំ ២០០៦ដល់សព្វថ្ងៃ។
 |
អបអរសាទរបុណ្យខួបកំណើតគម្រប់៨៧ឆ្នាំ ឈានចូល៨៨ឆ្នាំរបស់សម្តេច ហេង សំរិន ប្រធានរដ្ឋសភា ។ (រូបថត៖ dap.com.khmer) |
រួបរួមសម្តេច ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា ប្រារព្ធខួបកំណើតគម្រប់៨៧ឆ្នាំ ឈានចូល៨៨ឆ្នាំ នៅថ្ងៃទី២៥ ខែឧសភា ឆ្នាំ២០២១ នេះ។ តាមព្រះរាជសារជូនពរ ព្រះករុណាព្រះមហាក្សត្រ សម្តេចព្រះបរមនាថនរោត្តម សីហមុនី បានចាត់ទុកសម្តេច ហេង សំរិន ជាថ្នាក់ដឹកនាំដ៏ឆ្នើមដែលបានខិតខំអស់ពីកម្លាំងកាយចិត្តបំពេញភារកិច្ចបម្រើជាតិមាតុភូមិ ។
យោងតាមឯកសារស្រាវជ្រាវរបស់ លោក គាំម កុសល និងសាស្ត្រចារ្យ ដៀប សុផល ឥស្សរជនកំពូលរូបនេះ បានសិក្សានៅសាលាពុទ្ធិកបឋមសិក្សា ខេត្តកំពង់ចាមនាអំឡុងឆ្នាំ១៩៥៤ និងធ្លាប់រៀនវគ្គនយោបាយជាន់ខ្ពស់នៅប្រទេសវៀតណាម។
នៅឆ្នាំ១៩៦៩ សម្តេច ហេង សំរិន មានតួនាទីជាប្រធានកងអនុសេនាតូច ចលនាប្រដាប់អាវុធ (ផ្នែក៦) តំបន់២០ ភូមិភាគ បូព៌ា (២០៣) ហើយជាបន្តបន្ទាប់សម្តេចបានក្លាយជាប្រធានរណសិរ្សសាមគ្គីសង្គ្រោះជាតិកម្ពុជានាថ្ងៃទី២ ខែធ្នូ ឆ្នាំ១៩៧៨ និងជាប្រធានក្រុមប្រឹក្សាប្រជាជនបដិវត្តន៍កម្ពុជា ក្នុងឆ្នាំ១៩៧៩ ។
នៅឆ្នាំ១៩៨១ សម្តេចជាអគ្គលេខាធិការមជ្ឈិមបក្សប្រជាជនកម្ពុជានិងជាប្រធានក្រុមប្រឹក្សារដ្ឋនៃសាធារណរដ្ឋប្រជាមានិតកម្ពុជា (ក្រោយមកជារដ្ឋកម្ពុជា) ហើយចាប់ពីឆ្នាំ១៩៩១ សម្តេចជាប្រធានកិត្តិយសគណបក្សប្រជាជនកម្ពុជា។
ពីឆ្នាំ១៩៩៣ ដល់បច្ចុប្បន្ន សម្តេចក្លាយជាអ្នកតំណាងរាស្ត្រ ហើយកាន់កាប់តំណែងជាប្រធានរដ្ឋសភាជាតិចាប់តាំងពីឆ្នាំ២០០៦ មក។ សម្តេចបានទទួលគោរម្យងារជា «សម្ដេចអគ្គមហាពញាចក្រី» ពីព្រះករុណា ព្រះមហាក្សត្រ សម្ដេចព្រះបរមនាថ នរោត្ដម សីហមុនី កាលពីខែតុលា ឆ្នាំ២០០៧ ។
សម្តេច សាយ ឈុំ ប្រធានព្រឹទ្ធសភា បានកត់សម្គាល់ថា សម្តេច ហេង សំរិន សម្រេចបាននូវជោគជ័យដ៏ត្រចះត្រចង់ក្នុងនាមជាអ្នកដឹកនាំស្ថាប័នរដ្ឋសភា ដែលជាស្ថាប័ននីតិប្បញ្ញត្តិជាតិ ដែលធ្វើឲ្យកម្ពុជាក្លាយជាប្រទេសនីតិរដ្ឋ និងមានការអភិវឌ្ឍលើគ្រប់វិស័យ។
សម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានគូសបញ្ជាក់ផងដែរថា វីរភាពដឹកនាំរបស់សម្តេច ហេង សំរិន រួមចំណែកធានាយ៉ាងរឹងមាំនូវសន្តិភាព និងអធិបតេយ្យភាពជាតិនៅគ្រប់កាលៈទេសៈ៕
មតិពីមិត្តអ្នកអាន